Marcos 3

1Ja cꞌa Jesús arjaꞌ xoc chic jutij chipan ja jay xin molbal riꞌil in triꞌ cꞌo wiꞌ jun achi siquirnak jun rukꞌaꞌ. 2Ecꞌo cꞌa juleꞌ winak e cꞌambajal rxin ja Jesús, ejeꞌeꞌ ncajoꞌ nquetzꞌat ja wi ntzursaj ja rachi pa jun xulaꞌnbal kꞌij. Queriꞌ nqueban utzcꞌa chi nquewil jun ril ja nquichapbej rxin. 3Cꞌacꞌariꞌ ja Jesús xbij tre ja rachi ja siquirnak rukꞌaꞌ: —Catyictaji in catpeꞌe waweꞌ chikacojol, neꞌ tre. 4Cꞌacꞌariꞌ xbij chique ja winak: —¿Nak nuyaꞌ lugar chake ja ley chi nkaban pa tak xulaꞌnbal kꞌij, la jaꞌ chi nkaban ja rutzil owi itzelal? ¿La jaꞌ nuyaꞌ lugar chake chi nekatoꞌ ja winak owi nekacamsaj? neꞌ chique. Pro ja rejeꞌeꞌ ni majun nak ta quibij ta tre, ma xquicꞌulbaꞌ ta. 5Cꞌacꞌariꞌ pi ryewal ja Jesús chiquij in xertzꞌelwachij, congana bison cumal rumac ja ni mta wiꞌ quigana nchꞌobtaj cumal ja xbij chique. In xbij chic tre ja rachi ja siquirnak jun rukꞌaꞌ: —Tayukuꞌ ja rakꞌaꞌ, neꞌ tre. Ja cꞌa rachi xumaj ryukic ja rukꞌaꞌ in tzuri. 6Ja cꞌa fariseo ejeꞌeꞌ xebe, xequimoloꞌ quiꞌ e cachbil ja recꞌo chipan ja partido rxin ja Herodes in quemaj rchꞌobic nak nqueban tre ja Jesús chi nquicamsaj.

* * * * * * * * * *

7-8Ja cꞌa Jesús arjaꞌ xelel chipan ja lugar in be chiyaꞌ e rachbil ja rdiscípulo in congana e qꞌuiy ja winak ja raj Galilea xetreꞌel trij. In ecꞌo na más ja xeꞌekaj ruqꞌuin caniꞌ chique ja raj Jerusalén in chique ja recꞌo chipan ja juleꞌ chic tinamit ja cꞌo pa rcuenta Judea in chique ja raj Idumea in chique ja recꞌo chajuparaj binelyaꞌ Jordán in chique ja raj Tiro in ja raj Sidón pro congana e qꞌuiy ja winak xeꞌekaj ruqꞌuin. Queriꞌ queban como ekajnak rbixic cuqꞌuin nojel ja ntajini nuban ja Jesús. 9Ja cꞌa Jesús xbij chique ja rdiscípulo: —Tiqꞌuejeꞌto listo jun lancha matzij ja winak xa congana tiquepitzꞌ quiꞌ chwij, neꞌ chique. 10Queriꞌ xbij chique como arjaꞌ e qꞌuiy ja winak ertzursan chic in rmalariꞌ tok canojel ja cꞌo yobil chique congana nquemin quiꞌ trij, ncajoꞌ nquechapoc chi netzursaxi. 11Ja cꞌa ritzel tak espíritu ja recꞌo chique ja winak ejeꞌeꞌ tok quetzꞌat ja Jesús xexuqueꞌ chwach, quemaj rakic quechiꞌ in quewaꞌ quibij tre riꞌ: —Atat ja rat Ralcꞌwal Dios, xecheꞌ tre. 12Ja cꞌa Jesús congana cow xeruchap in xbij chique chi majun bar ta triꞌ nquikꞌalasaj wiꞌ chi arjaꞌ ja Cristo.

* * * * * * * * * *

13Cꞌacꞌariꞌ joteꞌe ja Jesús chwach jun jayuꞌ, xuwil jun lugar ja bar qꞌuejeꞌ wiꞌ. Ecꞌoli chiquicojol ja winak ja cꞌo rgana ja Jesús chi netreꞌel trij, arjaꞌ xersiqꞌuij pon in xebe ruqꞌuin. 14In ecꞌo cablajuj ja xeruchaꞌ chique utzcꞌa chi ejeꞌeꞌ neqꞌuejeꞌ ruqꞌuin chijutij in chakajaꞌ chi nebe nequiyaꞌaꞌ rbixic ja rtzobal Dios. 15In chakajaꞌ xuyaꞌ chique ja poder chi necowini nequitzursaj yawaꞌiꞌ in nequiwasajel itzel tak espíritu chique ja winak. 16Quewaꞌ quebiꞌ ja cablajuj riꞌ, Simón ja canox chic jun rubiꞌ binaꞌax tre Pedro, 17Jacobo ja rcꞌajol Zebedeo, Juan ja rchꞌalal Jacobo, ja cꞌa Jacobo in Juan ejeꞌeꞌ canox chic jun quebiꞌ rmal ja Jesús binaꞌax chique Boanerges. Boanerges tibij tzij alcꞌwalaxelaꞌ ja congana quichokꞌakꞌ e caniꞌ quiakolijay. 18Ja rAndrés, Felipe, Bartolomé, Mateo, Tomás, Jacobo ja rcꞌajol Alfeo, Tadeo, Simón, jun chique ja partido rbinaꞌan cananita, 19in Judas Iscariote ja jachowi ja Jesús pa quekꞌaꞌ ja xetzelan rxin.

