Mateo 13

Deja ejaja cuana huararaji jepuiti quisa

(Marcos 4.1-9; Lucas 8.4-8)

1Beju pia tsine Jesús ete jenetia cuinanana. Bai maje su puti putsu, aniuteana. 2Tu peje su dueji cristiano cuana jadhitapirutitana putsu, Jesús canoa aida su nubiana. Dapia canoa dume su aniuteana. Cristiano cuana bai maje su anititana. 3Da su Jesús ja bahue quisa cuana neje buetsuapirutana huecuana uja:

4—Beju piada deja putiana ejaja cuana ehuararati puji. Ehuararatani cama, piada piada ejaja cuana edid'i je dajajatana. D'ia janana cuana pue putsu, beju edid'i je dajajatana ejaja cuana diapetana. 5Pia ejaja cuana dajajatana tumu med'i pamuda mahue su. Beju tipeida huid'atatana. 6Med'i pamuda mahue putsu, beju sarapetana huid'atatana cuana, id'eti sinada puana putsu. 7Pia ejaja cuana junu quid'aji cuana duju su dajajatana. Beju murutana cuana junu quid'aji cuana ja babubabuatana. Babubabuatana putsu, beju manuamepetana. 8Pia ejaja cuana mu med'i saida su dajajatana. Saida murutana. Dueji ejaja putana. Piada piada equi cuana cien ejaja putana. Pia cuana sucuta tunca ejaja putana. Pia cuana quimisha tunca ejaja putana. Daja jajucuatitana ejaja cuana. 9Ahua micuaneda id'ajararaji su, beju meid'abaque.

Jesús ja deja ejaja cuana huararajiji jepuiti bahue quisa cuja epuani discípulo cuana quisatana

(Marcos 4.10-12; Lucas 8.9-10)

10Da su discípulo cuana ja Jesús quisabatana uja:

—¿Jucuaja ni da miada bahue quisa neje bahui cristiano cuana ebuetsuainia?

11Da su Jesús ja jeutsutana huecuana uja:

—Diusu ja micuaneda bahui tu ecuatsasiati etsia ai quisa cuana eshanapametani. Aimue pia cuana mu eshanapametani mahue. 12Quebata ja Diusu sa piba shanapaja su, Diusu ja mesa piba cuana ebia su eshanapameenitayu. Quebata ja aimue shanapaja mahue su, Diusu ja tueda aimue ai biame eshanapameta mahue. 13Da putsu, yama bahue quisa neje bahui ebuetsuainia huecuana. Tuneda echamatani biame, aimue ebatani huecuana mahue. Eid'abatani huecuana biame, aimue eshanapatani huecuana mahue. Da putsu, yama bahue quisa neje ebuetsuainia huecuana, aimue shanapaja yatani huecuana mahue putsu. 14Isaías chenu ja biahua tiempo uja deretaidha tuna jepuiti:

Tuneda eid'abatani biame, aimue eshanapatani huecuana mahue.

Echamatani huecuana biame, aimue ebatani huecuana mahue.

15Daja eputani huecuana, mecuana sa muesumu tadada putsu.

Aimue id'abaja, baja yatani huecuana mahue.

Aimue saida shanapaja yatani huecuana mahue.

Aimue ema peje su pueja eputani huecuana mahue yama esaisiame huecuana puji.

‘Daja da Isaías ja deretaidha biahua tiempo tueda cristiano cuana jepuiti.

16Daja hue Jesús ja mesa discípulo cuana quisainiame atana:

—Beju micuaneda beidaji epuani yama ai ana cuana ebainia putsu, quema quisa saida cuana eid'abainia putsu. 17Ene putsu, yama micuana equisainia, biahua tiempo profeta, Diusu peje su jei eputani chenu cuana ja jiahue micuaneda ebainia cuana baja adhaataidha. Jiahue quema micuaneda eid'abainia quisa cuana di id'abaja adhaataidha huecuana. Cuaja a taji mahue bataidha huecuana, biahua tiempo jenetia anitaidha putsu. Beju micuaneda mu beidaji, ema neje yani putsu.

