SAN MATEO 22
22
Ixlhachimoꞌon Dios va tacha xakꞌatan lakxtuklati
(Lc. 14:15-24)
1Ex va chuncha ni Jesús va aaqtaun aqtaychoqol jalaqlhixaqalay kun chivinti yu xtaꞌa jatapastakꞌati, va lakjunil:
2—Yu xalhachimoꞌon ni laktꞌiyan va tacha qayntaun ay jalhachimoꞌonuꞌ yu malakxtuklay istsꞌal, va makaniy kꞌatan. 3Ex ni yucha jalaqmalaqachal ixꞌoqxtamatin para kataꞌal juntaꞌinin yu kataxkavaꞌil. Pero mas lajkijuntaꞌikal, va jantu kataꞌuxamil ni laka kꞌatan. 4Ex taval va aaqtaun jamalaqachachoqol yu alati ixꞌoqxtamatin, va lakjunil: “Kꞌaꞌunapitik yu jalaqxaqalakantacha katamilcha. Yu vayti alinꞌojotacha. Klhinaulcha ixmaqnika ni vakax kun alati jatalhitsukukna yu ayaj talajꞌonta y tachun alinꞌojota. Katamilcha ni laka kꞌatan. Kaꞌalinacha ni jalakxtuklati.” 5Taval yu ixlakjunkan ixtamil ni kꞌatan va jantu katamakal kuenta para katamil, va taꞌal la ixlhitapatsakꞌan. Qayntaun va al laqtsꞌiniꞌ ixtꞌun, yu aqayntaun va al makanaꞌ ixlhitapatsa yu pulhajay. 6Yu alati va talachꞌapachal kun ixꞌoqxtamatin ni maqaliꞌ. Va tus ox talaqalhil y tamaqnil. 7Ex tejkan chuncha kꞌatsal ni ay jalhachimoꞌonuꞌ va ayaj talqamal. Va laqmalaqachal ixtropas para kalaqmaqnil ni anchanu jamaqninin, ex chuncha va jalaqxavanil ixputaulankꞌan. 8Ex chuncha va lakjunil ni ixꞌoqxtamatin: “Tachun alinꞌojotacha para yu xakꞌatan ni lakxtuklati pero yu ixlakjuntaꞌikan ixtamil jantucha paxtoqniy katamil. 9Chavay kꞌapꞌinchꞌipitik taꞌan talapaxtoqta ni lajꞌay lakatinixnan. Kꞌalakꞌunapitik tachun yu kꞌatꞌematꞌik para katamil ni xakꞌatan lakxtuklati.” 10Ex chuncha ni oqxtamatin va taꞌal tiꞌukxuntayanin ni jalakatinixnan. Talhijunil va taꞌayuꞌuncha yu tatemal, mas kaval laktuꞌunun, mas kaval yu jalajꞌoxin. Ex chuncha yu ixpulakna ni laqa chaqa va tus taꞌaqtsamal ni lapanakni.
11Chuncha ni ay jalhachimoꞌonuꞌ va tanuchal ixpulakna va para kalaqlaqtsꞌil yu jalakjuntaꞌikanta. Ex va laqtsꞌil qayntaun lapanaki yu jantu kaꞌulal xalaqchꞌiti ni xakꞌatan lakxtuklati. 12Ex ni yucha va junil: “Laqaj, ¿valiꞌiycha ixtꞌanuyachꞌitꞌa ni aniy mas jantu kꞌaꞌulatꞌi xalaqchꞌiti ni xakꞌatan lakxtuklati?” Ex ni anchanu lapanaki va jantu tsij kanaul, vamun saq ixjunita. 13Ex chuncha ni ay jalhachimoꞌonu va jalakjunil yu ixtatꞌajun jamunun laka mesa, va naul: “Ni anchanu lapanaki kꞌachꞌanchꞌitꞌik y kꞌamaqchꞌitꞌik. Kꞌamaxtꞌutꞌikcha ixlhimaqspaꞌ taꞌan putsꞌista. Ex ancha kaqalhujtsukutachal y ancha kalaktsakꞌayaꞌ ixtatsalati.” 14Laqsaval ayaj qaynlhuu yu jalakjuntaꞌiy pero va lakatsꞌuniy yu jalaksaknan.
