Atu 3

Pedru hã ihi'ré te te ipesezé wasu'u

1Tawamhã nimahã bâtâ na ma tô Pedru norĩ hã dame tineb zahuré, Zuwãhã me, 'Re ihâimana u'âsi mono nhorõwa 'ri u hã. Bâdâ sipi'rai wi, te dame tineb zahuré, 'Re ihâimana u'âsi mono ãma 're idawata za'ra mono zé bâtâ na. 2Tame te aibâ hã nhamra, hi'ré siromo ipodo hã. “I'madâ'â ze” na 'ridawa nhisi u te ta hã nasi dasiwi mrami ni, rob'uiprazém na te te 're da'awari mono da, 're danhisisi mono sidâpâsi. 3Tawamhã Pedru norĩ hã 'ri 'wawi wa'ra u zasi zahuré õ ré, ihi'ré hã ma tô sãmri zahuré. Te te sãmri zahuré wamhã, te nasi 'mahârâ zahuré, marĩ te te tãma sõmri zahuré da. 4Tawamhã Pedru norĩ hã ma tô 'madâ'â pese zahuré, Zuwãhã me. Taha wamhã, te Pedru hã tãma tinha, ãne:

— Wei wa'madâ'â.

5Tawamhã ma tô 'madâ'â zahuré, marĩ te te tãma sõmri zahuré da newa. 6Ãhã wamhã, te Pedru duré tãma tinha, ãne:

— Wa hã ĩnhimarĩ õ di. Rob'uiprazé hã duré ĩma hâimana õ di, ĩte hã. Tane nherẽ, 'Re ihâimana u'âsi mono te te ĩma isõmri na wa za aipawapto. Zezu Cristu, Nazaré ãma aré 're isãmra mono zadawa para, wa za aima tinha: Aiwahutu, aipara na 're aimorĩ da oto.

7Taha pari, Pedru hã ma tô pa'â isimire niwĩ, ihi'ré hã te te wahutu da. Te te wahutu wamhã, awa'awi ma tô parahaptete. Ma tô duré tipara'õtõ nhiptete. 8Tawamhã ma tô sime, hâimo para na sab da oto. Ãhã wamhã, hâiwi te oto za, para na. Tame ma te oto timorĩ na hã sãna'rata. Tawamhã Pedru norĩ me, ma tô siré asisi, 'Re ihâimana u'âsi mono nhorõwa 'ri 'wawi wa'ra u. Tawamhã morĩ sina te sarõtõ, rowẽ te. 'Re ihâimana u'âsi mono ãma te duré tiwata. 9Tawamhã aihĩni ma tô 'madâ'â za'ra ni, aibâ hã sarõtõ mono ré hã, duré 'Re ihâimana u'âsi mono ãma wata ré hã. 10Morĩ wẽ wa, ma tô duré ãma tatob'uzu za'ra ni. Tawamhã ãne te dasima nharĩ za'ra ni, ãne:

— Oro õ hã ihi'ré hã sãmra sina, rob'uiprazém na te te nasi da'awari za, morĩ wẽ di oto. I'madâ'â ze na 'ridawa nhisi ãma 're isãmra mono aré.

'Re ihâimana u'âsi mono nhorõwa 'ri ãma, Pedru te te dama irowasu'uzé wasu'u

11Tawamhã aibâ hã ma tô Pedru norĩ te te 're patété zahuré, Zuwãhã me, Salomahã nhisi na 'ri zahâpâ nhisi ãma. Te te 're patété zahuré mono ré, da te 'madâ'â za'ra wa, ma tô aihĩni itẽme dasisa're. Tawamhã ma tô ãma tatob'uzu za'ra ni. 12Tawamhã Pedru te te da'madâ'â wamhã, te dama tinha, ãne:

— Wasiré Izaraéu nhihudu norĩ, e marĩ wa, ma wa'ãma atob'uzu za'ra wa'wa. Wasi'uihâ na ihi'ré hã wa te ipese õ nherẽ, morĩ wẽ da hã, te we wa'ãma asõpré wa'wa. Wasi'uihâ na wa te pese õ di, wa norĩ hã. 'Re wane wẽ wa, wa te pese newa, te wei iwa'madâ'â za'ra wa'wa. Mare di. Ãne wab õ di. 13'Re ihâimana u'âsi mono, wahi'rata norĩ nhib'apito, Abra'ãhã nhib'apito, duré Izaquihi nhib'apito, duré Zacoho nhib'apito. Ta hã ma tô Zezusi hã wẽsã, tãma iromhuri wẽ 'wa hã. Tane nherẽ, Zezusi hã ma tô asiwi iwẽ'õ za'ra wa'wa. Ma tô asiwi isõmri 'wa, Pilatuhu ma. Taha nho'a, ma tô asiwi iwẽ'õ za'ra wa'wa, te te sima wẽ nherẽ Pilatu hã, morĩ da apâ, dazazém hawi. 14Zezusi hã 're morĩ wẽ uptabi nherẽ, ma tô asiwi iwẽ'õ za'ra wa'wa. Rob'manharĩ wasété'wa si ma tô asima iwẽ za'ra wa'wa, dazazém hawi da te dasiwi wazere da, Zezusihi upana. 15Dahâimana wẽ zéb da, dapẽ'ẽ wẽ hã za te te dama 're i'anhomri mono 'wa hã, aima za'ra wa'aba, da te dasiwi wĩrĩ da, ma tô dama i'ru za'ra wa'wa. Tazahã 'Re ihâimana u'âsi mono, ma tô apâ hâiwa'utu, dâ'â uptabi nherẽ. Wa norĩ hã Zezusi apâ hâiwa'utu wa, wa te isabu za'ra hã wa tô wa te dama 're wasu'u za'ra. 16Zezusi hã tiwaihu'u pese na ma tô ihi'ré hã pese, imreme te te sazei wa. Tahawa, ma tô aptete oto. Tahawa ma tô duré ta hã i'madâ'â za'ra wa'wa. Ma tô duré oto ta hã iwaihu'u za'ra wa'wa. Tô sena ta hã te te sazei wa, morĩ wẽ di oto wanho'a hã.

