Hechos 6

Mikïta rakikuyänanpaq akrayanqan

1Tsë witsanmi discïpulukuna atskaman mirayarqan. Pëkunachö waktsa pajukuna kayaptinmi waran waran mikïta rakiyaq. Hebreo parlaq pajukunata mas yanapayaptinmi griego parlaqkuna quejakur niyarqan: <<Griego parlaq pajukunata mana cäsurmi Hebreo parlaqkunaqa kikinpuralla mikïta rakinakuyan>> nir.

2Tsënö niyaptinmi llapan discïpulukunata ëllïkur chunka ishkë apostolkuna kënö niyarqan: <<Wawqikuna, manam allitsu kanman noqakunaraq Diospa willakïninta jaqirir pajukunata atiendir kakuyaptï. 3Tsëmi mikïta rakikuyänanpaq qamkunapita qanchis wawqikunata akrayämunki. Pëkuna kayätsun alli rikashqa nunakuna, Espíritu Santupa poderninchö kawaqkuna y alli yarpëyuq nunakuna. 4Tsënöpam noqakunapa tiempükuna kanqa Teyta Diosta mañakuyänäpaq y alli willakïninta willakuyänäpaq>>.

5Tsënö parlarirmi akrayarqan Estebanta, Felipita, Prócoruta, Nicanorta, Timónta, Parmenasta y Antioquía markapita Nicolásta. Estebanqa Teyta Diosman shumaq markäkuq y Espíritu Santupa poderninchö kawakuqmi karqan. Nicolásqa Israel nuna kananpaq unëpitanam cuerpunchö señalakushqa karqan. 6Tsëpitanam tsë akrayashqan wawqikunapa peqankunaman makinkunata churëkur apostolkuna Teyta Diosta mañakuyarqan.

7Tsëmi Teyta Diospa willakïninta willakuyaptin discïpulukuna Jerusalénchö mas atskaman mirayarqan. Tsënöllam tsë willakïta atskaq sacerdötikunapis chaskikur cäsukuyarqan.

Estebanta prësu tsariyanqan

8Nunakunapa nöpanchö milagrukunata y señalkunata#6.8 Señalqa nunakuna käyiyänanpaq milagrum këkan. Señalkunawanmi Teyta Dios käyitsin willakïnin rasunpa kashqanta. rurananpaqmi Estebanta Teyta Dios yanaparqan. 9Pëwanmi Librina niyashqan sinagögachö ëllukäyaq wakin Israel nunakuna liryar qallëkuyarqan. Tsë nunakunam kayarqan Cirene nacionpita, Alejandría markapita, Cilicia provinciapita y Asia provinciapita. 10Espíritu Santupa poderninwan shumaq käyïkur parlaptinmi Estebanta upällätsita puëdiyarqantsu.

11Tsëmi pakëllapa nunakunata pagar yachatsiyarqan Estebanpa contran kënö niyänanpaq: <<Moiséspa y Teyta Diospa contran Esteban parlëkaqtam wiyayarqü>>.

12Tsënö niyaptinmi precisaq Israel nunakuna, ley yachatsikuqkuna y wakin nunakunapis alläpa piñakuyarqan. Tsëmi Estebanta prësu tsarirkur apayarqan Sanedrín juezkuna juntarëkäyashqanman. 13Tsëchömi manakaqta parlar Estebanpa contran kënö niyarqan: <<Kë nunaqa sagrädu templuntsikpa y leynintsikpa contranmi imëpis parlakïkan. 14Tsënöllam nin Nazaretpita Jesús templuntsikta juchutsinanpaq kanqanta y Moisés yachatsishqan costumbrintsikkunata trocananpaq kanqanta>>.

15Tsëchö tëkaq juezkunam Estebanpa qaqllanta rikëkuyarqan imëka angelpa qaqllantanöraq.

Currently Selected:

Hechos 6: qwhB

Highlight

Copy