Atu 2

'Re ihâimana u'âsi mono hã Tipẽ'ẽzani we te te dama isõmrizé wasu'u

1-5Tawamhã zudeu norĩ hã ma tô 're sihutu Zeruzalẽ u, 'Re ihâimana u'âsi mono zadawa 'madâ'â'wa norĩ hã, tisiré norĩ u. Daro mono bâ ma tô 're dasihutu, Pẽtecosti na bâtâ nhisi u, 're danho ahâ za'ra mono wẽ te, 'Re ihâimana u'âsi mono ãma 're dawata za'ra mono da.

Tawamhã Pẽtécosti na bâtâ nhisi na Zezusihi zazei'wa norĩ hã ma tô sina ubumro. Siré si'ubumroi ré, awa'awi ma tô marĩ hã wapari za'ra, hâiwa hawimhã. Rowa'u'u wawẽ pupu'u ne hã 'ri 're wa'wa mono bâ ma tô marĩ hã wapari za'ra, aihĩni. Unhama ro'o ne hã ma tô marĩ hã sina sãmri za'ra. Ihâiba mono bâ ma tô te te ropé, itẽme, unhama ro'o ne hã. Tawamhã i'rãi mono bâ, ma tô simasa. 'Re ihâimana u'âsi mono pẽ'ẽzani hã ma tô itẽme tiwisi za'ra, isazei'wa norĩ u. Ihâiba mono bâ, ma tô ipẽ'ẽ 're sisisi, Ipẽ'ẽzani hã. Taha na si ma tô oto damreme mono bâ dama rowasu'u za'ra, timreme nai õ nherẽ, Ipẽ'ẽzani te te tãma iwaihu'u za'ra zéb zarina.

6Tawamhã Zeruzalẽ u 're idasi'rã'õtõ mono norĩ hã ropupu hã da te wapari za'ra wamhã, da'ahâ na ma tô itẽme dasito, Pedru norĩ u. Idasito mono hã, damreme mono bâ da te wapari za'ra wamhã, ma tô ãma tatob'uzu za'ra ni, imreme za'ra na hã. 7-8Tawamhã ãne te dasima rowasu'u za'ra ni:

— Pra. E niha, wa bété wamreme mono bâ wapari za'ra ni, õ norĩ hã, Galiléa ãma 're hâimana za'ra mono nherẽ. E niha, ma tô bété õ norĩ hã wamreme hã waihu'u za'ra. 9Wa norĩ hã darob amoi hawimhã wa we aihutu ni, Patia na danhipti'a nho'õmo nhisi hawimhã, duré Mediza na danhipti'a nho'õmo nhisi hawimhã, duré Elã na danhipti'a nho'õmo nhisi hawimhã, duré Mezopotãmia na danhipti'a nho'õmo nhisi hawimhã, duré Zudéa hawimhã, duré Capadosia na danhipti'a nho'õmo nhisi hawimhã, duré Põtu na danhipti'a nho'õmo nhisi hawimhã, duré Azia na danhipti'a nho'õmo nhisi hawimhã, 10-11duré Prizia na danhipti'a nho'õmo nhisi hawimhã, duré Pãfilia na danhipti'a nho'õmo nhisi hawimhã, duré Ezitu na romnhisi hawimhã, duré Libia na danhipti'a nho'õmo nhisi hawimhã, tame Sireni na 'ri nhisi 'rata daza'rui hawimhã. Nima norĩ hã Roma hawimhã ma tô we duré aihutu. Duré nima norĩ hã Cereta na romnhisi hawi ma tô we duré aihutu. Duré nima norĩ hã Arabia na danhipti'a nho'õmo nhisi hawi, ma tô we aihutu. Nima norĩ hã duré zudeu norĩ hã. Duré nima norĩ hã zudeu'õ norĩ, 'Re ihâimana u'âsi mono ãma 're idawata za'ra mono norĩ hã. E niha bété, wa wapari za'ra ni, wamreme mono bâ, aibâ norĩ hã te te wama irowasu'u za'ra na hã, 'Re ihâimana u'âsi mono, tiwaihu'u pese na te te dama 're i'ab'manharĩ wẽ uptabi mono wasu'u na hã.

