Salmos 71
71
1Hneˉ Dio kya̱a̱nꜙ, kyahꜗ baˊ chaˉ jeeˊ gyanˋ.
Ji̱hˊko̱hꜘ taꜙ kwaˉ jwëˈ jä̱nˋ kya̱a̱hˊ oˉhihꜙ.
2Lä̱ä̱ˋ jnäꜘ hiꜙ kwaˊ beꜘ kinꜙ,
jëëhꜘ heˉ lluꜗ jmahꜗ baˊ jmeehˉ.
Hiiꜘ toˉgwahˊ mahꜗ lä̱ä̱ˋ jnäꜘ.
3Waˊ la̱a̱hˈ hneˉ ku̱u̱ˊ hlooˉ jeeˊ leꜘ nɨɨnꜙ ko̱ˉllaˉji̱i̱h˜.
Jmeeˊ madaꜚ heˉ lä̱ä̱nꜘ,
jëëhꜘ hneˉ la̱a̱hꜗ ku̱u̱ˊ hlooˉ heˉ kwaꜙ beꜘ kinꜙ.
4Hneˉ Dio kya̱a̱nꜙ, lä̱ä̱ˋ jnäꜘ kihꜗ hi̱ˉ hñaaˉ dsëꜗ,
läꜙja̱ˉ kihꜗ hi̱ˉ jngëëhꜙ dsaˉ hiꜙ kihꜗ hi̱ˉ hä̱ä̱ˈ.
5Hneˉ Dio DSAˉJØ̱Ø̱Hˈ kya̱a̱nꜙ, la̱a̱hꜗ hneˉ oˉjø̱hꜙ dsëˉ kinꜙ.
Hneˉ baˊ hi̱ˉ hä̱ä̱˜ jnäꜘ läꜙji̱i̱hˈ maˊ gaꜙläꜙcha̱a̱nꜙ.
6Saꜙ gaˊ maˉläˉcha̱a̱nꜙ maˊ jmeehˉ ko̱ˉjø̱hꜘ kya̱a̱hˊ jnäꜘ.
Hneˉ baˊ hi̱ˉ gaꜙjmeeꜘ gaꜙläꜙcha̱a̱nꜙ,
heˉja̱ˉ hänˋ kyahˈ tä̱ä̱ꜘ.
7Jwë̱ë̱ꜘ dsaˉ naˉhñaahˈ jnäꜘ, pero hneˉ saꜙ naˉhñaahˈ jnäꜘ.
Hneˉ kwahˉ jeeˊ saꜙ hiiꜘ gooˉ kinꜙ.
8Johꜘ su̱ꜚ saꜙ chaˉ heˉ hänˋ kyahˈ.
Läꜙta̱a̱ˈ jmɨɨˊ jmeenˋ jʉʉhˉ kyahꜗ.
9Taꜙ jmääꜙ jnäꜘ taꜙ kooꜘ waˊraˉ gaꜙgyu̱u̱hnˉ.
Taꜙ be̱e̱ꜙ jnäꜘ waˊraˉ gaꜙdsa̱a̱ꜗ beꜘ kinꜙ.
10Hi̱ˉ naˉhøøhˊ kinꜙ, dsaˉta̱a̱yhˋ chaˉhä̱ä̱y˜ jnäꜘ.
Dsaˉta̱a̱yhˋ ko̱ˉjø̱hꜘ hnooyhˉ haˉ läꜙ jeeˊ jngëëyhˈ jnäꜘ.
11Jäyhꜘ: “Maˉbe̱e̱ꜗ baˊ Dio hi̱ˉ naˉ.
Hëëꜙ kiyhꜗ mahꜗ cha̱a̱hˈ hnihꜘ,
jëëhꜘ niꜙ ja̱a̱ˉ saꜙ cha̱a̱ˉ hi̱ˉ lä̱ä̱yꜗ.”
12Taꜙ waˊ läꜙø̱ø̱hꜘ kinꜙ hneˉ Dio kya̱a̱nꜙ.
Ñaˉ cha̱hꜘ, yaˉkwaˊ beꜘ kinꜙ.
13Waˊ jä̱ꜘ oˉhihꜙ hiꜙ waˊ he̱e̱ꜘ goˉte˜ hi̱ˉ naˉhøøhˊ kinꜙ.
Waˊ jä̱ꜘ naˉlä̱ä̱ˉ bihꜗ oˉhihꜙ hiꜙ waˊ ka̱hˈ waˊ gwë̱hˈ hʉʉˊdsëˉ kihꜗ hi̱ˉ hnøøꜗ jngëëhꜗ jnäꜘ.
