Salmos 40
40
1Kya̱a̱hˊ oˉjø̱hꜙ dsëˉ gaꜙjø̱ø̱nˋ kihꜗ DSAˉJØ̱Ø̱Hˈ kya̱a̱nꜙ mahꜗ kwayꜗ beꜘ kinꜙ.
Gaꜙjmeeyꜘ heˈ kinꜙ hiꜙ gaꜙnuuꜘ bihꜗ kaˉlähꜘ.
2Gaꜙlle̱e̱yˉ jnäꜘ nehꜙ tooˉ jeeˊ maˊ jmeenꜙ hʉʉˊdsëˉ ju̱u̱nꜘ jeeˊ ji̱i̱ꜗ heˉ dsaˉhooꜙ.
Gaꜙche̱e̱yhˉ jnäꜘ nëˊ ku̱u̱ˊ jeeˊ saꜙ hiiꜘ gooˉ tä̱hnꜙ.
3Gaꜙtooyhˉ llenꜙ ko̱o̱ˉ su̱ꜚ hmëëꜘ
heˉ gaꜙhänꜗ kihꜗ DSAˉJØ̱Ø̱Hˈ jnänˋ.
Hiꜙ waˊraˉ gaꜙjëëꜗ dsaˉ heˉ ja̱ˉ,
jwë̱ë̱ꜘ dsaˉta̱a̱hˋ jëë˜ dsa̱hꜙ,
hiꜙ läꜙgooꜙ dsëyꜗ
mahꜗ ka̱yꜗ oˉjø̱hꜙ dsëˉ kihꜗ DSAˉJØ̱Ø̱Hˈ jnänˋ.
4Lluꜗ laꜗ kihꜗ hi̱ˉ maˉkye̱ˉ oˉjø̱hꜙ dsëˉ kihꜗ DSAˉJØ̱Ø̱Hˈ jnänˋ.
Läꜙja̱ˉ kaˉlähꜘ hi̱ˉ saꜙ jmeeꜙ ko̱ˉjø̱hꜘ kya̱a̱hˊ hi̱ˉ cha̱a̱hˉ
niꜙ kya̱a̱hˊ hi̱ˉ jmää˜ jø̱ø̱hˈ dio hi̱ˉ naˉla̱a̱ꜚ ka̱a̱h˜ dsaˉ.
5Hneˉ Dio DSAˉJØ̱Ø̱Hˈ kya̱a̱nꜙ,
johꜘ ji̱i̱h˜ saꜙ maˉjmeehˊ heˉ jʉhˉga̱a̱ˉ kya̱a̱ꜗ jnäähꜗ.
Kye̱hˊ hʉʉˊdsëˉ kya̱a̱ꜗ jnäähˈ tä̱ä̱ꜘ baˊ,
niꜙ ja̱a̱ˉ saꜙ jnøøhꜙ miˉjnääꜙ kihꜗ läꜙjëꜙ heˉ naˉ.
Hnooꜗ gaˊ jnäꜘ hlëëhnˊ kihˈ heˉ naˉ pero moꜙsoꜙ jnøøhꜙ gaˊ jnäꜘ heˉ hlëëhnˊ, kihꜗ heˉ laꜗ chaˉmiihˉ.
6Saꜙ hnoohˉ hneˉ heˉ jë̱ë̱˜ dsaˉ jahꜘ
niꜙ heˉ gaˊ kwëëhˈ dsaˉ hneˉ saꜙ tɨh˜ hohꜘ.
Gaꜙjmeehˊ gaꜙläꜙngëënꜘ heˉ saꜙ ngɨɨhˊ heˉ ka̱a̱ꜗ jahꜘ kihꜗ dsoˊkyeˉ.
7Heˉja̱ˉ jwahnꜙ:
“Hi̱i̱ꜚ jnäꜘ laˉ, läꜙko̱hꜘ naˉsɨɨˉ kinꜙ nëˊ moˊjeˉ.
8Jnäꜘ tɨh˜ dsënꜙ jmeenˋ läꜙ hyohˉ hohꜘ.
Nehꜙ tuhˉdsënꜙ kye̱nˊ läꜙjëꜙ nʉʉhꜚ kyahꜗ.”
9Maˉhlëëhˋ baˊ jnäꜘ juˈdsooꜘ kyahꜗ jeeˊ dsaˉñeeꜙ dsaˉ.
