Atu 21

Paulu hã Zeruzalẽ u imorĩzé wasu'u 'rãsudu

1Tame wa tô oto wasisawi za'ra ni. Taha parip si, wa tô wasima wapâ za'ra ni. Tawamhã rowa'u'u na uba'rene hã ma tô oto waré tiwara za'ra awa'awi, Cosi na rob'ré za'iti nhisi u. Tamomo wasihutu wamhã, awẽm na si, wa tô duré ai'aba'ré ni, Rodisi na rob'ré za'iti nhisi u, uba're nhimizahârizéb u hã. Tawamhã ta hawi, wa tô ai'aba'ré ni, Patara na 'ri nho'õmo nhisi u. 2Tame, wa tô wasiwi sõpẽtẽ ni, rowa'u'u na uba'rene hã, Penisiza na danhipti'a nho'õmo nhisi u iwara da hã. Tawamhã taha na wasi'aba'ré da, wa tô oto asisi ni. 3Uba'rene hã waré wara ré, wa tô Sipri na rob'ré za'iti nhisi hã 'madâ'â za'ra ni, wanhimi'e niwĩ. Õne haré ma tô waré wara, Siria na danhipti'a nho'õmo nhisi u. Tahawa, wa tô Tiru na 'ri nho'õmo nhisi u oto aihutu ni, tamomo da te iro'wasari hã da te sa'ra za'ra da. Tame wa tô oto wawairébé ni, uba're hawimhã. 4Tame wa tô duré oto Zezusihi zazei'wa norĩ hã sõpẽtẽ za'ra ni. Wasisõpẽtẽ za'ra wamhã, romhuri misi, ma tô wa'ãma ai'utõrĩ za'ra, wasiré wasi'ubumroi ré hã. Tawamhã isazei'wa norĩ hã 'Re ihâimana u'âsi mono pẽ'ẽzani te te tãma iwaihu'u za'ra zéb zarina, ma tô Pauluhu wi tiwi rosawi za'ra, Zeruzalẽ u hã morĩ tõ da. 5Tawamhã bâdâ hã wasi'aba'rézéb da hã iwa waptã'ã wamhã, isazei'wa norĩ hã ma tô wasiré ai'aba'ré, â zaihâ u, 'ri nho'õmo nhiti. Aihĩni ma tô wasiré ai'aba'ré, aibâ norĩ hã timro norĩ me, duré ti'ra norĩ me, te te wazawi za'ra da. Tame wa tô wahi'rãtitõ asimro ni, supara 'ré wa, wamreme zusi da. 6Ãhã wamhã, wasisawi za'ra pari, wa tô oto asisi ni apâ uba're wawẽ neb 're, wasi'aba'ré da. Ta norĩ hã tawamhã 'ri tẽme ma tô apâ hã ai'aba'ré.

7Tawamhã Tiru hawi, wa tô ai'aba'ré ni. Wasi'aba'réi wamhã, Patorema'ida na 'ri nho'õmo nhisi u, wa tô aihutu ni. Tame isazei'wa norĩ hã wa tô sawi za'ra ni. Taha wamhã, duré tame ma tô bâdâ hã misi wa'ãma ai'utõrĩ za'ra, i'rata wasi'ubumroi ré hã. 8Tawamhã awẽm na si, wa tô ai'aba'ré ni, Sézaréa u. Tame wa tô asimro ni, Filipihi nhorõwa ãma. Filipi hã Zezusihi wasu'uwẽ na isazei'õ'wa norĩ ma rowasu'u'wa. 7 na isazei'wa norĩ pawapto'wa da, da te ipisutu za'ra norĩ me, aré 're ihâimana mono, Zeruzalẽ ãma. 9I'ra norĩ sipi'õ hã imro'õ za'ra maparane si'uiwa na ihâiba hã, te 'Re ihâimana u'âsi mono hã te te dama 're sadawa wasu'u za'ra. 10Tame tawamhã ma tô bâdâ hã nasi wa'ãma si'utõrĩ za'ra. Tawamhã aibâ hã ma tô watẽme tiwisi za'ra, Zudéa na danhipti'a nho'õmo nhisi hawi. Aibâ hã 'Re ihâimana u'âsi mono zadawa 'mahârâ'wa, Agabu na isisi hã. 11Watẽme wisi wi, ma tô Pauluhu usisizé hã tiwi waze. Taha wamhã, ma tô ãma sipara'õtõ wasisi. Ma tô duré ãma sipawasisi. Taha pari, ma tô wama rowasu'u za'ra, ãne:

— 'Re ihâimana u'âsi mono pẽ'ẽzani hã ãne ma tô ĩma waihu'u: “Ã da'usisizép tede'wai ma, te za zudeu norĩ hã ãne 'manharĩ za'ra, Zeruzalẽ ãma 're isi'ubumroi mono hã. Zudeu'õ norĩ ma, te za hâiba nhomri za'ra.”