Jesús ja deja ejaja cuana ehuararaji jepuiti quisa discípulo cuana quisatana

(Marcos 4.13-20; Lucas 8.11-15)

18‘Meid'abaque ema. Yama micuana equisa ejaja cuana huararaji bahue quisa cuaja epuani. 19Piada piada ejaja cuana edid'i su dajajatana. Daja nime da Diusu sa quisa eid'abatani cuana. Id'aba putsu, aimue eshanapatani huecuana mahue. Ishahua pue putsu, tueda Diusu sa quisa cuana mecuana sa muesumu su yani emejemitani. 20Beju pia ejaja cuana dajajatana tumu med'i pamuda mahue su. Daja nime da pia Diusu sa quisa eid'abatani cuana. Tipeida, beidaji neje tueda quisa cuana eid'abatani huecuana. 21Quejucua tsine hue saida eputani huecuana. Beju ema jepuiti mecuana sa sufri pu taji su, neicha hue equene su puina nime eputaniyu. Da su cuaja d'au pamuda ehuid'atatani cuana emanutani nime, daja tuneda quema quisa saida cuana jenetia enetideratani sufrimiento cuana jepuiti. 22Beju pia ejaja cuana dajajatana junu quid'aji cuana duju su. Daja nime da pia Diusu sa quisa eid'abatani cuana. Diusu sa quisa cuana eid'abatani huecuana biame, ye mundo sa madhada ai cuana ebia su tsada ebatani huecuana. Chipilu di ebia su tsada ebatani huecuana. Tuneda quitaita ebaseatitani, tueda ai cuana ema ebia su tsada ba putsu. Cuaja junu quid'aji cuana ja saida emurutani cuana etaitanamepetani nime, daja da ye mundo sa ai madhada cuana ja tueda quema quisa eid'abatani cuana emadhatiatani. 23Beju pia ejaja cuana mu dajajatana med'i saida su. Daja nime da pia Diusu sa quisa eid'abatani cuana. Butsepi eshanapatani huecuana. Cuaja med'i saida su ejaja cuana ebia su ejucuatitani nime, daja Diusu sa puji ebia su ai mudu saida cuana yatani huecuana. Ejaja jajucuatitana nime da huecuana. Piada piada cien ejaja putana. Pia sucuta tunca ejaja putana. Pia quimisha tunca ejaja putana. Daja da mecuana sa Diusu sa puji mudu saida cuana ejucuatitani.

Id'ene madhada jepuiti quisa

24Beju Jesús ja pia bahue quisa discípulo cuana uja quisatana:

—Diusu ecuatsasiati da uja: Piada deja ja arusu ejaja banatana te su. 25Beju dhidha su pamapa etahuitasa su, te emetse neje eduininiani deja te su putiana arusu duje id'ene madhada ebana puji. 26Beju arusu saida muruana su, id'ene madhada di arusu neje tupupai muruana. 27Da su te quinaji cuana ja ba putsu, emetse quisatitana huecuana uja: “Echua puji, ¿que je bataji pujiji arusu duju su id'ene madhada? ¿Aimue jia maida ejaja saida ecuaneda banana mahue? ¿A mique tsada ecuanaju id'ene madhada emutsuti?” 28-29Da su emetse ja uja jeutsutana huecuana: “Ema duininibaji ja id'ene madhada banatana. Be memutsuji tsuhu. Cuapuitime arusu di id'ene neje tupupai micuaneda mutsu cua. 30Ebia su saida tupupai pamuru. Beju eraja tiempo ecuina su, mudu puji cuana yama te su ebeitu id'ene madhada cuana arusu neje tupupai pamutsuta huecuana puji. Da su id'ene madhada cuana jeji a putsu, parisita huecuana ed'ed'a puji. Beju arusu quema ichaseta jude su paichasetata huecuana.”

