2 Timotiu 2

Paulu hã Timotiuhu ma, roti te te tãma isõmrizém na rowasu'u

1Ĩ'ra, ma'ãpé ĩwapari pese, asina. Cristu Zezusihi ãma wa wa norĩ hã 're wanomro. Ãhã wa, te za a hã isimipawaptobzéb zarina, asiptete sina ãma 're aihâimana mo. 2Ĩnhimirowasu'u hã ma tô aipo're na 're iwapari mo, isazei'wa norĩ nho'a te dama 're irowasu'u mono zé hã. Ta norĩ hã ahâ di. Tawamhã 're i'awapari mono zé hã te za aibâ norĩ ma 're i'awaihu'u mo, aima i'umnhasi za'ra norĩ ma hã, tãma iwaihu'u pese za'ra zéb zarina, ĩnhimirowasu'uzém na te te duré ãma 're uzusi za'ra mono da hã, dapawaptom na.

3Da'wapéi'wa dama i'umnha dasi'wapéi 're, dame 're hâimana mono wamhã, te te 're robzépata tõ mono da hã, 're sisawi mono õ di za. Tane a hã, Cristu Zezusihi nhib'a'uwẽ na 're aihâimana mono wa, te za asina 're isazei u'âsi mo, asisawi ãna ĩsine 're robzépata mono da. 4Da'wapéi'wa norĩ hã tinhib'apito ma, te te 're romhuri za'ra mono ré hã tãma wẽ za'ra di, isib'apito isimiromhuri na te te 're awẽsãmri mono da. Ãne wa, tinhimiromhuri upana, marĩ mono bâ te te sima 're rosa'rata za'ra mono õ di, te te aré sima 're iwẽ za'ra mono na hã. 5Duré, ni'wa hã dawara na hâimana wamhã, dawi watobro nherẽ, marĩ iwẽ hã te te sima âri õ di za, dawara na rotizé hã te te sina 'madâ'â õ wamhã. Dawara na roti hã te te sina i'madâ'âzéb zarina si, te za marĩ iwẽ hã sima ti'â, dawi watobro wamhã. 6Tane duré, buru na romhuri pese 'wa hã, amnho hã uburé da te ubumroi pari, imorĩ'rata na te za tite da hã âri 'rata. 7Ma'ãpé, ãma 're rosa'rata u'âsi mono, te aima irowasu'uzém na hã. Ãne wamhã, Wanhib'apito hã te za te te 're aipawapto, ãhã wasu'u na hã ãma 're awaihu'u mono da.

8Ma'ãpé, Zezu Cristuhu ãma 're rosa'rata pese mono. Ta hã dâ'â nherẽ, ma tô ab're hawi hâiwa'udu, Dawihi nhihudu hã. Wanhib'apito wasu'uwẽ na te 're da'apo're pu'u mono wamhã, taha wasu'u na wa tô te dama 're rowasu'u u'âsi. 9Tawamhã Wanhib'apito wasu'uwẽ na te dama 're rowasu'u mono 'ru te, wa oto te 're robzépata. Ĩwasédé hã te 're 'manharĩ mono newa, wa oto 're ĩza, dazazéb 're, isi'uwazi nhorõ rutu na ĩpawasisi ré. Tane nherẽ, 'Re ihâimana u'âsi mono zadawa wasu'u hã pawasisi ãna ne, te 're hâimana u'âsi. Te za da te dama ãma 're rowasu'u u'âsi za'ra. 10Te irobzépata da hã ĩma pire nherẽ, ĩsisawi õ di, te robzépata tõ da hã. Te 're robzépata mono nherẽ, 'Re ihâimana u'âsi mono hã tinhib'a'uwẽ da, te te sima ipisutu za'ra norĩ hã wa za te 're apawaptob u'âsi, Cristu Zezusi hã te te 're saze za'ra mono da, taha zarina tinho'reptuzé hã te te sina 're uwaimrami za'ra mono da, rowẽ na i'rata 're hâimana u'âsi za'ra mono da. 11Tô sena da te dasima 're irowasu'u za'ra mono zé hã ãne:

“Cristuhu siré 're wadâ'â za'ra mono wa, duré ta hã dâ'â uptabi nherẽ, ab're hawi hâiwa'utu wa, wa za isiré 're wahâimana u'âsi za'ra.

