Apocalípsis 5
5
Jesucristuta ciëluchö alabayanqan
1Tsëpitanam trönuchö tärëkaqpa allawka kaq makinchö rölluta rikarqä. Tsë rölluqa jananpa y rurinpam qellqarëkarqan. Qanchis sëllukunawanmi kuchunkuna laqarëkarqan.#Isa. 29.11; Eze. 2.9-10; Zac. 5.1. 2Tsëchömi juk puëdiq angelta rikarqä. Pëmi qaparipa qayakur kënö nirqan: <<¿Pillaraq sëllunkunata jorqurir rölluta kicharinman?>>
3Tsënö niptinpis ciëluchö, ni kë patsachö ni patsa rurinchöpis tsë rölluta kicharinanpaq ni qellqarashqanta rikärinanpaq manam pipis karqantsu.
4Tsë rölluta kichananpaq ni leyinanpaq pillapis mana kaptinmi alläpa llakikur waqarqä. 5Tsëmi ishkë chunka chusku (24) anciänukunapita juknin kaq kënö nimarqan: <<Ama waqëtsu. <Judá trïbupita yuriq León>#Gén. 49.9. nishqan nunam Satanásta vencishqa.#Juan 16.33; Apoc. 3.21. Pëmi puëdiq këkan qanchis sëlluta jorqurir rölluta kichananpaq. Pëqa rey Davidpita miraqpitam këkan>>.#Isa. 11.1, 10.
6Tsënö niramaptinnam juk Achkasta#5.6a Apocalipsis libruchö Achkas nishqanqa Jesucristum këkan. Altarchö sacrificiunö kananpaq üshata unë sacerdötikuna wanutsiyashqannömi Jesucristo cruzchö wanur Teyta Diospaq sacrificiu karqan.#Isa. 53.7. rikarqä. Wanutsishqanö karpis trönu nöpanchömi kawëkar shëkarqan. Chusku kawëkaqkunapa chöpinchömi y ishkë chunka chusku (24) anciänukunapa chöpinchömi shëkarqan. Qanchis waqrayuqmi y qanchis nawiyuqmi karqan.#5.6b Qanchis waqrayuq ninanqa alläpa puëdiq ninanmi. Qanchis nawiyuq ninanqa llapanta rikaq y llapanta musyaq ninanmi. Tsë qanchis nawinkunaqa Teyta Dios kë patsaman kachamushqan qanchis espïritukunam kayan.
7Trönuchö tëkaqpa allawka kaq makinpitam rölluta tsë Achkas chaskirirqan. 8Chaskiriptinnam nöpanchö këkaq chusku kawëkaqkuna y tsëchö këkaq ishkë chunka chusku (24) anciänukunapis puntanman lätëkur adorayarqan. Pëkunaqa llapankunam arpankunawan kayarqan. Jina qoripita rurashqa cöpawanmi inciensuta tsararëkäyarqan. Tsë inciensu karqan Teyta Diosman markäkuqkuna mañakuyashqankunam.#Sal. 141.2; Apoc. 8.3.
9Pëkunam mushuq alabanzata qotsurnin Achkasta alabar kënö niyarqan:#Sal. 33.3; 98.1; Isa. 42.10.
<<Qamllam puëdiq kanki tsë rölluta chaskirir kichanëkipaq.
Qammi nunakuna rëkur wanurqunki.
Yawarnikita ramarmi Teyta Diospaq nunakunata rantirqunki.
Tsëmi nunakunata Teyta Dios salvarqun pï casta kayaptinpis, ima idiömata parlayaptinpis, më markachö täräyaptinpis y më nacionpita kayaptinpis.
10Teyta Diosnintsikpa makinchö kayänanpaqmi y sirwiqnin sacerdötikuna kayänanpaqmi churarqunki.#Éxo. 19.6; Apoc. 1.6; 20.6.
Pëkunam patsachö mandakuq kayanqa>>.
11Tsëpitanam rikarqä yupëtapis mana puëdipaq atska angelkuna Achkasta alabëkäyaqta.#Dan. 7.10. Pëkunam trönupa nöpanchö, chusku kawëkaqkunapa nöpanchö y ishkë chunka chusku (24) anciänukunapa nöpanchö alabar 12qaparipa kënö niyarqan:
<<¡Nunakuna rëkur wanutsiyashqan Achkasqa#Juan 1.29; 1Cor. 5.7. llapanpiq mas puëdiqmi!
¡Pëmi llapan kamashqankunapapis duëñun këkan!
¡Pënöqa manam pipis yachaq kantsu!
¡Llapan kawaqkuna pëta imëpis alabëkulläyätsun!>>
13Tsënöllam wiyarqä ciëluchö këkaqkuna, kë patsachö këkaqkuna, patsa rurinchö këkaqkuna, lamar rurinchö këkaqkuna y llapanpis Teyta Dios kamashqankuna alabar kënö nikäyaqta: <<¡Trönuchö tëkaq Teyta Dios y nöpanchö këkaq Achkas imëyaqpis alabashqa këkullätsun!>>
14Tsënö alabayaptinmi Teyta Diospa nöpanchö këkaq chusku kawëkaqkuna <<¡tsënö katsun!>> niyarqan. Tsënöllam ishkë chunka chusku (24) anciänukunapis lätëkur [wiñëpa kawaq] Teyta Diosta adorayarqan.
Currently Selected:
Apocalípsis 5: qwhB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.