Mateo 21

1Quimajon bey ebenak, xa chinakaj ja tinamit Jerusalén ecꞌo chi wiꞌ in xeꞌekaj chuchiꞌ ja tinamit Betfagé ja bar cꞌo wiꞌ ja jayuꞌ rbinaꞌan Rjayuꞌal Olivo. Ja cꞌa Jesús ecꞌo caꞌiꞌ chique ja rdiscípulo xerutak 2in quewaꞌ xbijel chique riꞌ:

—Jix ja pa tinamit leꞌ, chilaꞌ newil wiꞌ jun ti bur ximili rachbil ti ral. Queꞌequiraꞌto in queꞌecꞌamaꞌto. 3Ja wi cꞌoli nak xquixkꞌiloni quewaꞌ tebij tre riꞌ: —Ja kajaw necꞌatzin tre, quixcheꞌ tre, in alnak neryaꞌlaꞌto. Queriꞌ xbijel ja Jesús chique. 4Nojel ariꞌ ma chaka ta bantaji, rumac chi triꞌ bantaj wiꞌ cumplir ja bitajnak can rmal ja profeta quewariꞌ: 5—Ja winak ja recꞌo chipan ja tinamit Sión quewaꞌ tebij chique riꞌ: —Tetzꞌataꞌ mpeꞌ leꞌ, peti ja Rey ewxin, arjaꞌ matuyaꞌ rukꞌij, xa trij jun ti bur tzꞌubulto wiꞌ. Ja ti bur cꞌa ti coꞌl na, ral jun bur banol ijkaꞌm, catcheꞌ chique. Queriꞌ bitajnak can rmal ja profeta. 6Ja cꞌa rdiscípulo ja Jesús ejeꞌeꞌ xebe, xequibanaꞌ ja bixel chique rmal. 7Quecꞌamto ja ti bur rachbil ja ti ral. Ja quitziak jariꞌ xequiwekbej, tzꞌabeꞌe ja Jesús trij in xumaj binem. 8Congana e qꞌuiy ja winak quesoclaꞌ ja quitziak pa rubey ja Jesús in ecꞌo chic juleꞌ xequikuplaꞌto rxak tak palma in queyaꞌ pa rubey chakajaꞌ. 9Ja cꞌa re nabeyal chwach e cachbil ja retran trij ejeꞌeꞌ congana nquerak quechiꞌ in quewaꞌ nquibij riꞌ:

—Dios, koꞌatoꞌoꞌ camic, peti ja Ralcꞌwal can ja rojer rey David, arjaꞌ bendecido amwal, arjaꞌ ja Cristo ja penak pan abiꞌ atat ja rat kajaw Dios. Koꞌatoꞌoꞌ camic Dios ja ratcꞌo chilaꞌ chicaj. Queriꞌ ja nquibij. 10Ja cꞌa tok xoc chipan ja tinamit Jerusalén xeyictaji ja tinamit pro canojel in quewaꞌ nquibij riꞌ:

—¿Nak cꞌa chi achiꞌal alaꞌ ja xurkaji leꞌ? xecheꞌe.

11—Jalaꞌ Jesús ja profeta ja raj Nazaret ja cꞌo pa rcuenta Galilea, xecheꞌxi cumal ja winak.

* * * * * * * * * *

12Ja cꞌa Jesús arjaꞌ xoc chipan ja nimlaj templo xin Dios in xumajto quilasaxic canojel ja recꞌo chipan ja quimajon cꞌayinem e cachbil chakajaꞌ ja quimajon lokꞌoj tak nakun. Ja quimesa ja qꞌuexol tak pwok xchꞌakij pa tokꞌulew in queriꞌ xuban tre chakajaꞌ ja quichꞌacat ja necꞌayin tak palomax. 13In xbij chique:

—Ja rtzobal Dios quewaꞌ tzꞌibtal chipan riꞌ: —Ja wochoch anin jariꞌ banbal oración, neꞌe ja Dios tre ja rtemplo pro ja rebanon ixix tre xa jun lugar ja bar neqꞌuejeꞌ wiꞌ alakꞌomaꞌ, neꞌe ja Jesús chique.

