1 Tesalonita 2

Tesalonita ãma Paulu hã iwẽ na si te te iromhurizé wasu'u

1Wasisãnawã norĩ, ai'rata wasi'ubumroi wa'aba ré, aima wanhimiromhuri za'ra wa'aba zé hã taré hãi õ di. Tô sena, wa tô aipawaptob za'ra wa'aba ni, sazei pese za'ra wa'aba da. Ãne na ma tô wa'ãma iwaihu'u za'ra wa'wa. 2Filipu na 'ri nho'õmo nhisi ãma zahadu wasi'ubumroi ré, wa tô robzépata za'ra ni, isazei'õ'wa norĩ nhimihâzém na, duré damreme wasété na zama. Taha na ma tô wa'ãmamhã iwaihu'u za'ra wa'wa. Tane nherẽ, Wanhib'apito 'Re ihâimana u'âsi mono hã ma tô wapawaptob za'ra, wapahi ãna, isadawa wasu'u hã wa te aima wasu'u za'ra wa'aba da, Cristuhu wasu'uwẽ hã. Tahawa, wamreme wa'rãmi, da te wawi ro'wa'rutu za'ra nherẽ, wa tô iwasu'uwẽ na aima rowasu'u za'ra wa'aba ni tô, wapahi za'ra ãna. 3Roti tô sena na si, wa aima roti za'ra wa'aba ni, ãhã na hã. Rowasu'u wẽ upana, wa te aima roti za'ra wa'aba õ di. Duré marĩ iwẽ hã wa te aiwi 're waibui za'ra wa'aba mono da, wa te wasima ãma aiwi 're rosa'rata za'ra wa'aba mono õ di. Marĩ iwẽ hã wa te aiwi udâ za'ra wa'aba õ di. 4Mare di. Ãnei õ di. Tô sena, 'Re ihâimana u'âsi mono te te sima 're iwawẽ za'ra mono zéb zarina, te te wapisutu za'ra wa, wa iwasu'uwẽ na wa te dama 're rowasu'u za'ra, ãne na romhuri'wa da, te te wawẽsãmri za'ra wa, wa norĩ hã.

Tawamhã wanhimirowasu'u wẽ wa, taré wama 're dato za'ra mono da, wa te wasina 're rosa'rata za'ra mono õ di. Mare di. 'Re ihâimana u'âsi mono hã te te 're iwawẽsãmri za'ra mono da si, wanhimirosa'rata za'ra hã. Õhõ si te za te te 're wapibu za'ra, 're iwanomro wẽ mono zéb zô, iwẽ na si 're iwanhimirosa'rata za'ra mono zéb zô zama. Tahawa, isadawa wasu'u na, wa te dama 're irowasu'u wẽ za'ra mono na, wa'ãma 're toi mono da, wa wa te wasina 're rosa'rata za'ra.

5Ai'rata wahâimana za'ra wa'aba ré, taré wamreme to na ai'ãma wawata za'ra wa'aba õ di. Duré marĩ iwẽ hã wanhimirowahutu wa'rãmi, wama sõmri za'ra wa'aba da, wa te wasina rosa'rata za'ra õ di. Ãne na ma tô wa'ãma iwaihu'u za'ra wa'wa. 'Re ihâimana u'âsi mono ma, waihu'u pese di, ãne na wapẽ'ẽ 're, wanhimirosa'rata za'ra hã. 6Wanhimirowahutu wẽ na wa'ãma 're aiwata za'ra wa'aba mono da, wa te wasina rosa'rata za'ra õ di. Duré, aimawi norĩ hã ãne zarina, wa'ãma wata za'ra da, wa te wasina rosa'rata za'ra õ di duré. 7Cristu hã ma tô wazatõrĩ za'ra, iwasu'uwẽ hã wa te dama 're waihu'u za'ra mono da, isadawa para. Tahawa, dama wamreme pire za'ra di. Tane nherẽ, wamreme pire na, wa te duré 're aiwari za'ra wa'aba mono õ wa, wa te ãma aiwi robzei'õ za'ra wa'aba õ di. Mare di. Ãnei õ di, wa te aima i'manharĩ za'ra wa'aba zé hã. Wamreme wẽ na si, wa tô aima rowasu'u za'ra wa'aba ni. Wa tô ai'madâ'â pese za'ra wa'aba ni, dana norĩ hã ti'ra te te 're i'madâ'â pese za'ra mono ne. 8'Re ihâimana u'âsi mono zadawa wasu'u hã, iwasu'uwẽ hã wawa'a ãna, wa tô aima wasu'u za'ra wa'aba ni, wama asawi pese za'ra wa'aba wa. Tahawa, aiwi 're wasisawi za'ra wa'aba mono õ di, wa te 're aipawaptob za'ra wa'aba mono tõ da hã. Tô sena, a norĩ wa'wa hã wama asawi uptabi za'ra wa'aba di.

