Atu 10

Conerizu hã, Pedruhu zô ihârâzé wasu'u

1Sézaréa na 'ri nho'õmo nhisi ãma te aibâ hã 're sãmra, da'wapéi'wa norĩ wada'uri'wa hã, Coneliu na isisi hã. Ta hã romanu. Da'wapéi'wa norĩ hã, isimi'ubumro norĩ hã Italianu na iwaptẽrẽ zara hã. Ta norĩ zama hã duré romanu. 2'Re ihâimana u'âsi mono zadawa 'madâ'â'wa te 're hâimana Coneliu hã. Duré isõrõwa ãma isiré 're ihâimana za'ra mono norĩ zama, te isarina imreme 'madâ'â pese 'wa na hã 're hâimana za'ra. Zudeu norĩ, isibrob'õ norĩ ãma ma tô 're siwãrĩ u'âsi ta hã, zudeu õ nherẽ. Te duré 're mreme u'âsi, 'Re ihâimana u'âsi mono ma. 3Tawamhã nimahã bâtâ na bâdâ sipra wi, ma tô marĩ hã 'madâ, sõtõ 'rowim ne. Hâiwa ãma 'Re ihâimana u'âsi mono ma, romhuri'wa hã ma tô 'madâ. Ma tô we itẽme sina rotété. Taha wamhã, te 'mahâ oto ãne:

— Coneliu.

4Tawamhã tãma pẽ'ẽwara nherẽ, te te 'madâ'â pese sina, ma sada'â, ãne asa:

— E marĩ na te we ĩ'mahâ.

Tawamhã asa te tãma tinha, hâiwa ãma romhuri'wa hã:

— 'Re ihâimana u'âsi mono hã ma tô te te 're aiwapari ze, tiwi 're irowaptẽrẽ mono zém na hã. Duré da'ãma 're aiwãrĩ pese mono na zama ma tô aiwaihu'u. Tahawa, te ai'ãma 're po're pu'u u'âsi. 5Tahawa, te za ida'mazatõ, Zopi u Sima Pedru na aibâ nhisi zô. 6Tinhipsara 'rata te a'â nhamra, romhâ su'u 'wai 'rata. Isõrõwa hã âporé zaihâ na te 're sa, 'ri hã.

7Tawamhã ãne na te te tãma rowasu'u pari, ma tô apâ mo ihawi, hâiwa ãma 'Re ihâimana u'âsi mono ma, romhuri'wa hã.

Tahawa, te Coneliu hã sitẽme sô tihârâ zahuré, isõrõwa 're, tãma iromhuri'wa norĩ zô. Tizadawa zapari'wa zô zama te hâ, da'wapéi'wa zô. 'Re ihâimana u'âsi mono zadawa 'madâ'â'wa, da'wapéi'wa hã. 8Marĩ te te i'madâ'âzém na te tãma rowasu'u za'ra. Taha parimhã, ma tô satõrĩ za'ra, Zopi u si'aba'ré da.

9Tawamhã si'aba'réi ré, ma tô tiwi ti'awẽ za'ra. Awẽ bâtâ na te duré ai'aba'ré, Zopi u. Tawamhã tamomo ma tô oto rosahutu za'ra.

Tawamhã ta norĩ hã, Coneliu te te isatõrĩ za'ra norĩ hã itẽme sihutu õ ré, abzuma ma tô Pedru hã sai'u 'ri nhisi hâpâ u hâimo, 'Re ihâimana u'âsi mono ma, mreme da. 10Tawamhã mra hã ma tô tiwĩ. Ãhã wamhã, sa neza. Tawamhã sô danhipi ré, ma tô duré marĩ hã 'madâ, sõtõ 'rowim ne. 11Hâiwa 'ridawa haré hã ma tô 'madâ, marĩ we te te isi'ra ti'ai u, zazahâ hâi wa'õtõ waré wawẽ hã. Ihâ nhipti mono bâ maparane si'uiwa na i'rã'õtõ na, da te ãma isi'ra hã. 12Taha 'remhã, te abaze hã i're daba'wara, inhize hã, duré inhi zei'õ hã siwazari, ti'ai baba di'i na 're inomro mono norĩ zama. Si zama te siwazari duré daba'wara. 13Tawamhã Pedru, ma tô wapa, ni'wai mreme hã. Ãne te ta hã 'mahâ:

— Pedru, aiwahutu, asima 'maiwĩrĩ da, asai hâ.