17— Wasiré Izaraéu nhihudu norĩ, ĩwapari pese za'ra wa'aba za. Wa hã wa tô aiwaihu'u za'ra wa'wa. Asiwi waihu'u aba ãna, ma tô dama i'ru za'ra wa'wa, Zezusi hã. Aima ipire za'ra wa'aba norĩ zama te te siwi waihu'u ãna, ma tô ta norĩ zama dama 'ru za'ra, Zezusi hã da te dasiwi wĩrĩ da. 18Taha zarina, ma tô 'Re ihâimana u'âsi mono hã timreme hã ãma uwaimra, duréihã isadawa 'mahârâ'wa norĩ hã wahi'rata norĩ ma, te te ãma 're i'awaihu'u siromo mono zéb zarina, Cristu hã za te te irobzépatazém na hã, Danho'reptui'wa da, te te ipisudu hã. 19-20Tahawa, te za aiwasédé hã 're irẽme za'ra wa'aba mo, 'Re ihâimana u'âsi mono u 're aipizari za'ra wa'aba mono da, aiwasédé hã te te aima 're pari za'ra wa'aba mono da. Tawamhã 'Re ihâimana u'âsi mono, te za te te 're aipawaptob za'ra wa'wa, aipẽ'ẽ 're, asiptete u'âsi ãma 're anomro aba mono da. Zezusi hã te za we apâ satõ, Danho'reptui'wa da, 'Re ihâimana u'âsi mono hã te te aima ipisutu za'ra wa'wa hã. 21Tane nherẽ, te za hâiwa ãma 're hâimana a'â, 'Re ihâimana u'âsi mono hã te te a'â ropese da, duréihã isadawa 'mahârâ'wa norĩ, wahi'rata norĩ ma, te te 're i'awaihu'u mono zéb zarina. 22Duréihã, Mozési ma tô wahi'rata norĩ ma rowasu'u siro, ãne: “Uburé Danhib'apito uptabi, 'Re ihâimana u'âsi mono hã ma tô ĩpisutu, tizadawa wasu'u'wa da, Asib'apito za'ra wa'wa hã. Ãne ni'wa hã asiré wa'wa hã te za ĩza'u si aima pisutu za'ra wa'wa, 'Re ihâimana u'âsi mono hã, ĩsine te te aima 're sadawa wasu'u za'ra wa'aba mono da. Tawamhã te za isimirowasu'u na 're iwapari pese za'ra wa'aba mo. 23Ni'wa hã imreme te te wapari õ wamhã, te za dasiwi wẽ'õ ni. 'Re ihâimana u'âsi mono nhib'a'uwẽ nhiti, te za satõrĩ ni. 'Re ihâimana u'âsi mono zama te za siwi wẽ'õ pese.” Ãne Mozési ma tô tinhib'a'uwẽ ma hã sadawa wasu'u za'ra. 24Duréihã uburé 'Re ihâimana u'âsi mono zadawa 'mahârâ 'rata 'wa norĩ hã ma tô ãne na te te tãma 're i'apisutu mono zéb uwaibaba, te te dama ãma 're rowasu'u za'ra. Samuéu hã uimrehẽne ma tô isadawa wasu'u na ãma sãna'rata, wahi'rata norĩ ma. Taha za'u si ma tô duré isadawa wasu'u'wa sidâpâsi te te dama ãma 're rowasu'u siromo za'ra. Uburé ma tô duré ã nimosi iromhâimanazém na zama, te te dama 're rowasu'u siromo za'ra. 25A norĩ wa'wa hã, wasiré wahi'rata norĩ nhihudu te 're aihâimana za'ra wa'aba mo. Tahawa, wahi'rata norĩ ma, 'Re ihâimana u'âsi mono te te 're i'apisutu mono zé hã te duré wama 're hâimana za'ra. Abra'ãhã ma, uimrehẽne ma tô tãma ropisutu 'rata. Ãne ma tô tãma ropisutu: “Romhutu'õpsi te za ni'wa hã asihudu hã te te 're da'apawapto, daro mono bâ rowẽ na 're danomro mono da.” Ãne ma tô taha ma ropisutu na'rata siro.

26— Tahawa, ma tô 'Re ihâimana u'âsi mono hã tinhimiropisudu hã ãma uwaimra. Ti'ra hã ma tô we atẽme uimrehẽne satõrĩ za'ra wa'wa, te te 're aipawaptob za'ra wa'aba mono da. Te te tãma 're iromhuri mono da hã te te pisutu wamhã, ma tô we atẽme satõrĩ za'ra wa'wa, 're anomro wasété aba mono zé hã 're rẽme za'ra wa'aba mono da, rowẽ na ãma 're anomro aba mono da oto.

Currently Selected:

Atu 3: xavBP

Highlight

Copy