Salmos 136
136
1Kwaˊ hnähꜘ tiˊhmaahˊ kihˈ DSAˉJØ̱Ø̱Hˈ jnänˋ, jëëhꜘ lluꜗ dsëyꜗ.
Läꜙ maˉngooꜗ ja̱ˉbaˊ heˉ läˉñihꜘ dsëyꜗ kihꜗ dsaꜙ.
2Kwaˊ hnähꜘ tiˊhmaahˊ kihˈ Dio hi̱ˉ jø̱ø̱hˈ gaˊ kihˈ jeeˊ läꜙjë̱ë̱ꜙ dio hi̱ˉ naˉla̱a̱ꜚ ka̱a̱h˜ dsaˉ.
Läꜙ maˉngooꜗ ja̱ˉbaˊ heˉ läˉñihꜘ dsëyꜗ kihꜗ dsaꜙ.
3Kwaˊ hnähꜘ tiˊhmaahˊ kihˈ Dsaˉjø̱ø̱hˈ jnänˋ
hi̱ˉ kye̱ˉ nëˊ kihˈ läꜙjë̱ë̱ꜙ dsaˉka̱a̱hˊ.
Läꜙ maˉngooꜗ ja̱ˉbaˊ heˉ läˉñihꜘ dsëyꜗ kihꜗ dsaꜙ.
4Kwaˊ hnähꜘ tiˊhmaahˊ kihˈ maꜙlaꜙ ja̱a̱ˉ
hi̱ˉ jmeeꜙ heˉ jʉhˉga̱a̱ˉ.
Läꜙ maˉngooꜗ ja̱ˉbaˊ heˉ läˉñihꜘ dsëyꜗ kihꜗ dsaꜙ.
5Kwaˊ hnähꜘ tiˊhmaahˊ kihˈ hi̱ˉ gaꜙjmeeꜘ gyʉʉhˈ jmɨˉgyʉʉꜙ
läꜙko̱o̱ˉ laꜗ hʉʉˊdsëˉ kihꜗ hñiiyꜘ.
Läꜙ maˉngooꜗ ja̱ˉbaˊ heˉ läˉñihꜘ dsëyꜗ kihꜗ dsaꜙ.
6Kwaˊ hnähꜘ tiˊhmaahˊ kihˈ
hi̱ˉ gaꜙjmeeꜘ maꜙ kihˉkihꜗ jmɨɨˉ kya̱a̱hˊ hwaˈ.
Läꜙ maˉngooꜗ ja̱ˉbaˊ heˉ läˉñihꜘ dsëyꜗ kihꜗ dsaꜙ.
7Kwaˊ hnähꜘ tiˊhmaahˊ kihˈ
hi̱ˉ gaꜙjmääꜗ läꜙjë̱ë̱ꜙ hi̱ˉ chooꜙ jeˉ gyʉʉhˈ.
Läꜙ maˉngooꜗ ja̱ˉbaˊ heˉ läˉñihꜘ dsëyꜗ kihꜗ dsaꜙ.
8Gaꜙjmääyꜗ hyooˉ hi̱ˉ kye̱e̱ꜘ gaˊ kihˈ jmɨɨˈ.
Läꜙ maˉngooꜗ ja̱ˉbaˊ heˉ läˉñihꜘ dsëyꜗ kihꜗ dsaꜙ.
9Gaꜙjmääyꜗ sɨhˉ hiꜙ nʉʉꜘ hi̱ˉ hë̱ë̱ꜙ gyʉʉhˈ
hi̱ˉ kye̱e̱ꜘ gaˊ kihˈ hwëˈ.
Läꜙ maˉngooꜗ ja̱ˉbaˊ heˉ läˉñihꜘ dsëyꜗ kihꜗ dsaꜙ.
10Kwaˊ hnähꜘ tiˊhmaahˊ kihꜗ hi̱ˉ gaꜙjngëëhꜗ jo̱o̱ꜘ dsaˉ Egipto
hi̱ˉ la̱a̱ꜗ hi̱ˉ ñʉʉhˉ toˉnëˊ kya̱a̱yˈ.
Läꜙ maˉngooꜗ ja̱ˉbaˊ heˉ läˉñihꜘ dsëyꜗ kihꜗ dsaꜙ.
11Hiꜙ läꜙja̱ˉ kihꜗ hi̱ˉ gaꜙhwë̱ë̱ꜗ dsaˉ Israel hwaꜗ ja̱ˉ.
Läꜙ maˉngooꜗ ja̱ˉbaˊ heˉ läˉñihꜘ dsëyꜗ kihꜗ dsaꜙ.
12Kya̱a̱hˊ ko̱o̱ˉ gaꜙhɨɨyꜘ gooyˉ heˉ be̱e̱ꜘ jwërte
gaꜙhwë̱ë̱yꜗ jeeˊ ja̱ˉ.
Läꜙ maˉngooꜗ ja̱ˉbaˊ heˉ läˉñihꜘ dsëyꜗ kihꜗ dsaꜙ.
