Génesis 19

Yuus yaakat Sodoman Gomorrajai ekeemakmau

1Etsa akaikin ai Lot yaakat Sodomanam eketu nayaimpinmaya shuar jimar winaun wainak tikishmatar tsuntsumaa 2chicharuk: Wina Apur ainata wii atumin umirnun pujau asamtai, wait aneasrum wina jearuin taatarma. Tumawakrumin entsan shikika itaamtai nawem nijakrum kanarum kashin káshikmasrum wetaarma, tusa tinaiti. Tama nita aimainak: Atsaa ika aa kanartatji, tusar tuina.

3Tuinakaisha Lot wina jearuin kanartarma tusa imatram ayu, tusar Lottan jeen wearuiti. Tumawarmatai Lot yutain umik, tura pannasha levadurajai pachimtsuk inarkamtai yuawaruiti. 4Tumawar eke kanuinatsaig Sodomanmaya shuar ainaka natsa, tura untach ainajaimak Lottan jen tenteawaruiti. 5Tumawar Lottan untsuinak: ¿Ju káshia jui jimar shuar amina jeemin taawara nusha tui pujuinawa? Nu jiikiarta takastasar wakeruinaji, tusar tuina. 6Tuinakai Lot nitajai chichastasa jiniak waitin shir epeni wajas, 7nitan chicharuk: Wina yatsur ainata, wait aneasrum shir pegkerchauka takasairpa. 8Antsu wina nawantur shuar takashtai jimar puja nuna mai jiirkitjarme, nutikamtai atum uruk wakerarmea nu umiktarma. Turasha ju shuar ainaka wina irartuinak taawarai, tusa tinaiti.

9Takai nita chichainak: ¡Menaasta!, ameka chikich nugkanmaya shuaraitiatam, ina apuri najanarmeka juka aitkawairpa tukartumaitsume. Nu shuar aina pegkerchau takanmain ame pegkerchau takantsattame, tusar Lottan jen waitirinka yumpunmain amajaina. 10Imatruinakai nayaimpinmaya shuar jeanam jimar egketu, Lottan achik awayak waitin epennaiti. 11Nutika shuar natsa aina, tura untach ainajai aa irununka wainmachu amajsaruiti. Turamu asar waitin ea yujaina. 12Tura nayaimpinmaya shuar aina Lottan chicharainak: ¿Amina pataim ainasha ju yaaktanam pujuinawak? Amina uchiram aina, nawantrum aina, awem aina, tura amina wari arutrama nuka ashi jukim yaakat ikukim yaja wetá. 13Ju yaaktanmaya shuar aina tunaun shir senchi takainamun Yuus nekau asa, yaakat emesratarma tusa Yuus akuptamkau asamtai, emesrattaji tusar tuina.

14Tuinakai nina awe artin pujuinan chicharuk: Ju yaaktanka Yuus emesrattawai, turatin asamtai wári jinkitarma tusa tinaiti. Takaisha antrantsuk tu wekatai tuina asar umirkacharuiti. 15Yama tsawa ai nayaimpinmaya shuar aina Lottan chicharainak: Ju yaaktan emeseakai jakaij takumka amina nuwem, tura amina nawantrum jimar arutrama nujai jukim, wári wetá tusar tiaruiti. 16Tamaitiat wári weachkai Yuus uwemtikrattsa wakera asamtai, nayaimpinmaya shuar aina, Lottan nina nuwejai, tura nawantri ainajaimak achikar jiikiaruiti. 17Turawar chicharuk: Uweemrattsam wakerakmeka ukurmeka iitsuk muranmani tsekegta, tusa tinaiti. 18Tuinakai Lot ayak: Wina apur ainata wait aneasrum tsagkurturtarma nunaka tumashtatjai. 19Wii atumin umirin asamtai jakai tusarum wait anentrakrum uwemtikruru asaakrumin muragka tsekegchattajai, nunii wekai ju yaakat keamu amaintuk winasha mantuawai tajai. 20Yaakat shikapach a ai we uwemrati tusarum akuptuktarma, tusa tinaiti.

21-22Takai ayak: Ame turutu asaakmin nu yaaktanka emesrashtatjai, tusa tinaiti. Tuma asamtai nu yaaktan naarinka Sóar anaikauwaiti. 23Etsa yama jinai Lot yaakat Sóarnum jeawaiti. 24Nunikmatai yaakat Sodomanam, tura Gomorranam, nayaimpinmayan azufre tutain jiya numamtinjai pachimar Yuus yutumtikauwaiti. 25Nutika yaaktanam shuar matsatunka, tura árak ainajaimak ashi ijinawaiti. 26Antsu Lottan nuwegka weayat ukurin ayanma iikma wea numamtin najaanaruiti. 27Tuma ai Abraham káshikmas nantaki, ni Yuusjai chichaaku wajasmaunam wuwaiti. 28Tuma nui jeaa wajas Sodoman Gomorrajai mura shikapach ainaka yaaktajai ashi ekeemakmau asa, senchi mukuintaun wainkauwaiti.

29Lot pujamu nugkanam yaakat irunun Yuus tu emeskauwaiti. Turasha Lotnaka Abraham weantu asamtai Yuus uwemtikrauwaiti. 30Lot Sóarnum pujutan ashama asa, nawantrin mai juki jinki mura irunmaunam wa amaunam pujusuiti. 31Lottan nawantri nina kain ekeun chicharuk: Ina aparigka uuntach jasai, tura ina nuattramainka juigka atsawai. 32Tuma asamtai ina apari vino anamkar, ina aparijai takaniasar uchirmakmi, tusar tiaruiti. 33Tuina asar aparin vinon susar anamkar aepas, nawantri emkau aparijai takaniasuiti. Turasha nina aparigka nekamachuiti. 34Kashin tsawak nina kain ekeun chicharuk: Yamaisha ina apari anamkami, turamtai ame nijai takaniasta. Tumar nina uchiri mai jurermi, tusa tinaiti.

35Tuina asar aparin ataksha vinon susar anamkar aepas, nawantri ekeu aparijai takaniasuiti. Turasha nigka nawantrijai takaniamunka, tura nantaki weankesha nekaprachuiti. 36Lottan nawantri nita aparinun mai ajaprukaruiti. 37Tura emkau uchi aishmagkun jurer, Moab anaikauwaiti. Moabka yamaikisha moabita ainan apariyaiti. 38Tura ekeusha uchi aishmagkun jurer Ben-ami anaikauwaiti. Ben-amika yamaikisha amonita ainan apariyaiti.

Currently Selected:

Génesis 19: hubDBL

Highlight

Copy