2 Makabe 15
15
Na inaki ca i Nikanore
1Ni sa rogoca o Nikanore nira sa tiko e na yasayasa vakaSamaria o Jutasa kei ira na nona mataivalu, sa lewa me valuti ira e na siga ni vakacecegu nira cegu tiko. 2Era a kaya na Jiu era asa vakasaurarataki mera muri koya, “Kua ni ravu vakaveitalia; mo rokova ga na siga sa vakatabuya vei ira o koya e raica na veika kece.” 3Sa qai taroga na tamata lolovira qo se tiko dina e dua na tui mai lomalagi sa vakatabuya na siga ni vakacecegu. 4Nira sa kaya, “Na Kalou bula sara ga, na Tui lomalagi, a vakarota me keimami rokova na ikavitu ni siga,” 5a sauma, “O yau tale ga au cecere e vuravura, au sa vakarota gona moni taura nomuni iyaragi me vakacavari na cakacaka ni tui.” Ia a sega ni vakavotukana na nona inaki ca.
Vakarautaki ira nona sotia o Jutasa mera vala
6Asa nakita e na nona viavialevu kei na dokadoka o Nikanore me tara e dua na ivakananumi ni qaqa vei Jutasa kei ira na nona tamata. 7Ia o Makabe a sega ni mudu nona nuidei e na vakabauta levu ni na vukei koya na Turaga. 8A mani vakauqeti ira na nona tamata mera kua ni rerevaka nodra kaba mai na meca, mera nanuma ga na veigauna sa oti a dau yaco kina na veivuke mai lomalagi, mera sa namata i na qaqa e na solia vei ira na Kalou sau. 9A vakauqeti ira mai na lawa kei ira na parofita, vakananuma tale ga vei ira na veigauna dredre era sa qaqa mai kina, era mani yalobolebole kina. 10Nira sa bole tu vaqo, sa qai solia vei ira na lewa, dusia tale ga vei ira na nodra veidabui na kai veimatanitu tani kei na nodra sega ni dina e na nodra yalayala. 11A vakaiyaragitaki ira, sega soti e na isasabai kei na moto, vakabibi ga e na veivakauqeti ni bole, qai vakayaloqaqataki ira e na nona tukuna vei ira nona tadra, dua na mataqali raivotu, e dodonu me vakabauti.
12Qo na ka a raica: A masu tiko, dodoka tiko na ligana e deladra na Jiu o Oniasi, o koya a betelevu, tamata vinaka, vakaturaga, yalomalua, dau vosa vakarokoroko, asa tuberi mai ni se gone e na ivakarau kece e rakorako. 13A basika tale ga mai e dua na tamata e laurai votu na uluna sikoa kei nona itutu dokai, nona itovo vakaturaga kei na nona vakatulewa dodonu. 14Sa qai vosa o Oniasi, “Qo e dua na tamata e lomani ira na veiwekani, masulaki ira vakalevu na lewenivanua kei na koro tabu, o Jeremaia na parofita ni Kalou.” 15A dodoka na ligana imatau o Jeremaia, solia vei Jutasa e dua na iselewau koula, ni kaya: 16“Taura na iselewau tabu qo, na iloloma mai vua na Kalou, mo na vakamatei ira kina na kemu meca.”
17Ni sa veivakayaloqaqataki o Jutasa e na vosa sa vakaturaga ka mana e na vakauqeta na yalovakatagane kei na yalodoudou e yalodra na cauravou. Era sa lewa mera kua ni keba, mera sa vala ga e na yaloqaqa me qai macala sara na ka taucoko e na nodra veikabikabi, veivala yadudua e na nodra igu taucoko, ni sa tiko e na itutu ni leqa na koro levu, na loqi tabu kei na valenisoro. 18Era na kauaitaki ira na watidra, na luvedra, kei na wekadra, ia era sa leqataka vakalevu duadua na valetabu. 19O ira na tiko e loma ni koro, sa dua tale ga na ka na levu ni nodra lomaleqa, era nuiqawaqawataka na veivala e caka tiko e lomanivanua.
