Mateo 26

Myaan re zha diiz naa xomod ten zha Jesús

(Mr. 14:1‑2; Lc. 22:1‑2; Jn.11 :45‑53)

1Leettsa ngwalo nzhab Jesús reta koree, tsa nzhab Jesús lo re zha kuu ngeteed lo Jesús:

2―Reta goo ne, nzhak falt chop wiz gak ani Paskw, lee na Kuu Myaad Ngok Men, taa zha na lo re zha nak tsiin par kee zha na lo kruz.

3Ne re wiza lee re ngwleyy kuu nabee lo re ngwleyy, ne re zha gol zha Israel, mkaltaa re zha liz Caifás kuu nak ngwleyy kuu nabee lo reta ngwleyy. 4Ne myaan re zha diiz naa xomod ten zha Jesús xlaanta, ne kuth zha Jesús. 5Per lee re zha nzhab:

―Tsowtaay lo ani, tsa yiit re men neʼaa.

Thib ngot mlath aseyt kuu chul ndetsi yek Jesús

(Mr. 14:3‑9; Jn.12 :1‑8)

6Tsa nda Jesús yez Betania liz Simún kuu mzhaak yiz kuu nteyaaz kwerp zha. 7Tsa mbig thib ngot kuu ndyaadno thib bot ke kuu le alabastr, kuu tseta nzo aseyt kuu kwathoz chul ndetsi ne kwathoz naap. Ne leettsa lee Jesús ndob roo mes, lee ngota mlath aseyt yek Jesús. 8Leettsa mwii re zha kuu ngeteed lo Jesús kona, tsa mnayii re zha ne mndelo zha mbez zha:

―¿Chebee tbaata mlux koree? 9Ngok gadoy naap, ne garoo temi gataa lo re zha prob.

10Jesús mbin koree, kona nzhab Jesús:

―¿Chebee ntsalzhoo goo ngot ree? Lee kuu mtsow ngot lon nak thib kuu wen. 11Tak lee re zha prob thibka nzi kon goo, ne tak tsow goo wen lo zha leettsa nlaaz goo, per lee na ndotʼn lo goo thibka. 12Lee ngot ree mtsow kuu tak lo ngot tsow ngot, mloo ngot aseyt kwerp da leettsa terka kaats zha na. 13Wlipaa na nin lo goo, dita lo yezlyu ta taa zha kwent Diiz Chul chaan da, noga teteth zha kuu mtsow ngot ree, tsa telaaz zha ngot.

Lee Judas myaan diiz kon re zha kuu nayii ne Jesús

(Mr. 14:10‑11; Lc. 22:3‑6)

14Judas Iscariote, kuu nak thib zha lo re tsiibchop zha kuu ngeteed lo Jesús, ngwa lo re ngwleyy kuu nabee lo re ngwleyy. 15Ne nzhab Judas lo re zha:

―¿Plal kix goo kan, tsa tan Jesús lo re goo?

Tsa myaan re zha diiz, ne mndaa zha galbtsii temi plat lo Judas.

16Ne leeka ora lee Judas mkwaan naa xomod taa Judas Jesús lo re zhaʼa.

Rtsee bluz kuu ndow Jesús

(Mr. 14:12‑25; Lc. 22:7‑23; Jn.13 :21‑30; 1Co.11 :23‑26)

17Ne lee wiz ner ani Paskw, ani kuu nzhow zha pan kuu nyoot lebadur, lee re zha kuu ngeteed lo Jesús mbig ne mnaabdiz lo Jesús ne nzhab:

―¿Pa nlaaza texkwaa nee rtsee Paskw dow rtseeʼaa?

18Lee Jesús mkab ne nzhab:

―Gwa goo yez, liz thib zha kuu nlebeen, ne gab goo lo zha: “Lee maestr ne: Mzin gaxa or da. Liza wun rtsee chaan Paskw kon re zha kuu ngeteed lon.”

19Tsa lee re zha kuu ngeteed lo Jesús mtsow zha taxal nzhab Jesús lo zha. Ne mdexkwaa zha rtsee Paskw. 20Ne leettsa ngoo yaal yezlyu, lee Jesús ndob roo mes kon re tsiibchop zha kuu ngeteed lo Jesús. 21Ne leettsa ngeyow rtsee re zha, nzhab Jesús:

―Wlipaa na nin lo goo, leeka thib goo tan lo re kuu nayii nen.

