Salmos 18
18
1Haˉ ko̱hꜘ saꜙ hnaanꜙ hneˉ DSAˉJØ̱Ø̱Hˈ kya̱a̱nꜙ,
kihꜗ heˉ la̱a̱hꜗ beꜘ kinꜙ.
2Hneˉ baˊ hi̱ˉ chehꜗ nëˊ kinꜙ,
hiꜙ kwahˉ ko̱o̱ˉ hneꜗ ñiiꜘ jeeˊ saꜙ hiiꜘ gooˉ kinꜙ,
hneˉ baˊ hi̱ˉ lä̱ä̱˜ jnäꜘ.
Dio kya̱a̱nꜙ, hneˉ la̱a̱hꜗ beꜘ kinꜙ,
kyahꜗ baˊ chaˉ oˉjø̱hꜙ dsëˉ kinꜙ,
hneˉ la̱a̱hꜗ läꜙko̱hꜘ ñeˈ heˉ hɨɨˉ dsaˉ jeeˊ lä̱ä̱y˜ hñiiꜘ.
Kya̱a̱hˊ beꜘ kyahꜗ lä̱ä̱hˊ jnäꜘ,
hiꜙ la̱a̱hꜗ läꜙko̱o̱ˉ hneꜗ ñiiꜘ jeeˊ leꜘ hmäähnˊ.
3Ngɨɨnˊ kihꜗ DSAˉJØ̱Ø̱Hˈ jnänˋ hi̱ˉ lleˋ kihˈ leꜘ jʉʉhˉ kihꜗ.
Chu̱u̱nꜘ kya̱a̱yhˊ mahꜗ lä̱ä̱yꜗ jnäꜘ kihꜗ hi̱ˉ naˉhøøhˊ kinꜙ.
4Maˉhä̱ä̱nˊ jeeˊ ju̱u̱nꜘ, peerꜙ gohnꜙ heˉ maˉjlënꜗ heˉ hlɨɨhˈ.
5Maˉchehnꜗ jeeˊ ju̱u̱nꜘ,
läꜙko̱o̱ˉ heˉ hiiꜘ cheꜘ heˉ jngɨɨhꜗ kinꜙ baˊ laˈ.
6Maˊ gaꜙjëënꜗ wɨɨꜘ, gaꜙngɨɨnˋ kihꜗ DSAˉJØ̱Ø̱Hˈ kya̱a̱nꜙ.
Gaꜙngɨɨnˋ beꜘ kihꜗ Dio kya̱a̱nꜙ kaˉlähꜘ.
Läꜙ gaꜙtëꜘ jeeˊ gyayˈ gaꜙnuuꜘ bihꜗ kinꜙ.
Heˉ gaꜙchu̱u̱nꜗ kya̱a̱yhˊ gaꜙllooꜗ läꜙ gaꜙtëꜘ hooˊ toˉgwayˊ.
7Läꜙji̱i̱hˈ gaꜙjehꜗ wɨɨꜘ hwaꜗ hiꜙ läꜙkye̱ˉ hʉʉˊ tɨɨˊ mohꜘ gaꜙsaˊ gaꜙjehꜗ.
Kihꜗ heˉ gaꜙyaꜙjë̱ë̱ˈ dsëꜗ Dio heˉja̱ˉ gaꜙlaꜗ läꜙja̱ˉ.
8Nehꜙ taˉhiyhˊ gaꜙhwëëˉ ñeˊ,
nehꜙ toˉhooyˊ maˊ hwëëˉ jeˉ heˉ jë̱ˉ goˉte˜,
läꜙkye̱ˉ mɨˈjeˉ maˊ hwëëˉ toˉhooyˊ ja̱ˉ.
9Gaꜙnäyꜗ gyʉʉhˈ jmɨˉgyʉʉꜙ
mahꜗ gaꜙjñaayꜗ gaꜙnooyˉ nëˊ kinꜙ.