12Tawamhã damreme mono bâ da te wapari za'ra wamhã, ma tô ãma tatob'uzu za'ra ni. Da te ãma rosa'rata waihu'u za'ra õ di. Tahawa, te ãne ãma tasisadanharĩ za'ra ni:

— E niha te te wama irowasu'u za'ra zém na wa za wasina rosa'rata za'ra ni. Wa te waihu'u za'ra õ di, wa te iwaihu'u za'ra zéb da hã.

13Tawamhã ni'wam norĩ si ma tô Pedru norĩ ãma tiwa'ẽ za'ra. Tahawa, te ãne sima rowasu'u za'ra:

— Oro õ norĩ hã wamreme mono bâ, te te waihu'u za'ra za, ma uwa 'rãi wa'u isé na si'uihâ idi'iti za'ra.

Pedru te te dama irowasu'uzé wasu'u

14Tawamhã Pedru hã ma tô hâiwi za. Isiré Zezusihi zadawa wasu'u'wa norĩ hã ma tô duré isiré hâiwi aimasa, 11 na ihâiba za'ra hã. Tawamhã mreme 'rãihâ na te dama rowasu'u Pedru hã, da te wapari za'ra da. Ãne te taha wamhã dama tinha:

— Wasiré zudeu norĩ, ĩwapari pese za'ra wa'aba za, duré uburé Zeruzalẽ ãma 're ai'ubumroi wa'aba mono norĩ zama, ĩnhimirowasu'u hã waihu'u za'ra wa'aba da. 15A norĩ wa'wa hã te ĩsiré isimasam norĩ ãma irosa'rata wasété za'ra wa'wa. Uwa 'rãi wa'u isé na wasi'uihâ idi'iti za'ra newa, te wa'ãma irosa'rata wasété za'ra wa'wa. Mare di. Rob'rãi wa'u isé na wa'uihâ idi'iti za'ra õ di. Zahadu bâdâ we sõ're za'a õ di. Ãne ré, da te 're âhuri mono õ di, rob'rãi wa'u isé hã. 16Ãhã na isadawa 'mahârâ'wai mreme hã ma tô wama ãma uwaimra oto, 'Re ihâimana u'âsi mono hã. Zuéu mreme hã ma tô wama ãma uwaimra, isadawa 'mahârâ'wai mreme hã. Tahawa, te ãne wa'ãma asõpré wa'wa. Tahawa, te duré ãne iwawapari za'ra wa'wa. Duréihã, 'Re ihâimana u'âsi mono mreme hã ma tô wahi'rata norĩ ma, te te 're awaihu'u, Zuéu hã. Ãne 'Re ihâimana u'âsi mono mreme hã:

17“Ãne wa za 'manha: Rob'rãsutu u ti'a si'utõrĩ õ ré, wa za Ĩpẽ'ẽzani hã te dama 're anhomri, daro mono bâ. Tawamhã asihudu za'ra wa'wa, aibâ norĩ hã, duré pi'õ norĩ hã te za te te 're ĩzadawa wasu'u za'ra. Ihi norĩ ma, sõtõ 'rowi te te 're irosawẽrẽ za'ra mono na wa za tãma 're ĩsiwaihu'u za'ra, ĩnhimiroti na hã. Duré, ipréduptém norĩ ma zama sõtõ 'rowim ne, wa za tãma 're ĩsiwaihu'u za'ra, ĩnhimiroti na.

18Ĩma romhuri'wa norĩ ma, wa za Ĩpẽ'ẽzani hã te tãma ãma 're aropé, aibâ norĩ ma, duré pi'õ norĩ ma zama. Tawamhã te za te te dama 're ĩzadawa wasu'u za'ra.

19Hâiwa na wa za marĩ dama iwaihu'u'õ hã 'manha, ãma idatob'uzu za'ra zéb da hã. Ti'ai ãma zama wa za duré marĩ hã dama iwaihu'u'õ hã 'manha. Dawapru te za puru. Duré uzâ te za ãro. Tawamhã isizé sa'ẽtẽ na watobro wamhã, te za rob'utõ.

