LUUKAS 4

Gu jaꞌook na tɨix maiꞌchim kaꞌ gu Jesuus

(Mt. 4:1‑11; Mr. 1:12‑13)

1Baꞌ miꞌ Jordaan Ak nat jum bakua gu Jesuus, gɇꞌ bhaan jum tajaa gux Dhuuduꞌ kam jix Uañ Iiꞌmdaꞌ. Miꞌ dhɨr baꞌ pu sɨlh mu jaꞌk bhɨi maaꞌn kap gampɨx jix chu gak kɨr na paiꞌ pu cham jaroiꞌ oirɨ, na guꞌ gux Dhuuduꞌ kam jix Uañ Iiꞌmdaꞌ pɨx nat puiꞌ jurtuda. 2Pu kaiꞌñkam pɨx mu jaꞌk bhɨi nat miꞌm saabum gook ooꞌm tanoolh gam gu bɨx chukaaꞌ, pu cham tuꞌ nat juu. Baꞌ nat paiꞌ pu ba aich gu jaꞌkbuiꞌ tanoolh gio gu bɨx chukaaꞌ nam saab, gu jaꞌook miꞌ ba ai. Tɨi ɨlhdhat na miꞌ maiꞌchiaꞌ gɨt na kapbhaiꞌ miꞌ kax bhioꞌ, 3jup tɨtda:

―Noꞌp sɨlhkam aap Dios jir maraaꞌn, eap jaꞌp tɨɨꞌn dhi jodai na paan jup jum duñiaꞌ noꞌt moo puiꞌm duu.

4Baꞌ gu Jesuus jup tɨtda:

―Jax dhui nap jum kaiꞌch miꞌ na mɨt paiꞌ tu uaꞌnak gu bɨjɨk dɨr kam nax ioꞌm jum aaꞌ na miꞌ puiꞌ jimdaꞌ gu maaꞌnkam na jax jix aaꞌ gu Dios na baꞌx bhaiꞌ tu jimdaꞌ, cham tuꞌ gu tuꞌ koiꞌ kɨꞌn.

5Miꞌ dhɨr baꞌ maaꞌn oidhaꞌ kuuꞌ am xi baidhak xi chu joojoiꞌñchuda bɨɨx kap na jɨꞌx gɇꞌgɇr jir kikcham na jɨꞌx jir oiꞌñgaꞌn. 6Baꞌp tɨtda:

―Jiñ aꞌm jup tu tuꞌiiꞌ bɨɨx dhiꞌ nap jɨꞌk tuꞌ nɨiꞌñ, pu bɨjɨk dɨr jiñ aꞌm tu bii nat dɨr yaꞌ ji tum kikchamta dhi oiꞌñgaꞌn bhaan. Baꞌ aañ yaꞌ dɨr jaꞌp jaꞌk puiꞌp jix bhaaiꞌ nañ tu makiaꞌ gu jaroiꞌ nañ ɨlhiiꞌñdhaꞌ, 7puiꞌ na jax aap tum makiaꞌ iñ noꞌ pich miꞌñi jaꞌp jum oꞌlhia kɨꞌn kɨkbok puiꞌ xi chɨi nañ aañ jir gɇꞌkam. Bɨɨx jum aꞌm ji chu biꞌyaꞌ.

8Baꞌ gu Jesuus jup tɨtda:

―Jax dhui na guꞌp jum kaiꞌch ɨp miꞌ na mɨt paiꞌ tu uaꞌnak gu bɨjɨk dɨr kam na dai gu Dios jix bhaiꞌ nach gɇꞌkamtuꞌndaꞌ, cham tuꞌ jumai. Dai guiꞌ pɨx jach jir tujuandam tugiꞌñ kaꞌ.

9Baꞌ bhammɨ jaꞌk jup baidhak Jerusaleen bhaiꞌ na paiꞌ kɨɨk gu gɇꞌ chiop, kuugaram xi kɨɨsak jup tɨtda:

―Eap yaꞌ dɨr mu tuudaiñ noꞌ sɨlhkam jum aꞌm tɨ nɨidhim gu Dios nap saak puiꞌr maraaꞌn. 10Gio guꞌp jum kaiꞌch miꞌ paiꞌ na mɨt tu uaꞌnak gu bɨjɨk dɨr kam:

Gu Dios bha ja jootsaꞌ gu noonbiꞌñ nam jum nuukdaidhaꞌ gammɨjɨ na cham tuꞌm duñiaꞌ.

