Atu 12

Pedru hã dazazém hawi 'Re ihâimana u'âsi mono te te isõ'reptuzé wasu'u

1Tawamhã apito Erodihi zadawa para ma tô isazei'wa norĩ ma, da te tãma 're rob'manharĩ wasété za'ra. 2Tahawa ma tô Zuwãhã dub'rada Tiagu hã dasiwi wĩrĩ ni, isi'uwazi 'wa pa na, apito Erodihi zadawa para. 3Tawamhã zudeu norĩ ma, ma tô tãma rowẽ za'ra, Tiagu da te dasiwi iwĩrĩzé hã. Tahawa, Erodi hã ma tô Pedruhu zama dama ti'ru, da te dasiwi âri da, dazazéb 're, da te sẽrẽ da. I'u'ẽtẽ duptoi'õ na dasa, da te 're ihuri mono zé bâtâ na ma tô siwi ti'â. 4Te te siwi âri wamhã, ma tô siwi tisẽ, dazazéb 're. Pascowa na dato nhisi hã si'utõrĩ parip si, da'ãma rowairébé'wa norĩ nho're sab da, ma tô a'â siwi tisẽ, dazazéb 're, da'ãma rowairébé'wa norĩ hã da te iwĩrĩzéb da hã, te te siwi ãma rowairébé da. Tahawa, da'wapéi'wa norĩ hã te nasi 'madâ'â za'ra siwa'rãmi. Maparane si'uiwa na si hã te nasi mararé itẽme ai'aba'ré. Abzuma zama te nasi siwa'rãmi ai'aba'ré, bara na zama, mara wa'wab zama, te te nasi 'madâ'â za'ra da. Uburé hã 16 na ihâiba za'ra hã, da'wapéi'wa norĩ hã. 5Pedru hã dazazéb 're, sãmra ré, te isazei'wa norĩ hã sa'ẽtẽ ãma mreme zusi u'â, 'Re ihâimana u'âsi mono ma, siré 're isi'rã'õtõ mono norĩ hã.

6Pedru hã Erodi te te dama i'ruzé hã romhuture di oto, da'ãma rowairébé'wa nho're sab da hã. Taha wamhã, awẽpsi te za dasiwi wazere ni, danho'a te te siwi ãma rowairébé da, niha wamhã, duré da te dasiwi wĩrĩ da. Tawamhã te Pedru hã oto nhono, bara na. Ãhã wamhã, da'wapéi'wa norĩ wa'wa, maparane isi'uwazi nhorõ rutu ré te nhono, pawasisi ré. 'Ridawa i'madâ'â'wa norĩ hã te duré ãhã wamhã aima'wara zahuré. 7Tawamhã hâiwa ãma Wanhib'apito ma, romhuri'wa hã awa'awi ma tô itẽme wi, mara wa'wa. Ãhã wamhã, mara wa'wam nherẽ, dazazéb 'remhã ma tô tirowa'a pese, 'ri 're wa'wa ãma hã. Hâiwa hawi romhuri'wa hã ma tô Pedru hã rési isisé ãma, utu da. Tawamhã te tãma tinha, ãne:

— Ai'aba'ré na aiwahutu.

Tahawa, ipawasisizé hã si'uihâ na ma tô tãma asisina, isi'uwazi nhorõ rudu hã.

8Tawamhã hâiwa hawi romhuri'wa hã te duré tãma tinha, ãne:

— Ai'uza hã ai'usisizém na asima wasisi. Aipara'uza zama asima za na.

Tawamhã Pedru, ma tô ãma saze, te te 'manharĩ da. Te duré tãma tinha:

— Ai'ubuzé ihâpa ré, we ĩzarina aimorĩ.

9Tawamhã sõtõ 'rowim ne, ma tô isarina watobro Pedru hã, te te irosawẽrẽ ne hã. Te te waihu'u õ di, tô sena 'Re ihâimana u'âsi mono ma romhuri'wa, itẽme iwisi na hã, hâiwa hawi. 10Tawamhã 'ridawa 'madâ'â'wa imorĩ'rada hã ma tô sa're zahuré. Taha nhana're isa hã ma duré sa're zahuré, Pedru norĩ hã. Tawamhã ma tô aimasisi zahuré oto, dazazé 'wawi wa'ra 'ridawa u si'uwazi tete 'manharĩ na 'ridawa nhito pese u. Tawamhã uihâ na ma tô 'ridawa nhitobzé hã tãma aiwãnhizari zahuré. Õne haré ma tô oto tipusi zahuré. Bâdâdi na ma tô tineb zahuré. Tawamhã hâiwa ãma romhuri'wa hã ma tô Pedruhu wi aimani, awa'awi. 11Tahawa, Pedru hã ma tô 'râwi sina rosa'rata, ãne:

— E niha. Te rosawẽrẽ newa. Tane nherẽ, tô sena ma tô Wanhib'apito hã we ĩtẽme satõ, hâiwa ãma tãma iromhuri'wa hã Erodihi wi, te te ĩnho'reptu da, zudeu norĩ te te sima iwẽ za'ra zéb zarina, ĩdâ'â tõ da.

12Tawamhã ãma iromhâimanazém na tô sena te te oto sina waihu'u wamhã, Mariaha nhorõwa u ma tô mo, Pedru hã. Zuwã Marcuhu na, Maria hã. Tame da'ahâ na ma tô tasi'rã'õtõ ni, ãma damreme zusi da. Taha wamhã, tamomo te oto mo, Pedru hã. 13Wisi wi, ma tô 'ri 'wawi 'ridawa nhitobzé hã ta'a. Tawamhã dama romhuri'wa hã ma tô itẽme wahudu pi'õ hã, Rodi na isisi hã 'ridawa ta'a'wa, te te waihu'u da. 14Tawamhã Pedruhu mreme te te waihu'u wamhã, ma tô sima rowẽ. Rowẽ te, si'aba'ré na apâ sipi'rai wa, ma tô 'ridawa na po're ha'â. Te te tãma 'ridawa ãna, te tisiré norĩ ma te te wasu'u da, wara. Ãne ma tô tãma wasu'u za'ra:

— Pedru hã te za, 'ridawa.