Ni Jesús lhisakmikan incha maqskꞌiniy katamapalal xaꞌimpuestos Roma
(Mr. 12:13-17; Lc. 20:20-26)
15Ex chuncha ni fariseos taꞌanchoqolcha. Taꞌaqtaylcha tamalakchꞌantamiy ixchivintikꞌan para katajunil taun jalhisakminti, para kalal kataputislajmal kun ixchivinti ni yucha. 16Ex chuncha tamalaqachalcha lati ixtꞌaltanankꞌan, chꞌantaun kun lati ixlapanakni ni Herodes, va para kataꞌal juninin ni Jesús. Tajunil:
—Jamalaniniꞌ, ni kijnan ijkꞌatsayau ni uxintꞌi laqpꞌutꞌeꞌey yu laqsaval, y vachuꞌ jamalaninin yu laqsaval ixlakatin Dios, y jantu makꞌay kuenta yu tanajun ni lapanakni, y jantu matichun tꞌalhauniy. 17Ex chuncha va knaunau kilaxtaqniu mijatapastakꞌati: ¿tas lhilaycha ni uxintꞌi? ¿Maqskꞌiniy kakmapalniu impuestos yu ay jalhachimoꞌonu Roma, u jantu?
18Pero ni Jesús va niman xtaqnil kuenta va taun jalaqtsꞌintanunti yu talhisakmil. Ex ni yucha va jalakjunil:
—Tꞌuy ukxpuꞌ makꞌayatꞌik, ¿valiꞌiycha kilalaqtsꞌintanuyaucha? 19Kilamasuniu ni tumin yu lhimapalkan impuestos.
Ex chuncha tamasunil aqxtaun tumin. 20Tejkan laqtsꞌil ni Jesús laklhisakmil, va lakjunil:
—Yu aniy ukxpuꞌ, ¿tas ayucha lapanaki ixꞌukxpu? ¿Tas ayucha ixtaqaꞌuti aniy tsꞌoqmukꞌanikanta?
21Ex ni anchanu lapanakni va tanaul:
—Va yu ay jalhachimoꞌonuꞌ Roma.
Ex va chuncha ni Jesús va lakjunil:
—Ex kꞌaxtꞌaqnitꞌikcha yu ay jalhachimoꞌonuꞌ Roma yu yucha paxtoqniy. Kꞌaxtꞌaqnitꞌikcha ni Dios yu Dios paxtoqniy.
22Tejkan chuncha taqasmaklhi ni anchanu lapanakni, va tus vak takꞌatsal, tamakaulcha ni Jesús, va taꞌanchoqolcha.
Talhisakmiy yu tejkan katakujchoqoyaꞌ janinin
(Mr. 12:18-27; Lc. 20:27-40)
23Anchanu julchan va talaqꞌal ni Jesús lati saduceos. Yuꞌuncha ixtanajun ni jantu takujchoqoy yu janinin. Ex chuncha talhisakmil ni Jesús, va tajunil:
24—Jamalaniniꞌ, ni Moisés kintajunin yu tejkan niy qayntaun joꞌati yu lakxtuklatacha y jantu makajun sasꞌatꞌan, ex yu ixlaqaj katꞌatsukuchoqol ni anchanu tiyau para kalaklhitsukunil sasꞌatꞌan ixlaqaj yu nitacha. 25Ex chuncha, taun julchan ixꞌalin pumatujun tꞌalaqaunin. Yu xajayaꞌ va lakxtuklal, pero niman nil. Jantu kalhitsukul sasꞌatꞌan. Ex chuncha yu ixanati va tamakaunichoqolcha ixpꞌisaqa. 26Taval ixpꞌisaqa vachu va chun xajchal. Ex yu xapumatꞌutunuꞌ vachu va chun lhitapasal. Tus talaqatapasaꞌol ni anchanu pumatujun tꞌalaqaunin. Va taniꞌol. Jantu matichun kalhitsukul sasꞌatꞌan. 27Ex taval vachucha nil ni xanati. 28Ex va chuncha, tejkan katakujchoqoyaꞌ ni janinin, ¿ex tasꞌayucha kunaꞌ ixapay ni anchanu xanati? Ni anchanu xanati tus laktꞌalakxtuklaꞌol.