14Tawamhã asa te tãma tinha, ãne:

— Ĩnhib'apito, mare uptabi di. Marĩ iwasétére hã te 're 'masi mono õ di, wahi'rada Mozési hã te te wawi isawi zahi za'ra hã.

15Tawamhã tãma irowasu'u'wa te duré tãma tinha, ãne:

— 'Re ihâimana u'âsi mono, te te aima wasu'u nherẽ, ta hã wasété õ nherẽ, iwasété na hã waptẽrẽ õ di za.

16Tô õhõ na si te ãma tãma sahu si'ubdatõ, timreme na hã. Taha pari, ma tô ti'â apâ, hâiwa u zazahâ hâi wa'õtõ waré wawẽ hã.

17Tawamhã Pedru te zahadu ãma rosa'rata, te te i'madâ'âzém na hã marĩ te te tãma iwasu'u hã te te waihu'u õ wa. Te te ãma rosa'rata ré, Coneliu te te isatõrĩ za'ra norĩ hã ma tô aihutu, 'ri nho'õmo u. Tawamhã Simahã nhorõwa zô ma tô dazadanharĩ za'ra. Ãhã wa, te 'ridawa aimasa oto. 18Tawamhã te sô da'mahârâ za'ra, ãne:

— E Sima Pedru hã te nhamra.

19Zahadu te Pedru hã ãma rosa'rata, te te i'madâ'âzém na. Tawamhã 'Re ihâimana u'âsi mono hã ma tô Tipẽ'ẽzani na tãma waihu'u, ãne:

— Õhõta, aibâ norĩ hã te we asô sinharĩ za'ra, si'ubdatõ ihâiba norĩ hã. 20Tahawa, ma'ãpé aiwahutu, itẽme si'ra za'ra da. Ta norĩ hã zudeu'õ na 're hâimana za'ra mono nherẽ, tiwi aiwairĩ za'ra õ di za, wa hã te we atẽme isatõrĩ za'ra na dâ'âsina.

21Tawamhã Pedru, ma tô si'ra oto, aibâ norĩ u. Te tãma siwasu'u za'ra, ãne:

— Wa hã Sima Pedru na ĩnhisi. E marĩ da, te ĩzô asinharĩ za'ra wa'wa.

22Tawamhã asa te tãma nharĩ za'ra, ãne:

— Da'wapéi'wa norĩ wada'uri'wa hã ma tô wei wazatõrĩ za'ra atẽme, Coneliu na isisi hã. Ta hã aibâ iwẽ, 'Re ihâimana u'âsi mono ãma 're iwata u'âsi mono. Duré zudeu norĩ te te 're i'awẽsãmri mono. Hâiwa ãma 'Re ihâimana u'âsi mono ma romhuri'wa hã ma tô po're pu'u Coneliu hã, asô hârâ da, asimirowasu'u hã te te wapari da.

23Tawamhã Pedru te tãma rob'ru za'ra, 'ri para u sisisi da, sõtõ za'ra da a'â.

Tawamhã ma tô ãma ti'awẽ za'ra. Awẽpsi, te ime timorĩ za'ra, aibâ norĩ me. Zezusihi zazei'wa norĩ zama te duré umro na isiré ai'aba'ré, Zopi ãma 're ihâimana za'ra mono norĩ hã. 24Awẽpsi te za aihutu, Sézaréa u hã. Tame Coneliu hã te zahadu sô mapa. Sô ihârâ za'ra norĩ hã te duré isiré sô mapari za'ra, isisãnawã norĩ hã, duré isiwadi norĩ zama.