11Tɇꞌkob jum bapmiꞌñdhidhaꞌ am nap baꞌ cham miꞌ paiꞌ jax chuꞌm jodai chaꞌm jutbui ɨlhiaꞌ.

12Baꞌ gu Jesuus jup tɨtda:

―Jax dhui nap jum kaiꞌch ɨp sia miꞌ na mɨt paiꞌ tu uaꞌnak gu bɨjɨk dɨr kam nax xidhuu noꞌ jaroiꞌ mamaiꞌchɨk gu Dios, na guꞌr gɇꞌkam.

13Baꞌ cham ka bhaaiꞌ gu jaꞌook na jax dhui ka maiꞌchiaꞌ gu Jesuus, puiꞌ ma jii ɨp gio. Ku guꞌ gatuuk gio tɨip maiꞌchiaꞌ ji.

Na kiaꞌpɨx ba ji chu ja aꞌgidhaꞌ gu Jesuus gu jaꞌtkam miꞌ Galilea

(Mt. 4:12‑17; Mr. 1:14‑15)

14Baꞌ gu Jesuus giop ba jii mu jaꞌk Galilea, pu maaꞌn na jax gɇꞌ bhaan tajaañixchuꞌndaꞌ gux Dhuuduꞌ kam jix Uañ Iiꞌmdaꞌ, gam na bɨxchuꞌ bax chu bhaaiꞌ na pu tu duñiaꞌ gu tuꞌ na jax ɨlhiiꞌñdhaꞌ. Baꞌ bɨɨx na jɨꞌx Galilea dɨbɨɨr bhaan bipioꞌ pɨx jaꞌx puiꞌ kaiꞌchdhaꞌ am gu jaꞌtkam na mu paiꞌ joidham jix bhaiꞌ tu bua gu Jesuus. 15Mi jaꞌp baꞌ pu tu ja aꞌgiꞌñdhaꞌ chichiop gu Israel kam jaꞌtkam nam paiꞌ jax jum jumpaꞌndaꞌ nam tu daandaꞌ buiñor gu Dios. Baꞌ joidham kɇɇkɇꞌ am, pɨx jix bhaiꞌ aaꞌndaꞌ am.

Gu Jesuus nam cham kɨɨgalhdhaꞌ gu jaꞌtkam miꞌ Nasareet

(Mt. 13:53‑58; Mr. 6:1‑6)

16Miꞌ dhɨr baꞌ mu jaꞌk ba ai gu Jesuus Nasareet na paiꞌ gɨꞌlhix. Baꞌ nat giop bam ai nam paiꞌ dhuuk cham tu juandaꞌ dai gu Israel kam jaꞌtkam, mu ba ai chiop nam paiꞌm jumpaꞌndaꞌ ɨp nam tu daandaꞌ gu miꞌ kam. Baꞌ xi chia mɨt na kɨkboi xi ja jiñkaixdhaꞌ gu ñioꞌkiꞌñ gu Dios, 17xi maa mɨt gu uꞌuan guiꞌ nat Isaiiyas tu uaꞌnak, guiꞌ na bɨjɨk bhaankam gu Dios tu ja aꞌgidhimɨk gu jaꞌtkam. Baꞌ nat bhaiꞌ ji sɨlh, ba tɨɨ miꞌ na paiꞌ jaꞌpnim kaiꞌch:

18Gux Dhuuduꞌ kam jix Uañ Iiꞌmdagaꞌn gu Dios jiñ aꞌm tajaañix,

nat guꞌ dɨɨlh gu Dios jiñ aꞌm tɨ tɨɨgɨk jiñ tajaañ nañ baꞌ ya jaꞌp tu ja aꞌgidhaꞌ gux bhaiꞌm kaiꞌchdham ñioꞌkiꞌñ guiꞌ nam soiꞌ tuꞌiiꞌ nam cham tuꞌ biaꞌ ni jɨꞌx,

gio guiꞌ nam jɨꞌk kuup jañ xi ja doꞌñchoi xi ja chiñiaꞌ nam jix bhaiꞌm taatɨt mu jaꞌp ba oipodaꞌ,

gio guiꞌ nam cham ñiññia kaꞌ nañ tu ja tɨɨꞌñchodaꞌ.

Bɨɨx guiꞌ nam jɨꞌk jum tulhiiñ jañ jix bhaiꞌ ja duñiaꞌ,

19xi ja aagiꞌñdhaꞌ iñ nat ampɨx jum ai oidhaꞌ nat jix joiꞌmdak ja aꞌm ba tɨ tɨɨ gu Dios.