22Tsa lee re zha kuu ngeteed lo Jesús kwathoz nabil ngoo leettsoo zha, ne mndelo zha mnaabdiz zha thibga thibga zha lo Jesús, ne nzhab zha:

―¿Chu nay? Zha Nabee.

23Jesús mkab ne nzhab:

―Thib zha kuu ntenit pan leen thibka yann kon nay, zhaʼa taan lo re zha kuu nayii nen. 24Lee na Kuu Mzin Ngok Men, ndoblo ridʼn kwathoz yalti taxal nzhab lo xkeets Diox, per kwathoz nalatt rid zha kuu taan lo re zha kuu nayii nen. Mas wen gagalt zhaʼa.

25Tsa lee Judas kuu mndaa Jesús lo re zha kuu nayii ne Jesús, mnaabdiz ne nzhab lo Jesús:

―Maestr, ¿chu nay?

―Lu ney ―nzhab Jesús.

26Ne leettsa ngeyow rtsee re zha, lee Jesús mzhen pan, ne mndaa Jesús texkix lo Diox, ne mtsow rol Jesús pan, ne mndaa Jesús pan lo re zha kuu ngeteed lo Jesús, ne nzhab Jesús:

―Dow goo, koree nak beel da.

27Tsaraa mzhen Jesús bas kuu nzo xit ub ne mndaa Jesús texkix lo Diox, ne mriid Jesús bas lo re zha kuu ngeteed lo Jesús, ne nzhab Jesús lo re zha:

―Wii goo xit ub kuu nzo leen bas ree. 28Koree nak ren da, ne leey nloo wli nak trat kub kuu mtsow Diox lo goo. Leey xon tsa tuyʼn falt kwathoz men. 29Per wlipaa na nin lo goo, gut raa na xit ub ree, asta wiz kuu leettsa gun kuu kub kon re goo ta nabee Xutʼn.

Jesús nzhab lo Pey: “Lu gab nlebeeta na”

(Mr. 14:26‑31; Lc. 22:31‑34; Jn.13 :36‑38)

30Bluz leettsa ngwalo mbil re zha thib himn, tsa mroo re zha nda zha yek yii Olib. 31Tya nzhab Jesús lo re zha kuu ngeteed lo Jesús:

―Nal yaal ree lee re goo laan, tak lee lo xkeets Diox nzhab: “Kuthʼn zha kuu nkenap mbak zhiil, tsa lee re mbak zhiil raats”. [Zac. 13:7] 32Per bluz leettsa roban na, nerʼn ya lo re goo yezlyu Galilea.

33Tsa lee Pey nzhab lo Jesús:

―¡Tegal reta zha laa lu, per lee na thitanax latʼn lu!

34Lee Jesús nzhab lo Pey:

―Wlipaa na nin loʼa, leeka nal yaal ree, or terka kwez ngite, leeʼa gab tson welt nlebeeta na.

35Tsa lee Pey nzhab:

―Tegal gathʼn kon lu, per gabtʼn nlebeetʼn lu.

Ne reta re zha kuu ngeteed lo Jesús leeka tata nzhab zha.

Jesús mndediz lo Diox leen alo Getsemaní

(Mr. 14:32‑42; Lc. 22:39‑46)

36Tsa nda Jesús kon re zha kuu ngeteed lo Jesús leen alo Getsemaní, ne nzhab Jesús lo re zha:

―Nzhee brin goo, leen nda tediz lo Diox baa.

37Ne ndano Jesús Pey, ne rop xgann Zebedeo kuu nak Juan ne Santiag, tsa mndelo mndebi leettsoo Jesús ne nalatt ngoo leettsoo Jesús. 38Tsa nzhab Jesús lo re yon zha:

―Kwathoz nalatt nzo leettsoon, taxal zha ndeyatha. Yaanka goo nzhee ne gatta goo tsa wii goo kuu gak.

39Tsa lee Jesús nda tut kwat, ne mtobxub Jesús asta mdiinn yeklo Jesús lo yu, ne mndediz Jesús lo Diox, ne nzhab Jesús:

―Xutʼn, os leey take, btelaan tsa riidtʼn yalti kuu riidʼn, per nlaztʼn gake taxal nlazʼn, sinke taxal nlaaza gake.

