Salmos 22
22
1Hneˉ Dio, Dio kya̱a̱nꜙ, ¿heˉlaˈ maˉbe̱e̱hꜙ jnäꜘ?
Hnoonꜗ lä̱ä̱hˊ jnäꜘ kihꜗ läꜙjëꜙ heˉ kɨˊhoohnˊ kyahˈ.
Peerꜙ ʉ̱ʉ̱ꜘ chehꜗ hneˉ kinꜙ.
2Dio kya̱a̱nꜙ, läꜙjmɨɨˈ läꜙhwëˈ baˊ kɨˊhoohnˊ
hiꜙ niꜙ miihˉ saꜙ ngɨɨhˊ kinꜙ.
Saꜙ hii˜ te̱e̱hnˊ dsënꜙ heˉ chu̱u̱nꜘ kya̱a̱hˊ hneˉ.
3Hneˉ hi̱ˉ jmeeꜙ hihꜙ la̱a̱hꜗ naˉjngëëˈ goˉte˜.
Kyahꜗ baˊ hneˉ häꜗ dsaˉ Israel.
4Kyahꜗ hneˉ gaꜙka̱ꜗ oˉjø̱hꜙ dsëˉ dsaˉ maˉgyu̱hˉ kya̱a̱ꜗ jnäähˈ heꜘ.
Gaꜙka̱yꜗ oˉjø̱hꜙ dsëˉ kyahꜗ,
heˉja̱ˉ baˊ ja̱ˉ gaꜙlä̱ä̱hˊ hnihꜘ.
5Kyahꜗ baˊ hneˉ gaꜙngɨɨyꜘ beꜘ hiꜙ gaꜙla̱a̱yꜘ.
Gaꜙka̱yꜗ oˉjø̱hꜙ dsëˉ kyahꜗ hiꜙ saꜙ gaꜙjä̱yꜘ oˉhihꜙ.
6Pero jnäꜘ la̱a̱nꜗ läꜙko̱o̱ˉ ja̱a̱ˉ jahˊ baˊ,
saꜙ jmääy˜ jnäꜘ läꜙko̱o̱ˉ ja̱a̱ˉ dsaˉ jmɨˉgyʉʉꜙ.
Oˉhihꜙ baˊ la̱a̱nˈ kihꜗ dsaꜙ, miˉkwa̱hꜗ bihꜗ jnäꜘ.
7Läꜙjë̱ë̱ꜙ hi̱ˉ jë̱ë̱˜ jnäꜘ ngɨɨ˜ bihꜗ kinꜙ.
Gwa̱a̱yh˜ waˊhooyˊ kinꜙ,
lleˊ bihꜗ jiiyh˜ kaˉlähꜘ mahꜗ jäyhꜘ:
8“Hi̱ˉ laˉ heꜘ maˊ kye̱ˉ oˉjø̱hꜙ dsëˉ kihꜗ DSAˉJØ̱Ø̱Hˈ jnänˋ.
Waˊ lä̱ä̱yˈ naꜗ, cherˊmahꜗ dsooꜘ la̱a̱yꜗ omeꜚ kya̱a̱yꜗ.”
9Pero hneˉ heꜘ hi̱ˉ gaꜙmiꜙcha̱a̱ˉ jnäꜘ kihꜗ maaˋ kya̱a̱nꜙ.
Läꜙji̱i̱hˈ maˊ gyu̱u̱nˉ gaꜙjmeehˊ chaˉ oˉjø̱hꜙ dsëˉ kinꜙ kya̱a̱hˊ hneˉ.
10Jä̱ä̱ꜗ ja̱ˉ gaˊ läꜙcha̱a̱nꜙ, maˉhä̱ä̱ˉ baˊ jnäꜘ jaˊgoohˉ.
Läꜙ maˊ ja̱ˉ läꜙ maˉla̱a̱hꜗ baˊ hneˉ Dio kya̱a̱nꜙ.
11Taꜙ waˊ läꜙø̱ø̱hꜘ hneˉ kinꜙ,
jëëhꜘ ngooꜗ yaˉjä̱hꜙ heˉ jëënꜚ wɨɨꜘ
hiꜙ saꜙ cha̱a̱ˉ hi̱ˉ kwaꜗ beꜘ kinꜙ.
