Lucas 23

1Cꞌacꞌariꞌ xeyictaji canojelal, quecꞌamel ja Jesús chwach ja gobernador Pilato. 2Ja cꞌa tok xeꞌekaji quemaj rbixic juleꞌ ril ja Jesús:

—Ajoj katzꞌaton ja nuban alaꞌ jun achi leꞌ, xa ntajini nuyoj quinaꞌoj ja kach tak aj Israel. Arjaꞌ nbij chique ja winak chi ma rubey ta ja nquetoj ja rimpuesto pa rukꞌaꞌ ja César ja nimlaj rey. In jun chic, nucoj riꞌ como Cristo, tibij cꞌa tzij ariꞌ chi nucoj riꞌ como jun rey, xecheꞌ tre ja Pilato. 3Ja cꞌa Pilato quewaꞌ xbij tre ja Jesús riꞌ:

—¿La atat ja rat rey quixin ja tinamit Israel? neꞌ tre.

—Queriꞌ ja caniꞌ nabij leꞌ, neꞌxi rmal ja Jesús. 4Ja cꞌa Pilato arjaꞌ tzijon chic cuqꞌuin ja jefe quixin sacerdote in cuqꞌuin ja juleꞌ chic winak, quewaꞌ xbij chique riꞌ:

—Ja ntzꞌat anin ni majun ril ja rachi, neꞌ chique. 5Pro más chi na xeyictaj trij ja Jesús, quewaꞌ quibij chic tre ja Pilato riꞌ:

—Pro ja rachi arjaꞌ xa ntajini nuyoj quinaꞌoj ja winak, ntajini nertijoj nojel nat nakaj chipan ja departamento Judea, xumajto ryaꞌic ja tijonem chipan ja departamento Galilea in camic rmajon ryaꞌic chique ja winak waweꞌ chakajaꞌ, xecheꞌ tre.

* * * * * * * * * *

6Ja cꞌa Pilato tok xcꞌaxaj chi pa Galilea ryaꞌon wiꞌ ja tijonem ja Jesús rmalcꞌariꞌ tok quewaꞌ xbij chic chique riꞌ: —¿La maxta aj Galilea ja rachi riꞌ? neꞌ chique. 7Ja cꞌa tok bix tre chi aj Galilea ja Jesús cꞌacꞌariꞌ xutakel ruqꞌuin ja Herodes ja gobernador xin Galilea como ja Herodes arjaꞌ cꞌo pa Jerusalén triꞌ chakajaꞌ. 8Ja cꞌa Herodes tok xekaji ja Jesús ruqꞌuin congana quicoti como arjaꞌ cꞌo chic tiempo ja congana rgana nutzꞌat riꞌ quewach ruqꞌuin como ekajnak chic rbixic ruqꞌuin nojel ja ntajini nuban ja Jesús in cꞌo rgana nutzꞌat ja tok nuban jun milagro. 9Congana pregunta xuban tre pro nixtacꞌa cꞌo ta jun ti tzij bix ta tre rmal ja Jesús. 10Ecꞌo cꞌa ja jefe quixin sacerdote e cachbil ja maestro ja netijon quixin ja winak tre ja ley xin Dios, ejeꞌeꞌ congana nqueban, quemaj rbixic ril ja Jesús chwach ja Herodes. 11Ja cꞌa Herodes e rachbil ja rsoldado ejeꞌeꞌ ni ma vale ta chiquewach ja Jesús, quemaj ryokꞌic, quecoj jun tziak tre ja caniꞌ nquecoj rey pro jariꞌ xa nquiyokꞌbej rxin. Cꞌacꞌariꞌ ja Herodes xutakel chic jutij ruqꞌuin ja Pilato. 12Jariꞌ mismo kꞌij xetzuri ja Pilato ruqꞌuin ja Herodes, xeꞌoc chic amigo como ja nabey xa quicꞌulel quiꞌ.

