2 Pedru 1
1
1Wa hã Sima Pedru, Zezu Cristuhu ma romhuri'wa, duré isadawa wasu'u'wa, wa ãma aima rob'ui'éré za'ra wa'wa, wasiré isazei'wa 're i'anomro aba mono norĩ ma. Wanhib'apito 'Re ihâimana u'âsi mono hã wẽ uptabi di. Duré wa'anho'reptui'wa Zezu Cristuhu zama wẽ uptabi di. Wẽ uptabi zahuré wa, ma tô te te 're aipawaptob za'ra wa'wa, wasine asina 're umnhasi za'ra wa'aba mono da, te te 're asõ'reptu za'ra wa'aba mono da.
2'Re ihâimana u'âsi mono hã, duré Wanhib'apito Zezusi hã, aima waihu'u pese za'ra wa'aba di. Ãne wa, wa ai'ãma tãma 're ĩmreme u'âsi za'ra wa'wa, isimizawizé hã ai'ãma 're hâimana u'âsi za'ra wa'aba mono da, duré rowẽ u'âsi, ãma 're anomro u'âsi aba mono da.
3'Re ihâimana u'âsi mono hã ma tô tiwaihu'u pese na uburé marĩ iwẽ na wama 're sõpru, wapẽ'ẽ 're, isine wawẽ uptabi na ãma 're iwahâimana za'ra mono zéb da hã, duré isine wa te dama 're i'manharĩ wẽ za'ra mono zéb da zama. 4Ãne zarina, te te wama 're i'aropisutu mono zéb zarina, ma tô marĩ iwẽ hã wapẽ'ẽ 're, te te wama 're anhomri, sa'ẽtẽ na. Wama wẽ uptabi di, wama 're isõprub za'ra mono zé hã. E marĩ da, ma tô wama 're sõprub za'ra. Isine wahâimana wẽ na oto ãma 're wahâimana za'ra mono da. Ãne wamhã, isazei'õ'wa norĩ ne, wawasété zô 're wasiwasutu u'âsi za'ra mono õ di za, wawasété na 're wahâimana za'ra mono da hã. 5-7Ãne wa, isazei'wa 're aihâimana za'ra wa'aba mono wa, te za sada 're asiptete za'ra wa'aba mo, aiwẽ uptabi na si ãma 're aihâimana za'ra wa'aba mono da oto. Duré Wanhib'apito nhimiroti hã te za 're iwaihu'u pese za'ra wa'aba mo. Duré aiwasété wi, te za asina 're asiptete za'ra wa'aba mo. Duré ro'wa'rudu hã ai'ãma 're hâimana za'ra wa'aba mono nherẽ, te za õne haré Wanhib'apito ãma si 're aihâimana za'ra wa'aba mo. Te za duré 'Re ihâimana u'âsi mono nhimiroti na si, 're aihâimana wẽ za'ra wa'aba mo. Duré, asisãnawã norĩ hã 're isawi pese za'ra wa'aba mono ne, te za asiré isazei'wa norĩ hã 're isawi pese za'ra wa'aba mo. Te za uburé 're idazawi pese za'ra wa'aba mo duré. 8Ãhã zarina si 're aihâimana za'ra wa'aba mono wamhã, te za aihâimana wẽ hã asima 're isa'ẽtẽ za'ra wa'aba mo. Ãne wamhã, Wanhib'apito Zezu Cristuhu nhimiroti hã taré waihu'u za'ra wa'aba õ di za. Te za tô marĩ iwẽ na ãma asima 're i'uwaimrami u'âsi za'ra wa'aba mo. 9Tane nherẽ, ãne na 're aihâimana za'ra wa'aba mono õ wamhã, datob'a na 're idanomro mono ne, te za 're anomro aba mo, duré da te 're irob'madâ'â wẽ pese za'ra mono õ ne. E marĩ wa. 'Re ihâimana u'âsi mono hã 're i'manharĩ wasété za'ra wa'aba mono zé hã, te te aima 're pari za'ra wa'aba mono nherẽ, ãma 're aipo're si'âri za'ra wa'aba mono wa, te za datob'a na 're idanomro mono ne, 're anomro aba mo.
10Ĩsisãnawã norĩ, tô sena ma tô 'Re ihâimana u'âsi mono hã aipisutu za'ra wa'wa, isib'a'uwẽ 're anomro aba mono da. Ãne wa, te za sada 're asiptete za'ra wa'aba mo, ãma 're aihâimana wẽ za'ra wa'aba mono da, 'râwi isib'a'uwẽ na asina 're waihu'u za'ra wa'aba mono da. Ãne wamhã, Wanhib'apito hã 're rẽme za'ra wa'aba mono õ di za. Duré aiwasété u 're aipizari za'ra wa'aba mono õ di za oto. 11Taha zarina, te za 'Re ihâimana u'âsi mono hã to sina te te 're ai'a'mazasi 'wa hâiwa u, Wanho'reptui'wa, Wanhib'apito Zezu Cristuhu u, Danhib'apito uptabi na dama 're ihâimana u'âsi mono u.