12Jwë̱ë̱ꜘ hi̱ˉ naˉhøøhˊ kinꜙ maˉtä̱ä̱hˊ läꜙkuˊ läꜙji̱i̱ꜗ,
la̱a̱yꜗ läꜙko̱hꜘ kyaˊ dsooˈ hi̱ˉ hä̱ä̱ˈ hi̱ˉ cha̱a̱ˉ hwaˈ aBasán.
13Naˉja̱a̱ꜚ hooyˊ hooyh˜ läꜙko̱hꜘ león hi̱ˉ hä̱ä̱ˈ hi̱ˉ hnøøꜗ hli̱i̱ꜗ nëˊ kinꜙ.
14La̱a̱ꜗ jnäꜘ läꜙko̱hꜘ jmɨɨˉ heˉ maˉtu̱u̱ˉ.
Läꜙja̱ˉ mooˈ kinꜙ, laꜗ läꜙko̱o̱ˉ heˉ saꜙ läꜙcha̱hꜘ.
Mɨˈdsënꜙ laꜗ läꜙko̱o̱ˉ sër˜ heˉ maˉjo̱o̱ꜗ.
15Waˊhoonꜙ, maˉläˉki̱i̱ꜙ läꜙko̱hꜘ ki̱i̱ˉ tʉˊhløøˉ.
Maˉchu̱hꜗ naˊsɨɨhnꜙ kya̱a̱hˊ toˊhoonꜙ.
Hneˉ maˉjmeehˊ kinꜙ läꜙko̱o̱ˉ heˉ maˉhä̱ä̱nˊ jeeˊ tʉˊhløøˉ jeeˊ ju̱u̱nꜘ baˊ.
16Ko̱o̱ˉ nääꜗ dsaˉ hñaaˉ dsëꜗ jmeeyꜙ läꜙko̱hꜘ dsɨɨˉ,
tä̱ä̱yhˊ läꜙkuˊ läꜙji̱i̱ꜗ kinꜙ.
Maˉhëëyꜗ tooˉ gooˉ tɨɨnꜙ.
17Maˉjnäꜘ mooˈ kinꜙ, läꜙji̱i̱hˈ leꜘ hënˋ johꜘ teꜗ.
Saꜙ tʉy˜ niꜙ miihˉ heˉ jë̱ë̱y˜ jnäꜘ.
18Gaꜙjmeeyꜘ llooˈ hmɨɨhˉ kinꜙ.
Gaꜙkooyhꜗ suërte hmɨɨhˉ ja̱ˉ, maˊ jëëy˜ hi̱ˉ maˊ të̱ë̱ˈ.
19Pero hneˉ DSAˉJØ̱Ø̱Hˈ kya̱a̱nꜙ, taꜙ waˊ läꜙø̱ø̱hꜘ hneˉ kinꜙ.
Hneˉ hi̱ˉ la̱a̱ꜗ beꜘ kinꜙ, yaˉjë̱ë̱ˋ jnäꜘ naꜗko̱hꜘ.
20Lä̱ä̱ˋ jnäꜘ kihꜗ ñeˈtuuhꜚ.
Taꜙ kwaˉ jwëˈ kihꜗ hi̱ˉ la̱a̱ꜗ läꜙko̱hꜘ dsɨɨˉ heˉ jngëëyhꜗ jnäꜘ.
21Lä̱ä̱ˋ jnäꜘ mahꜗ saꜙ ku̱hꜙ león.
Nooˉ nëˊ kinꜙ mahꜗ saꜙ täꜗ kyaˊ jøøꜗ kinꜙ.
22Jnäꜘ hlëëhnˋ kyahˈ kya̱a̱hˊ ø̱ø̱hnꜗ.
Jmeenˋ jʉʉhˉ kyahꜗ jeeˊ dsaˉñeeꜙ läꜙjë̱ë̱ꜙ ø̱ø̱hnꜗ.
23Läꜙjë̱ë̱ꜙ hi̱ˉ ga̱hꜗ DSAˉJØ̱Ø̱Hˈ jnänˋ, häˊ hnähꜘ kiyhꜗ.