12Robzépada hã wa te wasina 're waihu'u za'ra mono nherẽ, wanhiptete sina ãma 're wahâimana u'âsi za'ra mono wamhã, wa za Cristuhu siré wapire na wa te 're da'madâ'â u'âsi za'ra. Cristuhu zazei'õ'wa na dama 're wasiwasu'u za'ra mono wamhã, tizazei'wa na te te sina 're wa'awaihu'u mono õ di za. Te za te te siwi 're wa'awẽ'õ oto.

13Wa norĩ hã Cristu hã wa te 're saze za'ra mono nherẽ, tiwi 're wasipizari za'ra mono nherẽ, te tô wama umnhasi u'âsi na 're hâimana, marĩ na te te taré dama ãma 're aropisutu mono õ wa.”

14Ãhã wasu'u na te za asimi'madâ'â norĩ hã ãma 're ipo're pu'u za'ra mo. Te za duré aihâimana prédup sina tãma 're i'aroti mo, 'Re ihâimana u'âsi mono nho'a 're wahâimana za'ra mono nherẽ, taré marĩ wasu'u na 're sisada'âbâ za'ra mono tõ da. Dasisada'âbâzé hã wẽ õ wa, taha zarina 're dahâimana za'ra mono wamhã, te za dawi 're si'utõrĩ za'ra, dahâimana wẽ zé hã. 15Romhuri'wa nhimiromhuri hã wẽ wamhã, tinhimiromhuri ma, 're sisé mono õ di za. Tane te za sada 're asiptete u'âsi mo, i'uwaibaba si roti tô sena na si 're da'apawapto mono da, asimiromhuri na te te 're aiwẽsãmri mono da, 'Re ihâimana u'âsi mono hã. 16'Re ihâimana u'âsi mono nhimiroti zarinai õ na rowasu'u'wa norĩ nhiti, te za 're aihâimana mo. Ta norĩ nhimirowasu'u zarina, 're dahâimana za'ra mono wamhã, te za danhimirosa'rata na dasina 're dapahâ za'ra, Wamama nhimiroti nhiti hã. 17Ta norĩ nhimirowasu'u hã da'wa're ne, te 're hâimana. Da'wa're hã sa'ẽtẽ wamhã, te za uprosi, danhi hã. Tane, duré ta norĩ nhimirowasu'u hã isazei'wa norĩ ãma te te ropéi mono wamhã, te za tiwi uprosi za'ra, ihâimana wẽ zéb za'ra hã. Tane, Imeneusi norĩ nhimirowasu'u hã Pirétuhu nhimirowasu'u me te aiwa 're hâimana. 18Ta norĩ hã senai'õ na rowasu'u na te te dama 're rowasu'u zahuré, ãne: “Tâibâ, bâdâ ma tô iwa waptã'ã pa, 'Re ihâimana u'âsi mono ab're hawi te te ida'ahâiwa'utuzéb da hã. Niwab da hã te te ãma sahu õ di za, te te ida'ahâiwa'utuzém na hã.” Ãne te ta norĩ nhimirowasu'u hã 're hâimana. Taha zarina ma tô dawi uprosi zahuré, Wanhib'apito wasu'uwẽ na da te 're isaze za'ra mono zé hã. 19Tane nherẽ, ẽtẽ 'manharĩ na 'ri na'rada hã, siptete na 're ihâimana mono ne, te za 'Re ihâimana u'âsi mono nhimiroti hã pire na 're hâimana u'âsi. Ãne isimiroti na rob'ui'éré hã: “Wanhib'apito hã te za tinhib'a'uwẽ norĩ hã tite na te te 're awaihu'u.” Ãne duré ãma irob'ui'éré hâiba amo hã: “Ni'wam norĩ hã Wanhib'apito nhib'a'uwẽ na dama 're siwasu'u za'ra mono wamhã, te za tiwasédé hã rẽme pese za'ra, 're nomro wẽ mono da oto.” Ãne isimiroti na rob'ui'éré hã.

