Éxodo 17

Ajeri jaberoco tabai caje mituha esinaaecane

(Nm 20.1-13)

1Nitohaneein jetaote, Satiin isaraelitaauru jetao, caohacha curuaeconaa nenaa Siin caje mituhin cuhin jetao, jeriha Cana Coaunerane rijijieein, jeraae cuuje cuujeein, Refidiin turuhin jetao, ecu neloanaritecure. Nii jana, nii ecu neniha, nii cachaauruhacha coheni, esinaaecane jaun jetaote:

2“Canacaanu rai, esinaaeca teeune, que acau cohacaanura”, naauruha Moisesa raine jaun jetao:

“Chanuna, jataain carai niritiin ereeiche. Chanuna Cana Coaunera esenetana jerelanaala, coujuera rijitiin ereeiche”, nae jetao, acaauru rai Moisesa.

3Niritoha acaauru raine jaun jetaote, jataain cocohintooruhane jaun jetao:

“Chanutejian catohaneein Egipto caje canacaanu rocohin, canacaanu cairichaai, canacaanu bereecuru, canacaanu irihuru, naaonjoainuri aina curuaecaain, cocoirena que, canacaanu ateinana jereeita”, naain Moisesa que ereeuruha, nii cachaaurune jaun jetaote:

4“Chana laen ichareeun enene, caa cachaauru aina, inae naajeein cuaajeeinte, ajeri jaberoco que, canu bodoosiin catinaa cuurureeincha”, naain, Cana Coaunera caje bajaa Moisesane jaun jetaote:

5“Chajaain, jitariin nii cachaauru cotijiaain, acaauru taojiaain, nii Isaraeli bichauhenaauru tabaauru que, necorichanerateein, nii ichei otiha, nucuhe cuhanai faohitohilune jaa amaain, acaauru ichoaichaniha cunihu. 6Canune ichoaichaniha cuhin, Horebe bichatane nenaa ajeri seeonjoa ichoae neein ii cohareeuni. Inaen ecu turuhine, nii ajeri seeonjoa faohitoo, nii ichei otiha quete, caje mituha esinaaecane, caje raain acau cooruhine cachaauru”, naain jetao, tonorae Cana Coaunera, bajaane jaun. Niritoha rai Cana Coaunerane jaun, nii rai aitohane rijijieein, rai notiha que, nii ajeri jaberoco faohitoha, ecu turuhin, satiin coarajeeuruha Isaraeli bichauhenaaurune jana, Moisesane jana jetaote, caje mituha esinaaecane jaun jetao, 7jelai curuaate Meribaneein, neniha esinaaecane coreniha, Moisesa rai aitocuruha isaraelitaaurune jaun. Chaaen jetaote, Masaaneein jelai curuaate, ecu niha Cana Coaunerane esenetaelanaala cuujia: “Inaenacha cau niha, cana aina Cana Coaunera, chatohanihanachara”, naane jana, niha acaune jaun.

Amalesitacuru aina, sonaanaque neeuruhane

8Isaraelitaauru aina, sonaanaque neeuruhane coina jetaote, Refidiin nichae jetao, cuure Amalesitacuru. 9Nii jaun jetaote, Josoe rai jetao:

“Chajaain, taa Amalesitacuru coineteein, sonaanaque nenihu caa cachaauru tabaauru janijiin amanajaaincha. Canune, canu biji cuhane, Cana Coauneraacha tei otiha aina, nii ichatane ucuuno niha ureeuni janonera”, naain jetao, letoae Moisesa.

10Niritiin letoaa Moisesane jaun jetaote, Amalesitacuru aina sonaanaque jetao, niha cue Josoe. Nii tonohanau jetaote, ichatane ucuuno jetao, iniha cuure, Aaroon, Moisesa, Hor, naaonjoainuri. 11Nitohaneein, nii ichatane ucuuno turuhin, ecuun jerane rai biji sijirichaa Moisesane jana jetaote, sonaanaque, nii Amalesitacuru amuritoorelu isaraelitaauru. Jana, cotaaeca rai bijine, ocoai biji fauha Moisesane jetaote, nii isaraelitaauru amuritoorelu Amalesitacuru. 12Nitohaneein cotaaeca rai bijine jaun jetaote, leinjiin ajeri raain jetao, nii Moisesa rai teeure, nichoae nelauriaane coina. Inaen nichoae nelauriaane jana jetaote, jerane rai biji mucuure, Hor aina, Aarooncuru. Nitohaneein jerane mucuuruhane aina jetaote, ecuun bijihuru sijiichain sonafae Moisesa, enoha enotone reentihaaine aina jetao, 13sabereecha que Amalesitacuru saaujiin sonajaain jetao, amuritonajaaure Josoecuru.

14Nii jaun jetaote, Moisesa rai jetao:

“Caa ichei aitorichaaunine jaa laenaaun, itolere bana coaauquichene jaanu que. Chaaen Josoe rai aitoo, coatiha, inaen caohachanainejeein coaunojoineein neeururinaain Amalesitacuru”, nae jetao, rai Cana Coaunera.

15Nii jaun jetaote, “leinjiin Cana Coaunera raaichane, naitoonjoan icharaneein neeun”, naain jetao, nii ajeri caje nenaa rori jaain jetao, curuhaate Moisesa. 16Niritiin jetaote:

“Caate, amalecuru amuritoheraneein, sonaanaque caohachanainejeein, acaauru nefoerateeuru itajeratiha Cana Coaunerane jaaun, coujunacaneque, ajeri caje nenaa Cana Coaunera rorine”, nae jetao moisesa.

Currently Selected:

Éxodo 17: URA

Highlight

Copy