Mateo 18

1Jariꞌ tiempo ja rdiscípulo ja Jesús ejeꞌeꞌ xeꞌekaj ruqꞌuin in cꞌoli quicꞌaxaj tre quewariꞌ:

—¿Nak chake ja más nim rukꞌij ja tok xtoqui ja gobierno xin chilaꞌ chicaj? xecheꞌ tre. 2Ja cꞌa Jesús arjaꞌ xsiqꞌuij pon jun tacꞌal, xuyaꞌ chiquicojol 3in quewaꞌ xbij chique riꞌ:

—Ni katzij wiꞌ ja xtinbij chewe riꞌ, ja wi mateqꞌuex ja renaꞌoj, wi maquixoqui ix caniꞌ tak acꞌalaꞌ jariꞌ nixtacꞌa xquixoc ta chipan ja gobierno xin chilaꞌ chicaj. 4Xa nak ta ja nuban tinoꞌy chi noqui caniꞌ ja jun tacꞌal riꞌ ja cꞌariꞌ ja más nim rukꞌij chipan ja gobierno xin chilaꞌ chicaj. 5Ja tak acꞌalaꞌ ja re quitakawaꞌ xa nak ta xticꞌulu jun chique in wi pa nubiꞌ anin tok nucꞌul tibij cꞌa tzij ariꞌ chi anin ja ninrucꞌul. 6Pro congana lawuloꞌ chique xa nak ta ja xquetakchiꞌin quixin awaꞌ ja re taknoꞌy riꞌ ja yukul quecꞌuꞌx wqꞌuin, congana lawuloꞌ chique masqui xa ti jun chique ja nquitakchiꞌij chi rbanic ja il mac. Más na mejor nxi̱m jun caꞌ chi quekul chanim in neqꞌuia̱k pa yaꞌ in nejikꞌi chwach ja nquitakchiꞌij jun chique waꞌ ja yukul quecꞌuꞌx wqꞌuin. 7Ja winak waweꞌ chwachꞌulew congana npokonaj quewach, congana lawuloꞌ quibanon rumac ja xa netakchiꞌixi chi rbanic ja il mac. Queriꞌ nbij chewe como wi ncajoꞌ owi mani ni netakchiꞌix wiꞌ pro congana lawuloꞌ chique ja netakchiꞌin quixin. 8Rmalcꞌariꞌ nbij chewe, ja wi cꞌo jun ekꞌaꞌ owi jun ewakan wi xa nixrtakchiꞌij in nixrkajsaj chipan ja il mac mejor ja neban, tekupijel in techꞌakijel. Como más na utz ja xa jun ekꞌaꞌ owi xa jun ewakan nixoc chipan ja utzlaj cꞌaslemal ja mta qꞌuisic trij chwach ja caꞌiꞌ ekꞌaꞌ in caꞌiꞌ ewakan nixchꞌakix chipan ja kꞌakꞌ ja ni mta wiꞌ chupic trij. 9In chakajaꞌ wi cꞌo jun panewach xa nixrtakchiꞌij in nixrkajsaj chipan ja il mac mejor ja neban, tewasajel in techꞌakijel. Como más na utz ja xa jun panewach nixoc chipan ja utzlaj cꞌaslemal ja mta qꞌuisic trij chwach ja caꞌiꞌ panewach nixchꞌakix chipan ja kꞌakꞌ ja ni mta wiꞌ chupic trij. 10Kas tebanaꞌ cuenta nak neban chique waꞌ ja re taknoꞌy riꞌ, nixtacꞌa jun ta chique xteban ta tre ni mta. Como anin nbij chewe chi ja chilaꞌ chicaj ecꞌoli ja ángel quixin in jariꞌ ángel mta ariꞌ ja maquita yatajnak chique chi neꞌekaj chwach ja Nataꞌ ja cꞌo chilaꞌ chicaj. 11Como ja ranin inpenak chi quitoꞌic ja retzaknak, anin ja rin Alcꞌwalaxel ja xinoc alaxic cuqꞌuin ja winak.

12¿Nak nechꞌob ixix trewaꞌ ja xtinbij chewe riꞌ? Tzucꞌa cꞌo ta jun achi ecꞌo ta jun ciento tak rcarnelo in ntzak ta cꞌa jun chique. ¿Nak nuban ja rachi nechꞌob ixix? ¿La maqueruyaꞌ can ja re noventinueve in nbe pa tak kꞌayis chi rcanoxic ja tzaki? 13Queriꞌ nuban in anin nbij chewe, ja wi nuwil jariꞌ más na nquicot rmal ja jun xuwil chiquewach ja re noventinueve ja ma xetzak ta. 14In queriꞌ cꞌa tre chakajaꞌ ja Tatixel ewxin ja cꞌo chilaꞌ chicaj, ja rvoluntad arjaꞌ nixtacꞌa cꞌo ta jun chique waꞌ ja re taknoꞌy riꞌ xtitzꞌilox ta.