20Baꞌ nat tɨɨmok gu Jesuus nat ja jiñkaix, giop xi ñansapak gu uꞌuan mu jaꞌk xi maakak guiꞌ na miꞌr tujuandam chiop mi jaꞌp ji dhaibu ɨp gio. Guꞌ ji nam guꞌ bha tɨ nɨiꞌñ gu jaꞌtkam nam tɨ nɨɨra na ja aagiꞌñdhaꞌ na jax kaiꞌñkam jup jum kaiꞌch miꞌ nat paiꞌ ja jiñkaix. 21Baꞌp ja tɨtda gu Jesuus:

―Dhiꞌ na pimɨt jɨꞌk jax kai na ñich jam jiñkaix gu ñioꞌkiꞌñ gu Dios, xib yaꞌ puiꞌ ba tu tuiꞌdhiꞌ.

22Baꞌ pɨx jix bhaiꞌm taat am bɨɨx gu jaꞌtkam nam miꞌp tuꞌiiꞌ nam joidham kɇɇ na tu aꞌga gu Jesuus, pɨx jup jum tɨ tɨtda am:

―¿Dhiꞌ aa gu Josee gu maraaꞌn?

23Baꞌ gu Jesuus jup ja tɨtda ɨp gio:

―Jaꞌp japim dho chiñ chɨɨdaꞌ nam jax kaiꞌchdhaꞌ yaꞌ gu jaꞌtkam na saak jix bhaaiꞌ na dɨɨlh xim duaꞌñdhai noꞌ bax kaꞌook gu jaroiꞌ nax maatɨt ja duduadhiꞌñdhaꞌ gu jaꞌtkam. Gam chi jaꞌpni: “Puiꞌ na chich jax tɨ kai na pich joidham jix bhaiꞌ tu duu mu Kapernaum, puiꞌp jup xi chu duñiaꞌ yaꞌm dɨrbaꞌ am na pich paiꞌ gɨꞌɨɨr.”

24Muiꞌ xi chu ja aꞌgiꞌñchuꞌ gu Jesuus, jup ja tɨtda:

―Jax dhui nam guꞌ cham jɨɨgiꞌñdhaꞌ gu jaꞌtkam gu jaroiꞌ noꞌ tɨi bhaankam gu Dios tu ja aꞌgiꞌñ gu ñioꞌkiꞌñ noꞌr miꞌ kam, aañ moo yaꞌ pu jam tɨtda. 25Jax japim gix maat janoꞌ na gu Eliiyas yaꞌ xi oilhimɨk na puiꞌ bhaankam jup tu aꞌgimɨk gu Dios, maaꞌnnim bo nat yaꞌ giilhim bhiogiꞌ ma jii bɨɨx kap na jɨꞌx jir Israel, cham duuꞌn baik oidhaꞌ daman taak. Muiꞌx jaiꞌch kaꞌ am guꞌ tɨi gu dɨꞌdɨlhdhɨm uꞌuub yaꞌ dhi Israel, 26guꞌ pɨx ji nat guꞌ gu Dios mummɨ jaꞌk joot gu Eliiyas na paiꞌ Sarepta tɨ tɨɨꞌ, na miaꞌn bipioꞌ gama jaꞌk na paiꞌ Sidoon jup tɨ tɨɨꞌ nax ioꞌm muiꞌ paꞌ daaꞌñxim jir kikcham, na guꞌ miꞌx jaiꞌch kaꞌ maaꞌn gu ubii dɨlhdhɨm. Tɨɨꞌ na guꞌr maakam jaꞌk kam gu dɨlhdhɨm ubii nat buiñor joot gu Dios gu Eliiyas, cham tuꞌ iam jir Israel kam. 27Gio janoꞌ na gu Eliseo puiꞌ bhaankamuꞌn gu Dios yaꞌp tu ja aꞌgidhimɨk gu jaꞌtkam, janoꞌ giilhim ma tu ai guiꞌ na tootolhidhat gakiidhaꞌ gu ja tutkuꞌ gu jaꞌtkam bɨɨx kap yaꞌ na jɨꞌx jir Israel. Tɨɨꞌ nat guꞌ gu Namaan pɨx duaꞌñ nar mummɨ jaꞌk kam Siiria, ni kut iam maadɨt gu yaꞌ kam Israel duaꞌñ.