Taꜙ hwaꜗ kihꜗ maˉtɨɨyˊ maˊ laˈ naˉho̱o̱ˉ.
10Gaꜙwɨɨyꜗ ja̱a̱ˉ ángel mahꜗ gaꜙhë̱ë̱yꜘ jwëꜘ nëˊ lleꜘ.
11Gaꜙjmeeyꜘ gaꜙsooˉ jniiꜘ lähˉ läꜙkuˊ läꜙji̱i̱ꜗ kiyhꜗ
mahꜗ gaꜙjä̱ꜘ naˉho̱o̱ˉ.
Ja̱ˉ ji̱i̱hˈ moꜙsoꜙ gaꜙläꜙjnääyꜘ, jeeˊ jniiꜘ jeeˊ jmaˈ.
12Hiꜙ taꜙ chaˊnëyˊ ja̱ˉ yaꜙhɨɨꜗ jeˉ jë̱ë̱ˉ ñihꜗ,
ja̱ˉbaˊ jeeˊ jniiꜘ ja̱ˉ gaꜙhwëëˉ mɨˈdsëꜗ kya̱a̱hˊ mɨˈjeˉ.
13Gyʉʉhˈ jmɨˉgyʉʉꜙ gaꜙläꜙnʉʉhꜘ heˉ gaꜙhlëëhꜘ DSAˉJØ̱Ø̱Hˈ jnänˋ läꜙko̱hꜘ nʉʉhꜘ jeeˊ hɨ̱ɨ̱˜ ñihꜗ.
Hiꜙ gaꜙsa̱a̱ꜗ mɨˈdsëꜗ kya̱a̱hˊ mɨˈjeˉ.
14Gaꜙjwäyꜗ flecha kiyhꜗ, gaꜙjmeeyꜘ jeꜚñihꜗ, hiꜙ läꜙjë̱ë̱ꜙ hi̱ˉ naˉhøøhˊ kinꜙ gaꜙkyʉ̱ʉ̱yꜗ taꜙ laꜙ taꜙ jnøꜙ baˊ.
15Gaꜙläꜙjnäꜘ hwaꜗ jeeˊ hlaˉ jmɨˉñeehꜚ,
gaꜙläꜙjnäꜘ hwaꜗ hʉʉˊ tɨɨˊ kihꜗ jmɨˉgyʉʉꜙ.
Kya̱a̱hˊ heˉ yaꜙjë̱ë̱ꜗ dsëyꜗ,
ko̱o̱ˉ gaꜙjʉʉꜗ bihꜗ gaꜙlaꜗ läꜙja̱ˉ.
16Läꜙ gaꜙtëꜘ gyʉʉhˈ gaꜙhɨɨꜘ DSAˉJØ̱Ø̱Hˈ jnänˋ gooˉ nëˊ kinꜙ,
mahꜗ gaꜙcha̱a̱yhˉ jnäꜘ jeeˊ jëën˜ wɨɨꜘ,
läꜙko̱o̱ˉ heˉ maˊ hä̱ä̱nˊ nehꜙ jmɨˉjʉʉhˉ baˊ maˊ laˈ kinꜙ.
17Gaꜙlä̱ä̱yꜗ jnäꜘ kihꜗ dsaˉ hä̱ä̱ˈ hi̱ˉ naˉhøøhˊ kinꜙ.
Gaꜙlä̱ä̱yꜗ jnäꜘ kihꜗ hi̱ˉ saꜙ maˊ hnääˈ jnäꜘ,
jëëhꜘ saꜙ maˊ chaˉ beꜘ kinꜙ heˉ maˊ te̱e̱nꜚ kya̱a̱yhˊ.
18Maˊ jëëy˜ saꜙ chaˉ beꜘ kinꜙ, maˊ goˉnääyꜘ nëˊ kinꜙ,
pero DSAˉJØ̱Ø̱Hˈ jnänˋ gaꜙkwaꜘ bihꜗ beꜘ kinꜙ.