40Tsaraa mre Jesús lo re yon zha kuu ngeteed lo Jesús, ne lee re yon zha naxat; tsa nzhab Jesús lo Pey:

―¿Chu neeka thib or mxegt goo lo mkaal? 41Bloo goo mkaal lo goo ne bnaab goo ayud lo Diox, tsa kedit Maxuuy goo. Nlaaz goo tsow goo kuu nlaaz Diox, per men nak goo ne xegt beel goo.

42Mrop welt nda Jesús ne mndediz Jesús lo Diox, ne nzhab Jesús:

―Xutʼn, os tak riidtʼn yalti ree kuu ndoblon riidʼn; per ndoblo gake taxal nlaaza.

43Tsa mre Jesús lo re yon zha kuu ngeteed lo Jesús tedib welt, ne lee re zha naxat, tak kwathoz ngwatin zha mkaal. 44Tsa mlaa Jesús re zha ne ngwa Jesús mndediz lo Diox tedib welt, ne nzhab Jesús leeka re diiz kuu nzhab Jesús ner. 45Tsa mretab Jesús ta nzi re zha kuu ngeteed lo Jesús, ne nzhab Jesús lo re zha:

―¡Nalsi bneyy goo ne bdat goo! Tak mzina or kuu lee na, Kuu Mzin Ngok Men, taa zha lo re zha kuu nap falt. 46Gwache goo, ndaa goo reʼaa, tak ndyaada zha kuu taan lo re zha kuu nayii nen.

Mzhen re zha Jesús

(Mr. 14:43‑50; Lc. 22:47‑53; Jn.18 :2‑11)

47Leettsa lee Jesús bee ngenika, lee Judas kuu nak thib re zha kuu mteed lo Jesús, mzin kon kwathoz zha kuu nzo espad ne ya yaa. Re zhaʼa ndyaad kwent chaan re ngwleyy kuu nabee lo re ngwleyy, ne kwent chaan re zha gol kuu nabee lo re zha Israel. 48Ne mndaaʼa Judas thib seny lo re zhaʼa nzhab Judas:

―Zha kuu wun thib chut cho kwat, zhaʼa ten goo ne teno goo zha.

49Tsa lee Judas mbig lo Jesús ne mni “diox” lo Jesús ne nzhab:

―¡Maestr!

Oraaka ndow Judas thib chut kwat Jesús. 50Per lee Jesús nzhab lo Judas:

―Amig, btsow kuu ndyaada tsowa.

Tsa lee re men mbig ne mzhen Jesús, ne ndano zha Jesús.

51Per thib re zha kuu ndo kon Jesús, mloo spad ne mga nza mos ngwleyy kuu nabee lo reta ngwleyy. 52Tsa nzhab Jesús lo zhaʼa:

―Blotsow espada, tak reta zha kuu nzhuth kon spad kon spadka gath zha. 53¿Chu neta tak naabʼn lo Xutʼn, tsa taal Xutʼn thib tsiibchop mil mandad chaan Xutʼn nalorka? 54Per os tatay, ¿xomod gak re kuu nzhab lo xkeets Diox, kuu nzhab leey tabaa ndoblo gak?

55Tsa lee Jesús nzhab lo re men kuu nzi tya:

―¿Chebee kon spad ne kon ya ndyaad goo ten goo na taxal thib wann? Gandata wiz ngwaton mloon lo goo lee roo gwodoo. Ne, ¿chebee mzhent goo na tsya? 56Per reta koree ngeyak, tsa rolo re kuu mkee re profet kuu ngoo ndala.

Tsa lee re zha kuu ngeteed lo Jesús mlaa zha Jesús, ne mzhonn zha ndya zha.

Lee ngwleyy kuu nabee lo reta ngwleyy mnaab kwent lo Jesús

(Mr. 14:53‑65; Lc. 22:54‑55, 63‑71; Jn.18 :12‑14, 19‑24)

57Tsa lee re zha kuu mzhen Jesús ndano zha Jesús liz Caifás, kuu nak ngwleyy kuu nabee lo reta ngwleyy, ne tya nzi re maestr kuu nloo xkiiz Diox ne re zha gol kuu nabee lo re zha Israel. 58Per lee Pey tith tith ndeke dits re zhaʼa, asta lee liz ngwleyy kuu nabee lo reta ngwleyy, tsa myaan Pey mndob Pey kon re polisi kuu nkenap liz ngwleyy, tak nlaaz Pey ne Pey naa kwan yelo tsowno re zhaʼa Jesús.

