Salmos 118
118
1Kwaˊ hnähꜘ tiˊhmaahˊ kihˈ DSAˉJØ̱Ø̱Hˈ jnänˋ,
jëëhꜘ lluꜗ dsëyꜗ chaˉmiihˉ.
Läꜙ maˉhnääyꜗ ja̱ˉbaˊ jneˊ gaꜙläꜙjëꜙ johꜘ jmɨɨˊ chaˉ.
2Läꜙja̱ˉ jähˊ hnähꜘ dsaˉ Israel, dsaˉgoon˜:
“Läꜙ maˉhnääyꜗ ja̱ˉbaˊ jneˊ gaꜙläꜙjëꜙ johꜘ jmɨɨˊ chaˉ.”
3Läꜙja̱ˉ kaˉlähꜘ waˊ jähꜘ jo̱o̱ꜘsɨɨhˊ Aarón:
“Läꜙ maˉhnääyꜗ ja̱ˉbaˊ jneˊ gaꜙläꜙjëꜙ johꜘ jmɨɨˊ chaˉ.”
4Läꜙja̱ˉ jähˊ hnähꜘ läꜙjë̱ë̱ꜙ hnähꜘ hi̱ˉ ga̱hꜙ DSAˉJØ̱Ø̱Hˈ jnänˋ:
“Läꜙ maˉhnääyꜗ ja̱ˉbaˊ jneˊ gaꜙläꜙjëꜙ johꜘ jmɨɨˊ chaˉ.”
5Läꜙko̱o̱ˉ maˊ gaꜙjëënꜗ wɨɨꜘ,
gaꜙchu̱u̱nꜗ kya̱a̱hˊ DSAˉJØ̱Ø̱Hˈ kya̱a̱nꜙ.
Gaꜙnuuꜘ bihꜗ kinꜙ,
mahꜗ gaꜙlla̱a̱yꜗ jnäꜘ ko̱o̱ˉ jeeˊ lluˈ chaˉgaˊmiihˉ.
6DSAˉJØ̱Ø̱Hˈ kya̱a̱nꜙ chehꜗ kya̱a̱hˊ jnäꜘ.
Niꜙ miihˉ saꜙ gohnꜙ, ¿heeˉ naˉ leꜘ jmeeꜗ dsaˉ kinꜙ?
7Maꜙraꜙ juˈdsooꜘ, DSAˉJØ̱Ø̱Hˈ kya̱a̱nꜙ chehꜗ kya̱a̱hˊ jnäꜘ,
ja̱a̱ˉ hi̱ˉ heꜘ baˊ kwaꜙ beꜘ kinꜙ.
Lloo˜ ko̱o̱ˉ jmɨɨˊ lihnꜙ kya̱a̱hˊ hi̱ˉ naˉhøøhˊ kinꜙ.
8Lluꜗ gaˊ heˉ kye̱nˊ oˉjø̱hꜙ dsëˉ kihꜗ DSAˉJØ̱Ø̱Hˈ jnänˋ,
läꜙko̱o̱ˉ gaˊ heˉ kye̱nˊ oˉjø̱hꜙ dsëˉ kihꜗ dsaꜙ.
9Lluꜗ gaˊ heˉ kye̱nˊ oˉjø̱hꜙ dsëˉ kihꜗ DSAˉJØ̱Ø̱Hˈ jnänˋ,
läꜙko̱o̱ˉ gaˊ heˉ kye̱nˊ oˉjø̱hꜙ dsëˉ kihꜗ dsaˉtaˊ ka̱a̱hˊ.
10Dsaˉ hi̱ˉ tä̱ä̱hˊ läꜙka̱a̱ˉ jeeˊ jwɨɨˉ gaꜙta̱a̱hˋ läꜙkuˊ läꜙji̱i̱ꜗ kinꜙ.
Pero kya̱a̱hˊ beꜘ kihꜗ DSAˉJØ̱Ø̱Hˈ jnänˋ gaꜙhe̱e̱ꜙ jnihꜘ goˉte˜.
11Gaꜙta̱a̱yhˋ ko̱o̱ˉ hwehˉ läꜙkuˊ läꜙji̱i̱ꜗ kinꜙ.
Pero kya̱a̱hˊ beꜘ kihꜗ DSAˉJØ̱Ø̱Hˈ jnänˋ gaꜙhe̱e̱ꜙ jnihꜘ goˉte˜.
12Gaꜙchiꜗ gaꜙjwa̱a̱yꜗ läꜙkuˊ läꜙji̱i̱ꜗ kinꜙ
läꜙko̱o̱ˉ chiˉjwa̱a̱˜ tahꜗ sër˜.
Gaꜙjmeeyꜘ kinꜙ läꜙko̱o̱ˉ jeeˊ kooˉ chahˈto̱o̱ꜘ.
Pero kya̱a̱hˊ beꜘ kihꜗ DSAˉJØ̱Ø̱Hˈ jnänˋ gaꜙhe̱e̱ꜙ jnihꜘ goˉte˜.
13Maˊ goˉnääyꜘ nëˊ kinꜙ mahꜗ maˊ jwä̱ä̱yˈ jnäꜘ hwaꜗ,
pero DSAˉJØ̱Ø̱Hˈ jnänˋ gaꜙkwaꜘ beꜘ kinꜙ.
14DSAˉJØ̱Ø̱Hˈ kya̱a̱nꜙ la̱a̱ꜗ beꜘ kinꜙ, heˉja̱ˉ hänˋ kiyhˈ.