‘Daja da Diusu ja eichaderatayu chujemame tu peje su jei eputani cuana jei puja mahue cuana peje jenetia.

Mostaza ejaja jepuiti quisa

(Marcos 4.30-32; Lucas 13.18-19)

31Da su Jesús ja pia bahue quisa discípulo cuana quisatana. Uja atana huecuana:

—Diusu ecuatsasiati da mostaza ejaja nime. 32Tueda ejaja da pamapa pia ejaja cuana ebia su huai chidi biame, bana putsu, pamapa pia equi cuana ebia su aida emuruani. D'ia janana cuana echa su esaji cuana yatitani. Daja da Diusu ecuatsasiati epupiruani mostaza ejaja nime. Da su beju aida epuani. Equene quejucua chidi cristiano cuana tu peje su jei eputani biame, da su beju pamapa ejude su aniji cuana jei eputayu.

Levadura jepuiti quisa

(Lucas 13.20-21)

33Jesús ja pia bahue quisa neje discípulo cuana quisatana uja:

—Diusu ecuatsasiati da levadura harina bebajiji dume su nime. Epuna ja levadura harina neje ehuarutani. Tueda levadura ja pamapa harina bebajiji etutsuametani. Daja nime da Diusu ecuatsasiati. Equene quejucua chidi cristiano cuana tu peje su jei eputani biame, da su beju pamapa ejude su aniji cuana jei eputayu.

Jesús ja cristiano cuana bahue quisa neje bahui buetsuatana

(Marcos 4.33-34)

34Jesús ja cristiano cuana tueda ai cuana buetsuatana bahue quisa cuana neje bahui. 35Daja puana Jesús, cuaja Diusu sa profeta chenu ja biahua tiempo deretaidha batame. Uja Diusu puidha, profeta chenu ja deretaidha:

Yama bahue quisa neje bahui ebuetsua huecuana.

Diusu sa etsia quisa cuana yama bahue quisa neje equisa huecuana.

Id'ene madhada bahue quisa cuaja epuani Jesús ja discípulo cuana quisatana

36Jesús ja cristiano cuana buetsuape putsu, ete su putibana. Discípulo cuana neje ete su nubiana. Nubi putsu, discípulo cuana ja tueda uja atana:

—Quisaque ecuanaju butsepi cuaja epuani mique id'ene madhada jepuiti bahue quisa.

37Da su Jesús ja uja quisatana huecuana:

38—Mundo da te pu cua nime. Ema da te emetse pu cua nime. Ema da ejaja huararaji pu cua nime, cristiano cuana yama saida equisainia putsu. Arusu ejaja cuana da ema peje su jei eputani cuana pu cua nime. Id'ene madhada da ema peje su jei puja mahue cuana pu cua nime. Tuneda da Ishahua sa cristiano cuana. 39Id'ene madhada banaji da Ishahua pu cua nime. Eraja tiempo da Diusu sa castigo tsine epusiu pu cua nime. Rajarajaji cuana da Diusu sa ángel cuana pu cua nime. 40Beju cuaja id'ene madhada ejemitsuatani huecuana ed'ed'a puji nime, daja ángel cuana ja yatayu cristiano madhada cuana, Diusu sa castigo tsine ecuina su. 41Da hora su beju yama quema ángel cuana ebeitu pamapa cristiano cuana jucha ameji, ai madhada yatani cuana Diusu ecuatsasiati jenetia ejemicuina puji, cuati castigo su ejusianubia huecuana puji. 42Dapia epadaritita, etsedhaitita, ebia su sufri eputa huecuana putsu. 43Diusu sa dharejiji cuana mu Tata Diusu sa ecuatsasiati su beidaji neje yanienititayu. Ahua micuaneda id'ajararaji su, beju meid'abaenique.

