Salmos 73
73
Libro Tres
(Salmos 73-89)
1Dsooꜘ baˊ, jnaahˈ jmeeꜙ Dio kya̱a̱ꜗ jnäähˈ dsaˉ Israel,
pero maꜙlaꜙ kya̱a̱hˊ hi̱ˉ naˉjngɨɨˈ tuhˉdsëꜗ baˊ.
2Pero jnäꜘ, miihˉ gaˊ saꜙ gaꜙtë̱hnꜗ mahꜗ maˊ tä̱hnꜙ hwaꜗ.
Läꜙko̱o̱ˉ heˉ dsaˉchu̱u̱n˜ baˊ maˊ leꜘ kinꜙ kya̱a̱hˊ hʉʉˊdsëˉ heˉ maˊ jmeenꜙ.
3Jëëhꜘ gaꜙläꜙhøøhnˋ kihˈ hi̱ˉ jmää˜ hñiiꜘ ka̱a̱hˊ,
läꜙko̱o̱ˉ maˊ jëën˜ gaꜙnääꜗ baˊ lluˈ hi̱ˉ hñaaˉ dsëꜗ.
4Saꜙ chaˉ hʉʉˊdsëˉ kye̱yˉ cheˊ ju̱u̱yꜘ,
kihꜗ heˉ nøøꜘ lluꜗ dsëyꜗ.
5Saꜙ kyʉʉyh˜ heˉ dsaˉngëëyꜘ heˉ wɨɨꜘ,
niꜙ saꜙ jëëy˜ wɨɨꜘ läꜙko̱o̱ˉ jëë˜ hi̱ˉ jñahꜘ.
6Jnäꜘhäꜘ jmääy˜ hñiiꜘ ka̱a̱hˊ.
Heˉ ja̱ˉ laꜗ läꜙko̱hꜘ mɨɨˈ heˉ häˊ luuyˊ heˉ jihˈgye̱hꜗ.
Ʉ̱ʉ̱ꜘ le̱e̱y˜ heˉ jmeeyhꜙ dsaˉ,
heˉ ja̱ˉ laꜗ läꜙko̱hꜘ hmɨɨhˉ heˉ kë̱yhˉ.
7Laꜗ kiyhꜗ läꜙko̱o̱ˉ heˉ maˉhwëëˉ mɨˈnëyˊ taꜙ kaˊhneꜚ heˉ maˉläˉchayˉ chaˉmiihˉ kuuˊ.
Gaꜙngëëꜘ jwë̱ë̱ˈ he̱e̱ꜘ dsëyꜗ heˉ hlɨɨhˈ.
8Miˉkwa̱yhꜗ kihꜗ Dio mahꜗ hlëëyhꜙ hlɨɨhˈ kihꜗ dsaꜙ.
Jmääy˜ hñiiyꜘ ka̱a̱hˊ mahꜗ hɨɨyˉ juuˈ heˉ jmeeyhꜙ dsaˉ.
9Hlëëyhꜙ läꜙko̱o̱ˉ heˉ la̱a̱yꜗ jʉʉˊ gyʉʉhˈ jmɨˉgyʉʉꜙ.
Läꜙja̱ˉ hlëëyhꜙ kihꜗ läꜙka̱a̱ˉ hwaꜗ kaˉlähꜘ.
10Heˉja̱ˉ dsaˉ hi̱ˉ la̱a̱ꜗ kya̱a̱ꜗ Dio ka̱˜ nëˊ kiyhˈ,
jëëhꜘ la̱a̱yꜘ läˉchayˉ chaˉmiihˉ kuuˊ läꜙko̱o̱ˉ chaˉ dsaˉ heꜘ.
11Heˉja̱ˉ jäyhꜘ:
“Saꜙ läˉñeˉ Dio heˉ laˉ, saꜙ ka̱˜ kwa̱a̱t˜ hi̱ˉ gyaꜗ gyʉʉhˈ.”
12Jëëˋ daˊ haˉ läꜙ tä̱ä̱hˊ hi̱ˉ hñaaˉ dsëꜗ laˉ.
Niꜙ miihˉ saꜙ kye̱yˉ hʉʉˊdsëˉ haˉ läꜙ leꜘ kiyhꜗ.
Hnøøꜗ gyihꜗ heˉ ngooꜗ gaꜙllaꜙmahꜗ kuuˊ kiyhˈ.
13Niꜙ miihˉ saꜙ jmääꜗ kinꜙ heˉ naˉjngɨɨˈ tuhˉdsënꜙ.
Niꜙ saꜙ jmääꜗ kinꜙ heˉ saꜙ chaˉ heˉ naˉbä̱ä̱hnˋ.
14Läꜙta̱a̱ˈ jmɨɨˉ baˊ jëën˜ wɨɨꜘ.
Saꜙ chaˉ ko̱o̱ˉ jmɨɨˊ heˉ saꜙ jëënꜚ wɨɨꜘ.
15Waˊraˉ jähꜘ kihꜗ gaꜙhlëëhnˋ läꜙko̱o̱ˉ jähꜘ dsaˉ heꜘ,
gaꜙmiꜙga̱a̱nˈ dsaˉ kya̱a̱hꜗ jeeˊ naˉhmääˊ.