Tawamhã Pedru norĩ hã ma tô aihutu. Sihutu wi, Pedru hã te 'ri tẽme mo. 25'Ri para u sébré õ ré, ma tô sina uzusi 'ridawa u, Coneliu hã. Tawamhã Coneliu hã 'rã po sina, ma tô aime ipapara hi'rãtitõ, Pedruhu papara, tãma wapu wa, ãma wata da. 26Tane nherẽ, Pedru hã ma tô wahutu. Ãne te tãma tinha:

— Aiwahutu. Wa hã asine hã a'uwẽ.

27Tawamhã te te sima rowasu'u zahuré sina, ma tô oto si'mazasi zahuré, 'ri para u. Da'ahâ na ma tô sô tasi'rã'õtõ ni. 28Tawamhã Pedru hã te te da'madâ'â wamhã, te dama tinha, ãne:

— A norĩ wa'wa hã ma tô iwaihu'u pese za'ra wa'wa, 're iwahâimana za'ra mono zém na hã. Wa norĩ hã zudeu norĩ hã, zudeu'õ norĩ nhorõwa u 're wanhisisi waihu'u mono õ di. Wa norĩ hã 'Re ihâimana u'âsi mono nhib'a'uwẽ 're wahâimana za'ra mono wa, wa tiwi 're wasi'uwati pese za'ra, zudeu'õ norĩ wi. Ãne 're iwahâimana za'ra mono zé hã. Tane nherẽ, 'Re ihâimana u'âsi mono hã ma tô ĩma waihu'u pese oto, ni'wa, iwẽ na 'Re ihâimana u'âsi mono te te ĩma wasu'u wamhã, zudeu'õ nherẽ, te ĩsiwi wẽ'õ tõ da. Ãne ma tô ĩma waihu'u. 29Tahawa, ãma ĩzô aihârâ za'ra wa'aba wa, awa'awi wa tô we atẽme ĩmorĩ za'ra wa'wa, ĩsiwairĩ ãna. Ma'ãpé, ĩma rowasu'u za'ra wa'aba. E marĩ da, te ãma ĩzô ida'mazatõrĩ za'ra wa'wa, we ĩmorĩ da, atẽme za'ra wa'aba.

30Tawamhã Coneliu te asa tãma rowasu'u oto, ãne:

— Bâdâ si'ubdatõ ma tô ĩ'ãma ai'utõ, aibâ ĩtẽme iwisizém na hã. 'Re ihâimana u'âsi mono ma, ĩmreme ré, ma tô ĩtẽme wi, bâdâ sipra wi. Ti'uza hâirã na ma tô rob'uiwẽ, rowa'a nherẽ. 31Tawamhã te ĩma tinha, ãne: “Coneliu, 'Re ihâimana u'âsi mono ma, 're aimreme mono ré, ma tô te te 're aiwapari ze. Duré da'ãma 're aiwãrĩ pese mono na ma tô aiwaihu'u. 32Ma'ãpé da'mazatõrĩ, Zopi u. Sima Pedruhu zô aihârâ. Sima na romhâ su'u'wa nhisi nhorõwa ãma te nasi da'wa. Â poré zaihâ na te isõrõwa hã 're sa, 'ri hã.” Ãne te ĩma tinha. 33Tahawa, wa tô ĩsi'aba'ré na ãma asô da'mazatõ, we aimorĩ da. Ãhã zarina, ma tô we oto watẽme aiwi. Rowẽ di oto ãhã na ĩma hã. Ãhã na wa tô ãme wasi'rã'õtõ ni, 'Re ihâimana u'âsi mono nho'a, Wanhib'apito te te aima ipisutuzéb zarina, wa te wapari za'ra da, isimiroti hã.

