Génesis 17

Abraham señalakunqan

1Abram isqun chunka isqun (99) watayuq këkaptinnam Teyta Dios yuripurnin nirqan: <<Noqam kä El-Shaddai.#17.1 El-Shaddai ninanqa llapanpaqpis poderyuq Dios ninanmi. Ninqaqkunata cäsukur jutsannaq kawakunki. 2Qamwan pactuta rurashqäta cumplishaqmi.#Gén. 12.2-3. Tsënöpam mirënikikunata atskaman miratsishaq>>.

3Tsënö niptinnam Abram juklla lätakïkurqan. Teyta Diosnam nirqan: 4<<Pactu rurashqäta cumplirmi churashqëki atska nación nunakunapa tëtan kanëkipaq. 5Kananpitaqa manam Abramnatsu shutiki kanqa, sinöqa Abrahamnam.#17.5 Abraham ninanqa atska nunakunapa tëtan ninanmi. Tsënöqa shutiki kanqa atska nación nunakunapa tëtan kanëkipaq churashqa kaptiqmi.#Rom. 4.17-18. 6Tsëmi qampita mirënikikunata atskaman miratsiptï atska nacionkuna y reykunapis kayanqa.

7<<Kë pactuqa manam qamllapaqtsu kanqa, sinöqa tsurikikunapaq, willkëkikunapaq, willkëkikunapa tsurinkunapaq y pëkunapa mas mirëninkunapaqwanmi. Kë pactutaqa imëpis cumplishaqmi. Qampa Diosniki kanqänömi qampita mirënikikunapapis Diosninkuna kashaq. 8Forastërunö tëkanqëki Canaánchö markakunatam qoykushqëki. Tsënöllam mirënikikunatapis qoykushaq imëyaqpis tsëchö täräyänanpaq.#Hech. 7.5-6. Pëkunapa Diosninmi imëpis kashaq>>.

9-10Tsëpitanam Abrahamta yapë Teyta Dios kënö nirqan: <<Pactu rurashqäta chaskiyänëkipaq qampis y qamwan llapan ollqu kaqkunapis cuerpïkikunachö señalakuyë. Tsënölla señalakuyanqa mirënikikunapis.#Hech. 7.8; Rom. 4.11. 11Señalakurqa compañonnikikunapa puntanpa qarantam roquyänëki. Tsënö señalakurmi pactu rurashqäta chaskiyanki. 12Kananpitaqa ollqu yuriq kaqtaqa puwaq junaqyuqllaraq këkaptin compañonninchö señalayanki. Makikichö yuriqkunatapis y juk nacionpita sirwishuqnikipaq rantinqëki nunakunatapis señalayanki. 13Pactu rurashqäta imëpis yarpäyänëkipaq llapëki mana qonqëta señalakuyanki. 14Mëqanpis mana señalakurqa pactu rurashqäta manakaqmanmi churan. Tsënö kaqtaqa qamkunapita qarqunki>>.

15Jina Teyta Dios Abrahamta nirqam: <<Kananpitaqa warmikipa shutinpis manam Sarainatsu kanqa, sinöqa Saranam.#17.15 Sara ninanqa princesa ninanmi. 16Pëchö tsuriki yurinanpaqmi bendisishaq. Tsëmi warmiki atska nacionkunapa mamannö kanqa. Pëpita miraqpitam reykunapis kayanqa>>.

17Teyta Dios tsënö niptinmi Abraham yapë lätëkur shonqunllachö asikur kënö yarparqan: <<Juk pachak (100) watayuq këkarninqa ¿imanöpam warmïtapis tsurï kananpaq qeshyaqyätsïman? Y Sarapis isqun chunka (90) watayuqna këkar ¿imanöpanam qeshyaqyanman?>>

18Tsëmi Teyta Diosta Abraham nirqan: <<Teyta, mas allim kanqa tsurï Ismaelman bendicionnikita churëkuptiki>>.

19Tsënö niptinnam Teyta Dios nirqan: <<Manam Ismaelpaqtsu nikaq, sinöqa warmiki Sarachö yurinanpaq kaq tsurikipaqmi. Tsë tsurikipa shutinmi kanqa Isaac.#17.19 Isaac ninanqa asin ninanmi. Pactu rurashqäqa Isaacpaq y pëpita miraqkunapaqmi imëpis kanqa. 20Mañakamanqëkinöllam Ismaeltapis mirëninkuna jatun nación tikrayänanpaq bendisïkushaq. Y tsurinkunapis chunka ishkë mandakuqkunam kayanqa.#Gén. 25.12-18. 21Tsënö kaptinpis pactu rurashqäqa Sarachö yuriq tsuriki Isaacpaqmi kanqa. Watan kënö witsanqa Sara wawayuqnam këkanqa>>.

22Abrahamta tsënö nïkurmi Teyta Dios ewkurqan. 23Tsë junaqmi Teyta Dios ninqannölla makinchö këkaq llapan ollqukunata Abraham señalarqan. Tsëmi tsurin Ismaelta, makinchö yuriq nunakunata y sirwiqninpaq rantinqan nunakunatapis señalarqan. 24Tsë señalakunan junaq Abraham këkarqan isqun chunka isqun (99) watayuqmi. 25Tsurin Ismaelnam chunka kima watayuq këkarqan. 26Tsë junaqllam Abraham y tsurin Ismaelpis señalakuyarqan. 27Tsënöllam Abraham señalarqan makinchö yuriq ollqu sirwiqninkunata y rantinqan kaq forastëru nunakunatapis.

Currently Selected:

Génesis 17: qwhB

Highlight

Copy