* * * * * * * * * *

13Ja cꞌa Pilato arjaꞌ xerumol ja jefe quixin sacerdote e cachbil ja kꞌetol tak tzij quixin ja tinamit Israel e cachbil chic ja juleꞌ chic winak. 14Ja tok xemoltaj rmal quewaꞌ xbij chique riꞌ:

—Camic ecꞌamonto ja rachi chinwach riꞌ, ja ril nebij chi xa neruyoj ja tinamit. Pro bien techꞌoboꞌ, chewach ixix xincꞌot ruchiꞌ in ja ntzꞌat anin ni majun ril ja caniꞌ nebij tre. 15Ja Herodes chakajaꞌ ni majun ril xuwil como xutakpi chic jutij pa kakꞌaꞌ ajoj. Mta rbanon ja rachi ja yatal ta trij chi xtikacamsaj ta. 16Rmalcꞌariꞌ mejor ja nban tre, xa nyaꞌ jun orden chi nrapaxi in tok xtiraptaji cꞌacꞌariꞌ nsokpijel, neꞌe ja Pilato chique. 17Queriꞌ xbij chique como ja pa tak nmakꞌij pascua arjaꞌ puersa nsokpijel jun cach aj tinamit ja rocnak preso. 18Ja cꞌa rejeꞌeꞌ xa junan queban, quemaj rakic quechiꞌ canojelal:

—Tacamsaj ja rachi leꞌ. Ja cꞌa Barrabás jariꞌ tasokpijel, xecheꞌ tre. 19Ja Barrabás arjaꞌ jun achi xuban jutij yictaj trij ja gobierno chipan ja tinamit in ecꞌoli ja winak xercamsaj xa chewiꞌ ja tok ocnak preso. 20Ja cꞌa Pilato como cꞌo rgana nsokpijel ja Jesús rmalcꞌariꞌ tok tzijon chic jutij cuqꞌuin. 21Pro ja rejeꞌeꞌ xa más chi na quemaj rakic quechiꞌ:

—Tacamsaj chwach cruz, tacamsaj chwach cruz, xecheꞌ tre. 22Ja cꞌa Pilato pa roxmul xbij chique:

—Pro ¿nak cꞌa tre tok necꞌutuj rcamic, nak rbanon chewiꞌ? Ja ntzꞌat anin ni majun rbanon ja yatal ta trij chi xtikacamsaj ta. Rmalcꞌariꞌ mejor nyaꞌ jun orden chi nrapaxi in tok xtiraptaji cꞌacꞌariꞌ nsokpijel, neꞌ chic chique. 23Pro ja cꞌa winak e cachbil ja jefe quixin sacerdote xajutij quimajon rakic quechiꞌ, congana nquecoj ja Pilato pa chꞌaꞌoj chi ncamsaxi ja Jesús chwach cruz in tok qꞌuiswani ejeꞌeꞌ xechꞌocmaji. 24Ja cꞌa Pilato xuyaꞌ jun orden chi queriꞌ nba̱n tre ja Jesús ja caniꞌ ncajoꞌ ejeꞌeꞌ. 25Xsokpijel ja rachi ja rocnak pa cheꞌ ja yictaj trij ja gobierno ja recꞌo juleꞌ winak xercamsaj. Jariꞌ ja rachi ja quicꞌutuj tre. Ja cꞌa Jesús jariꞌ xujach pa quekꞌaꞌ juleꞌ soldado utzcꞌa chi queriꞌ nba̱n tre ja caniꞌ ncajoꞌ ja winak chi nba̱n tre.

* * * * * * * * * *

26Ja cꞌa soldado ejeꞌeꞌ kas quicꞌamonel ja Jesús pa bey ja tok cꞌo jun achi quewil, Simón rubiꞌ, aj Cirene. Ja cꞌa Simón arja cꞌa melojto pa tak kꞌayis in trij arjaꞌ queyaꞌel chi wiꞌ ja cruz, puersa queban tre chi ntreꞌel trij ja Jesús in nrijkajel ja cruz.

27Ja cꞌa Jesús congana e qꞌuiy ja winak etran trij in chakajaꞌ ecꞌo juleꞌ ixokiꞌ, ejeꞌeꞌ congana ncokꞌej rwach, congana nquibisoj. 28Pro ja Jesús arjaꞌ xuyaꞌ vuelta in quewaꞌ xbij chique riꞌ:

