Hebreos 1

Por Xgann Diox, mni Diox lo re men

1Ndala, kwathoz tyen welt mni Diox lo re teyaa zha ndala, ne kwathoz tyen mod mni Diox lo re zha, kon kuu nzhab re profet zha nak zha Diox; 2ne lee nal, re wiz bluz ree, mni Diox loʼaa por Xgann Diox kuu kayaa reta chaan Diox, ne kon Xgann Diox mdexkwaa Diox yezlyu ne yibaa, ne reta kuu nzo yibaa ne reta kuu nzo lo yezlyu. 3Lee zha nak xni chaan Diox, ne leeka lee zha nak Diox; ne lee zha nden reta kwaa kon xkiiz zha kuu ney. Ne leettsa ngwalo mtsow nambi zha lee lo re faltaa, tsa ndya zha mndob zha lad ban lo Diox yibaa.

Masraa nataak Xgann Diox nake re mandad chaan Diox

4Masraa nataak Xgann Diox nake re mandad chaan Diox, tak neʼaa lee zha mkayaa thib le kuu mas nataak nake re mandad chaan Diox. 5Tak neeka thib welt nzhabt Diox lo thib mandad chaan Diox:

Lu nak xgann na;

na mnda yalnaban loʼa naltseree. [Sal. 2:7]

Ne tedib ta leeka tata nzhab:

Na gak Xut zha,

ne lee zha gak xgann na. [2 Sam. 7:14]

6Per leettsa mtaal Diox zha kuu nak thibka Xgann Diox lo yezlyu ree, nzhab Diox tedib ta lo xkeets Diox:

Reta mandad chaan Diox gol lo zha. [Dt. 32:43]

7Ne leettsa mteth Diox re mandad, nzhab Diox:

Lee re mandad da nak taxal mbi, ne taxal loz bel.

[Sal. 104:4]

8Per leettsa ndaa Diox kwent chaan Xgann Diox, nzhab Diox:

Lu nak Diox ne lee yalnabee chaana nak thitanax,

ne lee yalnabee chaana nak kuu nali.

9Ne nke leettsooʼa re kuu nali ne nayiiʼa neʼa re kuu went;

kona lee Diox mtoba tsa nabeeʼa,

ne mtsow Diox mas naley nzo leettsooʼa nake re altaaʼa. [Sal. 45:6-7]

10Noga nzhab Diox lo Xgann Diox:

Lu, nak Zha Nabee, lu mdexkwaa yezlyu ne yibaa kon yaaʼa desde ndala.

11Too thib wiz ropta koree lux,

per lee lu thitanax luxta.

Ropta koree gak gox taxal lar,

12ne kiits luy taxal nkiits zha lar,

ne tsee luy taxal ntsee zha lar,

per lu nak Diox ne nzeeta;

ne lee yalnaban chaana thitanax luxt. [Sal. 102:25-27]

13Neeka thib welt nzhabt Diox lo thib mandad chaan Diox:

Btob lad ban lon,

asta yelo tsin re zha kuu nayii neʼa xann niiʼa,

tsa tobxub zha loʼa. [Sal. 110:1]

14Kuu nin nak: Lee re mandad chaan Diox kuu ntsow rtsin Diox, nak taxal mbi, ne ntaal Diox zha ntsow zha ayud re zha kuu naka kwent kayaa yalnaban kuu thitanax.

Currently Selected:

Hebreos 1: zao

Highlight

Copy