* * * * * * * * * *

15In jun chic chakajaꞌ, wi cꞌo jun awachꞌalal xuban jun itzel chawe jat ruqꞌuin, teyonaj ewiꞌ ruqꞌuin in tachꞌoboꞌ chwach ja xuban chawe. Ja cꞌa wi nchꞌobtaj rmal ja nabij tre xachꞌec cꞌariꞌ ja rawachꞌalal, xixtzur cꞌariꞌ ruqꞌuin. 16Ja cꞌa wi matichꞌobtaj rmal tacꞌamaꞌel jun owi e caꞌiꞌ awachbil, jat chic jutij ruqꞌuin. Queriꞌ naban utzcꞌa chi nojel ja nbixi cꞌo jun owi e caꞌiꞌ testigo ja necꞌaxani. 17Ja wi ni mta wiꞌ rgana nuchꞌob ja nquibij ja testigo tabij cꞌa chique ja riglesia. Ja cꞌa wi ni mta wiꞌ rgana nuchꞌob ja nquibij ja riglesia tabanaꞌ cꞌa tre chi ma awachbil chi ta caniꞌ naban chique ja molol tak impuesto e cachbil ja winak ja ma cotak ta rwach ja Dios. 18Ni katzij wiꞌ ja xtinbij chewe riꞌ, xa nak ta ja mateban permitir waweꞌ chwachꞌulew jariꞌ ja matiban permitir chilaꞌ chicaj in xa nak ta ja neban permitir waweꞌ chwachꞌulew jariꞌ ja nba̱n permitir chilaꞌ chicaj. 19Jutij chic nbij chewe, mana xa e caꞌiꞌ chewe wi xa junan nquechꞌob tre ja nquicꞌutuj pan oración jariꞌ ncꞌaxaxi ja coración in ja nquicꞌutuj jariꞌ nyataj chique rmal ja Nataꞌ ja cꞌo chilaꞌ chicaj. 20Queriꞌ nbij chewe como ja tok ecꞌo caꞌiꞌ owi e oxiꞌ ja quimolon quiꞌ pro wi pa nubiꞌ anin tok quimolon quiꞌ jariꞌ incꞌo chiquicojol. Queriꞌ xbij ja Jesús chique. 21Peti ja Pedro:

—Wajaw, ja wachꞌalal, wi qꞌuiylaj mul nuban itzel chwe ¿jaruꞌ mul ncuy? ¿La sobre ariꞌ ja wukuꞌ mul? neꞌ tre ja Jesús. 22In bix tre:

—Ma ja ta nbij chawe chi wukuꞌ mul ja nacuy pro ja nbij anin chawe, wukuꞌ mul chi setenta ja nacuy. 23Rmalcꞌariꞌ tok nbij jun cꞌambal tzij chewe riꞌ. Ja gobierno xin chilaꞌ chicaj queriꞌ rbanic caniꞌ nuban jun rey tok nchomij cuenta cuqꞌuin ja nesamaj ruqꞌuin. 24Ja rey tok xumaj rbanic ja cuenta cuqꞌuin cꞌo jun chique xeya̱ꞌ chwach, qꞌuiylaj mil quetzal ja rucꞌas cꞌo ruqꞌuin, cꞌayew chi naltaji. 25Ja cꞌa rajcꞌas como maticowini nutoj ja rucꞌas chewiꞌ tok cꞌo jun orden xuyaꞌ ja rey, quewaꞌ xbij riꞌ:

—Mejor, tecꞌayij ja rachi e rachbil rxjayil in ralcꞌwal chakajaꞌ, in nojel ja cꞌo ruqꞌuin tecꞌayij chakajaꞌ. Puersa ntojtaj na ja rucꞌas, neꞌe. 26Ja cꞌa rajsamajel arjaꞌ xuqueꞌ chwach ja rey in quewaꞌ xbij tre riꞌ:

—Wajaw, tiqꞌue jutzꞌit apaciencia wqꞌuin, anin ntoj na nojel ja nucꞌas, neꞌ tre. 27Ja rey congana xpokonaj rwach ja rajsamajel, xsokpijel in xucuy ja rucꞌas. 28Pro jariꞌ ajsamajel tok xelel chaka jalal tok quecꞌul quiꞌ ruqꞌuin jun chic rach ajsamajel in cꞌo rucꞌas ja rach ajsamajel ruqꞌuin pro xa jun ciento quetzal ja rucꞌas. Cꞌacꞌariꞌ xuchap chi rukul:

—Tatojoꞌ ja racꞌas wqꞌuin, neꞌ tre. 29Ja cꞌa rach ajsamajel arjaꞌ xuqueꞌ chwach:

—Tiqꞌue jutzꞌit apaciencia wqꞌuin, anin ntoj na nojel ja nucꞌas, neꞌ tre, 30pro arjaꞌ ma xrajoꞌ ta. Cꞌacꞌariꞌ xucꞌamel, xutak pa cheꞌ in xbij tre chi cꞌa tokoriꞌ nelto pa cheꞌ ja tok xtucoj ja rucꞌas. 31Ja juleꞌ chic rach tak ajsamajelaꞌ tok quetzꞌat ja bantaji ejeꞌeꞌ congana junwiꞌ quenaꞌ, xebe ruqꞌuin ja rey, xequibij tre nojel ja bantaji. 32Ja cꞌa rey arjaꞌ xutak rsiqꞌuixic in quewaꞌ xbij tre riꞌ:

—Atat congana at itzel ajsamajel, anin xincuy nojel ja racꞌas cꞌo wqꞌuin como xacꞌutuj chwe chi npokonaj awach. 33¿Nak cꞌa tre tok ma xapokonaj ta rwach ja rawach ajsamajel ja caniꞌ xinban anin chawe, xinpokonaj awach? Queriꞌ ja xbij tre. 34Congana yictaj ryewal ja rey, xujach ja ritzel ajsamajel chique juleꞌ chic winak chi nutij pokon pa quekꞌaꞌ in xbij tre chi triꞌ nqꞌuejeꞌ wiꞌ, cꞌa tokoriꞌ nel libre ja tok xtutoj nojel ja rucꞌas. Queriꞌ nbij ja cꞌambal tzij. 35In ja Nataꞌ ja cꞌo chilaꞌ chicaj queriꞌ cꞌa xtuban chewe ixix chakajaꞌ chejujunal ja wi ma nojel ta ecꞌuꞌx ma nojel ta ewanma neꞌecuy ja rewachꞌalal ja nqueban chewe.

Currently Selected:

Mateo 18: tzjW

Highlight

Copy