—Ma quinewokꞌej ta ixokiꞌ ja rix aj Jerusalén. Mejor ja neban, tewokꞌej ewiꞌ ixix in tewokꞌej quewach ja tak ewal chakajaꞌ. 29Queriꞌ nbij chewe como nerilaꞌ na jun cꞌayewalaj tiempo ja tok quewaꞌ xtiquibij ja winak riꞌ: —Ja camic congana quiꞌil chique ja rixokiꞌ ja ni mta wiꞌ alanem chiquij, congana quiꞌil chique ja rixokiꞌ ja ni mta wiꞌ tak cal eqꞌuejenak ta, xquecheꞌe. 30Ja tok xterilaꞌ ja cꞌayewalaj tiempo quewaꞌ xtiquemaj rbixic ja winak riꞌ: —Mejor ta titzakto chakij ja nimak tak jayuꞌ, ta korumuk ja cocojlaj tak jayuꞌ chakajaꞌ, xquecheꞌe. 31Queriꞌ nbij chewe como anin wi quewaꞌ nqueban chwe ja tok in caniꞌ jun cheꞌ rax ja ma yatal ta tre chi ncꞌati in janila jun nimlaj rpokonal ja xtiban chique ja winak ja re caniꞌ juleꞌ chakijlaj tak cheꞌ. Queriꞌ xbij ja Jesús chique ja rixokiꞌ.

32Ecꞌo chi cꞌa caꞌiꞌ achiꞌiꞌ, ejeꞌeꞌ cꞌoli ja quil quibanon in junan xecꞌamarel ruqꞌuin ja Jesús chi neꞌecamsaxi. 33Ja cꞌa tok xeꞌekaj chipan ja lugar rbinaꞌan Rwiꞌcamnak triꞌ querip wiꞌ ja Jesús chwach cruz in queriꞌ queban chique ja re caꞌiꞌ achiꞌiꞌ ja cꞌo quil chakajaꞌ, jun pa riquikꞌaꞌ in jun pa rxcon. 34Ja cꞌa Jesús arjaꞌ cꞌo jun oración xuban quewariꞌ: —Nataꞌ, queꞌacuyuꞌ como ejeꞌeꞌ ma cotak ta ja netajini nqueban, neꞌ tre ja Tatixel. Cꞌacꞌariꞌ quemaj rbanic suerte trij ja rtziak nak xtichꞌeco chique in quejach chiquewach. 35Ja cꞌa winak ja quimajon rtzꞌatic ja nbantaji e cachbil ja kꞌetol tak tzij ejeꞌeꞌ quemaj rtzꞌujic ja Jesús, quewaꞌ quibij riꞌ: —Arjaꞌ Toꞌonel quixin winak neꞌxi, ja cꞌa wi ni katzij wiꞌ chi arjaꞌ ja Cristo ja chaꞌon rmal ja Dios titoꞌoꞌ cꞌa riꞌ ruyon camic, xecheꞌe. 36Ja cꞌa soldado ejeꞌeꞌ quemaj ryokꞌic chakajaꞌ, xetiloc más ruqꞌuin ja Jesús, cꞌo juleꞌ chꞌamlaj vino quitzujuj tre 37in quewaꞌ quibij tre riꞌ: —Atat wi ni katzij wiꞌ chi at Rey quixin ja tinamit Israel tatoꞌoꞌ cꞌa awiꞌ ayon, xecheꞌ tre. 38Cꞌo juleꞌ tzꞌibanem bani in parwiꞌ ja Jesús yaꞌon wiꞌ chwach ja cruz, oxiꞌ rwach ja tzobal ja tzꞌibax wiꞌ, jun pa griego, jun pa latín, in jun chic pan hebreo, quewaꞌ nbij riꞌ: —Jawaꞌ rachi riꞌ arjaꞌ rey quixin ja tinamit Israel, neꞌe.

39Cꞌo cꞌa jun chique ja re caꞌiꞌ achiꞌiꞌ ja cꞌo quil quibanon ja reripon chwach cruz arjaꞌ xumaj rbixic juleꞌ itzel tak tzij tre ja Jesús, quewaꞌ xbij tre riꞌ:

—Ja wi ni katzij wiꞌ chi atat ja rat Cristo tatoꞌoꞌ cꞌa awiꞌ camic in koꞌatoꞌoꞌ ajoj chakajaꞌ, neꞌ tre. 40Pro ja cꞌa jun chic achi ja cꞌo ril rbanon arjaꞌ xumaj rchꞌolixic ja jun chic:

—¿La mataxbej awiꞌ chwach ja Dios como atat kꞌeton chic tzij chawij chi natcamsaxi chakajaꞌ? 41Ja rajoj ni yatal wiꞌ chakij chi nokcamsaxi como jariꞌ nkatojbej ja ritzelal kabanon pro ja jun chic achi leꞌ arjaꞌ mta nak ta itzelal rbanon, neꞌ tre. 42Cꞌacꞌariꞌ tzijon chic ruqꞌuin ja Jesús, quewaꞌ xbij tre riꞌ:

—Kas xquinurkaj chawe ja tok xcatpi chic jutij ja tok atocnak chic Rey chipan ja ragobierno, neꞌ tre. 43Ja cꞌa Jesús xbij tre:

—Ni katzij wiꞌ ja xtinbij chawe riꞌ, chipan awaꞌ jun kꞌij ja rokcꞌo wiꞌ riꞌ ok caꞌiꞌ awqꞌuin nokbe chipan ja utzlaj lugar ja bar cꞌo wiꞌ quicotemal, neꞌ tre.