19Gaꜙtëëyˉ jnäꜘ ko̱o̱ˉ jeeˊ saꜙ hiiꜘ gooˉ,
gaꜙlä̱ä̱yꜗ jnäꜘ taꜙlaꜙ kihꜗ heˉ hnääyꜗ jnäꜘ baˊ.
20DSAˉJØ̱Ø̱Hˈ jnänˋ maˉmiˉhmaahˊ kinꜙ
läꜙko̱hꜘ teꜗ taˊ lluˈ heˉ gaꜙjmeenꜗ.
Maˉmiˉhmaayhˊ kinꜙ läꜙko̱hꜘ teꜗ heˉ gaꜙhä̱ä̱nꜙ hñiinꜙ.
21Jëëhꜘ, läꜙ maˊ hä̱ä̱ˊ baˊ jnäꜘ jwëˈ kihꜗ DSAˉJØ̱Ø̱Hˈ jnänˋ.
Ji̱hˊko̱hꜘ saꜙ maˉläˉø̱ø̱nꜘ kihꜗ Dio.
22Läꜙ maˉhøøꜙ baˊ jnäꜘ läꜙjëꜙ nʉʉhꜚ kiyhꜗ.
Ji̱hˊko̱hꜘ saꜙ maˉjmeenꜗ taꜙ kooꜘ madaꜚ kiyhꜗ.
23Gaꜙhøønꜗ läꜙjëꜙ läꜙji̱i̱hˈ jeeˊ leꜘ.
Gaꜙläꜙø̱ø̱ꜘ jnäꜘ kihꜗ dsoˊkyeˉ.
24Heˉja̱ˉ maˉmiˉhmaahˊ Dio kinꜙ
läꜙko̱hꜘ teꜗ taˊ lluˈ heˉ maˉjmeenꜗ chaˊnëyˊ.
25Chaˉmiihˉ dsaˉläˉñihꜘ hohꜘ kihꜗ hi̱ˉ dsaˉläˉñihꜘ dsëꜗ,
hiꜙ läꜙja̱ˉ lluꜗ hohꜘ kya̱a̱hˊ hi̱ˉ saꜙ ä̱ä̱ˉ dsooˊ.
26Jmeehˉ heˉ lluꜗ kya̱a̱hˊ hi̱ˉ jmeeꜙ heˉ lluꜗ,
hiꜙ hä̱ä̱hˈ kya̱a̱hˊ hi̱ˉ kyʉʉh˜ ma̱y˜.
27Pero hneˉ lä̱ä̱hˊ läꜙjë̱ë̱ꜙ hi̱ˉ hwa̱a̱ˊ hi̱ˉ jëë˜ wɨɨꜘ.
Mahꜗ heehꜙ wɨɨꜘ hi̱ˉ jmää˜ hñiiꜘ ka̱a̱hˊ.
28Pero kinꜙ miˊjnäähꜗ jeˉ kyahꜗ, hneˉ DSAˉJØ̱Ø̱Hˈ kya̱a̱nꜙ.
Miˊjnäähꜗ beꜘ kyahꜗ jeeˊ hä̱ä̱nˊ jeeˊ naˉho̱o̱ˉ.
29Kya̱a̱hˊ beꜘ kyahꜗ te̱e̱nꜚ kya̱a̱hˊ hi̱ˉ naˉhøøhˊ kinꜙ.
Kya̱a̱hˊ Dio kya̱a̱nꜙ hli̱i̱nˋ nëˊ waˊ heˉ chaˉ heˉ naˊhyahˉ taꜙ jeeˊ tä̱ä̱yhˊ naˉhmääyhˊ.
30Jëëhꜘ jwëꜘ kihꜗ Dio laꜗ lluꜗ goˉte˜,
hiꜙ läꜙja̱ˉ maꜙraꜙ heˉ dsaˉläˉteꜗ baˊ juuˈ kiyhꜗ.
