Génesis 21

Isaac akinamu

1Yuus Saran anajmatamurin imatiksag umikuiti. 2Sara Abraham untach jasa aig Yuus tina tumasag uchi aishmagkun Abrahamnaun jureruiti. 3Tumamtai Abraham uchirin Isaac anaikauwaiti. 4Tura ocho tsawan ejémtai, Yuus timaun turusag umiak Isaackan kati mushuken tsupirkauwaiti. 5Abraham cien uwín ejé pujai Isaac akinawaiti. 6-7Sara chichaak: “Yuus winaka wishimtikrurai Abrahaman nuwegka uchinka juremaitsuapi tu enentaimtamaitkun, Abrahamsha untach aig uchin juretrajai. Wii uchin jureru asamtai, nitasha shir anenak wijai wishirartatui”, tusa tinaiti.

Abraham Agaran Ismaeljai jiiki awemamu

8Uchi uunmarmatai muntsun utsurkar, Abraham yutain nukap umik jiistamruawaiti. 9Turakai egiptonmaya nuwanam Abrahaman uchiri akinawa nu, Isaackan wishikun Sara wainkauwaiti. 10Tura Abrahaman chicharuk: Nuwa inatainam uchi akinawa nuka wina uchirjai metek amina waríram aina nunaka jumaitsui. Tuma asamtai ju nuwa wii inatai puja juka uchirijai jiikim awemata, tusa tinaiti. 11Tama Abraham nina uchirin enentaimtus senchi wake mesemar nekaprauwaiti. 12Turasha Yuus chicharuk: Amina uchiram tura nuwa amina inatairmesha iturchatka enentaimtutsuk, Sara turama nuke umirkata. Amee weantu ainaka Isaackaiyag artinaiti, tusa tinaiti.

13Tura amina inatairmin uchi akinawa auncha amina uchiram asamtai, nukap napamkatnaitjai, tusa tinaiti. 14Tama Abraham káshikmas nantaki, uchi yuatnurin pankan susa, tura nuap aparmaunam entsan aimruk Agaran aentsak, uchirijai apatak aujas akupkauwaiti. Turam uchirijai aya nugkanmag Beerseba tutainam wuwaiti. 15Tura nui jeaa entsan amuk, uchirinka númi wajamunam ejetanam apujsauwaiti. 16Tura uchiri jan iitan nakitak ikuki menaan ekeemsauwaiti. Tuma ai uchi senchi útu. 17Tuman Yuus anturkauwaiti. Tura nayaimpinmaya shuar nayaimpinam pujusag chicharuk: Agara uchisha ¿urukamtai aitkame? Ashamkaipa, uchi útmaun Yuus anturkayi. 18Uchi inankim jukim itatmamtikata. Nu uchia nuiyan nukap napamkatnaitjai, tusa tinaiti. 19Nuna tusa Yuus nuwan entsa atatmaun iwaintukuiti, nutikam nuap aparmaun juki weri aimak itan Ismaelan aaruiti. 20-21Yuus yayámu asa, uchika tsakar Parán nugkanam aya nugkanmag pujusuiti. Nigka shigki apunkamun ekentan yacha ajakuiti. Nui pujaun nina nukuri egiptonmaya nuwan eatak nuwemtikawaiti.

Abraham Abimelecjai chichaman umikaru

22Nu uwítin Abimelec suntara apuri Ficoljai, Abrahaman jeari chicharuk: Ame takámun Yuus yainma nuka isha nekaji. 23Tuma asamtai yamai winasha Yuusan naari pachisam, wina uchir ainasha, wii weantu ainasha, tura ame yamai pujam nuiya shuar ainasha, ¿wii amina wait anentramiajam nutiksamkek wait anentrattam? tusa tinaiti. 24Tama Abraham ayak: Yuusa naarin pachisan tajame. 25Ame turutam nunaka imatiksanak umiktin asamtai, amina inatairam aina yumirmatain akinkaru aina nu awagturkita, tusa Abimeleckan tinaiti.

26Tama Abimelec ayak: Yáki yumirmatnasha najanaya nunaka nekatsjai. Tura ameksha nu pachismeka ujatkachuitme, tusa tinaiti. 27Tutai Abraham oveja ainan, vaca ainajai juki Abimeleckan susauwaiti, tura chichaman umikaruiti. 28Nuna tura Abraham siete ovejan akankauwaiti. 29Turamtai Abimelec iniak: ¿Jusha iturkatna siete ovejasha akankaume? tusa tinaiti. 30Tama Abraham ayak: Wii ovejan amaj junaka yumirmatnaka wii tainaitjai tusan jutikajai, tusa tinaiti. 31Tura nu nugkanam Yuusa naarin pachisar chichaman umikaru asar, juka Beerseba atii tiaruiti. 32Tusar Abimelec nina suntaari apuri Ficoljai, filisteo ainan nugkeen waketkiaruiti. 33Tumawarmatai Abraham Beersebanam númi tamarisco tutain arawaiti, tura nui apu Yuusan emematnaiti. 34Tura Abraham filisteo ainan nugkeen nukap uwí pujusuiti.

Currently Selected:

Génesis 21: hubDBL

Highlight

Copy