29Ex ni Jesús lajqaltayl, va lakjunil:
—Ni uxiknankꞌan jantu pꞌastꞌakꞌatꞌik yu naunatꞌik. Jantu mispꞌayatꞌik tacha tsꞌoqkanta la ixchivinti Dios. Vachu jantu mispꞌayatꞌik tacha junita ixtapꞌasta ni Dios. 30Tejkan katakujchoqoyaꞌ ni janinin, ex ni yuꞌuncha jantucha katalakxtuklayaꞌ. Va katajunaꞌ tacha ixmayulnin Dios laktꞌiyan. 31Chavay tacha lhichꞌivinanatꞌik incha ni janinin katakujchoqoyaꞌ, ¿Jantu aqtaun pꞌutꞌeꞌeyatꞌik la ixchivinti Dios yu naul ni yucha? Va inchine naul: 32“Kitꞌin va ixDios kunita ni Abraham, vachu ixDios kunita ni Isaac, vachuꞌ ixDios kunita ni Jacob.” Chuncha ni yucha jantu ixDioskꞌan kaval ni janinin. Va ixDioskꞌan junita yu takujta.
33Tejkan chuncha taqasmaklhi ni lapanakni va tus vak takꞌatsal por yu ixmalaniy ni Jesús.
Yu lhinaunkan yu apalay maqskꞌiniy
(Mr. 12:28-34; Lc. 10:25-28)
34Ex chuncha tejkan takꞌatsal ni fariseos ni Jesús va tus vak lakmakal ni saduceos, ex ni yuꞌuncha va tataqxtoqlhi. 35Qayntaun ni yuꞌuncha va ixmasuy ixlhachimoꞌonkꞌan. Ex ni yucha va ixlaqtsꞌintanuputun ni Jesús, va lhisakmil:
36—Jamalaniniꞌ, ¿tas ayucha yu apalay ay yu lhinaunkan?
37Ex ni Jesús va junil:
—“Kꞌaꞌachꞌanin miJalhachimoꞌonuꞌ Dios kun tachun melhanuti ali tachun mijatsukunti ali tachun mijatapastakꞌati.” 38Ni aniy yu apalay maqskꞌiniy y yucha va yu xapꞌunaj lhinaunkan. 39Yu ataun lhinaunkan va laycha vachu va chun. Va inchine najun: “Kꞌapꞌaxkꞌatꞌi mintꞌamachaqaꞌ tacha pꞌaxkꞌakꞌan milaqꞌaman.” 40Yu aniy laꞌatꞌuy chivinti yu lhinaunkan, yuꞌuncha va tacha xaputayan tachun ixlhachimoꞌon ni Moisés, ali tachun yu maqancha ixtalaqputeꞌey ixchivinti Dios.
¿Kun taꞌayucha lapanaki mintachal ni Cristo?
(Mr. 12:35-37; Lc. 20:41-44)
41Ex chuncha tejkan ancha ixtataꞌaqxtoqnun ni fariseos, laklhisakmil ni Jesús, 42va lakjunil:
—Ni uxiknan, ¿tisuncha lhipꞌastꞌakꞌatꞌikcha ni Cristo? ¿Kun taꞌayucha mintachal?
Ex ni yuꞌuncha va tajunil:
—Va kun David mintachal.
43Ex ni Jesús va lakjunil:
—¿Ex valiꞌiycha va machivinil ni Espíritu Santo ni David para kamapaqaꞌul ni Cristo tacha ixJalhachimoꞌonu? Ni David va naul:
44Ni Jalhachimoꞌonu Dios junil kiJalhachimoꞌonuꞌ:
“Kꞌatꞌaꞌulcha aniy la kilhijakanaj,
tus tejkan kaklaqmaqalhajaꞌoyaꞌ mintꞌalaxkayan.”
45Chuncha incha ni David va mapaqaꞌuy Jalhachimoꞌonuꞌ yu Cristo, ¿ex tas pulaycha kaval qayntaun yu kaminchal kun yucha?
46Jantu matichun lay kaqaltayl. Ex ni anchanu julchan jantucha matichun katapujul katalhisakmil tuꞌuchun.
Currently Selected:
SAN MATEO 22: tpt
Highlight
Share
Copy
Want to have your highlights saved across all your devices? Sign up or sign in
© 2004,Wycliffe Bible Translators, Inc. All rights reserved.