14Ecꞌo cꞌa tak moyaꞌ in tak cojo, ejeꞌeꞌ xeꞌekaj ruqꞌuin ja Jesús chipan ja templo, ja cꞌa rarjaꞌ xertzursaj. 15Ja cꞌa jefe quixin sacerdote e cachbil ja maestro ja netijon quixin ja winak tre ja ley xin Dios ja tzꞌibtal can rmal ja Moisés ejeꞌeꞌ quetzꞌat nojel ja xuban ja Jesús ja congana ncꞌascꞌoꞌi natzꞌat in ecꞌo juleꞌ acꞌalaꞌ xequicꞌaxaj chakajaꞌ, quimajon rakic quechiꞌ chipan ja templo in quewaꞌ nquibij riꞌ:

—Dios, koꞌatoꞌoꞌ camic, peti ja Ralcꞌwal can ja rojer rey David, necheꞌe. In congana pi quiyewal rmal ja quetzꞌat in ja quicꞌaxaj 16in quibij tre ja Jesús:

—¿La matacꞌwaxaj cꞌa ja quimajon rbixic chawe ja racꞌalaꞌ leꞌ? xecheꞌ tre.

—Ncꞌwaxaj nacꞌa pro ja rixix ¿la mta cꞌa jutij esiqꞌuin awaꞌ ja tzꞌibtal can chipan ja rtzobal Dios riꞌ? —Dios, ja tak acꞌalaꞌ e cachbil ja tak yaquiꞌaꞌ, atat ayaꞌon pa quechiꞌ ja nquiyabej akꞌij in ni majun nak ta falta tre ja nquiyabej akꞌij. Queriꞌ ja tzꞌibtal can, neꞌe ja Jesús chique. 17Cꞌacꞌariꞌ xeruyaꞌ can, be, xelel chipan ja tinamit, be cꞌa pa Betania in triꞌ xewar wiꞌ.

* * * * * * * * * *

18Ja cꞌa chi rcab kꞌij akꞌabil ntajini nmeloji ja Jesús chipan ja tinamit Jerusalén, majtaj rmal rkꞌakꞌanil rupan. 19In xutzꞌat pon jun mocaj higuera, chinakaj chiꞌ bey tiquil wiꞌ in be ruqꞌuin. Ja cheꞌ ni majun rwach, xa ruyon ruxak in rmalcꞌariꞌ tok ja Jesús quewaꞌ xbij tre ja cheꞌ riꞌ:

—Majutij xcatwachin ta, neꞌ tre, in jariꞌ hora chakiji ja cheꞌ. 20Ja cꞌa rdiscípulo ejeꞌeꞌ congana cꞌascꞌoꞌi quetzꞌat in quibij tre:

—¿Nak tre cꞌalaꞌ, ni takaꞌan chakiji chanim ja cheꞌ? xecheꞌ tre.

21—Ni katzij wiꞌ ja xtinbij chewe riꞌ, ja wi cꞌo yukulbal ecꞌuꞌx ruqꞌuin ja Dios in wi matuban caꞌiꞌ acꞌuꞌx jariꞌ nixcowini neban ixix ja caniꞌ xinban anin tre ja cheꞌ riꞌ. In ma ruyon tariꞌ pro nixcowini chakajaꞌ nebij trelaꞌ ja jun jayuꞌ leꞌ chi neli, nerqꞌuiakaꞌ riꞌ pa yaꞌ in nbe, nixrnimaj. 22Xa nak ta ja necꞌutuj pan oración wi yukul ecꞌuꞌx ruqꞌuin ja Dios chi rcꞌutuxic jariꞌ nyataj chewe, xecheꞌxi rmal ja Jesús.

* * * * * * * * * *

23Ja cꞌa tok xeꞌekaj chipan ja tinamit xoqui ja Jesús chipan ja nimlaj templo xin Dios in xumaj quitijoxic ja winak. Kas rmajon quitijoxic ja tok xeꞌekaji ja jefe quixin sacerdote e cachbil ja principaliꞌ xin tinamit in quibij tre:

—¿Nak atocnak wiꞌ chewiꞌ tok amajon rbanic nojel awaꞌ ja kamajon rtzꞌatic in nak yoyon chawe chi naban? xecheꞌ tre.

