San Marcos 4
4
Ejemplo de se tlakatl tlatookak
(Mt. 13:1-9; Lc. 8:4-8)
1Jesús oksemi opéj tlamachtia inakastlan lago de Galilea. Sa tekitl miekej tlakaj omololojkej inawak, iwan okachi kuale otlejkok itech se barko katlej oyeka tlatentle ijtik atl iwan ompa ipan omotlalij. In tlakaj oyekaj itempan atl. 2Okinmachtij de miek tlamantle iwan okintlapowij ika ejemplos para ma kimomakakan kuenta. Okinmilwij:
3―¡Xikkakikan kuale tlan namechilwis! Se tlakatl okiske otookato. 4Nijkuak otookatoka, sekin semiya owetzke ipan ojtle. In totomej owalajkej iwan okikuajkej in semiya. 5Oksekin owetzke ijtik teyoj, okiske totoka porke mach okipiaya miek tlale. 6Pero nijkuak chikawak otonak, okichichinoj porke mach okipiaya wejkatlan inelwayo. 7Oksekin owetzke itzalko in bierojxiwitl, omoskaltij okachi miek yon xiwitl, iwan tlatoktle mach semi omoskaltij porke oxiwmikke iwan mach otlakke. 8Oksekin owetzke kan kuale tlale, okiske iwan otlakke miek. Sekin semiya okitemakak senpoale iwan majtlaktle itliolo san de se semiya, iwan oksekin okitemakak eyinpoale itliolo iwan oksekin asta se siento itliolo.
9Iwan okinmilwij:
―Tla ankinekij ankimomakaskej kuenta, xikkakikan.
Jesús okitlajtlanijkej tlanik tlamachtia ika ejemplos
(Mt. 13:10-17; Lc. 8:9-10)
10Nijkuak omokaj sa yen Jesús, in majtlaktle iwan omen iwan kanaj keskimej oksekimej, ijkuakón okitlajtlanijkej in Jesús tlan kijtosneki in ejemplo de yen tlatookak. 11Yej okinmilwij:
―Namejwan Dios yoamechkawilij xikmatikan tlan oyeka tlatitok de kenik in Dios tlanawatia. Oksekimej katlej mach ya kimatij, se kinmatiltia ika ejemplos. 12Para ijkón, maski ma kitakan, mach ma kimomakakan kuenta tlan kitaj. Iwan maski ma kikakikan, mach ma kimatikan tlanon kijtosneki tlan kikakij. Iwan ijkón yejwan mach moyolkuepaskej, iwan Dios mach kintlapojpolwis de intlajtlakol.
Jesús okintomilij in ejemplo de yen tlatookak
(Mt. 13:18-23; Lc. 8:11-15)
13Jesús okinmilwij:
―Tla amo ankimomakaj kuenta yin ejemplo, tonses ¿kenik welis ankimomakaskej kuenta de yen oksekimej ejemplos? 14Tlan omotookak yon kej yeskia yen itlajtol in Dios. 15In semiya katlej owetzke ipan ojtle yon kej yeskia yejwan katlej kikakij in tlajtole, pero san niman ejko in Satanás iwan kikixtia in tlajtole katlej omotookak ipan inyolo. 16In semiya katlej owetzke ijtik teyoj, yon ken se tlakatl katlej kiresibiroa itlajtol in toTajtzin Dios ika pakilistle nijkuak kikaki. 17Pero mach wejkatlan monelwayotia iwan san niman nelwayowaki ipan iyolo. Pewa trabajojpanoa iwan pewa kitlatlalochtiaj por yen itlajtol in toTajtzin Dios, walmosotlawa iwan kikawa in Dios. 18In semiya katlej owetzke itzalko in bierojxiwitl, yon ken sekimej katlej kikakij in tlajtole, 19pero sa tekitl tlanemiliaj itech tlamantin de yin nemilistle, kawiliaj ma moskalti in bierojxiwitl ipan inyolo. Kinekij kipiaskej miek tomin iwan kinekij kipiaskej miek tlamantle, yon ken bierojxiwitl katlej mach kikawilia ma tlaki in tlatoktle de yen itlajtol in Dios ipan inyolo. 20In semiya katlej omotookak kan kuale tlale, yon ken tlakaj katlej melawak kikakij itlajtol in Dios iwan kiresibiroaj ipan inyolo. Yonmej tlakaj katej ken semiya katlej kitemakaj senpoale iwan majtlaktle intliolo san de se semiya, iwan sekimej kitemakaj eyinpoale intliolo, iwan sekimej kitemakaj asta se siento intliolo.