Hneˉ ñehˊ kweeˉ DSAˉJØ̱Ø̱Hˈ kya̱a̱nꜙ,
ja̱ꜙ taˊ gaꜙjëëꜗ baˊ jnäꜘ.
10Saꜙ gaꜙhmänꜗ nehꜙ tuhˉdsënꜙ juˈdsooꜘ kyahꜗ.
Maˉhlëëhˋ baˊ jnäꜘ heˉ miˉtehˋ juuˈ kyahꜗ
hiꜙ läꜙja̱ˉ heˉ lä̱ä̱hˊ jnäähꜗ.
Maꜙraꜙ heˉ maˉhlëëhnˋ jeeˊ jä̱ˈ dsaˉ.
Ji̱hˊko̱hꜘ saꜙ gaꜙhmänꜗ juˈdsooꜘ kyahꜗ
hiꜙ niꜙ kihꜗ heˉ hnaahꜙ jnäähˈ.
11Hneˉ DSAˉJØ̱Ø̱Hˈ kya̱a̱nꜙ,
taꜙ waˊ gaaꜘ hohꜘ heˉ läˉñihꜘ hohꜘ jnäꜘ.
Hä̱ä̱ˋ jnäꜘ tä̱ä̱ꜘ baˊ, kya̱a̱hˊ heˉ hnaahꜙ jnäꜘ
hiꜙ kya̱a̱hˊ juꜗdsooꜘ kyahꜗ.
12Johꜘ heˉ wɨɨꜘ saꜙ maˉngëënꜘ.
Maˉjlëꜗ nëˊ kinꜙ läꜙjëꜙ heˉ hlɨɨhˈ heˉ maˉjmeenꜗ
läꜙji̱i̱hˈ maˉløøˉ mɨˈnënꜙ.
Chaˉgaˊmiihˉ dsooˊ chaˉ kinꜙ läꜙko̱hꜘ gaˊ jñuˉ llenꜙ.
Läꜙkye̱ˉ mɨˈdsënꜙ ngooꜗ gaꜙhwa̱a̱ꜘ.
13Hneˉ DSAˉJØ̱Ø̱Hˈ kya̱a̱nꜙ, taꜙ jmeeˉ hñaaˉ hohꜘ.
Yaˉlä̱ä̱ˋ jnäꜘ hiꜙ kwaˊ beꜘ kinꜙ naꜗko̱hꜘ.
14Waˊ jä̱ꜘ oˉhihꜙ hiꜙ waˊ ka̱hˈ waˊ gwë̱hˈ hʉʉˊdsëˉ kihꜗ hi̱ˉ hnøøꜗ jngëëhꜗ jnäꜘ.
Waˊ dsaˉje̱e̱h˜ kya̱a̱hˊ oˉhihꜙ hi̱ˉ hɨɨˉ juuˈ jmeehꜙ jnäꜘ.
15Waˊ kyʉ̱ʉ̱ˈ kya̱a̱hˊ oˉhihꜙ läꜙjë̱ë̱ꜙ hi̱ˉ miˉkwa̱hꜗ jnäꜘ.
16Waˊ cha̱a̱ˉ lluꜗ hiꜙ waˊ jë̱ë̱ˉ dsëꜗ läꜙjë̱ë̱ꜙ hi̱ˉ hnaahˉ hneˉ.
Läꜙ ja̱hꜘ hi̱ˉ hnøøꜗ lä̱ä̱ꜘ, waˊ jäyhꜘ tä̱ä̱ꜘ:
“Ja̱a̱ˉ Dio baˊ la̱a̱ˈ jø̱ø̱hꜗ.”
17Hi̱ˉ täˉñeeꜘ baˊ jnäꜘ,
jëën˜ wɨɨꜘ pero maꜙraꜙ heˉ jë̱ë̱˜ baˊ Dio jnäꜘ.
Hneˉ baˊ naˉ hi̱ˉ kwaꜙ beꜘ kinꜙ hi̱ˉ lä̱ä̱˜ jnäꜘ.
Heˉja̱ˉ taꜙ miˉhɨɨˊ chaˉmiihˉ DSAˉJØ̱Ø̱Hˈ kya̱a̱nꜙ.
Currently Selected:
Salmos 40: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