12Tawamhã imreme wa te wapari za'ra wamhã, tame isazei'wa norĩ 're isi'ubumroi mono norĩ me, wa tô Pauluhu wi rosawi za'ra ni aré, Zeruzalẽ u morĩ tõ da. 13Tawamhã asa te wama nharĩ za'ra, ãne:

— E niha da, te aiwa'õ za'ra wa'wa. Ma tô ãma ĩwi irobzei'õ za'ra wa'wa. Zeruzalẽ u hã ĩmorĩ da si, wa tô ĩsima rowẽ upta. Zezusi hã, Wanhib'apito na te 're sisi mono wa, ãté te za dasiwi ĩnherẽ ni, dazazéb 're. Ãté, wa za dârâ. Tane nherẽ, ĩma hã wẽ di tô, tamomo ĩmorĩ da hã.

14Tahawa, Zeruzalẽ u morĩ tõ da, wa te oto tiwi rosawi waihu'u za'ra õ di. Tahawa, wa tô tãma nharĩ za'ra ni oto, ãne:

— Wẽ di tô. Mo oto tô aimorĩ. Wanhib'apito te te aima iwẽzéb uwaibaba, te za tô i'manha.

15Tame wahâimana za'ra ré, suru na ma wa'ãma tironomro za'ra. Tawamhã wanhibro hã wa oto wasima ubumro za'ra ni, Zeruzalẽ u wasi'aba'ré da. Taha pari, wa tô wawairébé ni oto. 16Sézaréa ãma isazei'wa norĩ hã ma tô wame si'mazatõrĩ za'ra, umro na wame 'masi'aba'réi hutu da. Tawamhã Menasõhõ nhorõwa u ma tô wame ai'aba'ré, tame wasi'ubumro da a'â. Duréihã isazei'wa, Menasõ hã. Ipotozé hã Sipri na rob'ré za'iti nhisi hã.

Paulu hã Zeruzalẽ ãma 're isãmra mono zé wasu'u na'rada

17Tawamhã Zeruzalẽ u wasihutu wi, ma tô isazei'wa norĩ hã to sina wazawi za'ra. 18Tawamhã awẽm na si ma tô Paulu hã wame timorĩ za'ra, Tiaguhu u hã. Tame, ma tô uburé pese ubumro, isazei'wa 'madâ'â'wa norĩ hã. 19Tawamhã Paulu hã ma tô uburé sawi za'ra, timreme na. Te te sawi za'ra pari, ma tô tinhimiromhurizém na hã oto tãma siwasu'u za'ra, 'Re ihâimana u'âsi mono, zudeu'õ norĩ ma, uburé te te 're i'ab'manharĩ mono zém na. 20Pauluhu mreme te te wapari za'ra wamhã, aihĩni ma tô ãma tiwata za'ra, 'Re ihâimana u'âsi mono ãma. Tahawa, te asa tãma rowasu'u za'ra, Pauluhu ma, ãne:

— Wasisãnawã, ãhã na wa za aima wasiwasu'u za'ra ni. Zudeu norĩ, wasiré hã ahâ uptabi na ma tô Zezusi hã te te sina 're umnhasi za'ra, Danho'reptui'wa na. Aihĩni, te simi'ẽ na 're hâimana za'ra, 'Re ihâimana u'âsi mono nhimiroti 'rata na Mozésihi nhimi'ui'éré zarina. 21Ta norĩ hã ma tô aiwasu'u wapari za'ra, wasiré zudeu norĩ ma, asimirowahutu wasété newa. Mozésihi nhimi'ui'érézé hã, te wasiré zudeu norĩ wi isawi za'ra, u, daro mono bâ 're ihâimana za'ra mono wi, ãma 're hâimana za'ra mono tõ da. Duré Mozésihi nhimi'ui'éré zarina, ti'ra norĩ te te 're sihâiwata nhihâri za'ra mono tõ da, ma tô, u, wasiré zudeu norĩ wi isawi. Ãne ma tô aiwasu'u hã wapari za'ra, ta norĩ hã. 22Ãhã na aihĩni, te za aiwaihu'u za'ra ni, we aiwisizém na hã. E marĩ, wa za tawamhã 'manharĩ za'ra ni, ãne na aiwasu'u hã tô senai õ na da te waihu'u za'ra da. 23Tawamhã ãne wa za aima roti za'ra ni, marĩ 'manharĩ da, 're aihâimana wẽ mono zé hã da te waihu'u za'ra da. Wawa'wa, aibâ maparane si'uiwa na ihâiba hã marĩ na ma tô tãma ropisutu za'ra, 'Re ihâimana u'âsi mono ma. 24Tawamhã te za asiré isimroi mo, 'Re ihâimana u'âsi mono nhorõwa 'ri u, marĩ hã Mozésihi nhimi'ui'éré zarina asiré 'manharĩ za'ra wa'aba da, 'Re ihâimana u'âsi mono ma, aihâiba wasété ãna aihâimana za'ra wa'aba da, tãma. Tawamhã 'Re ihâimana u'âsi mono ma, pone'ẽrebâ te te siwi isimro hã te za tãma iwa'âbâ za'ra. Tawamhã te za oto si'rãpari za'ra, 'Re ihâimana u'âsi mono ma, te te iropisutu za'ra zéb zarina, te te tãma ãma i'uwaimrami za'ra na da te iwaihu'u za'ra zéb da hã. Ãne hã 'manharĩ wamhã, aihĩni te za aiwaihu'u za'ra ni oto, aiwasu'u hã tô senai õ na hã. Te za duré aiwaihu'u za'ra ni, 'Re ihâimana u'âsi nhimiroti 'rata na Mozésihi nhimi'ui'éré zarina 're i'aihâimana mono zém na hã. Ãne hã 'manharĩ da, wa aima waihu'u za'ra ni, wasiré isazei'wa zudeu norĩ, te te aiwaihu'u za'ra da. 25E niha tawamhã zudeu'õ nherẽ, isazei'wa norĩ 're ihâimana za'ra mono zéb da hã. Ãne wa tô tãma roti pari za'ra ni: “Danhimizama hã romhâiba 'manharĩ ãma 're dawata za'ra mono da, da te 're isimroi mono nhi hã 're huri aba mono õ di za. Duré iwapru hã 're âhuri aba mono õ di za. Duré danhimizama da te 're isõ'reti za'ra mono nhi hã 're huri aba mono õ di za. Duré aihâiba na asiwi 're asipsaihuri za'ra wa'aba mono õ di za.” Ãne wa tô tãma rob'ui'éré za'ra ni.

26Tawamhã Paulu hã ma tô ãma saze za'ra, aibâ norĩ siré morĩ da. Tawamhã awẽm na si, ma tô Paulu hã te te simro, aibâ norĩ hã, 'Re ihâimana u'âsi mono nhorõwa 'ri u. Marĩ hã ma tô isiré 'manharĩ za'ra, 'Re ihâimana u'âsi mono ma, hâiba wasété ãna tãma hâimana za'ra da. Taha pari, ma tô ãzé, 'Re ihâimana u'âsi mono nhorõwa u. Sébré wamhã, ma tô dama pisutu bâdâ hã, marĩ te te siwi i'manharĩ 'rãsutu zéb da hã. Te te siwi 'manharĩ parimhã, te za marĩ hã ihâiba mono bâ tãma sõmri za'ra, sasedoti norĩ ma, si'udâna za'ra. Tawamhã te za waihu'u za'ra ni, 'Re ihâimana u'âsi mono ma, te te i'manharĩ 'rãsutu za'ra zém na hã.

Zudeu norĩ hã, Pauluhu zada isiti'ru za'ra zé wasu'u

27Tawamhã zahadu bâdâ 7 na ãma si'utõrĩ za'ra õ di, Paulu norĩ, te te siwi i'manharĩ 'rãsutu zéb u hã. Romhuture di oto. Tawamhã zudeu norĩ hã Azia hawi isihudu ma tô Paulu hã sima sãmri za'ra, 'Re ihâimana u'âsi mono nhorõwa 'ri ãma. Izaraéu nhihudu norĩ te, 'ri 'wawi wa'ra ãma sãmra ré, ma tô siwi 'madâ. Tahawa, ma tô sada dawada'uri wasété za'ra, Pauluhu da. Tawamhã ma tô oto siwi pa'â, Paulu hã. 28Tahawa, te si'mahârâ za'ra zudeu norĩ hã, ãne:

— Wasiré Izaraéu nhihudu norĩ, wei wa'ãma ana wa'aba. Ã hã aibâ hã ma tô daro mono bâ te te dama 're rowahutu, da te dasiwi wawẽ'õ za'ra da, duré Mozésihi nhimiroti hã da te dasiwi wẽ'õ za'ra da, 'Re ihâimana u'âsi mono nhorõwa 'ri zama, da te dasiwi wẽ'õ za'ra da. Ma tô duré zudeu'õ norĩ hã we te te simro, 'Re ihâimana u'âsi mono nhorõwa 'ri u. Isõrõwa hã wẽ nherẽ, ma tô wawi wasété za'ra.