16Maˊ hnoonˈ maˊ läꜙngëënꜘ haˉ läꜙ laꜗ kihꜗ hi̱ˉ hñaaˉ dsëꜗ,
pero saꜙ hii˜ läꜙngëënꜘ.
17Pero läꜙ maˊ gaꜙhenꜗ gwahꜙ naˉjngɨɨˈ kihꜗ Dio,
ja̱ˉgaˊ gaꜙläꜙmanꜙ haˉ taꜙ dsaˉnääyꜗ gaˊ maˉju̱u̱yꜙ.
18Dsooꜘ baˊ maˉche̱e̱hꜙ hnihꜘ ko̱o̱ˉ jeeˊ dsaˉchu̱u̱y˜,
mahꜗ dsaˉchu̱u̱y˜ läꜙ gaꜙtëꜘ chaˊjeˉ.
19Kya̱a̱hˊ ko̱ˉhwëëꜘ baˊ he̱e̱yꜘ goˉte˜.
Hiꜙ kya̱a̱hˊ heˉ naˉhñeeyhˈ baˊ ju̱u̱yꜘ.
20Läꜙcha̱hꜘ waˊraˉ gaꜙñeꜗ jneˊ,
dsaˉgaaꜘ dsëˉ jneˊ heˉ maˉkënˊ.
Läꜙja̱ˉ jmeehˈ kiyhꜗ
waˊraˉ gaꜙtëꜘ jeeˊ llahꜗ taˊ Dsaˉjø̱ø̱hˈ kya̱a̱nꜙ.
Ko̱o̱ˉ täꜘbeꜘ baˊ jmäähˈ hnihꜘ taꜙ kooꜘ,
miˉkwa̱hꜚ kihꜗ hi̱ˉ liiꜘ jneˊ cha̱a̱ˉ lluꜗ.
21Jä̱ä̱ꜗ ja̱ˉgaˊ läꜙngëënꜘ haˉ läꜙ leꜘ kiyhꜗ hi̱ˉ hñaaˉ dsëꜗ heꜘ,
maˊ gyanˊ tiˉmeehˉ dsënꜙ.
Peerꜙ maˊ kuhˊ maˊ ji̱i̱ꜙ tuhˉdsënꜙ.
22Maˊ la̱a̱nˈ ja̱a̱ˉ hi̱ˉ tooˉ hi̱ˉ saꜙ ngëëꜘ.
Läꜙko̱hꜘ jahꜘnuuˉ baˊ maˊ la̱a̱nˈ chaˊnëhˊ.
23Miihˉ gaˊ saꜙ gaꜙjehꜗ dsënꜙ.
Pero maꜙraꜙ heˉ ngëꜙ baˊ jnäꜘ kya̱a̱hˊ hneˉ.
Maˉjä̱ä̱hꜙ jnäꜘ kya̱a̱hˊ goohˉ raˉllu̱u̱ꜗ.
24Maˉjä̱ä̱hꜙ jnäꜘ kya̱a̱hˊ nʉʉhꜚ kyahˈ,
läꜙji̱i̱hˈ lloo˜ ko̱o̱ˉ jmɨɨˊ tëëhˊ jnäꜘ yaꜙjwɨɨꜗ kyahꜗ.
25Hi̱i̱ˉ gaˊ naˉ cha̱a̱ˉ kinꜙ gyʉʉhˈ, ja̱a̱ˉ hneˉ baˊ cha̱a̱hˉ.
Läꜙja̱ˉ nëˊ hwaˈ laˉ saꜙ cha̱a̱ˉ gaˊ jñahꜘ hi̱ˉ hnaahnꜚ.
26Jmɨˉngoꜗ kinꜙ maˉngooꜗ dsaˉhwa̱a̱ꜘ,
pero Dio baˊ hi̱ˉ kwaꜙ beꜘ kihꜗ jmɨˉlleꜘ kinꜙ,
hiꜙ la̱a̱yꜗ he̱e̱nꜚ läꜙjëꜙ johꜘ jmɨɨˊ chaˉ.
27Läꜙjë̱ë̱ꜙ hi̱ˉ dsaˉläˉø̱ø̱ꜘ kyahꜗ, ju̱u̱ꜘ bihꜗ.
Pero hneˉ he̱e̱hˈ goˉte˜ läꜙjë̱ë̱ꜙ hi̱ˉ saꜙ jmeeꜙ taˊheꜗ kyahꜗ.
28Pero jnäꜘ, jä̱nꜙ chu̱hꜙ kooꜘ kihꜗ Dio.
Heˉ ja̱ˉ baˊ laˈ lluꜗ kinꜙ.
Maˉchaˉ baˊ oˉjø̱hꜙ dsëˉ kinꜙ kya̱a̱hˊ DSAˉJØ̱Ø̱Hˈ jnänˋ,
heˉja̱ˉ hlëëhnˋ kihˈ läꜙjëꜙ taˊ heˉ jmeeyꜙ.
Currently Selected:
Salmos 73: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