9Wasisãnawã norĩ, ãne na te tô wa'ãma 're aipo're pu'u u'âsi za'ra wa'aba mo, 're iwanomro wẽ mono zém na. Wa norĩ hã wahâimanazéb da, wa tô wasima romhuri pese za'ra ni, wapatâ'â nherẽ, duré wawasutu nherẽ. Bâtâ sidâpâsi wasi'uihâ na wanhib'rata na wa tô romhuri za'ra ni, wahâimanazéb da hã. Bâdâ 'rãiwatobro õ ré, duré bâdâ sébré nherẽ, wa tô wasima romhuri za'ra ni, wa te aiwari za'ra wa'aba tõ da, wama asõprub za'ra wa'aba na wapire na wa'madâ'â za'ra wa'aba tõ da, 'Re ihâimana u'âsi mono zadawa wasu'u na, wa te aima rowasu'u za'ra wa'aba ré.

10A norĩ wa'wa hã ma tô iwawaihu'u za'ra wa'wa, asõ'a za'ra wa'aba, 're iwanomro mono zé hã. 'Re ihâimana u'âsi mono hã ma tô duré wawaihu'u za'ra, 're iwanomro wẽ mono zém na hã. Wawasédé hã wa te 'manharĩ za'ra õ di. Iwẽ na si wa tô wahâimana za'ra ni, asõ'a za'ra wa'aba. 'Re ihâimana u'âsi mono nhimiroti na hã duré ãma wasipa za'ra õ di. Ãne ãma 're iwanomro mono zé hã, tô ibâ na si. 11Damama hã, dahâimanazém na ti'ra norĩ te te 're ipawaptob za'ra mono ne, wa tô wa norĩ hã aihâiba mono bâ wa'aba, aipawaptob za'ra wa'aba ni, 'Re ihâimana u'âsi mono zadawa wasu'u na 're anomro wẽ wa'aba mono da. Ãne hã aima waihu'u pese za'ra wa'aba di. 12Duré da te aima 're amhâzépa za'ra wa'aba mono nherẽ, wa tô ãma aima robze za'ra wa'aba ni iwasu'uwẽ na, aiwi 're robzei'õ tõ za'ra wa'aba mono da. Wa tô aima roti pese za'ra wa'aba ni, 'Re ihâimana u'âsi mono nho'a 're anomro wẽ wa'aba mono da, toi uptabi na te te 're ai'madâ'â za'ra wa'aba mono da. Ta hã ma tô te te sima 're aiwẽ za'ra wa'wa, hâiwa ãma ihâiba na rowa'a na isiré 're aihâimana u'âsi za'ra wa'aba mono da, rowẽ uptabi na.

13'Re ihâimana u'âsi mono zadawa wasu'u hã wa te aima iwasu'u za'ra wa'wa hã wapari za'ra wa'aba wamhã, ma tô asima iwẽ za'ra wa'wa. Taré ti'ai ãma aibâ nhimirowasu'u newa, ãma 're rosa'rata za'ra wa'aba mono õ di. Tô sena 'Re ihâimana u'âsi mono mreme na, ma tô ãma irosa'rata za'ra wa'wa. Tane tô, 'Re ihâimana u'âsi mono zadawa wasu'u na si wanhimirowasu'u za'ra hã. Isadawa wasu'u hã te tô ai'ãma te te 're romhuri pese za'ra wa'wa, aipẽ'ẽ 're, iwẽ na si 're anomro aba mono da. Tahawa, 'Re ihâimana u'âsi mono ãma si, wa 're wawata za'ra, imreme hã asina 're waihu'u za'ra wa'aba mono wa.

