Apocalipsis 5
5
Comam Meꞌ isbi yeb huneꞌ teꞌ hum
1Wilnihan Comam tzꞌon̈an yul istzꞌon̈obal tuꞌ, ayco huneꞌ teꞌ hum yul iskꞌab, ayayo tzꞌib yul teꞌ yeb yinta teꞌ. Caw chulbilayo teꞌ, ayico hujeb sello yin̈ teꞌ.#Is 29:11; Ez 2:9-10; Zac 5:1 2Wilnihan huneꞌ naj ángel caw aycano yip, iskꞌamben naj yin̈ caw ip:
—¿Mactaxca ay yelapno yoc yinilo issellohal teꞌ hum tiꞌ, cat isholnito teꞌ? ẍi naj. 3Yajaꞌ nitam satcan̈ yeb yul sat yiban̈kꞌinal tiꞌ yeb yalan̈ txꞌo txꞌotxꞌ ilcha hunu mac chu isholnito teꞌ, nitam yilni tzet ayayo yul teꞌ.
4Caw xin chinokꞌan yuto mach ilcha mac ay yelapno yoc ishajni teꞌ, nitam yilni tzet chal teꞌ.
5Yalni huneꞌ naj anciano wetan:
—Mach chachꞌokꞌi, ay huneꞌ mac xakꞌoji, Balam isbi, titna yin̈ naj Judá, titnapaxo yin̈ naj rey David.#Is 11:1, 10 Haꞌ naj chu istzilnilo hujeb sello tuꞌ, cat isholnito teꞌ, ẍi naj wetan.
6Wilnihan huneꞌ mac hacaꞌ meꞌ lin̈ancan̈ yictabal tzꞌon̈obal, yeb yictabal ebnaj can̈wan̈ querubín, yeb xolbal ebnaj anciano. Huneꞌ mac tuꞌ hacaꞌtan̈e xaalaxico yin̈ xahanbalil,#5.6 Is 53:7. hujeb yucꞌaꞌ yeb hujeb isbakꞌsat,#Zac 4:10 haꞌ ton hujwan̈ Yespíritu Comam Dios alaxti yul sat yiban̈kꞌinal tiꞌ. 7Comam Meꞌ isbi, haꞌ inilo teꞌ hum ayco yul iswatxꞌkꞌab Comam tzꞌon̈anayo yul istzꞌon̈obal. 8Hayet yinilo Comam teꞌ, yay jahno ebnaj can̈wan̈ querubín yeb ebnaj veinticuatro anciano sata Comam Meꞌ isbi tuꞌ. Sunil ebnaj ikꞌbil yarpa, yeb isvaso naba oro nohna yu pom. Haꞌ pom tuꞌ yechel istxah anma yetxa Comam yehi.#Sal 141:2
9Yanico ebnaj huneꞌ acꞌ bit, chalni hacaꞌ tiꞌ:
Mamin, hachn̈echꞌan chu hachahni huneꞌ teꞌ hum tiꞌ, cat hatzilnilo issellohal teꞌ, yuto hach tiꞌ cachoc xahanbalil, ismalto hachiqꞌuil, yu halokꞌni anma yeto Comam Dios, tzijxan̈e anmahil, nananta yabxubal, niẍte con̈ob yeb nimeta con̈ob.#Sal 33:3; 98:1; Is 42:10
10Hawanico anma tuꞌ reyalil yeb sacerdotehal yu isyijen tzet chal Comam Dios, cat yoc yahawilo yul sat yiban̈kꞌinal tiꞌ,#Ex 19:6 ẍi ebnaj.
11Lahwi tuꞌ, wilnihan hayebtam millón ebnaj ángel hoyanico yin̈ istzꞌon̈obal Comam yeb yin̈ ebnaj can̈wan̈ querubín yeb ebnaj anciano. Wabenan yul isnukꞌ ebnaj ángel tuꞌ, 12chalni ebnaj yin̈ caw ip hacaꞌ tiꞌ:
Comam Meꞌ isbi, Comam oc xahanbalil, yet ay yallax yin̈ ta Yahawil,#Jn 1:29; 1Co 5:7 ta ay iskꞌalomal, ta ay ishelanil, ta ay yip, ta ay yelapnoj, ta ay ismay yeb yallax tzotiꞌ cꞌul yin̈, ẍi ebnaj.
13Wabenpaxojan yalni tzet watxꞌebil yu Comam Dios yul satcan̈ yeb tzet ay sat txꞌo txꞌotxꞌ yeb yalan̈ txꞌo txꞌotxꞌ, yeb tzet ay xol haꞌ mar, chalni hacaꞌ tiꞌ:
Hallaxojab tzotiꞌ cꞌul yin̈ Comam tzꞌon̈anayo yul istzꞌon̈obal, yeb yin̈ Comam Meꞌ isbi. Hallaxojabi ta caw ay yelapnoj, ta caw ay ismay, ta caw ay yip yin̈ sunilbal tiempo, ẍi.
14Yalnipaxo ebnaj can̈wan̈ querubín:
—Hacojab tuꞌ, ẍi ebnaj. Haxa ebnaj veinticuatro anciano ay jahno ebnaj, yalni ebnaj tzotiꞌ cꞌul yin̈ Comam.
Currently Selected:
Apocalipsis 5: jac
Highlight
Share
Copy
Want to have your highlights saved across all your devices? Sign up or sign in
© 1997, Wycliffe Bible Translators, Inc. All rights reserved.