24—Anin chakajaꞌ cꞌoli ncꞌwaxaj chewe. Ja wi xtebij chwe ja xtincꞌwaxaj chewe riꞌ anin chakajaꞌ nbij chewe nak inocnak wiꞌ chi nmajon rbanic nojel awaꞌ ja remajon rtzꞌatic. 25Camic tebij chwe, ja Juan Bautista ¿nak yoꞌ tre ja rsamaj chi neruban bautizar ja winak, la jaꞌ Dios ja cꞌo chilaꞌ chicaj ja yoꞌ tre owi xa winak? xecheꞌxi rmal ja Jesús. Ja cꞌa rejeꞌeꞌ quemaj tzij chibil tak quiꞌ:

—Ja wi xtikabij tre chi Dios yoꞌ tre, arjaꞌ nbij chake: —Ja wi queriꞌ ¿nak cꞌa tre tok ma xenimaj ta? neꞌ alaꞌ chake. 26In wi xtikabij tre chi xa winak xeyoꞌ tre jariꞌ nak la xtiban chake cumal ja winak como ja chiquewach ejeꞌeꞌ ja Juan arjaꞌ jun profeta xin Dios, xecheꞌe. 27In quibij tre ja Jesús:

—Ma kotak ta nak yoꞌ tre, xecheꞌ tre.

—In nixtacꞌa anin ta chakajaꞌ xtinbij ta chewe nak inocnak wiꞌ chi nmajon rbanic nojel awaꞌ ja remajon rtzꞌatic.

* * * * * * * * * *

28Ja cꞌa camic ¿nak nechꞌob trij awaꞌ ja cꞌambal tzij ja xtinbij chewe riꞌ? Cꞌo jun achi ecꞌo caꞌiꞌ rcꞌajol, arjaꞌ be ruqꞌuin jun chique ja rcꞌajol in quewaꞌ xbij tre riꞌ:

—Ncꞌajol, camic jat, catesamaj chipan ja ntijcoꞌm, neꞌ tre.

29—Ma can ta, mta ngana ninbe, neꞌ tre ja rtataꞌ. Pro tok qꞌuiswani tiꞌon tre in rmalariꞌ xuqꞌuex ja rnaꞌoj in be pa samaj. 30Ja cꞌa tatixel arjaꞌ be chic ruqꞌuin ja jun chic rcꞌajol in caniꞌ xbij tre ja jun rcꞌajol nabey queriꞌ xbij tre chakajaꞌ ja jun chic. In xbij ja ralaꞌ tre ja rtataꞌ:

—Utz cꞌariꞌ taꞌ, can ninbe, neꞌ tre, pro ma xbe ta. 31Camic tebij cꞌa chwe ¿nak chique ja re caꞌiꞌ alcꞌwalaxelaꞌ ja banowi ja rvoluntad ja rtataꞌ? neꞌe ja Jesús chique.

—Jariꞌ ja tzijon wiꞌ nabey, xecheꞌ tre. In bix chic chique rmal ja Jesús:

—Ni katzij wiꞌ ja xtinbij chewe riꞌ, ja molol tak impuesto e cachbil ja rixokiꞌ ja xa itzel quicꞌaslemal ejeꞌeꞌ neꞌoc chipan ja gobierno xin Dios nabey chewach ixix. 32Queriꞌ nbij chewe como ja Juan Bautista arjaꞌ peti, xucꞌut chewach ja mero rbey Dios pro ja rixix ma xenimaj ta. Pro ja molol tak impuesto e cachbil ja rixokiꞌ ja xa itzel quicꞌaslemal ejeꞌeꞌ quinimaj. Ja cꞌa rixix masqui xetzꞌat chi queriꞌ queban pro ni ma xtiꞌon ta wiꞌ chewe ja rewil emac, ma xeqꞌuex ta ja renaꞌoj, ni ma xenimaj ta wiꞌ ja Juan.