28Baꞌ na mɨt puiꞌ kai, giilhim bhaiꞌ ji bhaak jamɨt bɨɨx guiꞌ nam jɨꞌk miꞌp tuꞌiiꞌ. 29Daagɨk jamɨt xi buusaidhak dɨɨrap bhaiꞌ bhɨich gu taiꞌ na paiꞌ taiꞌgɨm jir kikcham, nammɨ baas dɨr jaꞌp amuub kookbaꞌn ba aichdhidhat am na paiꞌx babaaꞌ nam sap baꞌ miꞌ dhɨr mɨjɨmmɨ xi ñuiꞌññaꞌ gɨt. 30Guꞌ ji nat guꞌ gu Jesuus miꞌ buus ja saagiꞌñ, gaammɨjɨ ji dhuu.

Gu Jesuus na ba duaꞌñdhaꞌ maaꞌn gu maaꞌnkam na kax ñaanbiꞌ kaꞌ

(Mr. 1:21‑28)

31Mu jaꞌk baꞌ pu bhɨi gu Jesuus Kapernaum na paiꞌ Galilea bhaan bipioꞌ gu dɨbɨɨr, baꞌ miꞌ pu tu ja aꞌgiꞌñdhaꞌ gu jaꞌtkam chiop janoꞌ nam paiꞌ dhuuk cham tu juandaꞌ dai gu Israel kam jaꞌtkam. 32Baꞌ joidham kɇɇkɇꞌ am, na guꞌx gɨꞌm tu ja aꞌgiꞌñdhaꞌ, cham tuꞌ jaaxmadaꞌ kɨꞌn.

33Baꞌ miꞌ dhi chiop maaꞌn miꞌx jaiꞌch kaꞌ gu maaꞌnkam na bhaan jup tuiꞌñgɨdaꞌ gu cham kɨɨꞌ iiꞌmdaꞌ, ampɨx puiꞌx ñaanbiꞌ kaꞌ. Baꞌ gɇꞌ kɨꞌn bhaiꞌ dhɨr jaꞌp muiꞌ ba jiiñ na ka tu aꞌga gu Jesuus, jup kaiꞌch:

34―¿Jax japich bhaiꞌ bach dhoodam Jesuus Nasareet kam? ¿Nap yaꞌch koodaꞌ aa? Cham ji nap puiꞌch buadaꞌ. Jix maat iñ guꞌ nap aap jir jix uañ nap bhaankam ya oirɨ gu Dios.

35Guꞌ ji nat guꞌ gu Jesuus pu ñiok, jup tɨtda:

―¡Chaꞌp ñiokdaꞌ cham kɨɨꞌ iiꞌmdaꞌ nap bhaiꞌ bhaan baaxchugɨt naanbichuꞌn dhiñ jaduuñ! Mup buusniaꞌ bhaiꞌ dhɨr, chaꞌp bhaiꞌ pu tuiꞌñgɨdaꞌ.

Baꞌ mi jaꞌp ji ia gu maaꞌnkam ja taagiob guiꞌ nam miꞌp tuꞌiiꞌ, nat guꞌ gu cham kɨɨꞌ iiꞌmdaꞌ puiꞌ xi dhoodak nat baꞌ pɨk ba buus bhaiꞌ dhɨr bhaan. Gio baꞌ bhaiꞌp ji bam gu maaꞌnkam, dai na bax kɨɨꞌ, cham tuꞌ ka naanbiꞌ. 36Baꞌ gu jaꞌtkam giilhim bax chotdon am bɨɨx nam jɨꞌk miꞌp tuꞌiiꞌ nam jax tɨ nɨiꞌñ, pɨx jup jum tɨ tɨtda am dɨɨlh:

―¡Aa guꞌx ioꞌm jir gɇꞌkam ji bak jia dhich jaduuñ nam baꞌ gam cham kɨkɨɨꞌ iꞌiiꞌmdaꞌ jix jɨɨgiꞌñ na ja ñiokiꞌñ!

37Baꞌ naiꞌ pɨx jaꞌx puiꞌ tum kaiꞌchdhaꞌ na jɨꞌx jir Galilea na mu paiꞌ joidham tu buadaꞌ gu Jesuus.