20'Ri wawẽ ãma hã piza hã ahâ na te 're hâimana za'ra, ẽtẽ waipo pré oru 'manharĩ hã, duré ẽtẽ waipo prã prata 'manharĩ hã, duré wede 'manharĩ hã, duré zé'a 'manharĩ hã. Nima norĩ hã, marĩ da hã wẽ uptabi di, marĩ hã da te ãma 're i'manharĩ za'ra mono zéb da hã. Duré nima norĩ hã marĩ da hã wẽ uptabi õ di, marĩ hã da te ãma 're i'manharĩ za'ra mono zéb da hã. 21Tane ni'wam norĩ hã te aima iwaihu'u mono zéb zarina, tô senai'õ na rowasu'u'wa nhimiroti hã te te siwi 're wẽ'õ pese za'ra mono wamhã, Wanhib'apito ma, wẽ uptabi di za, romhuri hã za te te tãma 're i'apisutu mono da hã. Ãne wa, Wanhib'apito ma, sisõmri za'ra wa, te za tãma pisutu za'ra, iwẽ na te te tãma 're dapawaptob za'ra mono da. 22Ãne wa, dahâiba téb ré, dawasété zô 're idasiwasutu za'ra mono norĩ ne, 're aihâimana mono õ di za. Te za asina 're irosa'rata u'âsi mo, aihâimana wẽ na 're aihâimana mono da, duré Wanhib'apito umnhasi sina 're aihâimana mono da zama, duré asimizawi pese na 're aihâimana mono da zama, duré rowẽ na si dasiré 're aihâimana mono da zama. Taha da, te za asina 're irosa'rata u'âsi mo, uburé Wanhib'apito zazei'wa norĩ me, hâimana wẽ sina, isimipawaptobzéb zô te te tiwi 're irowaptẽrẽ za'ra mono norĩ me. 23Siwa'ru marĩ na 're dasisada'âbâ za'ra mono wamhã, 're dawapari mono õ di za. Ãne na, 're dasisada'âbâ za'ra mono wamhã, te za oto damreme na 're dasi'wapé za'ra. Ãne na hã aima waihu'u pese di. 24Ni'wa hã Wanhib'apito ma romhuri'wa na 're hâimana mono wamhã, timreme na te te 're da'a'wapéi mono õ di za. Simizawi pese na te za dama 're hâimana, aihĩni ma. Waimri na te za duré te te dama 're arowaihu'u, waptu na dazada 're sahi mono ãna. 25-26Ni'wam norĩ hã isimiroti na sada 're hâimana za'ra mono wamhã, atãma te za tinhimiroti wẽ na te te 're pawaptob za'ra, tinhimirosa'rata na te te ãma saprĩ za'ra da, Wamama nhimiroti hã tô sena na te te sina waihu'u za'ra da oto, isimipawaptobzéb zarina. Wa'uburé norĩ nhib'apito hã ma tô aré tãma 're sadawa nhipese za'ra, te te sima 're ida'awẽ mono zéb uwaibaba, isimiroti na 're hâimana za'ra mono da. Tane nherẽ, a'uwẽ norĩ hã tinhimirosa'rata na te te ãma saprĩ za'ra wamhã, te za oto Wa'uburé nhimiroti hawi 're wairébé. Taha da, te za Wanhib'apito ma romhuri'wa hã atãma te te 're apawapto, tinhimiroti wẽ na hã.

Currently Selected:

2 Timotiu 2: xavBP

Highlight

Copy