Chipilu erubuani, perla chujeneda jepuiti quisa

44Daja hue Jesús ja buetsuainiame atana huecuana:

—Diusu ecuatsasiati da chipilu yahua ped'u su erubuani pu cua nime. Piada deja ja tueda chipilu etejetani su, neicha dapia hue erubuataniyu. Beju putiyu putsu, beidaji neje mesa pamapa ai cuana eirupetani tueda yahua ped'u tipeida ebaja puji.

45‘Daja huecha Diusu ecuatsasiati da perla chujeneda saida pu cua nime. Piada iruiruji deja da pamapa ejude cuana je epuniuneti perla chujeneda, saida cuana eteje puji. 46Beju piada perla ebia su aida, chujeneda teje putsu, beidaji neje mesa pamapa ai cuana eirutani tueda perla tipeida ebaja puji. Daja nime quema quisa saida cuana. Chipilu erubuani, perla chujeneda pu cua nime.

Tarrafa aida jepuiti quisa

47‘Diusu ecuatsasiati da tarrafa aida pu cua nime. Esia puji deja cuana ena su jusia putsu, dueji tsapiapiati se cuana ejemitsuatani huecuana. 48Tarrafa beju sejea su, eriretsuatani huecuana emaje su. Dapia se cuana edharepirutani huecuana. Pamapa se saida cuana beju d'iti cuana su eichasetatani huecuana. Pamapa saida mahue se cuana beju ejusiatani huecuana. 49Daja da epu castigo tsine su, ye mundo epupe su. Da hora su Diusu sa ángel cuana ja eichaderatayu chujemame Diusu sa dharejiji cuana cristiano madhada cuana peje jenetia. 50Dhare putsu, cristiano madhada cuana cuati castigo su ejusinubiata huecuana. Dapia tueda cristiano madhada cuana ebia su epadaritita, etsedhaitita, ebia su sufri eputa huecuana putsu.

51Beju daja Jesús ja discípulo cuana buetsuatana. Buetsuape putsu, uja quisabatana huecuana:

—¿A da micuaneda eshanapainia quema quisa?

Da su jeutsutana huecuana uja:

—Ehe, Echua Puji. Eshanapainia ecuanaju.

52Da su Jesús ja uja atana huecuana:

—Ahua quebata Moisés chenu sa jacuatsasiati ebuetsuaji da quema jabuetsuati su jei epu su, beta ai chujeneda saida detse mesa pu cua nime. Jacuatsasiati edhi, quema jabuetsuati eichacua di mesa tupupai yani, ahua ema peje su jei epu su.

Jesús Nazaret ejude su putiana

(Marcos 6.1-6; Lucas 4.16-30)

53Beju Jesús ja daja quisape putsu, mesa ejude Nazaret su putiana. 54Dapia cuinati putsu, jadhitati jude ete su buetsuapirutana. Dapia cristiano cuana tu jepuiti nimetiutana. Tuneda cama jaquisabatitana uja:

—¿Que jenetia jia da ye deja tueda bahue eni ai cuana jabuetsuatiana? ¿Cuaja ni da tuahueda ye ai nimetiuda cuana ame yatani? 55¿Aimue jia maida tueda carpintero José sa ebacua mahue? Mesa cuara da María. Mesa edue cuana da Jacobo, José, Simón, Judas. 56Mesa dudu cuana di upia yanita. Beju pamapa mesa familia cuana upia ecuana duju su yanita. Da su, ¿cuaja ni da tueda ai bahue eni cuana nime bahue pu cua?

57Da putsu, aimue Jesús peje su jei putana huecuana mahue. Da su Jesús ja uja atana huecuana:

—Diusu sa profeta sa ejude quitaita su aniji cristiano cuana ja aimue tueda saida ebatani mahue. Mesa familia quitaita cuana ja di aimue tueda saida ebatani mahue. Pia ejude su aniji cuana ja bahui profeta saida ebatani.

58Da su Jesús ja dapia mesa ejude quitaita su quejucua hue ai nimetiuda cuana atana, dapia cristiano cuana tu peje su jei puja mahue putana putsu.

Currently Selected:

Mateo 13: tna

Highlight

Copy