Éxodo 18

Moisesa rene turuha cuha Jetrone

1Madiaaun nenaa saseredote Moisesa tanaa Jetro jetaote, rai naraaichuru aina curuaecaain Moisesa coroatajaneein Egipto caje roconajaa Cana Coaunerane coitucue.

2Nii Moisesa jetaote, rai sinijiera Sejora ratiriin amuhane jaun jetao, rai loreri asae raain jetao, sirinajaen nii rai inaca Jetro, 3coroatajai bereecuru aina curuaecaain. Leinjiin curuaa jetaote, Geresone: “Nejelau atane quene, nejelau cachaauru aina neeun”, naa Moisesane jaun. 4Leeocha jetaote, Elieserneein curuaate: “Canu inaca Coaunera te, canu coroatajanihane jaun, faraaon sabere caje nichoteeun”, naane jaun.

5Nitohaneein amuhin jetaote, caohacha curuaeconaa cacha areroo turuhane jaun jetao, nii ecooca Cana Coaunerane jaun, ecu nenaa ichatane ecuuno, neloanariteein ecu niha Moisesane jana jetao, nii Moisesa sinijiera, rai coroatajai bereecuru, naaonjoainurique necorichanerateein jetao, rene turuhin coaraa cue Jetro. 6Rene turuhin jetaote:

“Ii sinijiera, coroatajai ii bereecuru, naaonjoainuri uhaain, canu ii tanaa Jetro nichaaune, ii rene turuhin ichoharaa uunra”, naa Moisesa rai, nii rai tanaane jaun jetaote, 7nii rai tanaa coineteein jetao, nacatiha nenoracaain, ecu ita rai ereeuruhane baiha jetao, jiniiquiin lohanari asae enoha cuure jetao, Moisesacuru. 8Nitohaneein lohanari asae raain jetaote, itolereecha que coroatajanenajaain, faraaon aina curuaecaain egipto cocoaichacuru cairichaa, Isaraelecuru coreniha Cana Coaunerane beebeje jetao, bero cuhane cuujeein itolere necairichanaa caje ichoteratenajae Cana Coaunerane maajeein jetao, beebeje nii tanaa rai Moisesa.

9Niritiin beebejihane jaun jetaote, cairichaerinajaauruha egipto cocoaichacurune caje, isaraelitaauru ichoterateein, jataain cairichaaojoaain acaauru coaraa Cana Coaunerane coitucuhin jetao, jataain coroajeein jetao:

10“Caohacha te, ichae Cana Coaunera, inara cairichaeriha faraaon, Egipto cocoaichacuru ainane jana, Isaraeli cocoaichaneeichene rocohin, 11inara cotaairiin, inara que nererojoecaeriin neeuruhane caje, inara rocohane jaun. Inaen laen esinae rauhijiriin, itolere diosichuru ichanohinchuru amurijiriin, jataain nelateein leinjiincha niha Cana Coaunerane esenetaanura”, naain jetaote, 12leinjiin carenero sohin mocohin jetao, Cana Coaunera coroajeein jetao, nii choae tacaain itolereeuruque belai Jetro. Nii baiha jetaote, nii Moisesa tanaa aina jiniiquiin jetao, Cana Coaunera notaracae lenoniha cuure jetao, satiin nii Isaraeli bichauhenaauru aina Aarooncuru.

Cocoainanacaihuri cocoainaacoaa Moisesane

(Dt 1.9-18)

13Nii cojoanoo janone, niha isaraelitaauru rai rucuhenacaine jaun, nelauriaain acaauru rai beebejeein rucuheca Moisesane jana jetaote, satiin nacatiha, ecu sonafaajeein chujuhequiin cohacure, le cacha cachaauru aina niha rucuhenacaine jaun. 14Nitohaneein, nii cachaauru tiha Moisesane coaraane jaun jetaote:

“Chana ichaai, catohaneein caa cachaauru aina. Chanuna iicha nitohanai rucuheraneein nenaa jereei, arajiin cau neeuruha nitohanai rucuhena naineraneein nenacaauru cachaauru natiin”, naa nii tanaa Jetrone jaun jetaote:

