Génesis 9
9
Ja senenhabekonti joi Diossen Noé betan aká
1Diossenra Noé, itan jawen bakebo jakonhakin shinanxonkin, neskara joibo yoia iki: “Icha bakeakanwe itan nato main kaikanwe.
2Nato netemea jatíbi yoinabora, mato meraax raketi saki ikanti iki. Jatíbi noyai yoinabo, mainmeabo, itan aniparomeabo, jatíbi ja yoinabaon koshira mato iti iki.
3Jatíbi yoinabora maton piti iki, paxabi piti yoábo, maton keenashamanbora maton piti iki. Jabora en mato meniai.
4Ikaxbira westíora jawékibicho, maton pitima iki: nami jimiabira maton pitima iki, yoinabo jiminres koshiax, jaa kopíra maton atima iki.
5Mato retea kopíra, joni itan yoina inonbi en masá tenemati iki. Jonibora jawen kaibo reteketian westíorabo, en jato masá tenemati iki.
6Jonin jabé joni reteketianra, wetsa jonin jaribi reteti iki, jonibora Diossen ja keskábiakin joniaa iki.
7Ikaxbi maton, ¡Icha bakeakanwe, jabo nato neten kainon!” akinbo.
8Jainxonra Diossen Noé jawen bakeboyabi yoiribia iki:
9“Ninkakanwe, mato betan itan maton chiní bakebo betanra, jaskara senenhabekonti joi en benxoai.
10Jainoax wapóroninmeax jokona jatíbi mato betan iká yoinabo betanribira ja joi en benxoai: noyaibo, ináati itan ináatima yoinabo, jatíbi nato netemea yoinabo betanra en akai.
11Jaskara mato betan senenhakonti joira, jawetianbi en wetsakeskaayamai: jonibo itan yoinabora, moa jakiribi jenen ewa en jato keyomayamai. Nato mainmeabo jan jato keyotira moa jenen ewa iwetsayamai.
12Mato betan itan jatíbi yoinabo betan jatíbitian jaskara senenhabekonti joira en benxoai, ja oinxon onantira nato iki:
13enra nokon koshki nai koinbo meran ake, nato netemeabo betan jaskara ati joi en benxoa ja oinxon onantira iti iki.
14Mai mananhon en nai koin tsinkímaketian, jain nokon koshki pikotara maton oinnoxiki.
15Jatianra en shinanti iki, mato betan itan jatíbi yoinabo betan jaskara senenhabekonti en benxoa joi, jatianra jan mato keyoti jenen ewa bewetsatima iki.
16Ja nai koinman nokon koshki iketian oinxonra en shinanti iki, jatíbi nato netemea jonibo betan itan jatíbi yoinabo betan jatíbitian jaskara senenhabekonti en benxoa joi.
17Nato ja oinxon onanti en akára, nato mainmea jatíbi jonibo betan itan jatíbi yoinabo betan jaskara senenhabekonti en benxoa joi iki”, akinbo. Jaskatira Dios betan Noé yoyo ika iki.
Noé itan jawen bakebo
18Noekan bakebo wapóroainoax mannabora Sem, Cam, Jafet iká iki, Camra Canaánman papa iká iki.
19Ja kimishara iká iki, Noekan bakebo, jabaon chiní bakebaon bakeara, nato main jakiribi kaikana iki.
20Waiakin peoxonra, Noekan uva banaa iki.
21Wetsa netenra Noekan pae xeaa iki, jatianra panhena iki, jaskataxa jawen carpa xobo napo, chopa potayonax rakata iki.
22Ja Camman papan, Canaánman, jawen papa Noé oinnara chopaoma iká iki, pikóxonra jawen wetsa rabe yoia iki.
23Jatianra Sem betan Jafetnin, jan perakooti bixon paobaini kaxon jaton papa rapokana iki. Chopaoma iketian jawen yora oinnaketianra chitikan itan wetsaori oinnax kaxon rakokana iki.
24Paen jishtenxonra jawen bake chinikan jaskara aká Noekan onanna iki,
25jatianra yoia iki: “¡Canaánra jakonmabires iti iki! ¡Jawen wetsa rabekan yanka yonoti ioraa namanbiresa iti iki!” akin.
26Jainxon yoiribia iki: “Semman Ibo Diossa jakon iki, itan Canaán ibanon jawen yanka yonoti.
27Diossen abánon Jafet ani mai menikin, jawen chiní bakeboyabi; ibanon Sem betan jawen chopa peotanin jaai, jainoax abánon Canaán jawen chiní bakeboyabi jaton yanka yonoti imakin”, akin.
28Ja jenen ewata pekáora, kimisha pacha pichika chonka baritiapari Noé jaa iki;
29jaskatax iskon pacha pichika chonka baritiayanix Noé mawata iki.
Currently Selected:
Génesis 9: shp
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
