Mateus 6

Fa fu gi tra sma wan sani

1“Sorgu tak' te yu e du tra sma wan bun, yu no e du en fu sma si. Noso yu no abi pai na yu P'pa di de na heimel. #Mat 23:5 2Te yu e gi wan pôtisma wan sani, no du en nanga pranpran. Bika na so den hoigriman e du ini den kerki nanga tapu strati, soso fu sma kan gi den grani. Fu tru Mi e taigi un taki: Den kisi den pai kba. 3Ma te yu e gi wan pôtisma wan sani, yu kruktu-anu no mus sabi san yu let'anu e du. 4Na so a e tan wan kibri sani. Dan yu P'pa di si san yu du, sa pai yu.”

A yoisti fasi fu begi

5“Te yu e begi, yu no mus de leki den hoigriman. Bika den lobi fu tnapu begi ini den kerki nanga tapu uku fu strati fu sma kan si den. Fu tru Mi e taigi un taki: Den kisi den pai kba. #Luk 18:10-14 6Ma te yu e begi, go na ini yu kamra èn tapu a doro. Dan yu e taki nanga yu P'pa di no wan sma e si. Ma yu P'pa di e si yu drape, sa pai yu. 7Te yu e begi yu no mus begi langabere begi leki den sma di no sabi Gado. Bika den e prakseri tak' te den begi langa, den o kisi san den e aksi. 8Yu no mus begi leki den, bika yu P'pa sabi san yu abi fanowdu fosi yu aksi En. 9Ma disi na a fasi fa yu mus begi:

Wi P'pa di de na heimel,

Yu nen mus de santa.#6:9 Un kan puru a pisi disi so tu: “sma mus abi bigi lespeki gi Yu nen.”

10Kon tiri wi,

meki Yu wani psa na grontapu

soleki fa a e psa na heimel.

11Gi wi tide a nyanyan

di wi abi fanowdu.

12Gi wi pardon fu wi sondu,

soleki fa wi e gi trawan pardon

di du wi wan sani.

13No meki tesi kon na wi pasi,

ma kibri wi fu didibri.

Bika na Yu na a Kownu,

èn ala makti nanga ala glori

na fu Yu, fu têgo. Amen.#6:13 Wantu manuscript no abi a laste pisi fu vers 13.

14Bika efu yu e gi sma pardon di du yu wan sani, yu P'pa na heimel sa gi yu pardon tu. #Mrk 11:25-26 15Ma efu yu no e gi sma pardon, yu P'pa no sa gi yu pardon tu.”

Te yu e faste

16Yesus taigi den moro fara taki: “Te yu e faste, yu no mus poti wan sari fesi leki den hoigriman. Bika den e masi den fesi soso fu sma kan si tak' den e faste. Fu tru Mi e taigi un taki: Den kisi den pai kba. 17Ma te yu e faste, yu mus wasi yu fesi èn yu mus kan yu wiwiri. 18Sma no abi fu sabi tak' yu e faste, ma soso yu P'pa di no wan sma e si. Dan yu P'pa di e si san yu e du na wan kibri fasi, sa pai yu.”

Grontapu gudu nanga heimel gudu

19“Yu no mus suku gudu dya na grontapu, pe kakalaka e nyan den, pe frustu e meki den pori gwe, èn pe fufuruman kan broko kon ini yu oso, fufuru den. #Yak 5:2-3 20Ma meki yu gudu de na heimel, pe kakalaka no man nyan den, pe frustu no man meki den pori gwe, èn pe fufuruman no man broko kon ini yu oso, fufuru den. 21Bika pe yu gudu de, na drape yu ati o de tu.

22Yu ai de leki wan lampu di e tyari leti gi yu skin. Efu yu ai krin, yu heri libi o krin. 23Ma efu yu ai dungru, dan yu heri libi o dungru. Sobun, efu a sani di mus tyari leti kon gi yu, tyari dungru kon, a no spotu dungru yu libi sa dungru.

24No wan sma kan wroko gi tu basi. Bika a sa hori a wan na ati, dan a lobi a trawan. Noso a sa lespeki a wan, ma a no teri a trawan. Yu no kan dini Gado makandra nanga den gudu fu grontapu.”

No broko yu ede

Lukas 12:22-31

25“Fu dat'ede Mi e taigi un taki: No broko yu ede nanga san yu o nyan noso dringi fu tan na libi, noso san yu o weri fu tapu a skin. A libi warti moro leki nyanyan, èn yu skin warti moro leki krosi. 26Luku den fowru di e frei na loktu. Den no e prani, den no e koti, den no e kibri nyanyan ini maksin. Ma toku un P'pa na heimel e gi den nyanyan. Un no warti moro leki den fowru dan? 27Sortu wan fu unu kan meki tak' a e libi pikinso moro langa te a e broko en ede? 28Fu sanede yu e broko yu ede nanga krosi? Luku fa den bromki e gro. Den no e wroko èn den no e meki krosi. 29Ma Mi e taigi un taki: Wan bigi kownu leki Salomo srefi no ben man weri so moi leki den bromki disi. #1Kron 10:4-7; 2Kron 9:3-6 30We, efu Gado e weri so moi krosi gi a grasi di e gro tide èn tamara sma e bron en, A no sa weri moro moi wan gi yu dan? Fa yu bribi pikin so?

31Dat'ede yu no mus broko yu ede nanga san yu o nyan, san yu o dringi, noso san yu o weri. 32Bika na sma di no sabi Gado e broko den ede nanga den sani disi. Ma yu P'pa na heimel sabi tak' yu abi ala den sani disi fanowdu. 33Ma tapu a fosi presi yu mus suku fu de ondro a tiri fu Gado, èn fu libi bun ini En ai, dan A sa gi yu ala den sani disi tu. 34So, no broko yu ede nanga a dei fu tamara. Tamara sa abi en eigi broko-ede. Den broko-ede fu wan dei sari kba.”

Currently Selected:

Mateus 6: srn

Highlight

Copy