15“Niha acaauru rai rucuhenacaine jaunte, Cana Coaunera caje bajaanune coina, turuhin cacoharaa uure cachaauru. 16Catohaneein niha acaauru rai chatoanai rucuhenacaine, canu rene turuuruhanena: ‘Caate, baaso ichae, caate, caohacha ichae’, naain coitucuhanune coina turuhin beeure. Niine esinae rauhijiriin Cana Coaunera rai rauhi rijitojoeein, acaauru rai beebejeein, que acaauru relaaun”, nae jetao, Moisesa.

17Nejetaote, nitohanai ichaane rautaain coaraenihane jaun jetao, suujuate nii tanaa:

“Coatiha caohachaain nitohanai ichaaine, 18inasiina cotaaeca ii aina nenacaauru cachaauru netonaine jana, ii netonai cotaequi natiin. Jataain ii jaberoco amurijiriin niha iicha rucuheneni inatiin, iicha jelai nii rucuheraneein nenaa jerereei. 19Caohachaain, caa ii suujuatihanune aonaain tonoraaute, ii coroatajanemiin Cana Coaunera. Ii te, nainereei nii cachaauru coreniha Cana Coaunera rai ereeine, nii baaso ichaain neeuruhane corenihane. 20Esinae rauhijiriin aitoha Cana Coaunera rai rauhine rijitojoeein acaauru relaau, chaaen naaonjoaain techuisi caohachae ichaonaa, naain coitucuuruhane coina, acaauru que coitucuerateeu. 21Aihana jaun, ii te, nainereei nii cachaauru caje charijichaainti, caohachaain suujua coaaraneein nenaa naineein, Cana Coaunera que suujua acateein, nii coriquiichaque coacuelanaala nenaa cachane, nii coaraain, nii le oharaancaain nenacaauru cachaauru coaaranuque cocoainaau. Jerichanejeeinchu, nii lefashaain nenacaauru coaaranu cocoainaain, nii saoquichooncaain nenacaauru coaaranu maajeein cocoainaain, nii lechooncaain nenacaauru coaaranu maajeein cocoainaain. 22Acaauru te, nainere chatohaneein niha baaso ichaain ita colurujuera cachaaurune, nii rucujueein, naaonjoanaa nainecurure. Jataain rucuhenajelanaala nenaanihane laen, nainecure ii rene uhaauruhane, jana, rucuhenacaecanete, ecu nejesinajeein rucuhena nainecure. Nii banate, iicha nii rucuhena jereeine, ichei caaintaane caje, ii coroatajanecurure rucuhenaque. 23Caa ichei caitoonjoan tonoraain, jeriha Cana Coaunera rijijieein, nitohaneein ichaaine banaachate, abatanaanaineein, nii banate, raotojoeein loreri asae cauha cunaanainecurure cachaauru nihanatiin”, naain suujuatiha Jetrone jaun jetaote.

24Nii rai aitoha tanaane tonoraain jetao, 25caohachaain suujua coaaraneein nenacaauru Isaraelecuru cocoainaacoe jetao, nii Moisesa, jelai le oharaancai coaaranu, jelai lefashai coaaranu, jelai saoqui choonca coaaranu, jelai lechoonca coaaranu, naaonjoainurineque. 26Nitohanihane jaun jetaote, niha nii cachaauru rai rucuhenacaine, ecu rucujeein, naaonjoaaunre. Jana ecu rucuhenajelanaala nenaa jetaote, Moisesa rene amaaure. Jana rucuhenacajeein ainaa nihane jetaote, ecu acaauruacha nejesinajeein rucuhecure.

27Nitohaneein jetaote, ecu carajaaojoaain acaauru aina nihane baiha jetao, jelaiha natane cauha cue jetao, nii rai tanaa, inaen nii tanaa rai nocoiha Moisesane jaun.

Currently Selected:

Éxodo 18: URA

Highlight

Copy