Isazei'wa norĩ te te 're irobzépata za'ra mono zé wasu'u

14Zudéa na danhipti'a nho'õmo nhisi ãma hã, aiwana za'ra wa'aba, ma tô da te 're sazei pese za'ra, 'Re ihâimana u'âsi mono zadawa wasu'u hã, iwasu'uwẽ hã. Tawamhã Cristu Zezusihi ãma ma tô 're danomro, isazei'wa norĩ, siré 're isi'rã'õtõ mono norĩ hã. Tawamhã isiré norĩ hã isazei'õ'wa norĩ hã ma tô te te ãma 're rowasété za'ra, isazei'wa norĩ hã te te 're saze za'ra mono tõ da, iwasu'uwẽ hã, tisiré nherẽ. Tane, a norĩ wa'wa hã wasiré isazei'wa norĩ hã, ta norĩ ne, ma tô 're irobzépata za'ra wa'aba mo, asiré norĩ hã asada 're sahi za'ra wa'aba mono wa, Zudéa norĩ ne. 15Duréihã, zudeu norĩ hã ma tô te te 're simro, 'Re ihâimana u'âsi mono zadawa 'mahârâ 'rata 'wa norĩ hã. Duré, ãhã na zama isihudu norĩ hã ihi'rata norĩ hã te te 're irob'manharĩ za'ra mono zéb zarina, ma tô siwi tiwĩ, Wanhib'apito Zezusi hã. Ma tô duré te te wa'ãma 're rowasété za'ra, iwasu'uwẽ hã wa te dama 're wasu'u za'ra mono tõ da. Ma tô sisiti siwi wazatõrĩ za'ra, isiti wasi'aba'ré da. Ma tô duré uburé da'ãma tinhitob'ru za'ra. Tahawa, 'Re ihâimana u'âsi mono ma, wẽ õ di, 're ihâimana za'ra mono zé hã. 16Tawamhã wa norĩ hã zudeu'õ norĩ ma, wa tô wa te tãma 're rowasu'u za'ra iwasu'uwẽ na, da te 're sazei pese za'ra mono da, Zezusi hã te te 're da'anho'reptui mono da. Tawamhã ta norĩ hã zudeu nherẽ, isazei'õ'wa norĩ hã, ma tô te te wawi 're ro'wa'rutu za'ra, te te 're wazadawa uwati za'ra mono da aré, iwasu'uwẽ na wa te dama 're rowasu'u za'ra mono tõ da. Ãne tiwasété na 're ihâimana za'ra mono zém na, ma tô 're siwasété za'ẽtẽ za'ra. Tawamhã tâibâ oto. 'Re ihâimana u'âsi mono hã ma tô wawi ro'wa'rutu'wa norĩ hã te te 're wẽ'õ pese za'ra. Rowẽ'õ, ma tô duré tãma pisutu za'ra. Tawamhã isiti te za oto 're nomro u'âsi.

Paulu hã Tesalonita u apâ imorĩzém na isiwasu'uzé wasu'u

17Wasisãnawã norĩ, isazei'õ'wa norĩ nhimirob'manharĩzéb zarina, wasi'aba'ré na aihawi za'ra wa'aba, wasi'aba'réi wamhã, asiti za'ra wa'aba, wa a'â 're wasi'ubumro. Tane nherẽ, ai'rata 're iwasi'ubumroi u'âsi aba mono ne, wa wanhimirosa'rata na wa te ai'ãma 're rosa'rata wẽ u'âsi za'ra wa'wa. Awa'awi hã wapẽ'ẽzé uptabi na, wa 're wahâimana za'ra. Tahawa, apâ atẽme wasihutu su'u aba da, wa tô wasima waihu'u za'ra ni, wa te asabu za'ra wa'aba da. 18Wa te duré asabu téb za'ra wa'aba neza. Wa hã Paulu hã, apâ atẽme ĩmorĩ aba neza. Tahawa, atẽme ĩmorĩ aba da, bâdâ, wa tô nasi ĩsima pisutu. Tane nherẽ, Satanasi hã wanhitob'ru hã ma tô nasi wa'ãma ro'wa'rutu za'ra, ãma atẽme ĩwisi za'ra wa'aba tõ da. 19Tane tô. Ni'wam norĩ me asõwa're'reb za'ra wa'aba, wasisõpẽtẽ za'ra õ di za, Wanhib'apito Zezusi apâ wei morĩ wamhã. Ni'wam norĩ hã, asõwa're'reb za'ra wa'aba, te te wama 're rowẽ zani za'ra mono õ di za. Wanhib'apito wei morĩ wamhã, ni'wam norĩ hã asõwa're'reb za'ra wa'aba, te te dama wawaihu'u za'ra õ di za, tô sena aima za'ra wa'aba, wa te 're isadawa wasu'u za'ra mono zém na hã. 20Tane tô, wato sina, wa wa te 're aiwasu'u wẽ za'ra wa'wa dama, a norĩ wa'wa hã wama 're rowẽ zani za'ra wa'aba mono wa, 'Re ihâimana u'âsi mono 're isaze za'ra wa'aba mono zém na.

Currently Selected:

1 Tesalonita 2: xavBP

Highlight

Copy