Läꜙjë̱ë̱ꜙ hnähꜘ saˊju̱ˉ kihꜗ Jacob jmeeˊ hnähꜘ jʉʉhˉ kiyhꜗ.
Läꜙjë̱ë̱ꜙ hnähꜘ saˊju̱ˉ kihꜗ Israel waˊ ga̱hꜙ hnähꜘ kaˉlähꜘ.
24Jëëhꜘ DSAˉJØ̱Ø̱Hˈ jnänˋ,
saꜙ gaꜙjmeeyꜘ taꜙ kooꜘ maˊ gaꜙjëëꜗ wɨɨꜘ hi̱ˉ täˉñeeꜘ,
niꜙ saꜙ gaꜙhmääyhˉ kihꜗ kaˉlähꜘ.
Hi̱ˉ heꜘ gaꜙnuuꜘ baˊ maˊ gaꜙchu̱u̱yꜘ kya̱a̱hˊ.
25Kyahꜗ baˊ hneˉ hänˋ jeeˊ dsaˉñeeꜙ ø̱ø̱hnꜗ.
Chaˊnëˊ jeeˊ läꜙjë̱ë̱ꜙ hi̱ˉ jmeeꜙ jʉʉhˉ kyahꜗ
miˊtenˋ heˉ gaꜙbä̱ä̱hnˋ hñiinꜙ.
26Läꜙjë̱ë̱ꜙ hi̱ˉ täˉñeeꜘ kuyhꜙ läꜙji̱i̱hˈ kë̱ë̱yꜗ.
Hnähꜘ hi̱ˉ hnaahˉ DSAˉJØ̱Ø̱Hˈ jnänˋ
jmeehˈ hnähꜘ jʉʉhˉ kiyhꜗ, mahꜗ cha̱a̱ˉ hnähꜘ tä̱ä̱ꜘ.
27Läꜙka̱a̱ˉ läꜙjʉhꜗ jmɨˉgyʉʉꜙ läꜙdsooh˜ dsëyꜗ DSAˉJØ̱Ø̱Hˈ jnänˋ mahꜗ dsaˉje̱e̱yh˜ kya̱a̱yhˊ.
Läꜙjë̱ë̱ꜙ nääꜗ dsaˉ jmɨˉgyʉʉꜙ ju̱hꜗ jnëˊ chaˉnëyˊ.
28Jëëhꜘ DSAˉJØ̱Ø̱Hˈ jnänˋ baˊ hi̱ˉ la̱a̱ꜗ dsaˉtaˊ.
Hi̱ˉ heꜘ baˊ jmeeꜙ hihꜙ kihꜗ läꜙka̱a̱ˉ jmɨˉgyʉʉꜙ.
29Läꜙjë̱ë̱ꜙ hi̱ˉ chaˉ chaˉmiihˉ kihꜗ
jlu̱u̱yˊ lleyˊ hiꜙ jmeeyꜗ jʉʉhˉ kiyhꜗ.
Läꜙja̱ˉ jmeeˊ jneˊ läꜙjë̱ë̱ꜙ jneˊ hi̱ˉ le̱e̱ꜙ kaˉlähꜘ tʉˊgwaahˊ,
jëëhꜘ hñaaꜗ jneˊ, saꜙ leꜘ jmeenˊ heˉ cha̱a̱ˉ jneˊ.
30Läꜙja̱ˉ läꜙjë̱ë̱ꜙ jo̱o̱ꜘsɨɨyhˊ jmeeyˈ jʉʉhˉ kihꜗ Dsaˉjø̱ø̱hˈ jnänˋ.
Läꜙjë̱ë̱ꜙ saˊju̱ˉ kiyhꜗ, hlëëyhꜗ kihꜗ Dio.
31Kihꜗ hi̱ˉ ja̱ˉ gaˊ läꜙcha̱a̱ˉ,
jmeeyhꜗ juuˈ haˉ läꜙ laꜗ heˉ lluꜗ heˉ gaꜙjmeeꜘ Dio kiyhꜗ.
Hi̱ˉ heꜘ jähꜙ: “Dio baˊ heꜘ hi̱ˉ gaꜙjmeeꜘ heˉ ja̱ˉ.”
Currently Selected:
Salmos 22: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