12Ãhã wasu'u hã aima waihu'u pese za'ra wa'aba nherẽ, duré asiptete sina ãma 're aihâimana za'ra wa'aba mono nherẽ, wa za te ãma 're aipo're pu'u u'âsi za'ra wa'wa, aiwi simani za'ra wa'aba tõ da, iwasu'u hã. 13-14Ĩma wẽ di tô, ĩhâiba ré 're ĩhâimana mono ré hã, ãhã wasu'u na, te ãma 're aipo're pu'u u'âsi za'ra wa'aba mono da hã, ĩdâ'âzéb u romhuture na, te ĩsina waihu'u wa, Wanhib'apito Zezu Cristu te te ĩma iwaihu'u siromo zéb zarina. 15Tahawa, ĩma iwaihu'u pese na si, wa za te 're aipawaptob za'ra wa'wa, uburé te aima ãma irob'ui'éré za'ra wa'wa hã, aiwi 're simani za'ra wa'aba mono tõ da, ĩ'uirĩ na hã.
Wanhib'apito hã rowa'a za'ẽtẽ ré, sab ré, te te siwi i'madâ'â na rowasu'u
16Wa norĩ hã wa tô Wanhib'apito hã wa te aima 're wasu'u za'ra wa'wa, iwaihu'u pese uptabi na, duré za apâ we imorĩ na zama. E tawamhã taré danhimirosa'rata nhipese zarina, wa tô Wanhib'apito wasu'uwẽ hã wa te aima 're wasu'u za'ra wa'wa. Mare di. Wa norĩ hã Wanhib'apito Zezu Cristu hã rowa'a za'ẽtẽ ré, isab ré, wa tô watõmo na hã 'madâ'â za'ra ni. 17-18I'rata wa tô aimasam ni, Imama ãma wata wamhã, 'Re ihâimana u'âsi mono hã. Hâiwa hawi te we tãma tinha, rowẽ uptabi hawi, ãne: “Ã hã ĩ'ra, te 're isawi pese mono, tãma 're ĩto za'ẽtẽ mono.” Ãne te we tãma tinha. Wa norĩ hã wa tô ãne na hã wapari za'ra ni, 'Re ihâimana u'âsi mono hâiwa hawi we te te tãma inharĩ na, ẽtẽ 'rãihâ iwazéb zahi ãma, Wanhib'apito Zezusihi 'rata wasimasab ré.
19Marĩ, wa te isabu za'ra zéb zarina, wa tô waihu'u za'ra ni, tô sena na Danho'reptui'wa na 'Re ihâimana u'âsi mono zadawa 'mahârâ 'rata 'wa norĩ te te dama 're irowasu'u za'ra mono zém na hã. Awẽ u te za wasi wawẽ hã 're pusi, dama rowa'a'wa da, isimirowa'a zarina ãma 're danomro wẽ mono da. Tane wapawapto'wa da, te wama 're hâimana, isadawa 'mahârâ'wa norĩ nhimirowasu'u hã, ãma 're iwanomro wẽ mono zéb da hã. Ãne wamhã, te za ãma 're irosa'rata u'âsi za'ra wa'aba mo. 20-21'Re ihâimana u'âsi mono zadawa 'mahârâ 'rata 'wa norĩ nhimirowasu'u na rob'ui'éré hã, marĩ te te iwasu'uzé hã, ni'wa hã si'uihâ na te te waihu'u õ di, te te dama 're i'awaihu'u mono da hã. E marĩ wa. Ta norĩ hã, si'uihâ na te te dama 're rowasu'u za'ra mono õ wa. 'Re ihâimana u'âsi mono si, ma tô Tipẽ'ẽzani na te te tãma 're awaihu'u, te te dama 're wasu'u za'ra mono da. Tane, wa norĩ zama isadawa wasu'u'wa norĩ nhimirowasu'u hã, wasi'uihâ na wa te 're waihu'u za'ra mono õ di, marĩ te te iwasu'uzé hã wa te dama 're iwaihu'u za'ra mono da hã. Taha wasu'u hã pire wa, ma'ãpé ãma 're rosa'rata pese za'ra wa'aba mono, waihu'u za'ra wa'aba da.
Currently Selected:
2 Pedru 1: xavBP
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc.All rights reserved.