Druka kei na mate i Nikanore
20Nira sa namaka kece tu na tau mai ni lewa, ra sa tu voleka na meca, tuva tu na nodra mataivalu mera vala, ra sa tuva mai e liu na elefadi, tai sau mai na mataivalu vodo ose, 21sa qai laveta o Makabe na ligana ni sa raica na mataivalu vakatamera e matana, nodra iyaragi duidui kei na vakadomobula ni kedra irairai na elefadi. Sa kaciva na Kalou e dau cakacaka mana, ni kila tu ni sega ni vakatau e na iyaragi na qaqa, e na lewa ga ni Turaga se me o cei e nona na qaqa. 22#2Tui 19.35A mani kaci vua vaqo: I kemuni na Kalou, oni a tala mai na nomuni yagilosi e na gauna nei Esekaia na tui Jutia, a mai vakamatei ira vakadua e lewe 185,000 e na keba nei Senakarivi. 23E na gauna qo, kemuni na Tui vakalomalagi, ni tala mai e dua na iyaragi vinaka me vakatubura yani e liu na rere kei na sautaninini. 24Me vakamatei ira na ligamuni sau o ira era via valuta tiko qo na nomuni matatamata tabu.” A mai tinia yani nona masu e na vica na vosa qo.
25 #
1M 7.43-50
E toso mai o Nikanore kei ira na nona tamata e na domo ni biukila kei na sere ni ivalu; 26ia o Jutasa kei ira nona tamata, era sotavi ira na meca e na ivalu e na domo ni kerekere vua na Kalou kei na masu. 27Nodra vala tiko e ligadra, nodra masuta tiko na Kalou e yalodra, era mani vakamatei ira kina e via lewe 35,000, era marautaka vakalevu nona sa vakaraitaki koya mai vaqo na Kalou.
28Ni sa oti na vala era sa lesu tiko mai e na marau, era a kilai Nikanore ni sa mate tu, se vakaisulu taucoko sara tu ga vakaivalu. 29Sa qai tubu na kaila kei na mamaue, era vakavinavinaka vua na Kalou levu e na vosa ni nodra qase. 30Sa qai lavaka o koya sa dau taqomaki ira na kainona e yagona kei na yalona, dei vakadua tu nona lomani ira na wekana, me cebe laivi na ulu i Nikanore kei na ligana me kau i Jerusalemi. 31Ni sa yaco yani e kea, sa kacivi ira vata mai na kainona, tuvani ira na bete e mata ni yaletare, sa qai kacivi ira na tiko e loma ni koronivalu. 32A vakaraitaka vei ira na uluna vakasisila o Nikanore kei na ligana a dau laveta tu vakadokadoka e na nona bolea na valetabu ni Kalou Sau; 33sa qai cebeta laivi mai na yame ni tamata ca o Nikanore, kaya ni na musumusuka vakalalai me vakani ira kina na manumanuvuka, qai vakaliliga na uluna veibasai kei na vale tabu me isau ni nona lialia. 34Era qai rai kece i lomalagi, vakavinavinaka vua na Kalou e na nona vakaraitaki koya, ra kaya, “Cecere o koya a taqomaka nona itikotiko me kua ni vakadukadukalitaka.” 35Sa qai vakaliliga na ulu i Nikanore e na bainivalu me ivakaraitaki matata vei ira kece ni veivuke ni Turaga. 36#1M 7.49Era mani lewa e na veidigidigi raraba mera dau solevutaka na ika13 ni siga ni ika12 ni vula, e vakatokai Eta e na vosa vakaSiria, na siga se bera na siga i Motekai.
iTinitini ni ivola
37Qo gona na itinitini kei Nikanore. Me tekivu mai na gauna ya, sa tu ga e ligadra na Iperiu na koro. 38Sana tini tale ga e ke na noqu italanoa. Kevaka a talanoataki vakavinaka, vakadodonu, qori sara ga na ka au a gadreva; kevaka e talanoataki vakaca, qori na kena vinaka au bau rawata. 39Me vaka ni ca na gunuva wale ga na waini se na gunuva wale ga na wai ia nirau veiwaki na wai kei na waini sa kamikamica dina qai gunu vinaka ka kuria nona taleitaka e dua, sa vaka kina na ivakarau ni talanoa e rogorogo vinaka e daligadra na wilika na ivola. Kena levu.
Currently Selected:
2 Makabe 15: FNVDC12
Highlight
Share
Copy
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.