2 Pita 2

O Ira na Parofita Lasu

1Era a tubu cake ena kedra maliwa na tamata ena gauna o ya na parofita vakailasu eso, era na tubu cake talega vakakina ena kemuni maliwa na i vakavuvuli vakailasu eso. O ira oqo era na kauta vakavuni mai na veivakavuvuli cala ka veivakarusai, era na cakitaka na Turaga ka sa voli ira vakadua, ka ra na vakavuna ga kina na nodra vakarusai vakasauri. 2Ena lewe vuqa era na muria na nodra i valavala vakasisila; ena vosa vakacacataki vakakina na sala ki na dina ena vuku ni veika era sa cakava. 3Ia ena nodra loma kocokoco, era na vakayagataki kemuni me ra rawa-ka kina mai na nodra i talanoa buli eso. Ia sa tu vakarau ga mai na dua na gauna balavu na nodra Dauveilewai, ka sa sega ni moce na nodra Dauveivakarusai!

4A sa sega ni lomani ira na agilosi i valavala ca na Kalou, ia sa biuti ira ga ki eli, ena vanua butobuto me ra tiko kina ka yacova na Siga ni Lewa. 5A sa sega talega ni lomana na vuravura makawa na Kalou, ia sa vakavuna ga na waluvu me luvuci kina na nodra vuravura na tamata i valavala ca. A sa vakabulai ga kina o Noa, o koya ka a vunautaka na i valavala dodonu, ka vakakina e lewe vitu tale na tamata. 6#Vteki 19.24A sa vakarusai rau na koro o Sotoma kei Komora na Kalou ena bukawaqa, ka sa yaco oqo me i vakaraitaki ni veika ena yaco vei ira na tamata ca ena gauna e muri. 7A sa vakabulai Loti, e dua na tamata yalododonu, o koya ka sa rarawa vakalevu na lomana ena vuku ni nodra i vakarau vakasisila na tamata ca. 8A sa bula maliwai ira oqo na tamata yalododonu o ya, ka sa rarawa voli na lomana ena veisiga ni sa raica ka rogoca na nodra i valavala vakasisila. 9O koya oqo sa kila kina na Turaga na sala me ra vakabulai kina o ira na tamata lotu mai na veivakatovolei e vuqa; sa kila talega na sala me ra totogitaki tiko kina na tamata i valavala ca me yacova na Siga ni Lewa, 10ka vakabibi vei ira era muria tiko na veigagadre ca ni yagodra, ka cata na veiliutaki ni Kalou.

Era sa tamata yalokaukauwa ka sega ni kila na rere o ira na i vakavuvuli vakailasu oqo, ka ra sa sega ni dokai ira na veika bula vakaiserau mai cake; ia era sa vosavakacacataki ira ga. 11Ni o ira mada ga na agilosi, ka dina ga ni ra sa uasivi mai vei ira na i vakavuvuli vakailasu oqo ena kaukauwa kei na qaqa, era sa sega ni bau beitaki ira ka vakacacani ira ena mata ni Turaga. 12Ia o ira na tamata oqo era sa dau cakava ga na ka sa takoso e matadra, ka sega ni bau vakasamataka mada vakavinaka. Era sa vakataki ira ga na manumanu kila sa sucu mai me ra na qai vesuki ka vakamatei. Era sa dau vosavakacacataka na veika era sa sega ni kila. Era na vakarusai ga me vakataki ira na manumanu kila, 13ka ra na vakararawataki ena vuku ni veivakararawataki ga era sa vakavuna. Era sa dau okata me ka ni lasa na marau vakalialia ena siga levu tutu. Era sa dukadukali ka velavela, ka sa vakacacani kina na kakana era sa kania vata kei kemuni ena vuku ni nodra i tovo vakamadua kei na i vakarau veivakaisini. 14Era sa vakasamataka tu ga me ra ia na veibutakoci; era sa sega ni mamau rawa ena caka ca. Era sa dau vakacalai ira na tamata era sa dau bale vakarawarawa. Sa vakatavulici na lomadra me ra daukocokoco. Ena tau vei ira na cudru ni Kalou! 15#Tiko 22.4-35Era sa biuta na sala dodonu ka ra sa lako sese; era sa taura ga na sala sa muria o Pelami na luve i Piori tagane, o koya ka sa dau domona na i yau sa dau rawati mai na caka ca, 16ia sa qai cudruvi ena vuku ni nona i valavala ca. A sa vosa vakatamata na nona asa ka sa tarova kina na nona cakacaka vakalialia na parofita.

17O ira na tamata oqo era sa vaka na i keliwai mamaca kei na o sa veicaginayaki ena cava. Sa vakarautaka tu na Kalou me nodra na tikina butobuto loaloa kei eli. 18Era sa dau ia na vosa vakalialia kei na vosa vakaviavialevu, ka vakayagataka na nodra garogaro ca me ra coriti ira kina na tamata era se qai vakatekivu dro tani mai vei ira na tamata i tovo ca. 19Era sa yalataka vei ira na bula galala, ia o ira mada ga era se bobula tikoga ki na ca; ni sa yaco na tamata me bobula ki na veika cava ga ka sa rawai kina. 20Kevaka era sa dro bula taumada mai na veika dukadukali ni vuravura oqo ena vuku ni nodra sa kila na noda Turaga ka noda i Vakabula o Jisu Karisito, ka ra sa qai tacori tale ka rawai ena veika ca oqo, era sa na qai ca vakalevu cake sara o ira oqo emuri ka ca vakalailai ena i tekitekivu. 21Ni sa vinaka cake vei ira me ra a kakua mada ni ra kila na sala ni valavala dodonu, ka ca ga me ra sa kila taumada ka qai vakanadakuya na i vakaro tabu sa soli vei ira. 22#Vbale 26.11Na veika sa yaco vei ira sa dusimaka na dina ni vosa vakaibalebale o ya: “Sa lesu tale na koli ki na nona lua,” ka “Sa lesu tale na vuaka sa vakasilimi oti ki na soso me vaqiqiqi kina.”

Currently Selected:

2 Pita 2: FNVDC12

Highlight

Copy