20Bâdâ te te duré rob'uiwẽ õ di za. Te za tirobra. A'amo zama hã te za titõmo wapru. Ãne wa za 'manha, uburé Danhib'apito nhibâdâ hã iwa waptã'ã õ ré, ipire uptabi hã.

21Tawamhã te dapawaptob da, da te ĩwi waptẽrẽ za'ra wapsi, wa za tô sena da'anho'reptu.”

22Tawamhã Pedru hã ma tô duré ãma uzusi, tinhimirowasu'u na, ãne:

— Wasiré Izaraéu nhihudu norĩ, ĩwapari pese za'ra wa'aba za. Zezusi hã Nazaré ãma aré 're isãmra mono hã, ta hã, 'Re ihâimana u'âsi mono zadawa para, ma tô te te 're da'apawapto, danho'a. Marĩ iwẽ hã dama i'manharĩ waihu'u'õ hã ma tô te te dama 're ab'manharĩ. Tô sena, õ hã 'Re ihâimana u'âsi mono zadawa para, te te dama 're i'ab'manharĩ mono zém na da te 're waihu'u za'ra mono da, ma tô Timama waihu'u pese zarina marĩ iwẽ hã te te dama 're ab'manharĩ. Ai'rata 're hâimana za'ra wa'aba mono wa, ma tô ãne na hã ãma asiwi i'madâ'â waihu'u 'wa. 23'Re ihâimana u'âsi mono hã ma tô tiwaihu'u pese na waihu'u siro romhâ ré, Zezusihi dâ'âzé hã. Te te iwaihu'u siromo zéb uwaibaba, duré te te sima iwẽzéb uwaibaba, ma tô aima pisutu za'ra wa'wa, Zezusi hã dama 'ru za'ra wa'aba da, 'Re ihâimana u'âsi mono nhimiroti waihu'u'õ'wa norĩ ma, ai'upana za'ra wa'aba, te te siwi wĩrĩ da. Tahawa, ma tô siwi sasõ, wedepo'o nhonhi'rãmi na. Taha na ma siwi tiwĩ. 24Tane nherẽ, 'Re ihâimana u'âsi mono hã ma tô hâiwa'utu, ab're hawi watobro da, dâ'â uptabi nherẽ. Ma tô duré pawapto, dâ'â u'âsi nomro tõ da. Idâ'âzé tãma wapure wa, dâ'â u'âsi nomro waihu'u õ di, Zezusi hã. 25Tahawa, wahi'rada Dawi hã ma tô Zezusi wasu'u duréihã, ãne:

“Wanhib'apito, te ĩnho're 're hâimana u'âsi. Ta hã ĩnhimire niwĩ 're hâimana u'âsi mono wa, marĩ mono ipipa ma hã 're ĩpahi mono õ di za.

26Tahawa, ĩto sina, wa 're ĩhâimana, ĩpẽ'ẽ 'remhã. Duré ĩmreme toi u'âsi na, wa 're ĩmreme. Ĩhâiba ré 're ĩmorĩ u'âsi dai õ nherẽ, ĩpahi ãna wa za asô ĩsina 're ĩnhimipari u'âsi.

27Ĩdâ'â nherẽ, ĩrẽme õ di za, adâ 're ihâimana za'ra mono zéb ãma hã. Wa hã te aima 're romhuri wẽ u'âsi mono wa, ĩdâ'â wamhã, ĩhâiba 'roi õ di za. Tahawa, ĩdâ'âzé, wa hã te ĩsima pipa õ di za.

28'Re ĩmorĩ wẽ u'âsi da, ma tô ĩma iwaihu. Tahawa, ĩto sina wa za 're mo, asõ'a 're ĩmorĩ wa.”

