Lucas 1

Jaskara kopí wishaa

1Ichaxonra ja noo xaranmeax ikonshaman winota jawékibo wishakin tanakana iki.

2Ja peokootiainxonbi jatonbishaman oinkanabaon, noa yoikani keskáakinribi; ja joniboribira jawen joi yoiaibo jato imaa iki.

3Enribira ja peokootainoabi kikinshamanhakinbo onanboxon, jakonshamanhakin en mia wishaxonai, nokon keen Teófilo,

4jaskáaxon ja mia yoikana ikon joibo min kikinhakin onannon ixon.

Jato bautizanai Juan pikóti ángelnin yoia

5Ja Judea main Herodes apo inontianra, westíora sacerdote Zacarías janeya jakátiai. Jara iká iki Abías janeya tsinkí ikainoaribi. Jatian jawen awin Elizabet iká iki, ja sacerdote Aarónman rarebo.

6Ja rabébira iká iki Dios bebon jakoni jabékona iken, tsonbi jakonmaninbo yointi yama, jainoax ja non Ibon yoiai itan jawen eséboribi senenhai jabékona.

7Jaskara ikaxbira bakeoma ikana iki, ja Elizabet bakeayosma iketian, itanribi ja rabébi moa yosiora ikana iki.

8Wetsa netenra Zacarías jawen nete nokóketian, jabé ikáboyaxonbi sacerdote ixon Diossen tee axoni iitaitian,

9jaskara jaton axé iketian ja sacerdotebaon suerte akana, jaki paketa iki. Ja Diossen xobo meran jikixon, incienso menoi kati.

10Jatian ja incienso Dios menoxonti hora nokoketian, ja jemaori tsinkíkana icha jonibo orani ikana iki,

11jatian jaskáai iitaibira, ja jainxon incienso menoti patax, mekayao westíora ángel pikota iki.

12Jaskáakin ja ángel meraax, Zacarías ratetax kikinni raketa iki.

13Jaskatainbi ja ángelnin yoia iki: —Zacarías rakéyamawe, Diossenra min oranabo mia ninkáxonke; min awin Elizabethra moa bakeya ikai, ja bakera Juan akin min janenoxiki.

14Jatianra ikonbiresi mia raronoxiki, itan icha joniboribira ja pikóketian raronoxikanai.

15Jara non Ibo bebon kikin joni inóxiki. Janra jawetianbi vino itan wetsa jan paenti xeatibo xeayamanoxiki, jainoax pikotamatianbira moa Diossen Shinan bochóya inóxiki.

16Janra icha Israel jonibo, jaton Ibo Dioski jato banémaribanoxiki.

17Ja parira non Ibo joámatianbi rekennoxiki, jara ja profeta Elías jayáni Shinanyaribi, itan atipana koshiaribi inóxiki. Jaskáaxonra ja papabo betan jaton bakebo jakiribi jato raeananmaribinoxiki; jainxonra ja yoitima jonibo, ja yoiti jonibo ikanai keskatiribi ikanon ixon jato imanoxiki; neskáaxonra ja jonibo jato benxokaamanoxiki, jaskáaxon non Ibo bikanon ixon —akin.

18Jatian jaskáa Zacaríassen ja ángel yokata iki: —¿Jawekopiki ea neskara winóti iki? Ea iki moa yosishoko, jatian nokon awinribi iki moa yoxanshoko —akin.

19Jaskáketian ángelnin yoia iki: —Ea riki Gabriel, ja Diossen yoiaibores axonai, janra ea raanke miibetan yoyo ixon neskara jakon joibo mia yoiti.

20Ikaxbi jaskarabo en mia yoiabo ikonhayamaxa, rama mia yoyo iamai banetai; miara jaskati yoyo itipanyamai kaai, jawen ititianbiribi jatíbi neskarabo seneni kaai kaman —akin.

21Jaskatai kaman ja jemaori tsamata jonibo Zacarías pikótinin manákana iká iki, ¿Jawekeskatiki ja Diossen xobo meranoax ishton pikóyamai? ikibo yokakaati.

22Jatian moa pikóxon jato yoyo ati atipanyamaa iki; jatian jaskataitian oinxon onankana iki, ja Diossen xobo meranxonra, namá keska meran oinke ixon. Jatianra meken chankanxonres, jato yoyo aka iki. Jaskataxa moa yoyo iamai baneta iki.

23Jatian jawen tee moa senenhax, Zacarías moa jawen xobon kaa iki.

24Jainoax jawen awin Elizabet moa tooya iká iki, jaskataxa pichika oxe jawen xobomeax pikóyamaa iki.