* * * * * * * * * *

33Camic tecꞌwaxaj chic jun ja cꞌambal tzij ja xtinbij chewe riꞌ. Cꞌo jun tatixel cꞌo jun rchenoj, uva rticon chwach. Xucoj pa qꞌuexton, xucꞌot jun jul chipan ja bar nlasax wiꞌ ja riyaꞌl uva. Ja cꞌa chenoj xuyic jun torre chipan ja nqꞌuejeꞌ chajinel parwiꞌ. Cꞌacꞌariꞌ xuyaꞌ pa kajonem chique juleꞌ ajchonlaꞌiꞌ in be chipan jun tinamit congana nat. 34Ja tok nakajinto ja tiempo ja xtiwachin wiꞌ ja rtijcoꞌm, arjaꞌ ecꞌo juleꞌ rmoso xerutakel cuqꞌuin ja rajchonlaꞌiꞌ chi nequicꞌamaꞌ ja renta. 35Ja rajchonlaꞌiꞌ tok xeꞌekaji ja moso cuqꞌuin xequechap, jun quesoc, jun quicamsaj in jun chic queqꞌuiak tzaꞌn abaj. 36Ja cꞌa rajaw chenoj arjaꞌ ecꞌo chic juleꞌ rmoso xerutak pro más chi na e qꞌuiy xerutak chiquewach ja caniꞌ xebe nabey, in caniꞌ ban chique ja xebe nabey ni queriꞌ chic ban chique ejeꞌeꞌ chakajaꞌ. 37Ja rajaw chenoj tok qꞌuiswani cꞌo jun rcꞌajol xutak cuqꞌuin in xbij kaj pa ranma: —Como jawaꞌ ncꞌajol nqueban respetar awaꞌ, neꞌe. 38Pro ja rajchonlaꞌiꞌ ja tok xekaji ja ralcꞌwalaxel cuqꞌuin quewaꞌ quibij chibil tak quiꞌ riꞌ: —Jalaꞌ ja rachi leꞌ noc na pa rukꞌaꞌ ja rulew riꞌ como herencia. Camic kacamsaj in noc pa kakꞌaꞌ ajoj ja herencia rxin, xecheꞌe. 39Cꞌacꞌariꞌ quechap, quiwasajto chipan ja chenoj in quicamsaj. Queriꞌ nbij ja cꞌambal tzij. 40Camic tebij cꞌa chwe, ja rajaw chenoj ja tok xtipeti ¿nak nuban cꞌariꞌ chique ja rajchonlaꞌiꞌ nechꞌob ixix? xecheꞌxi rmal ja Jesús.

41—Arjaꞌ ni ma jutzꞌit npokonaj quewach alaꞌ ja ritzel tak winak nabij leꞌ, nercamsaj, ja cꞌa rchenoj nuyaꞌ chic jutij pa kajonem chique juleꞌ chic ajchonlaꞌiꞌ ja cotak nquetoj ja renta tok nerilaꞌ ja tiempo chi nquetoj, xecheꞌ tre. 42Ja cꞌa Jesús arjaꞌ xbij chic chique:

—¿La mta cꞌa jutij esiqꞌuin chipan ja rtzobal Dios jawaꞌ jun tzij riꞌ? —Ja banol jay cꞌo jun abaj ja mta quigana ruqꞌuin in quechꞌaꞌ pro jariꞌ abaj cojon chic chi rbanic ja jay, arjaꞌ ja más nim rukꞌij como arjaꞌ nchapowi ja resquinaꞌil. Jariꞌ samaj kajaw Dios banowi in kas ncꞌascꞌoꞌi nkatzꞌat, neꞌe. 43Rmalcꞌariꞌ anin nbij chewe, ja gobierno xin Dios nlasax na pan ekꞌaꞌ ixix in nco̱j chic pa quekꞌaꞌ jun chic tinamit ja cotak nquisamajij utzcꞌa chi cꞌoli ja rutzil xin Dios nuyaꞌ. 44Xa nak ta ja xa junwiꞌ nutzꞌat ja rabaj ja xinbij chewe in xa nuban ofender riꞌ rmal jariꞌ caniꞌ nuban jun achi nuchokꞌ rkan chwach jun abaj in nkꞌaji. In xa nak ta ja nkꞌe̱t tzij trij rmal ja rabaj ja xinbij chewe jariꞌ caniꞌ nuban jun achi ntzakto jun abaj trij in nchictaj rmal, neꞌe ja Jesús chique.

45Ja cꞌa jefe quixin sacerdote e cachbil ja fariseo ja tok quicꞌaxaj ja cꞌambal tak tzij ja xbij ja Jesús bien chꞌobtaj cumal chi ejeꞌeꞌ ja xebixi. 46Laj quechap chi nquecoj preso pro xa nquixbej quiꞌ chiquewach ja winak como ja nquibij ja winak chi ja Jesús arjaꞌ jun profeta xin Dios.

Currently Selected:

Mateo 21: tzjW

Highlight

Copy