Pedru hã Conerizu norĩ ma, te te irowasu'uzé

34-35Tawamhã Pedru hã timreme na ma oto ãma tãma sãna'rata za'ra, ãne:

— Tô ta, ãhã na wa tô waihu'u. Tô sena 'Re ihâimana u'âsi mono hã ma tô si'ãma ropisutu, dawi 're sisawi tõ mono da, zudeu nherẽ, duré zudeu'õ nherẽ. Daro mono bâ, iwẽ si da te 're 'manharĩ za'ra mono da, imreme, da te 're wapari za'ra mono wamhã, te za tô te te sima 're da'awẽ mono, aiwapsi. Misi, ma tô te te da'ãma sima 're rosa'rata, dawi 're sisawi tõ mono da. 36'Re ihâimana u'âsi mono zadawa wasu'u hã ma tô iwaihu'u za'ra wa'wa. Tizadawa wasu'u hã ma tô wama waihu'u za'ra, wasiré Izaraéu nhihudu norĩ ma. Zezu Cristu hã ma tô watẽme satõrĩ za'ra, te te wama rowasu'u za'ra da, 'Re ihâimana u'âsi mono ãma rowẽ na 're idanomro mono zém na hã. Zezu Cristu hã, uburé Danhib'apito uptabi. Taha wasu'u ma tô iwaihu'u za'ra wa'wa. 37Wasiré Izaraéu nhihudu norĩ nhipti'ai ãma 're ihâimana mono zém na hã ma tô duré iwaihu'u za'ra wa'wa, Zezu Cristu hã. Zuwã Batista hã ma tô dama rowasu'u, â dawabzuri hã da te 're 'manharĩ za'ra mono da. Taha parip si, wasiré Izaraéu nhihudu norĩ nhipti'ai mono bâ, ma tô 're mo, Zezu Cristu hã. Galiléa ãma 're imorĩzém na ma tô sãna'rata. 38'Re ihâimana u'âsi mono hã ma tô Tipẽ'ẽzani hã tãma tisõ, Zezusihi ma, Nazaré ãma aré 're isãmra mono ma. Tiwaihu'u pese zama ma tô tãma tisõ. Tahawa, wasiré Izaraéu nhihudu norĩ nhipti'ai wa'wai baba, ma tô 're mo, marĩ iwẽ hã te te dama 're ab'manharĩ mono da, dama i'manharĩ waihu'u'õ hã. Duré, Wa'uburé nhimiwada'uri nhiptete zarina 're ihâimana siwamnarĩ za'ra mono norĩ hã ma tô te te 're apese. Ãne ma tô iwẽ hã te te dama 're ab'manharĩ, Imama hã isiré 're morĩ u'âsi wa, 'Re ihâimana u'âsi mono hã. Ãne Zezu Cristu 're ihâimana mono zém na ma tô iwaihu'u za'ra wa'wa. 39-40Wa norĩ hã Zeruzalẽ ãma duré daza'rui mono bâ, Izaraéu nhihudu norĩ nhipti'ai ãma uburé Zezusi te te dama 're i'ab'manharĩ wẽ mono na watõmo na wa te 're i'madâ'â za'ra mono zéb zarina, wa tô wa te dama ãma 're rowasu'u za'ra.

Te duré tãma rowasu'u za'ra, ãne:

— Ta hã, Zezu Cristu hã wedepo'o nhonhi'rãmi na da te dasiwi isasõmrizém na ma tô dasiwi wĩrĩ ni. Tane nherẽ, bâdâ maparane ãma si'utõrĩ õ ré, ma tô apâ hâiwa'utu, 'Re ihâimana u'âsi mono hã. Taha pari, ma tô tãma pisutu Zezusihi ma, wama sihâi'ré za'ra da. 41Aihĩni, da te sabu za'ra õ di. Wa norĩ si wa tô wahâiba pisutu sabu za'ra ni. Romhâ ré, ma tô 'Re ihâimana u'âsi mono hã sima wawẽ za'ra, Zezusihi hâiwa'utuzém na wa te dama 're rowasu'u za'ra mono da. Tahawa, watẽmep si ma tô satõ, Zezusi hã hâiwa'utu parimhã. Wa tô isiré wasaihuri ni. Wa tô duré isiré âhuri ni, apâ hâiwa'utu parimhã. 42Tahawa, ma tô wama pisutu za'ra, iwasu'uwẽ na wa te dama 're rowasu'u za'ra mono da. Ma tô duré wapisutu za'ra, Zezusi hã 'Re ihâimana u'âsi mono te te ipisutu na, wa te dama 're wasu'u u'âsi za'ra mono da, da'ãma rowairébé'wa da hã. Tawamhã dahâiba ré 're idahâimana za'ra mono norĩ ma, te za te te dama 're arowairébé, duré 're idadâ'â za'ra mono norĩ ma zama. 43Duréihã 'Re ihâimana u'âsi mono zadawa 'mahârâ 'rata 'wa sidâpâsi, ma tô Zezusi za te te dama 're i'ab'manharĩ wẽ mono zém na wahi'rata norĩ ma, te te 're wasu'u siromo za'ra, ãne: “Õ hã da te dasina 're umnhasi za'ra mono wamhã, dawasédé hã te za te te dama 're apari, te te da'ãma 're ab'madâ'â mono tõ da oto.” Ãne ma tô wahi'rata norĩ ma, te te 're wasu'u za'ra, isadawa wasu'u'wa norĩ hã.

'Re ihâimana u'âsi mono hã zudeu'õ norĩ ma, Tipẽ'ẽzani te te tãma isõmri za'ra zé wasu'u

44Tawamhã Pedru hã zahadu te te tãma rowasu'u za'ra ré, ma tô 'Re ihâimana u'âsi mono Tipẽ'ẽzani hã tãma sõmri za'ra, Pedruhu mreme wapari'wa norĩ ma hã. Tahawa, ipẽ'ẽ mono bâ ma tô sisisi, hâiwa hawimhã. 45-46Tawamhã zudeu norĩ, Zezusihi zazei'wa 're ihâimana za'ra mono norĩ hã, Pedruhu siré, Zopi hawi isi'aba'ré norĩ hã ma tô ãma titob'uzu za'ra, zudeu'õ norĩ ãma, 'Re ihâimana u'âsi mono, Tipẽ'ẽzani ta norĩ ma zama, te te oto sõmri za'ra wa. Tahawa, te zudeu'õ norĩ hã damreme amo na sima robzanhamri za'ra, timreme nai õ nherẽ. 'Re ihâimana u'âsi mono ãma, te duré tiwata za'ra, iwaihu'u pese na. Ãne hã te te wapari za'ra wamhã, te zudeu norĩ hã sima nharĩ za'ra, ãne:

— Oro õ norĩ hã zudeu'õ za, ma 'Re ihâimana u'âsi mono Tipẽ'ẽzani hã tãma sõmri za'ra.

Tahawa, te Pedru hã tãma nharĩ za'ra, ãne:

47— 'Re ihâimana u'âsi mono ma tô Tipẽ'ẽzani hã tãma sõmri za'ra, te te wama isõmri za'ra ne hã. E 'wa hã te za tawamhã â hã tiwi sawi za'ra, â dawabzuri te te 'manharĩ tõ za'ra da, iwa. Mare di. Te za tô 'manharĩ za'ra, ta norĩ hã.

48Tawamhã ma tô tãma 'ru za'ra, Zezu Cristuhu nhisi na, isadawa para â dawabzuri hã te te 'manharĩ za'ra da, zudeu'õ norĩ hã. Tawamhã Pedru te siwi waptẽ, i'rata sãmra za'ra da a'â.

Currently Selected:

Atu 10: xavBP

Highlight

Copy