25Jainoax neskata iki: “Non Ibonra rama ea neskara imake, moa ea jonibaon omisyamanon ixon”, iki.

Jesús pikóti ángelnin yoia

26Jatian moa sokota oxe tooya ikenra Diossen jawen ángel Gabriel raana iki; ja Galilea main iká Nazaret janeya jemanko.

27Ja jeman iká iki westíora xontako María janeya jawetianbi joni betan yoranyosma, ikaxbi José janeya jonin binoxon onantiares, jara iká iki ja apo David ipaoniton rarebo.

28Kaax ángel ja xontako ikain nokota iki, jainxon neskáakin yoia iki: —¡Eara mia oinni joke, Diossenra mia katóke! Ja Ibora mii betan iki —akin.

29Jatian jaskáakin ángelnin yoiai ninkatax María rateta iki, jainxon shinanna iki: —¿Jaweatimein ea jaskáakinbo yoiai? —ixon.

30Jaskataitian ángelnin yoia iki: —Rakéyamawe María, Diossenra mia katóke,

31ramara mia benbo bake tootai, ja bake pikóketianra Jesús akin min janenoxiki,

32jara jato xewina joni inóxiki, jainxonra ani Diossen Bake akinribi anoxikanai; jara non Ibo Diossen apo imanoxiki, jawen reken papashoko David imani keskáribiakin;

33Jaskatax jatíbitian ja Jacobnin rarebobo jato ikinai iti kopí, jara jatíbitian apo iki jenéyamanoxiki —akin.

34Jaskáaketian Marían ja ángel yokata iki: —¿Jawekeskatiki jawetianbi joni betan yorantinin iosma ikaxbi ea neskara jawéki iti iki? —akin.

35Jatian ángelnin yoia iki: —Ja Diossen Shinanra miki jonoxiki, jatianra ja ani Diossen atipana koshi, mii meran inóxiki. Jaskara kopíra ja Bake pikotai, jawenabiribi iken, Diossen Bake akin janenoxikanai.

36Jainoaxa ja min rarebo Elizabet moa yoxanshoko ikaxbi tootax, rama moa westíora benbo bakeya ikai. Jara ja tooismatonin yoinkanai ikaxbi moa sokota oxe tooya iki.

37Jaskara ikenra Diossen jawe jawékibi atipanyamaa yamake —akin.

38Jaskáaketian Marían yoia iki: —Eara non Ibon yonoti iki, abánon ja min yoia keská ea Diossen imakin —akin. Jaskáabaini ja ángel moa kaa iki.

Elizabet oinni María kaa

39Jaskarabo iká pekáo basimabi María ishton Elizabet oinni kaa iki, ja Judea mainmea mananman iká jeman.

40Nokóxonra ja Zacaríassen xobonko jikixon Elizabet saludana iki.

41Jaskáakin Marían saludana Elizabetkan ninkatatianbira, ja Elizabetkan poko meranoax jawen bake koshia iki. Jainoaxa Elizabet ja Diossen Shinan bochóya ikax,

42koshinshaman María akí neskata iki: —¡Diossenra wetsa ainbobo aká bebonbires mia jakonhakin akinke, jainxon ja min bake pikoti kaairibira jakonhakin akinke!

43Eara jawemabishoko iki, ja nokon Ibon tita ikaxbi ea oinni mia joti.

44Ja min ea saludantoshia en ninkatatianbira, nokon bake poko meranoax raroi koshike.

45¡Diossen mia raroshaman imabanon, jaskara imatibo non Ibon mia yoia senenti min ikonhaa kopí! —akin.

Marían Dios rabia

46Jatian María neskata iki:

“Nokon shinanyaxonbira non Ibo en rabiai,

47jan ea kishpinmaa Dioskira nokon shinan meran ea raroai,

48ea jawen yonoti ikax, rabíti shinanhoma iken, ekiakin shinanna kopí.

Jaskáakinra, jonibaon rama peoxon jatíbitian Diossenra mia raroshaman imake akin ea anoxikanai.

49Ja jatíbi atipana koshia Diossen, ani jawékibo emeranxon aká kopí.

¡Jakon riki jawen jane!

50Diossenra já rabiaibo jatíbitian,

jato noibai.

51Jawen atipana koshinra ani jawékibo aká iki:

Ja rabitai jonibaon anoxon shinankana jawékibora, jato ras akanaana iki.

52Ja apobo jaton teeainoa pikoxonra,

ja rabítinin shinanhomabo ani jonibo jato imaa iki.