Kihꜗ hi̱ˉ kye̱ˉ oˉjø̱hꜙ dsëˉ kiyhꜗ,
la̱a̱yꜗ läꜙko̱o̱ˉ ñeˈ heˉ hɨɨˉ dsaˉ jeeˊ lä̱ä̱˜ hñiiyꜘ.
31¿Haˉ taꜙ jäꜙ jñahꜘ dio hi̱ˉ la̱a̱ꜗ läꜙko̱hꜘ DSAˉJØ̱Ø̱Hˈ jnänˋ?
¿Haˉ taꜙ jäꜙ jñahꜘ dio hi̱ˉ lihꜙ hä̱ä̱ꜗ jneˊ läꜙko̱hꜘ Dio jnänˋ?
32Dio baˊ heꜘ hi̱ˉ kwaꜙ beꜘ kinꜙ,
hi̱ˉ hä̱ä̱˜ jnäꜘ waˊ haˉ chaˉ haˉ jeeˊ nɨɨnꜙ.
33Jmeeyꜙ jwä̱ä̱ˊ maˉtɨɨnꜙ,
läꜙko̱hꜘ jwä̱ä̱ˊ maˉtɨɨˊ ja̱a̱ˉ kyaˊnuuˉ.
Hiꜙ jmeeyꜙ dsaˉsë̱ë̱hnˋ hwehˉ nëˊ mohꜘ ñiiꜘ.
34Miˉllu̱u̱yꜗ jnäꜘ mahꜗ nɨɨnˋ jeeˊ hniiˉ,
kwayꜙ beꜘ kihꜗ saˊkyoonꜙ mahꜗ koohnꜚ flecha.
35Maˉkwëëhˋ jnäꜘ ñeˈ heˉ hɨɨnˋ jeeˊ lä̱ä̱nˊ hñiinꜙ
hiꜙ maˉhä̱ä̱hˋ jnäꜘ kya̱a̱hˊ goohˉ raˉllu̱u̱ꜗ.
Hiꜙ kihꜗ heˉ lluꜗ hohꜘ, maˉcha̱a̱ˉ baˊ jnäꜘ lluꜗ.
36Saꜙ jwë̱ë̱hˋ goˉte˜ maˉjmeehˊ jeeˊ ngënꜙ,
heˉja̱ˉ saꜙ dsaˉchu̱u̱n˜.
37Gaꜙjmeenꜗ biiꜗ gaꜙmiꜙje̱e̱nꜚ läꜙjë̱ë̱ꜙ hi̱ˉ naˉhøøhˊ kinꜙ
mahꜗ gaꜙte̱e̱hnˋ jwɨɨ˜ kiyhˈ.
Hiꜙ saꜙ gaꜙhwa̱a̱nˋ läꜙji̱i̱hˈ gaꜙdsa̱a̱ꜗ läꜙjë̱ë̱ꜙ.
38Gaꜙmiꜙlla̱a̱ˈ jnihꜘ mahꜗ moꜙsoꜙ jmeehꜙ gyihꜗ jnäꜘ.
Gaꜙjä̱yꜘ naˉsa̱a̱ˈ naˉja̱a̱yˈ hʉʉˊ tɨɨnꜙ.
39Gaꜙkwahˊ hneˉ beꜘ kinꜙ mahꜗ jmeenˋ hniiˉ.
Gaꜙjmeehˊ gaꜙjä̱ꜘ oˉhihꜙ hi̱ˉ naˉhøøhˊ kinꜙ.
40Gaꜙjmeehˊ gaꜙje̱e̱h˜ hi̱ˉ naˉhøøhˊ kinꜙ taꜙ kaˊluuyˊ
mahꜗ läꜙja̱ˉ miˊlla̱a̱nꜗ läꜙjë̱ë̱ꜙ hi̱ˉ saꜙ hnääꜗ jnäꜘ.
41Gaꜙngɨɨyꜘ beꜘ pero niꜙ ja̱a̱ˉ saꜙ cha̱a̱ˉ hi̱ˉ gaꜙkwaꜘ,
läꜙkye̱ˉ kihꜗ Dio maˊ chu̱u̱yꜘ pero saꜙ gaꜙnuuyꜘ kihꜗ.