* * * * * * * * * *

44Ja pa tak ncꞌajkꞌij cꞌo jun nimlaj kꞌekuꞌm xoqui nojel chwachꞌulew, cꞌa a las tres xin takakꞌij sakar chic jutij. 45Ja kꞌij ma xcaꞌy chi ta. In chaka jalal tok raktaji ja manta ja tasben rpan ja nimlaj templo xin Dios ja bar cꞌo wiꞌ ja santilaj lugar, chaka caꞌiꞌ xuban. 46Ja cꞌa Jesús arjaꞌ xurak ruchiꞌ, xuban jun oración quewariꞌ: —Nataꞌ, pan akꞌaꞌ atat njach wiꞌ ja wanma, neꞌ tre ja Tatixel. Ja cꞌa tok bitaj queriꞌ rmal ni cam kaj. 47Cꞌo cꞌa jun capitán paꞌl triꞌ, arjaꞌ tok xutzꞌat ja bantaji xumaj ryaꞌic rukꞌij ja Dios, quewaꞌ xbij riꞌ: —Jalaꞌ jun achi leꞌ ni katzij wiꞌ chi mta ril rbanon, neꞌe.

48Congana e qꞌuiy ja winak quimolon quiꞌ chi rtzꞌatic ja nbantaji. Pro ja tok quetzꞌat nojel ja bantaji congana nqueban, congana nebisoni xebe. 49Ja cꞌa rixokiꞌ ja retranel trij ja Jesús ja tok xelel pa Galilea e cachbil canojel ja winak ja cotak rwach ejeꞌeꞌ cꞌa cꞌa nat xepeꞌeto chic wiꞌ, quimajon rtzꞌatic nojel ja nbantaji.

* * * * * * * * * *

50-51Cꞌo cꞌa jun achi José rubiꞌ, arjaꞌ aj Arimatea ja cꞌo pa rcuenta Judea. Ja cꞌa José arjaꞌ jun chique ja kꞌetol tak tzij quixin ja tinamit Israel pro jun utzlaj achi rbanon utz chwach Dios. Arjaꞌ nojel rucꞌuꞌx rayben ja kꞌij ja tok xtoqui ja gobierno xin Dios. Ma junan ta xuchꞌob cuqꞌuin ja rach tak kꞌetol tzij como xa ma utz ta xutzꞌat ja queban tre ja Jesús. 52Be cꞌa ja José ruqꞌuin ja Pilato chi rcꞌutuxic ja cuerpo rxin ja Jesús. 53Ja tok yataj lugar tre rmal ja Pilato cꞌacꞌariꞌ be xerkajsaj ja cuerpo rxin ja Jesús chwach cruz in xubar pa jun utzlaj tziak. Ja cꞌa tok bartaj rmal xeryaꞌaꞌ chipan jun panteón ja cꞌoton chwach jun portales pro jun panteón ja mta jutij cojon ta jun camnak chipan. 54Jawaꞌ bantaji chipan ja kꞌij ja nchomarsbex wiꞌ nakun jeꞌe rxin ja nmakꞌij in xajalal majaꞌn tirili ja hora ja numajel wiꞌ ja xulaꞌnbal kꞌij.

55Ja cꞌa rixokiꞌ ja retranel trij ja Jesús ja tok xelel pa Galilea ejeꞌeꞌ xebe trij ja José, xequitzꞌataꞌ ja panteón in quetzꞌat chakajaꞌ nak ban tre ja cuerpo rxin ja Jesús. 56Ja cꞌa tok tzꞌattaj cumal cꞌacꞌariꞌ xemeloji ja pa tak cochoch, xequichomij juleꞌ akꞌom ja quiꞌ rxulaꞌ ja nquecoj trij rcuerpo ja Jesús. Ja pa xulaꞌnbal kꞌij xexulaꞌni ja caniꞌ nbij ja ley xin Dios chi nqueban.

Currently Selected:

Lucas 23: tzjW

Highlight

Copy