29Ta norĩ hã ma tô aibâ hã 'madâ'â za'ra aré, Trufimu na isisi hã, Éfézu ãma 're isãmra mono hã. 'Ri nho'õmo nhi'riti na Pauluhu siré morĩ ré, ma tô 'madâ'â za'ra. Tahawa, ma tô ãma romnomri za'ra, zudeu'õ nherẽ, 'Re ihâimana u'âsi mono nhorõwa 'ri u, Paulu te te saprõni 'ru te. Tahawa, te ãne da'mahârâ za'ra, zudeu norĩ hã. 30Tahawa, Zeruzalẽ 'remhã 'ri wa'õtõ mono bâ ma tô ro'wa'rudu hã te te ropé. Tawamhã Pauluhu zô ma tô dasitẽme dasisa're, 'Re ihâimana u'âsi mono nhorõwa 'ri u. Ma tô dasiwi pa'âri ni 'ri para, rob u da te dasiwi wazere da. Da te dasiwi wazere parip si, ma tô oto tiwi 'ri nhitom ni. 31Tawamhã te aré dasiwi wĩrĩ ni. Ãhã wamhã, da te aré dasiwi iwĩrĩzé wasu'u hã ma tô wapa, Roma hawi da'wapéi'wa norĩ nhib'apito hã, Zeruzalẽ ãma 're idasi'ubumroi mono norĩ isib'ru za'ra zé wasu'u hã. 32Tawamhã awa'awi ma tô tinhib'a'uwẽ norĩ zô hârâhai'aba'ré za'ra, tiwada'uri'wa norĩ me siré sisa'rei mono da, datẽme. Itẽme isisa'rei mono hã da te 'madâ'â za'ra wamhã, ma tô ãma rosahâri za'ra ni, Pauluhu ãma hã. 33Tawamhã apito hã ma tô Pauluhu u ai'ré 'râwi. Taha wamhã, ma tô pa'â. Taha pari, ma tô duré da'wapéi'wa norĩ ma ti'ru, te te siwi pawasisi da, maparane isi'uwazi nhorõ rutu na. Taha pari, ma tô ãma da'azadanha, ãne:

— E 'wa hã ã hã aibâ. E marĩ ma tô 'manha.

34Tawamhã dasiwa'rãmi te nasi tãma 'mahârâ za'ra ni, dasimana'rãmi hawi. Da te tãma wasu'u waré za'ra õ di. Dahârâ si'rahâri ahâ wamhã, iwasu'u uptabi hã te te waihu'u õ di, apito hã. Tahawa, da'wapéi'wa norĩ ma, ma tô ti'ru, Paulu te te siwi saprõni da, tinhorõwa u. 35Tawamhã hâimo 'ri para u sai'urizéb u sihutu wamhã, da'wapéi'wa norĩ hã ma tô te te siwi upari, Paulu hã, zudeu norĩ hã sahi sina, isarina si'aba'réi wa. 36Tahawa, ma tô nasi tãma 'ru za'ra, ãne:

— Wĩrĩ aba. Wĩrĩ aba.

37Tawamhã da'wapéi'wa norĩ hã apito nhorõwa u te te siwi 'mazébré õ ré, Paulu hã ma tô apito ma tinha, ãne:

— E aima wẽ õ di, aima ĩsiwasu'u da hã.

Tawamhã apito hã te asa tãma tinha, ãne:

— E nare aima waihu'u pese di, gregu norĩ mreme hã. 38Wa tô aré ai'ãma romno, a hã ezipsiu newa. Nimosi ni'wa hã ezipsiu norĩ siré ãma ma tô aibâ norĩ na aiwãnhizari za'ra. Ta hã 4 miu na ma tô te te simro, rowasété 'manharĩ'wa norĩ hã a'ubuni u. Roma ãma apito wi sipizari za'ra da, dapãrĩzéb ré, ma tô te te simro. 'Wazé, a hã simroi mono õ di.

39Tawamhã Paulu hã te asa tãma tinha, ãne:

— Wa hã zudeu. Tasu na 'ri nho'u isa'ẽtẽ nhisi ãma ĩpotozé hã, Sirisia na danhipti'a nho'õmo nhisi ãma hã. 'Wazé za ĩma iwẽ, te dama irowasu'u da hã.

40Tawamhã da'wapéi'wa norĩ nhib'apito hã ma tô tãma wẽ tô, te te dama rowasu'u da.

Paulu hã si'uihâ na dama isiwasu'uzé wasu'u na'rada

Tawamhã te te dama rowasu'u da, apito te te tãma wẽ wa, ma tô Paulu hã sai'u hâimo, 'ri para u sai'urizém na hã. Tame ma tô tinhib'rada hã dama wẽ hâimo, ari'iwi dasi'ubumro da. Tahawa, ma tô tawarõtâ'â za'ra ni. Dawarõtâ'â za'ra wamhã, Paulu hã ma tô timreme na dama rowasu'u, hebreu norĩ mreme na.

Currently Selected:

Atu 21: xavBP

Highlight

Copy