53Ja jawékiakasaibora icha jawékiati jato menia iki,

jatian ja jatíbi jawékia jonibora, jawebiomabo jato banémaa iki.

54Ja jawen yonoti Israel jonibo jato akinxonra, jawen noibamisti shinanmanribi jato akintinin shinanbenoyamaa iki.

55Jaskáakin jato akintibo ja non rekenbo jato yoini iketian;

jainxon ja Abraham itan jawen chiní rarebo iki kaiboribi jato yoini iketian”, iki.

56Jaskatax María ja Elizabetkan xobonpari kimisha oxe ikax, moa jawen xobon karibaa iki.

Jato bautizanai Juan pikota

57Jatian jaskara iiti moa bakenti oxe senenketianra, benbo bake Elizabet bakena iki.

58Jatianra ja patax ikáboyabi jawen rarebobo ja rarokinni bokana iki, non Ibon jakonhakin akinna onanax.

59Jatian ja bake pikota moa posaka neteya iketian boxon, jawen jakina rebichi xatexonkana iki, jainxon ja bake jawen papan janenbi Zacarías akin janekaskana iki.

60Ikaxbi jawen titan jato yoia iki: —Jawen janen ayamakanwe, jawen janera iti jake Juan —akin.

61Jato jaskáaketian yoikana iki: —Min rarebora ja janeya yamake —akin.

62Jainxon ja baken papa yoyo iamai iken, mekemanres metokin yokákana iki, janbiribiki jawen bake jawe janekasai ixon.

63Jaskáakana jawen papan jan wishati tablashoko bexonkanti jato yokata iki, jaskáakin bexonkanketian, neskati iká wishaa iki: “Jawen jane riki Juan”, iki iká, jatianra jonibo jatikaxbi ratékana iki.

64Jaskákanaitianribi Zacarías moa jakiribi yoyo ika iki, jainxonra Dios rabikin peoa iki;

65Jaskara oinnaxa ja patax ikana jonibo ratékana iki, jainoax ja Judea main iká mananbaon jakana joniboribi, jaskara winotabo jato yoiaketankana iki.

66Jatian jaskara ikábo ninkata jonibo jatonbinix neskatibo yokakaakana iki: “¿Jawekeskamein nato bake aniax ikí kanoxiki?” ikibo. Jawen atipana koshin ja Ibon akinnai ointaanan.

Zacarías bewaa

67Jatian ja baken papa Zacarías ikonbiresi Diossen Shinan bochóya ikax, ja Diossen imaa joibores yoyo iki neskata iki:

68“¡Israel jonibaon Dios, rabinon akanwe,

kopíaxon jawen jonibo jato xabáai joá iken!

69Jawen yonoti ipaoni Davidkan

rareboboainoara, noa jan kishpinmai westíora joni atipana koshiya noa raanxona iki.

70Jaskara itibora moatianbi janbi imaa profetabo

meranxon Diossen jato yoimaa iká iki;

71Ja non rawíboibakea, itan ja noa omisai

joniboibakea pikoanan noa jan xabáati.

72Jainxon ja non reken papashokobo jato onísaxon jato akintiribi yoia iki,

jainoax ja senenhabekonti joi akátoninribi shinanbenotima.

73Ja non reken papashoko Abraham akonkin jato yoini joi riki neskara:

74Jawen keena keskatires noa ikanon ixonra, non rawíboibakea noa jan xabáa iki;

75jainoax nato neten já bebon jaax, ponté shinanya itan ochaoma keskáboribi noa jatíbitian ikanti kopí.

76Baké jatian miara Ani Diossen profeta akin anoxikanai.

Minpari rekenxon, ja non Ibo joti iketian benxokaanon ixon jato yoiaitian.

77Jaskáaxon Diossen jaton ochabo moa

shinanxonyamataanan jato kishpinmai joi, jawen jonibo min jato onanmati kopí.

78Ja non Diossenra jawen ani akinmisti shinanya ixon,

jan noa kishpinmati noa raanxona iki,

ja netetiibi jakonshamankin noa bari pikómaxonai keskáakin.

79Jaskáaxon ja kikin yamé keska meran

jakanabo, jato tenai keskáakin jato anon ixon,

jainxon jakoni jakanon ixonribi noa onanmati”, iki.

80Jainoax ja bake anii; shinan meranribi koshikaa iki, jainoax jain joni jayamainko já iki; jawen kaibo Israel jonibo Diossen joi jato yoii joái kaman.

Currently Selected:

Lucas 1: shp

Highlight

Copy