29Taha pari, te duré dama tinha, ãne:

— Wasiré Izaraéu nhihudu norĩ, ĩwapari pese za'ra wa'aba za. Wahi'rada Dawi hã wa za aima wasu'u za'ra wa'wa oto sõ'awi. Tô sena, ma tô dârâ, ta hã. Dâ'â wamhã, ẽtẽ zahâpâ wa, ab're 're, ma tô dasiwi sẽrẽ ni. Da te isẽrẽzé hã wama waihu'u pese za'ra di, ãhã na hã. 30Ta hã, 'Re ihâimana u'âsi mono zadawa 'mahârâ 'rata 'wa, te 're hâimana. Tawamhã 'Re ihâimana u'âsi mono, ma tô tãma ropisutu, isihudu hã isine dama si'apito da, zahadu wapsi, i'uirĩ na te te dama 're aroti mono da. 31-32Tahawa, 'Re ihâimana u'âsi mono te te tãma iwaihu'uzéb zarina, ma tô wasu'u siro Dawi hã, Danho'reptui'wa da, te te ipisudu hã apâ za ihâiwa'utuzém na hã, ãne:

“Dâ'â nherẽ, 'Re ihâimana u'âsi mono te te rẽme õ di za. Ihâiba hã 'roi õ di za.”

Ãne ma tô Dawi hã wahi'rata norĩ ma rowasu'u za'ra, apâ za ihâiwa'utuzém na. 'Re ihâimana u'âsi mono hã ma tô Zezusi hã hâiwa'utu. Apâ te te hâiwa'utu wamhã, wa norĩ hã wa tô 'madâ'â za'ra ni. Tahawa, wa wa te dama 're wasu'u za'ra, ihâiwa'utuzém na hã. 33'Re ihâimana u'âsi mono hã ma tô sitẽme ti'â apâ, isimire niwĩ oto 're sãmra u'âsi mono da. Tawamhã Tipẽ'ẽzani hã ma tô ti'ra ma tisõ, te te tãma ãma iropisutu siro hã, te te sima 're ida'awẽ mono zéb uwaibaba, te te dama 're anhomri mono da. Ãhã na, Zezusi hã ma tô wama sõmri za'ra, Tipẽ'ẽzani hã. Tahawa, ma tô ãne wa'ãma asõpré wa'wa. Ma tô duré ãne iwawapari za'ra wa'wa, aimreme mono bâ wa'aba. 34Dawi hã dâ'â wamhã, hâiba wahuré morĩ õ di, hâiwa u hã. Cristuhu si ma tô hâiba wahuré mo, hâiwa u apâ. Tahawa, ãne ma tô duré wahi'rata norĩ ma Cristu wasu'u wẽ, Dawi hã:

“'Re ihâimana u'âsi mono te roti, Ĩnhib'apito ma: ‘We aimorĩ, ĩ'rata 're asãmra mono da, ĩnhimire niwĩ. 35Zahadu, wa za aipawapto. Siwi aiwẽ'õ'wa norĩ ma, asiptete di za. Tahawa, a hã tô sena Danhib'apito uptabi na te te siwi aiwaihu'u wa, te za aima 're 'rã po za'ra. Asisiti te za duré 're i'azatõrĩ mo.’ ”

36Tahawa, wa hã wa aima rowasu'u za'ra wa'wa, waihu'u pese za'ra wa'aba da oto, duré uburé wasiré Izaraéu nhihudu norĩ te te waihu'u pese za'ra da. Zezusi hã da te dasiwi sasõmri da, dama i'ru za'ra wa'wa hã, ta hã 'Re ihâimana u'âsi mono te te ipisudu, uburé Danhib'apito da hã, duré uburé Danho'reptui'wa da hã. Ma'ãpé ãhã wasu'u hã tô sena na waihu'u pese za'ra wa'aba.

37Tawamhã Pedruhu mreme, da te wapari za'ra wamhã, ma tô tapẽ'ẽwara za'ra ni. Tahawa, te ãne tãma nharĩ za'ra ni, Pedru norĩ ma, Zezusihi zadawa wasu'u'wa norĩ ma hã:

— Wasiré Izaraéu nhihudu norĩ, e niha za, tawamhã. E marĩ, wa za 'manharĩ za'ra ni.