14Pero ngooꜗ baˊ jnäꜘ kye̱nˊ oˉjø̱hꜙ dsëˉ kyahꜗ,
hiꜙ chaˉgaˊmiihˉ hänˋ kyahˈ ko̱o̱ˉ jmɨɨˊ ko̱o̱ˉ jmɨɨˊ.
15Jmeehnꜚ juuꜗ kihꜗ dsaꜙ kihꜗ taˊ lluˈ heˉ jmeehˉ.
Läꜙja̱ˉ hlëëhnˊ läꜙta̱a̱ˈ jmɨɨˊ kihꜗ heˉ lä̱ä̱hˊ dsaˉ,
maꜙkeꜙ saꜙ tä̱ä̱nꜙ hënˋ haˉ ko̱hꜘ teꜗ heˉ jmeehˉ.
16Hlëëhnˊ kihˈ läꜙjëꜙ heˉ jʉhˉga̱a̱ˉ heˉ jmeehˉ hneˉ Dio,
DSAˉJØ̱Ø̱Hˈ kya̱a̱nꜙ.
Miˉdsoohnꜚ dsëꜗ dsaˉ,
ja̱a̱ˉ hneˉ baˊ jmeehˉ heˉ lluꜗ jmahꜗ.
17Hneˉ Dio kya̱a̱nꜙ,
läꜙ maˉmähnꜗ gaꜙmiꜙtë̱ë̱hˈ jnäꜘ heeˉ naˉ jmeenˋ.
Heˉja̱ˉ läꜙ maˉngooꜗ baˊ jnäꜘ hlëëhnˊ kihˈ heˉ jʉhˉga̱a̱ˉ heˉ jmeehˉ.
18Maꜙkeꜙ gaˊ maˉgyu̱hnˉ hiꜙ maˉtøøꜘ llenꜙ, taꜙ yaꜙbe̱e̱ꜙ jnäꜘ.
Jëëhꜘ hnøøꜗ gaˊ hlë̱ë̱hnˊ hi̱ˉ ja̱ˉ gaˊ dsaˉläˉcha̱a̱ˉ haˉ läꜙ laꜗ beꜘ kyahꜗ.
Jmeehnꜚ juuˈ kihꜗ hi̱ˉ naꜗ gaˊ läꜙcha̱a̱ˉ haˉ läꜙ laꜗ beꜘ kyahꜗ.
19Jmeehnꜚ juuˈ kiyhꜗ haˉ ko̱hꜘ saꜙ lluꜗ taˊ heˉ jmeehˉ.
Johꜘ heˉ jʉhˉga̱a̱ˉ saꜙ jmeehˉ.
Saꜙ cha̱a̱ˉ gaˊ jñahꜘ läꜙko̱hꜘ hneˉ.
20Maꜙkeꜙ maˉjmeehˊ maˉjëënꜗ chaˉmiihˉ heˉ lliꜘwɨɨꜘ,
pero maꜙraꜙ heˉ jmeehˈ baˊ hneˉ läꜙcha̱a̱nˉ lluꜗ.
Läꜙko̱o̱ˉ heˉ cha̱a̱hˊ jnäꜘ heˉ hä̱ä̱nˊ ñiihˊ gaˊ kihˈ hwaꜗ laˉ.
21Jmäähˈ jnäꜘ jø̱ø̱hˈ gaˊ läꜙko̱hꜘ maˊ la̱a̱nˈ jä̱ä̱ꜗ.
Läꜙja̱ˉ jmeehˈ nøhꜗ dsënꜙ kaˉlähꜘ.
22Kwa̱a̱t˜ kinꜙ, hänˋ kyahˈ kya̱a̱hˊ salterio.
Hänˋ kyahˈ hneˉ Dio kya̱a̱nꜙ, kya̱a̱hˊ tu̱ˉ heˉ chooˈ chaˉmiihˉ sɨˊñeꜗ.
Hänˋ kyahˈ hneˉ hi̱ˉ naˉjngëëˈ kya̱a̱ꜗ jnäähˈ dsaˉ Israel.
23Peerꜙ jë̱ë̱ˉ dsënꜙ hänˋ kyahˈ läꜙka̱a̱ˉ tuhˉdsënꜙ
läꜙlluꜗ heˉ maˉlä̱ä̱hˊ jnäꜘ.
24Läꜙta̱a̱ˈ jmɨɨˊ baˊ hlëëhnˊ kihꜗ heˉ jmeehˉ heˉ lluꜗ jmahꜗ baˊ.
Jëëhꜘ, läꜙjë̱ë̱ꜙ hi̱ˉ maˊ hnøøˈ jmeeꜗ heˉ hlɨɨhˈ kinꜙ, maˉjä̱yꜘ naˉlä̱ä̱ˉ bihꜗ oˉhihꜙ.
Currently Selected:
Salmos 71: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
