Salmos 79
79
1Maˉyaˉnääꜗ dsaˉ hi̱ˉ cha̱a̱ˉ ʉ̱ʉ̱ꜘ taꜙ hwaꜗ kyahꜗ hneˉ Dio kya̱a̱nꜙ.
Mahꜗ gaꜙjmeeyꜘ läꜙ hyohˉ dsëyꜗ nehꜙ gwahꜙ naˉjngɨɨˈ kyahꜗ.
Gaꜙdsaꜗ gaꜙsaˊ gaꜙhe̱e̱yꜗ Jerusalén.
2Gaꜙkwëëyhꜗ gaꜙkuhˉ ta̱ˈ hi̱ˉ hë̱ë̱ꜙ gyʉʉhˈ
ngoꜗ kihꜗ hi̱ˉ jmeeꜙ taˊheꜗ kyahꜗ.
Läꜙja̱ˉ ngoꜗ kihꜗ hi̱ˉ naˉjngëëˈ kya̱a̱hꜗ,
gaꜙkuhˉ jahꜘ hi̱ˉ cha̱a̱ˉ nehꜙ nuuꜙ.
3Läꜙko̱hꜘ tʉ̱ʉ̱y˜ jmɨɨˉ gaꜙtʉ̱ʉ̱yꜗ jmaˉ kihꜗ dsaˉ kya̱a̱hꜗ läꜙ gaꜙdsaꜗ Jerusalén.
Niꜙ ja̱a̱ˉ saꜙ gaꜙjä̱ꜘ maˊ ha̱a̱ˈ hi̱ˉ naˉju̱u̱ˊ heꜘ.
4Dsaˉ hi̱ˉ tä̱ä̱hˊ läꜙka̱a̱ˉ kooꜘ kya̱a̱ꜗ jnäähꜗ,
ngɨɨ˜ bihꜗ jë̱ë̱y˜ jnäähˈ,
hlëëyhꜙ wɨɨꜘ hiꜙ miˉkwa̱yhꜗ jnäähˈ.
5Hneˉ DSAˉJØ̱Ø̱Hˈ kya̱a̱nꜙ, ¿haˉ ji̱i̱hˈ lloo˜ heˉ lle̱e̱hꜘ?
¿Cheˊ läꜙ maˉlle̱e̱hꜘ naˉ baˊ tä̱ä̱ꜘ kya̱a̱hˊ jnäähˈ
läꜙji̱i̱hˈ moꜙsoꜙ läˉchaˉ oˉjø̱hꜙ dsëˉ kya̱a̱ꜗ jnäähˈ?
6Che̱e̱ꜙ heˉ yaˉjë̱ë̱ˈ hohꜘ nëˊ kihˈ dsaˉ hi̱ˉ saꜙ kyu̱u̱ꜙ hneˉ.
Läꜙja̱ˉ che̱e̱ꜙ nëˊ kihˈ hi̱ˉ jmeeꜙ hihꜙ jmɨˉgyʉʉꜙ laˉ
hi̱ˉ saꜙ kye̱ˉ oˉjø̱hꜙ dsëˉ kyahꜗ.
7Jëëhꜘ dsaˉ heꜘ gaꜙsa̱a̱yhꜗ jnäähˈ hi̱ˉ la̱a̱ꜗ saˊju̱ˉ kya̱a̱ꜗ Jacob.
Hiꜙ jeeˊ jwɨɨˉ jeeˊ maˊ tøøhˊ jnäähˈ
gaꜙdsaꜗ gaꜙsaˊ gaꜙhe̱e̱yꜗ.
8Taꜙ jmeehˋ jnäähˈ kwa̱a̱t˜ kihꜗ dsoˊkyeˉ
heˉ gaꜙjmeeꜘ dsaˉ maˉgyu̱hˉ kya̱a̱ꜗ jnäähˈ.
Waˊ jäˉ cha̱hꜘ heˉ läˉñihꜘ hohꜘ baˊ,
jëëhꜘ moꜙsoꜙ ñeˊ jnäähˈ heeˉ jmeeˊ jnäähꜗ.
9Hneˉ Dio hi̱ˉ lä̱ä̱˜ dsaˉ, kwaˊ beꜘ kya̱a̱ꜗ jnäähˈ,
mahꜗ läꜙjnäꜘ haˉ ko̱hꜘ jø̱ø̱hˈ saꜙ la̱a̱hꜗ.
Lä̱ä̱ˋ jnäähˈ mahꜗ ki̱i̱ˈ hohꜘ kihꜗ dsoˊkyeˉ kya̱a̱ꜗ jnäähˈ,
kihꜗ heˉ lluꜗ hohꜘ.
10¿Heˉlaˈ kwahˉ jwëꜗ kihꜗ dsaꜙ heˉ jäyhꜙ kya̱a̱ꜗ jnäähˈ:
“Saꜙ cha̱a̱ˉ Dio cha̱a̱ˉ kyahꜗ hnähꜘ”?
Toꜙloꜙnëˊ jnäähꜗ te̱e̱hˋ jwɨɨ˜ kihꜗ hi̱ˉ gaꜙjngëëhꜗ dsaˉ kya̱a̱hꜗ
mahꜗ waˊ läˉñeˉ läꜙjë̱ë̱ꜙ dsaˉ,
ja̱ˉbaˊ läꜙja̱ˉ leꜘ kihꜗ läꜙjë̱ë̱ꜙ kaˉlähꜘ.
11Jmeeˊ heꜗ kihꜗ läꜙjë̱ë̱ꜙ hi̱ˉ tä̱ä̱hˊ kɨˉhooh˜ nehꜙñeˈ.
Kihꜗ heˉ chaˉ chaˉmiihˉ beꜘ kyahꜗ,
lä̱ä̱ˋ hi̱ˉ maˉnaˉbä̱ä̱hˋ ju̱u̱ꜘ.
12Hneˉ DSAˉJØ̱Ø̱Hˈ kya̱a̱nꜙ, gyiiꜗ ji̱i̱h˜ ko̱ˉnaˉ te̱e̱hˋ jwɨɨ˜ kihꜗ hi̱ˉ tä̱ä̱hˊ kooꜘ kya̱a̱ꜗ jnäähˈ,
kihꜗ läꜙjëꜙ wɨɨꜘ heˉ maˉhlëëyhꜘ kyahꜗ.
13Hiꜙ jnäähˈ hi̱ˉ la̱a̱ꜗ dsaˉ kya̱a̱hꜗ,
hi̱ˉ la̱a̱ꜗ läꜙko̱hꜘ borrego hi̱ˉ tä̱ä̱hˊ nehꜙ jnëˈ kyahꜗ,
kwaˊ jnäähˈ tiˊhmaahˊ kyahˈ
hiꜙ häˊ jnäähˈ kyahꜗ läꜙjëꜙ johꜘ jmɨɨˊ chaˉ.
Currently Selected:
Salmos 79: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