42Gaꜙjmääꜙ jnihꜘ läꜙko̱hꜘ tʉˊhløøˉ
heˉ dsaˉlle̱e̱ꜘ kya̱a̱hˊ lleꜘ.
Gaꜙheeꜘ gaꜙsohnꜗ kiyhꜗ
läꜙko̱hꜘ tʉˊji̱i̱ꜗ heˉ chaˉ chaˊjwëꜗ.
43Gaꜙlä̱ä̱hˋ jnäꜘ jeeˊ tä̱ä̱hˊ ko̱o̱ˉ nääꜗ dsaˉ hi̱ˉ cha̱a̱hˉ,
hiꜙ gaꜙhñaahˋ jnäꜘ kye̱nˊ nëˊ kihˈ läꜙka̱a̱ˉ jmɨˉgyʉʉꜙ.
Dsaˉ hi̱ˉ saꜙ maˊ kyu̱u̱nꜙ, hi̱ˉ heꜘ jmää˜ jnäꜘ jø̱ø̱hˈ naꜗ.
44Laˊ gaꜙnuuꜘ bihꜗ, cha̱hꜘ baˊ nʉʉyhˊ kinꜙ.
Dsaˉ cha̱a̱ˉ ʉ̱ʉ̱ꜘ, cha̱hꜘ baˊ he̱e̱yhˉ kinꜙ.
45Hi̱ˉ tä̱ä̱hˊ ʉ̱ʉ̱ꜘ, gaꜙjehꜗ dsëyꜗ,
hiꜙ goyhꜙ gaꜙhwë̱ë̱yˉ jeeˊ maˊ tä̱ä̱yhˊ naˉhmääyhˊ.
46Naˊji̱i̱hꜙ baˊ DSAˉJØ̱Ø̱Hˈ jnänˋ.
Heˉ baˊ cheˉ llu̱u̱ꜗ hi̱ˉ la̱a̱ꜗ läꜙko̱o̱ˉ ku̱u̱ˊ hlooˉ kinꜙ.
Waˊ laˈ jʉʉhˉ kihꜗ Dio hi̱ˉ lä̱ä̱˜ jneˊ.
47Dio baˊ heꜘ hi̱ˉ te̱e̱hˉ jwɨɨ˜ kihꜗ dsaˉ hi̱ˉ hñaaˉ dsëꜗ kya̱a̱hˊ jnäꜘ,
hiꜙ tooyhˉ goonꜙ läꜙka̱a̱ˉ jeeˊ jwɨɨˉ kaˉlähꜘ.
48Hi̱ˉ heꜘ lä̱ä̱˜ jnäꜘ kihꜗ hi̱ˉ naˉhøøhˊ kinꜙ,
hiꜙ lla̱a̱y˜ jnäꜘ jø̱ø̱hˈ gaˊ kihꜗ hi̱ˉ hneeˉ kya̱a̱hˊ jnäꜘ.
Gaꜙlä̱ä̱hˋ jnäꜘ kihꜗ dsaˉ hä̱ä̱ˈ.
49Heˉja̱ˉ kwanꜙ tiˊhmaahˊ kyahˈ läꜙka̱a̱ˉ jeeˊ tä̱ä̱hˊ dsaˉ,
hiꜙ hänˋ su̱ꜚ kyahꜗ hneˉ DSAˉJØ̱Ø̱Hˈ kya̱a̱nꜙ.
50Haˉ ko̱hꜘ saꜙ gaꜙjmeehˊ gaꜙlɨhꜗ rey hi̱ˉ gaꜙlle̱e̱hˋ.
Läꜙjëꜙ jmɨɨˉ baˊ hnaahꜙ David,
hiꜙ läꜙja̱ˉ kaˉlähꜘ hnaahꜙ saˊju̱ˉ kiyhꜗ.
Currently Selected:
Salmos 18: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