13Kwaˊ hnähꜘ tiˊhmaahˊ kihˈ
hi̱ˉ gaꜙnäꜘ jwëˈ chaˊjmɨˉñeehꜚ gyʉ̱ʉ̱ˉ.
Läꜙ maˉngooꜗ ja̱ˉbaˊ heˉ läˉñihꜘ dsëyꜗ kihꜗ dsaꜙ.
14Mahꜗ gaꜙjä̱ä̱yꜗ dsaˉ Israel taꜙ jwëꜘ ja̱ˉ.
Läꜙ maˉngooꜗ ja̱ˉbaˊ heˉ läˉñihꜘ dsëyꜗ kihꜗ dsaꜙ.
15Hiꜙ gaꜙjmeeyꜘ gaꜙju̱u̱ꜗ Faraón kya̱a̱hˊ jmɨɨˉ
hiꜙ läꜙja̱ˉ läꜙjë̱ë̱ꜙ hløøꜘ kya̱a̱yꜗ.
Läꜙ maˉngooꜗ ja̱ˉbaˊ heˉ läˉñihꜘ dsëyꜗ kihꜗ dsaꜙ.
16Kwaˊ hnähꜘ tiˊhmaahˊ kihˈ
hi̱ˉ gaꜙjä̱ä̱ꜗ dsaˉ kya̱a̱ꜗ taꜙ hwaꜗ ki̱i̱ꜙ.
Läꜙ maˉngooꜗ ja̱ˉbaˊ heˉ läˉñihꜘ dsëyꜗ kihꜗ dsaꜙ.
17Hiꜙ gaꜙjngëëyhꜗ dsaˉtaˊ ka̱a̱hˊ.
Läꜙ maˉngooꜗ ja̱ˉbaˊ heˉ läˉñihꜘ dsëyꜗ kihꜗ dsaꜙ.
18Gaꜙjngëëyhꜗ dsaˉtaˊ ka̱a̱hˊ hi̱ˉ hä̱ä̱ˈ jwërte.
Läꜙ maˉngooꜗ ja̱ˉbaˊ heˉ läˉñihꜘ dsëyꜗ kihꜗ dsaꜙ.
19Gaꜙjngëëyhꜗ Sehón hi̱ˉ maˊ la̱a̱ˈ dsaˉtaˊ kya̱a̱ˈ dsaˉ amorreo.
Läꜙ maˉngooꜗ ja̱ˉbaˊ heˉ läˉñihꜘ dsëyꜗ kihꜗ dsaꜙ.
20Hiꜙ gaꜙjngëëyhꜗ Og hi̱ˉ maˊ la̱a̱ˈ dsaˉtaˊ kya̱a̱hˊ hwaꜗ Basán.
Läꜙ maˉngooꜗ ja̱ˉbaˊ heˉ läˉñihꜘ dsëyꜗ kihꜗ dsaꜙ.
21Mahꜗ gaꜙkwëëyhꜗ dsaˉ Israel hwaꜗ kihꜗ dsaˉ heꜘ.
Läꜙ maˉngooꜗ ja̱ˉbaˊ heˉ läˉñihꜘ dsëyꜗ kihꜗ dsaꜙ.
22Hwaꜗ ja̱ˉ gaꜙlaꜗ he̱e̱ꜚ dsaˉ Israel hi̱ˉ jmeeꜙ taˊheꜗ kiyhꜗ.
Läꜙ maˉngooꜗ ja̱ˉbaˊ heˉ läˉñihꜘ dsëyꜗ kihꜗ dsaꜙ.
23Kwaˊ hnähꜘ tiˊhmaahˊ kihˈ
hi̱ˉ gaꜙjëëꜗ haˉ läꜙ maˊ dsaˉngëëꜘ jneˊ.
Läꜙ maˉngooꜗ ja̱ˉbaˊ heˉ läˉñihꜘ dsëyꜗ kihꜗ dsaꜙ.
24Mahꜗ gaꜙlä̱ä̱yꜗ jneˊ kihˈ hi̱ˉ maˊ naˉhøøhˊ jnänˋ.
Läꜙ maˉngooꜗ ja̱ˉbaˊ heˉ läˉñihꜘ dsëyꜗ kihꜗ dsaꜙ.
25Hiꜙ jmeeyꜙ chaˉ heˉ kuhˉhɨ̱h˜ läꜙjë̱ë̱ꜙ hi̱ˉ cha̱a̱ˉ jmɨˉgyʉʉꜙ.
Läꜙ maˉngooꜗ ja̱ˉbaˊ heˉ läˉñihꜘ dsëyꜗ kihꜗ dsaꜙ.
26Kwaˊ hnähꜘ tiˊhmaahˊ kihˈ Dio hi̱ˉ gyaꜗ gyʉʉhˈ.
Läꜙ maˉngooꜗ ja̱ˉbaˊ heˉ läˉñihꜘ dsëyꜗ kihꜗ dsaꜙ.
Currently Selected:
Salmos 136: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