Ejemplo de se tlanextle
(Lc. 8:16-18)
21Jesús okinmilwij:
―Mach akaj kitlalia se tlanextle itlampa se chikiwitl o noso itlampa se tlapechtle. Sino motlalia ajkopan para ma tlawi. 22Nochi katlej amo momati kipia por momatis, iwan nochi katlej kajki tlatitok kipia por nesis. 23Tla ankinekij ankimomakaskej kuenta, xikkakikan.
24Jesús okinmilwij:
―Moneki kuale xikkakikan tlan ankikakij. Ijkón ken tlan namejwan ankitemakaskej, Dios no ijkón amechmakas iwan amechmakas asta okachi. 25Porke akin kinekis moskaltis okachi itech itlajtol in Dios, moskaltis okachi. Iwan katlej amo kinekis, kipolos asta tlan ya kimati.
Ejemplo de se semiya katlej moskaltia wejkapan
26Jesús okijtoj:
―Namechilwis se ejemplo para xikmatikan kenik in Dios tlanawatia: se tlakatl otlatookak itlalaj. 27Tla kochis nochi yuale iwan tla mewas o noso amo mewas nochi kualkan, in tlatoktle moskaltijtiw, pero yej mach kimati kenik moskaltia, 28inewian in tlale kitlakiltia in tlatoktle, achtoj kisa iwan moxiwyotia iwan satepan miawati, xiloti iwan motliolotia. 29Iwan nijkuak walchikawa, in tlakatl kipixka porke yokualtik.
Ejemplo de iyolo in mostaza katlej okachi tzikitzin ke iyolo in miltomatl
(Mt. 13:31-32, 34-35; Lc. 13:18-19)
30Satepan Jesús okinmilwij:
―¿Tlan ika welis tikparejaroskej para xikmomakakan kuenta kenik in Dios tlanawatia? O noso, ¿tlan ejemplo welis namechilwis para okachi xikmomakakan kuenta? 31Yon ken iyolo mostaza, katlej okachi tzikitzin de miek oksekin semiya. 32Pero nijkuak se kitooka, kisa iwan moskaltia okachi weyi de nochi namotlatok. Momamayotia iwan totomej asta itech motepajsoltiaj.
33Jesús okintlapowij ika miek ejemplos asta kan okimomakayaj kuenta in tlakaj. 34Pero nijkuak oyeka san Yej iwan imomachtijkawan, okinyekilwiaya para ma kimomakakan kuenta.
Jesús okiketzaltij in ejekatl iwan atl
(Mt. 8:23-27; Lc. 8:22-25)
35Itech yon tonale nijkuak otleyuak, Jesús okinmilwij imomachtijkawan:
―Ma tipanokan oksé lado.
36Tonses, imomachtijkawan okinkajtejkej in tlakaj katlej ompa inwan oyekaj iwan okiwikakej in Jesús itech se barko katlej itech yoyeka. Oksekimej barkojtin noijki no oyajkej. 37Satepan owalaj se ejekatl chikawak iwan atl opéj motlamotla ipan barko iwan opéj atemi. 38Jesús okochtoka tlakuitlapan ipan se ikpale. Iwan okijxitijkej okilwijkej:
―¡Tlamachtij! ¿Amo tikmomaka kuenta nik tiapolakij?
39Yej owalmej iwan okajwak in ejekatl iwan okilwij in atl:
―¡Ximoketza! ¡San xieto!
San niman in ejekatl omoketzke iwan atl sa omokaj. 40Jesús okinmilwij imomachtijkawan:
―¿Tlanik wel anmomawtiaj? ¿Ayamo antlaneltokaj inawak Dios?
41Yejwan sa tekitl omomawtijkej iwan okimolwijkej entre yejwan:
―¿Akin Yin tlakatl, porke asta yen ejekatl iwan atl kitlakitaj?
Currently Selected:
San Marcos 4: nhy
Highlight
Share
Copy
Want to have your highlights saved across all your devices? Sign up or sign in
© 2006, Wycliffe Bible Translators, Inc. All rights reserved.
