Génesis 10

Noépa tsurinkunapita miraqkuna

1 Crónicas 1.5-23

1Këchömi qellqarëkan Noépa tsurinkunapaq y pëkunapita miraqkunapaqpis.

Noépa tsurinkunam kayarqan Sem, Cam y Jafet. Diluviupitaran pëkunapa tsurinkuna yuriyarqan.

2Jafetpa tsurinkunam kayarqan Gomer, Magog, Madai, Javán, Tubal, Mesec y Tiras.

3Gomerpa tsurinkunam kayarqan Askenaz, Rifat y Togarma.

4Javánpa tsurinkunam kayarqan Elisa, Tarsis, Quitim y Dodanim. 5Lamar kuchunpa ëwarmi tsë nunakuna nacionkuna kayänanpaq atskaman mirayarqan. Cada nacionchömi kikinkunapa idiömankunata parlayaq.

6Campa tsurinkunam kayarqan Cus, Mizraim, Fut y Canaán.

7Cuspa tsurinkunam kayarqan Seba, Havila, Sabta, Raama y Sabteca. Raamapa tsurinkunam kayarqan Seba y Dedán.

8Nimrodpis Cuspa tsurinmi karqan. Pëmi kë patsachö mas puntata poderninchö nunakunata tsarararqan. 9Nimrodmi Teyta Dios yanapaptin jirka animalkunata alli tsarita yachaq karqan. Tsëmi pipis jirka animalkunata alli tsarita yachaptin niyaq: <<Nimrodnömi jirka animalkunata tsarita yachan>>.

10Nimrod mandanqan jatun markakunam kayarqan Babel, Erec, Acad y Calne. Tsë markakunaqa Sinarchömi kayarqan. 11Tsëpitam Asurman ëwar sharkatsirqan Nínive, Rehobot y Cala markakunata. 12Tsënöllam sharkatsirqan Resén jatun markata. Tsë markaqa karqan Nínivipita Calaman pasaq nänichömi.

13Mizraimpita miraqkunam këkäyan ludeo nunakuna, anameo nunakuna, lehabita nunakuna, naftuhita nunakuna, 14patruseo nunakuna, casluhíta nunakuna y caftorita nunakunapis. Caftorita nunakunapitam filisteo nunakuna mirayarqan.

15Canaánpa wamaqshu tsurinmi karqan Sidón. Y qepa kaq wawqinnam karqan Het. 16Canaánpita miraqkunam këkäyan jebuseo nunakuna, amorreo nunakuna, gergeseo nunakuna, 17heveo nunakuna, araceo nunakuna, sineo nunakuna, 18arvadeo nunakuna, zemareo nunakuna y hamateo nunakunapis. Tsë nunakunaqa cananeo nunakunam kayarqan. Pëkunam atskaman mirar jinantinman witsikäyarqan. 19Tsëmi cananeo nunakunapa mojunninkuna karqan Sidón markapita Gaza nöpanchö këkaq Gerar markayaq. Tsënöllam mojunnin pasarqan Sodoma, Gomorra, Adma y Zeboim markakunapa hasta Lasayaq.

20Pëkunam kayarqan Campa tsurinkunapita miraqkuna. Tsë nunakunam nacionkuna kayänanpaq atskaman mirayarqan. Cada nacionchömi kikinkunapa idiömankunata parlayaq.

21Jafetpa mayor wawqin Sempapis tsurinkuna karqanmi. Semqa Heberpa y Heberpita miraqkunapa unë castanmi karqan. 22Sempa tsurinkunam kayarqan Elam, Asur, Arfaxad, Lud y Aram.

23Arampa tsurinkunam kayarqan Uz, Hul, Geter y Mas.

24Arfaxadpa tsurinmi karqan Sala. Salapa tsurinmi karqan Heber. 25Heberpa tsurinkuna ishkëmi kayarqan. Wamaqshu tsurinpa shutinmi karqan Peleg.#10.25 Peleg ninanqa rakikashqa ninanmi. Tsënöqa shutin karqan pë kawanan witsan nunakuna chikinakur wakpa këpa ewkuyanqanpitam. Qepa kaq tsurinpa shutinnam karqan Joctán.

26Joctánpa tsurinkunam kayarqan Almodad, Selef, Hazar-mavet, Jera, 27Adoram, Uzal, Dicla, 28Obal, Abimael, Seba, 29Ofir, Havila y Jobab. Pëkunam kayarqan Joctánpa tsurinkuna. 30Pëkunam täräyarqan Mesapita Sefaryaq. Sefarqa këkan inti yarqamunan lädupa jirkakuna kashqanchömi.

31Pëkunam kayarqan Sempa tsurinkunapita miraqkuna. Tsë nunakunam nacionkuna kayänanpaq atskaman mirayarqan. Cada nacionchömi kikinkunapa idiömankunata parlayaq.

32Tsënömi karqan Noépa tsurinpita miraqkuna. Diluviupitaran pëkuna mëtsëpapis ëwarnin nacionninkunata rurayarqan.

Currently Selected:

Génesis 10: qwhB

Highlight

Copy