Gu Jesuus na ba duaꞌñdhaꞌ gu daadaꞌn gu Simoon Peegro

(Mt. 8:14‑15; Mr. 1:29‑31)

38Baꞌ miꞌ dhɨr nat buusnɨk chiop gu Jesuus, sɨlh jii gama jaꞌk na paiꞌ tu baꞌaak gu Simoon Peegro. Guꞌ ji na guꞌ janoꞌ pɨk jup jix kaꞌook toiñdhiꞌ kɨꞌn gu daadaꞌn gu Simoon Peegro, mɨjɨ boꞌ baꞌm bakxidhat baꞌk chɨr. Baꞌ bɨɨx dhɨt soiꞌ ba tɨtda am gu Jesuus guiꞌ nam mi oiꞌdhaꞌ na iam duaꞌñdhaꞌ. 39Baꞌ muiꞌ ji ai ɨp gu Jesuus amuub na paiꞌ boꞌ, baꞌ bɨɨpɨꞌ xi mugiaꞌtɨk nat baꞌ miꞌ dhɨr xi ñiok gu koꞌkdaiꞌ na toiñdhichuꞌn. Jix kɨɨꞌp jum duu gu daadaꞌn gu Simoon, miꞌ dhɨr dai nat bamgɨk ba tu ja onbaiꞌ.

Gu Jesuus na muiꞌ ja duduaꞌñdhaꞌ gu jaꞌtkam

(Mt. 8:16‑17; Mr. 1:32‑34)

40Baꞌ nat paiꞌ pu ba jur, nat ampɨx bhɨjɨ ji bhiꞌñ gu tanoolh, muiꞌ gu jaꞌtkam pɨx miꞌ ji ai mɨt na paiꞌ gu Jesuus ji ja baidhat gux kakoꞌkkam bɨɨx aixim tuꞌm na ja ɇɇkaꞌ na baꞌ ja duduaꞌñdhaꞌ. Baꞌ gu Jesuus pɨx jup ji ja duduaꞌñ, dai na bhaiꞌ pɨx xi ja daꞌngim. 41Muiꞌ mɨt miꞌp ja aich guiꞌ nam ampɨx jix ñanaanbiꞌ kaꞌ na ja aꞌm jup tuiꞌñgɨdaꞌ gu cham kɨkɨɨꞌ iꞌiiꞌmdaꞌ. Baꞌp tɨtdadaꞌ am gu Jesuus gɇꞌ kɨꞌn:

―Aap jir diꞌ gu maraaꞌn gu Dios.

Guꞌ ji na guꞌ maaꞌn na jax ñiokdhai pu maiꞌ jootsaꞌ gu Jesuus bhaiꞌ dhɨr bhaan gu maaꞌnkam, na guꞌ dhiꞌ pɨx na puiꞌ jurtuꞌnkaꞌ na baꞌ miꞌ dhɨr puiꞌp kaiꞌchdhaꞌ. Jix maat am guꞌ nar diꞌ guiꞌ na bhaankam ya oirɨ gu Dios.

Gu Jesuus na naiꞌ tu ja aꞌgidhidhaꞌ gu jaꞌtkam

(Mr. 1:35‑39)

42Baꞌ cham jaroiꞌ ji aaꞌñdhak gu Jesuus kapbhuimuk ba jii miꞌ dhɨr na paiꞌ muiꞌ daaꞌñxim jir kikcham, nammɨ jaꞌk bhɨi maaꞌn kap na paiꞌ cham jaroiꞌ oirɨ. Guꞌ ji na mɨt guꞌ naiꞌ ji gaꞌngimɨ gu jaꞌtkam na mɨt paiꞌ dhuuk tɨɨ na cham tu jaiꞌch, mummɨ ba ji bubua mɨt na paiꞌ ka oirɨ. Baꞌ tɨix aagɨt am nam gɨt gio jaꞌk jup buaꞌ, guꞌ ji na guꞌ cham aaꞌ gu Jesuus, 43jup ja tɨtda:

―Jax dhui nat guꞌ aañ pu kaiꞌñkam bhañ joot gu Dios nañ bɨɨx kap ja aaꞌñdhaꞌ gu jaꞌtkam nat jix ja joiꞌmdak ja aꞌm ba tɨ tɨɨ, sia ku guꞌx ioꞌm jir gɇꞌkam.

44Baꞌ naiꞌ jaꞌp pu tu ja aꞌgiꞌñdhaꞌ gu Jesuus gu Israel kam jaꞌtkam bɨɨx kap chichiop nam paiꞌm jumpaꞌndaꞌ nam tu daandaꞌ.

Currently Selected:

LUUKAS 4: stp

Highlight

Copy