38Tawamhã Pedru te duré asa dama tinha, ãne:

— Aiwasété wi, te za aipizari za'ra wa'wa, rẽme pese za'ra wa'aba da, Zezusihi nhimiroti na si oto 're anomro aba mono da. Zezu Cristuhu zazei uptabi 'wa na asiwasu'u za'ra wa'aba sina, te za â dawabzuri hã i'manharĩ za'ra wa'wa. Aihâiba mono bâ te za ãne i'manharĩ za'ra wa'wa, aiwasédé hã te te aima pari za'ra wa'aba da, 'Re ihâimana u'âsi mono hã. Tawamhã Tipẽ'ẽzani te za aima sõmri za'ra wa'wa. 39Ãne ma tô aima ropisutu siromo za'ra wa'wa, te te aima 're sõmri za'ra wa'aba mono da, asihudu norĩ ma zama. Wasiré'õ norĩ ma zama ma tô tãma ropisutu siromo za'ra. Wanhib'apito, 'Re ihâimana u'âsi mono, za sitẽme sô 're ihârâ za'ra mono norĩ ma, ma tô ropisutu siromo za'ra, Tipẽ'ẽzani na hã.

40— Tahawa, wasiré Izaraéu nhihudu norĩ 're ihâimana wasété za'ra mono zém na 're aihâimana za'ra wa'aba mono õ di za. Ãhã na tiwi aipizari za'ra wa'aba, 're idanomro wẽ mono zém niwĩ oto 're anomro aba mono da, asisõ'reptu za'ra wa'aba da, 'Re ihâimana u'âsi mono hã te te dasiré aiwẽ'õ pese za'ra wa'aba tõ da.

41Tawamhã da'ahâ na ma tô Zezusi hã saze za'ra ni, Pedru te te dama isadawa wasu'uzém na hã. Tahawa, ma oto â dawabzuri hã 'manharĩ za'ra ni, 3 miu na dahâiba hã. Tawamhã Zezusihi zazei na'rata 'wa norĩ me, ma tô oto sitẽme atob za'ra. Taha wamhã, ahâ uptabi di oto, isazei'wa norĩ hã.

Isaze na'rata 'wa norĩ 're ihâimana za'ra mono zé wasu'u

42Tawamhã Zezusihi zazei'wa norĩ hã isadawa wasu'u'wa norĩ nhimirowahudu hã te te 're wapari pese za'ra. Te te rẽme za'ra õ di. Ma tô 're sisawi pese za'ra. Ma tô duré 're si'rã'õtõ, tisa da, duré 'Re ihâimana u'âsi mono ma, 're mreme zusi mono da. 43Zezusihi zadawa wasu'u'wa norĩ hã marĩ iwẽ hã ahâ na ma tô te te dama 're 'manharĩ za'ra, dama i'manharĩ waihu'u'õ hã. Tahawa, ma tô ãma 're datob'uzu za'ra.

44Tawamhã isazei'wa norĩ hã te oto siré 're hâimana za'ra, aihĩni. Tinhibrom na tite da si, te te sima ãma 're rosa'rata za'ra mono õ di oto. 45Ni'wam norĩ hã ma tô tinhipti'a hã te te dama 're wede za'ra, duré tinhibrob zama, iwa'âbâ zô. Tawamhã iwa'â hã ma tô te te sima 're po'o za'ra, marĩ zô tiwi 're iro'wanhi'riti za'ra mono zéb zarina. 46Awẽ sidâpâsi ma tô duré 're si'rã'õtõ, 'Re ihâimana u'âsi mono nhorõwa 'ri 'wawi wa'ra 're, 're mreme zusi mono da, tãma. Tinhorõwa mono bâ, ma tô duré 're si'rã'õtõ, i'u'ẽtẽ wapu na siré 're saihuri mono da. Sima 're sõprub za'ra mono wa, ma tô to sina tisa na hã siré 're saihuri. 47'Re ihâimana u'âsi mono ãma te duré siré ãma 're wata za'ra, uburé isõprubzém na hã. Tawamhã aihĩni, ma tô isazei'wa norĩ hã wẽsãmri za'ra ni. Tawamhã awẽ sidâpâsi, ma tô isazeté'wa dasina hã tahâ'â ni, 'Re ihâimana u'âsi mono hã rowasété hawi te te 're i'anho'reptui mono norĩ hã.

Currently Selected:

Atu 2: xavBP

Highlight

Copy