15Tahawa, te pi'õi ma nharĩ za'ra, ãne:

— Mare di. Ma ai'rãsiwamna.

Ãhã wamhã, ma duré asa ãma tãma wa'rãmi za'ra, ãne:

— Tô sena te za, Pedru hã.

Tawamhã te oto nharĩ za'ra, ãne:

— Ãté Pedruhu 'madâ'â'wa te za, hâiwa ãma 'Re ihâimana u'âsi mono ma, romhuri'wa hã.

16Ãne ré, te Pedru hã nasi 'ridawa ta'a. Tahawa, ma tô oto tãma 'ridawa za'ra. Ãhã wamhã, õ hã na tô te te siwi 'madâ'â wamhã, ma tô oto ãma titob'uzu za'ra, sena na. 17Tawamhã Pedru hã ma tô tinhib'rada hã tãma wẽ za'ra hâimo, ari'iwi si'ubumro da. Taha pari, ma tô tãma siwasu'u za'ra, Wanhib'apito hã dazazém hawi, te te iwazere na. Te duré tãma nharĩ za'ra:

— Tiaguhu ma, te za ĩwasu'u za'ra wa'wa, duré isiré isazei'wa norĩ ma zama.

Taha pari, ma tô tiwi timorĩ za'ra nimomo.

18Tawamhã ãma awẽ wamhã, awẽ wi, da'wapéi'wa norĩ hã Pedru te te siwi sa'rese za'ra õ wa, ma tô tiwi tirowaihu'u'õ za'ra. 19Ãhã wamhã, Pedruhu zô sõpré pese da, ma tô Erodi hã tãma nharĩ za'ra. Tane nherẽ, sô sõpré pese mono nherẽ, te te siwi sãmri õ di. Tahawa, Erodi hã ma tô i'madâ'â'wa norĩ hã sadanharĩ pese za'ra, Pedruhu ãma. Taha pari, ma tô dama 'ru za'ra, da te siwi simro da, dazazé 'madâ'â'wa norĩ hã.

Apito Erodihi dâ'âzé wasu'u

Tawamhã apito Erodi hã ma tô mo, Zudéa na danhipti'a nho'õmo nhisi hawi, Sézaréa u, tame sãmra da a'â, niha bâtâ na.

20Tawamhã apito Erodi hã ma tô sahi u'âsi dazada hâimana, Tiru na 'ri nho'õmo nhisi ãma 're idahâimana za'ra mono norĩ zada, duré Sidõ na 'ri nho'õmo nhisi ãma 're idahâimana za'ra mono norĩ da zama. Tahawa, Tiru hawi ma tô da'madâ'â'wa norĩ hã ai'aba'ré, apito Erodihi u, Sidõ hawib zama. Erodi hã te te siwi sadaihu'u da, ma itẽme hã sito. Tawamhã Blastu na Erodihi nhibrob 'madâ'â'wa nhisi u uimrehẽne, ma tô aihutu. Tawamhã te ãne tãma siwasu'u za'ra, Blastuhu ma hã:

— Ma'ãpé, wa'ãma aime za'ra na, Erodihi me apâ wa te wasima ropese za'ra da, wasazé hã wa te duré wasima 're uipra za'ra mono da, isib'a'uwẽ norĩ wi apâ.

Tawamhã Blastu hã ma tô ãma saze za'ra, ãma sime za'ra da. Taha pari, ma tô Erodihi u aihutu, te te duré ta hã sadawa pibu za'ra da, tisazé te te apâ 're i'uipra za'ra mono zéb da hã. 21Tahawa, Erodi hã bâdâ te te sima ipisutuzém na ma tô ti'uza wẽ ihâpa hã sima tisẽ. Taha wamhã, Danhib'apito 're isimasisi mono zéb ãma ma tô nhamra, tinhimirotizéb ãma, te te dama roti da. 22Tawamhã te te dama roti pari, ma tô ãne ãma tawata za'ra ni, damreme 'rãihâ na:

— Õhõ mreme hã, aibâ mreme õ di. Ihâiba'õi mreme, duré iwaihu'upese mreme.

23Tawamhã awa'awi ma tô hâiwa ãma Wanhib'apito ma romhuri'wa hã azâ, ihâzé pire na, Erodi hã. 'Re ihâimana u'âsi mono ãma si 're idawata za'ra mono zé hã te te sima sawi wa, ma tô azâ. Marĩ hã isãna wai'u ne hã ãma sépu'u wa, ma tô oto dârâ, Erodi hã.

24Ãhã wamhã, 'Re ihâimana u'âsi mono zadawa wasu'u hã ma tô ropé, 'ri pâ. Sadawa wasu'u za'ẽtẽ di oto ropâ.

Banabé norĩ hã Saruhu me, Ãtioquia u apâ inebzé wasu'u

25Tawamhã Banabé norĩ hã ma tô apâ tineb zahuré, Sauluhu me, Ãtioquia u. Isazei'wa norĩ nhibzari te te i'wapé zahuré hã te te dama sõmri zahuré pari, ma tô apâ tineb zahuré, Zeruzalẽ hawi. Taha wamhã, te Zuwã Marcu hã isiré timorĩ zahuré.

Currently Selected:

Atu 12: xavBP

Highlight

Copy