59Tsa lee re ngwleyy kuu nabee lo re ngwleyy, kon re zha gol kuu nabee lo re zha Israel, ne kon reta zha kuu mas nataak lo re zha Israel, nkwaan zha naa kwan keki zha Jesús, tegal kuu wlite, tsa kuth zha Jesús. 60Per mzalt zha naa kwan keki zha Jesús, par tak kuth zha Jesús, tegal nzin kwathoz men kuu nkedi ne nkeki Jesús. Tsaraa mzin chop zha kuu nzhab kuu wlit, 61ne nzhab zha:

―Nee mbin lee zha ree nzhab: “Na luux gwodoo chaan Diox, ne tsonka wiz taa nay tedib welt”.

62Tsa lee ngwleyy kuu nabee lo reta ngwleyy ngwateli, ne mnaabdiz lo Jesús, ne nzhab:

―¿Chebee nkabta neeka thib kwaa? ¿Xomod nak re kuu nkeki zha lu?

63Per lee Jesús mkabt neeka thib kwaa lo ngwleyy kuu nabee lo reta ngwleyy. Tsa lee ngwleyya mre mnaabdiz lo Jesús ne nzhab:

―Btselo lo Diox kuu naban leeʼa ne kuu wli. Ne lo nee: ¿Chu lu nak Xgann Diox Kuu Mtaal Diox Nabee?

64Jesús mkab ne nzhab:

―Lu ney. Noga nin lo goo, lee goo wii goo lo na, Kuu Mzin Ngok Men, tobʼn lad ban lo Diox kuu tak tsow reta kwaa, tsa nabeen. Ne wii goo leen yal leen xkow lobee.

65Tsa lee ngwleyy kuu nabee lo reta ngwleyy mchat xab, ne nzhab:

―¡Lee zha ree ni de Diox! Kon kuu ni zha. Ndechet raa lee tedib testig, mbina goo xa ni de zha Diox. 66¿Xa nloo koree lo goo?

Lee re zha mkab ne nzhab:

―Nap zha falt, ndoblo gath zha por falt zha.

67Tsa mtsuk zha lo Jesús ne mdinke zha Jesús. Ne chop tson zha mkee maket kwat Jesús. 68Ne mbez zha:

―Lu ne, lu nak Crist Kuu Mtaal Diox Nabee, ne naa cho mkeey yeka.

Pey nzhab: “Nlebeet Pey Jesús”

(Mr. 14:66‑72; Lc. 22:56‑62; Jn.18 :15‑18, 25‑27)

69Leettsa lee Pey ndob lee liz ngwleyy kuu nabee lo reta ngwleyy, tsa lee thib ngot mndyeen kuu nke tsiin lo ngwleyya, mbig lo Pey ne nzhab:

―Noʼa ndiy kon Jesús zha Galilea, taxal tedib net zha.

70Per lee Pey nzhab lo re zha:

―Netʼn kwan ntetha lon.

71Tsa lee Pey nda ndo roo pwert, tsa mwii tedib ngot mndyeen kuu nke tsiin lo ngwleyya lo Pey, tsa nzhab ngot lo re zha kuu nzi tya:

―No zha ree ndiy kon Jesús, zha yez Nazaret.

72Ne tedib welt lee Pey mtselo kruz, ne nzhab:

―¡Nlebeetʼn mbyi baa!

73Tut bluz lee re zha kuu nzi tya, mbig lo Pey ne nzhab:

―Wlipaa noʼa thibka naka kon re zha baa, asta xa ndediza nabeey.

74Tsa lee Pey mtselo kruz, ne mndelo mde leeka lee, ne nzhab:

―¡Wlipaa na, nlebeetʼn mbyi baa!

Ne ora lee ngite mrez. 75Tsa lee Pey mtelaaz kuu nzhab Jesús lo Pey: “Leettsa terka kwez ngite, leeʼa gab tson welt nlebeeta na”. Or mtelaaz Pey kona, mroo pey tya ne mla yalne leettsoo Pey ne mndelo Pey mbinn Pey.

Currently Selected:

Mateo 26: zao

Highlight

Copy