Heꜘ baˊ hi̱ˉ heꜘ hi̱ˉ lä̱ä̱˜ jnäꜘ.
15Jeeˊ tä̱ä̱hˊ hi̱ˉ llu̱u̱ꜗ,
peerꜙ jë̱ë̱ˉ dsëyꜗ tooyh˜ mɨɨhˊ kihꜗ heˉ gaꜙlɨyhꜗ.
Haˉ ko̱hꜘ heˉ jʉhˉga̱a̱ˉ saꜙ gaꜙjmeeꜘ DSAˉJØ̱Ø̱Hˈ jnänˋ
kya̱a̱hˊ gooyˉ raˉllu̱u̱ꜗ.
16Haˉ ko̱hꜘ saꜙ be̱e̱ꜘ gooyˉ raˉllu̱u̱ꜗ.
Johꜘ heˉ saꜙ jmeeyꜙ kya̱a̱hˊ gooyˉ raˉllu̱u̱ꜗ.
17Saꜙ jngëëhꜗ dsaˉ jnäꜘ, jëë˜ gaˊ jnäꜘ jmɨˉgyʉʉꜙ.
Jmeehnꜚ juuˈ kihꜗ dsaˉ
haˉ läꜙ laꜗ heˉ jʉhˉga̱a̱ˉ heˉ gaꜙjmeeyꜘ kinꜙ.
18DSAˉJØ̱Ø̱Hˈ kya̱a̱nꜙ gaꜙheeyhꜗ jnäꜘ wɨɨꜘ jwërte,
pero saꜙ gaꜙjngëëyhꜗ jnäꜘ.
19Näˊ kinꜙ hoˊhaahˊ jeeˊ dsaˉta̱a̱hˋ hi̱ˉ llu̱u̱ꜗ,
mahꜗ dsaˉhenꜘ kwanˋ tiˊhmaahˊ kihˈ DSAˉJØ̱Ø̱Hˈ kya̱a̱nꜙ.
20Hoˊhaahˊ ja̱ˉ laꜗ kihꜗ DSAˉJØ̱Ø̱Hˈ jnänˋ,
taꜙ jeeˊ dsaˉta̱a̱hˋ hi̱ˉ llu̱u̱ꜗ.
21Kwanˋ tiˊhmaahˊ kyahˈ jëëhꜘ maˉnʉʉhˉ kinꜙ.
Hneˉ baˊ hi̱ˉ lä̱ä̱˜ jnäꜘ.
22Ja̱ˉbaˊ ku̱u̱ˊ heˉ saꜙ gaꜙtɨhꜗ dsëꜗ tëꜙhyahꜙ,
heˉja̱ˉ baˊ gaꜙjä̱ꜘ läꜙko̱o̱ˉ mɨˈku̱u̱ˊ heˉ kyeˉ dsaˉ toˉnëˊ kihˈ ko̱o̱ˉ hneꜗ jʉʉhˉ.
23Dio baˊ heꜘ hi̱ˉ gaꜙjmeeꜘ läꜙja̱ˉ,
heˉ ja̱ˉ naˉ jmeeꜙ dsa̱a̱˜ dsëˉ jneˊ.
24Jmɨɨˊ heˉ maˉjnäꜘ naꜗ, maˉjmeeꜘ DSAˉJØ̱Ø̱Hˈ jnänˋ.
Heˉja̱ˉ waˊ cha̱a̱ˉ jneˊ lluˈ jmɨɨˊ naˈ.
25DSAˉJØ̱Ø̱Hˈ kya̱a̱nꜙ, chu̱u̱nꜘ kya̱a̱hˊ hneˉ, lä̱ä̱ˋ jnäähꜗ.
Ngooꜗ baˊ jnäꜘ chu̱u̱nꜘ kya̱a̱hˊ hneˉ,
mahꜗ miˉjä̱ä̱hꜚ jnäähꜗ.
26¡Heˉ baˊ cheˉ jø̱hˈga̱a̱ˉ hi̱ˉ jaꜗ läꜙhihꜙ kihꜗ DSAˉJØ̱Ø̱Hˈ jnänˋ!
Jeeˊ chihˈ gwahꜙ kihꜗ DSAˉJØ̱Ø̱Hˈ jnänˋ jmeenˊ jʉʉhˉ kiyhꜗ.
27DSAˉJØ̱Ø̱Hˈ jnänˋ la̱a̱yꜗ maꜙraꜙ Dio hi̱ˉ chooꜙ waˊjeˉ jnänˋ.
Kye̱ˉ hnähꜘ gohˈ hmaˉ mahꜗ maꜙnøønˈ maꜙjmeenˊ jʉʉhˉ kiyhꜗ läꜙ gaꜙtëꜘ nëˊ naˊhyooꜘ.
28Hneˉ la̱a̱hꜗ Dio kya̱a̱nꜙ, jnäꜘ kwanˋ tiˊhmaahˊ kyahˈ.
Jmeenˋ jʉʉhˉ kyahꜗ, Dio kya̱a̱nꜙ.
29Kwaˊ hnähꜘ tiˊhmaahˊ kihˈ DSAˉJØ̱Ø̱Hˈ jnänˋ,
jëëhꜘ lluꜗ dsëyꜗ chaˉmiihˉ.
Läꜙ maˉhnääyꜗ ja̱ˉbaˊ jneˊ gaꜙläꜙjëꜙ johꜘ jmɨɨˊ chaˉ.
Currently Selected:
Salmos 118: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