* * * * * * * * * *

Ja cꞌa Jesús xoc chic chipan jun jay e rachbil ja rdiscípulo. 20Ja cꞌa winak xequimoloꞌ chic quiꞌ cuqꞌuin in rmalariꞌ nixtacꞌa cꞌo ta tiempo chique ja Jesús chi newaꞌi. 21Ja cꞌa rchꞌalal ja Jesús tok quicꞌaxaj ja ntajini nuban ejeꞌeꞌ xepeti, ncajoꞌ nquecꞌamel. Queriꞌ queban como ja pa quetzij ejeꞌeꞌ chꞌujari ja Jesús.

22In chakajaꞌ ecꞌo juleꞌ maestro ja netijon quixin ja winak tre ja ley xin Dios ja tzꞌibtal can rmal ja Moisés, ejeꞌeꞌ epenak pa Jerusalén in quewaꞌ quibij chique ja winak riꞌ:

—Jalaꞌ rachi leꞌ Beelzebú ucꞌayon rxin, xa poder rxin ja jefe quixin ja ritzel tak espíritu xa jariꞌ nucoj chi quilasaxic ja ritzel tak espíritu, xecheꞌe. 23Ja cꞌa Jesús xersiqꞌuij pon in quewaꞌ jun cꞌambal tzij ja xbij chique riꞌ:

—Mta moda ja Satanás xquerlasaj ta ja rach tak demonio. 24Jun gobierno wi xa división nuban chibil riꞌ jariꞌ xa nyojtaji. 25In queriꞌ chique juleꞌ winak ja recꞌo pa jun jay chakajaꞌ, wi xa división nqueban chibil tak quiꞌ jariꞌ xa neqꞌuisi. 26In queriꞌ cꞌa tre ja Satanás chakajaꞌ, ja wi xa nchꞌojin kaj ruqꞌuin arjaꞌ ruyon, wi nerlasaj ja rach tak demonio jariꞌ xa nyojtaji in nqꞌuisi.

27Ja wi natekaj ruqꞌuin jun achi ja congana rchokꞌakꞌ in wi nachꞌob chi nalasaj tre ja rnakun ja cꞌo pa rochoch rjawaxic chi nabacꞌ na nabey ja rachi. Ja wi queriꞌ naban jariꞌ natcowini nalasaj tre nojel ja cꞌo pa rochoch.

28Anin ni katzij wiꞌ ja xtinbij chewe riꞌ, ja winak masqui nqueban ja il mac xa nak ta chi il maquil jariꞌ cꞌo cuytajic trij in chakajaꞌ masqui nquibij juleꞌ tzij tre ja Dios ja xa ofensa rcꞌamonto tre jariꞌ cꞌo cuytajic trij chakajaꞌ. 29Pro wi cꞌo jun winak xa nak ta chi winakil wi arjaꞌ nbij juleꞌ tzij tre ja rEspíritu Santo ja xa ofensa rcꞌamonto tre jariꞌ ni mta wiꞌ cuytajic trij jariꞌ il mac nrijkalej pro ni chijutij, neꞌe ja Jesús chique. 30Queriꞌ xbij chique rumac ja quibij tre chi cꞌo jun itzel espíritu ucꞌayon rxin.

* * * * * * * * * *

31Cꞌacꞌariꞌ xeꞌurkaji ja rchꞌalal ja Jesús cachbil ruteꞌ, ejeꞌeꞌ ecꞌo chwa jay in quetakoc rsiqꞌuixic. 32Ja cꞌa winak ja retzꞌubuloc chinakaj ja Jesús ejeꞌeꞌ quibij tre:

—Pakasaꞌ rateꞌ in ja re awachꞌalal ecꞌo chwa jay in ncajoꞌ netzijon awqꞌuin, xecheꞌ tre. 33Ja cꞌa Jesús xbij chique:

—Camic nchꞌob chewach echinatak ja nuteꞌ in echinatak ja wachꞌalal, neꞌ chique. 34Cꞌacꞌariꞌ xerucꞌut ja retzꞌubuloc chinakaj in quewaꞌ xbij riꞌ:

—Ejeꞌeꞌ cꞌawaꞌ eꞌocnak nuteꞌ in eꞌocnak wachꞌalal. 35Queriꞌ nbij chewe como xa nak ta ja nbanowi rvoluntad ja Dios arjaꞌ cꞌariꞌ ocnak nuchakꞌ owi wanaꞌ owi nuteꞌ, neꞌe.

Currently Selected:

Marcos 3: tzjW

Highlight

Copy