Romanos 5

Tayta Dios salvamashqansipita kushikushqansi

1Señorninsi Jesucristuman yärakur perdonash karmi Tayta Dioswan alina kawaykansi. 2Jesucristuman yärakushqami Tayta Dios kuyapämashpansi perdonamansi. Saymi gloriaman pushamänansipaq kashqanta musyar kushikunsi.

3Saynöpis kushikunsi imano nakarpis payman yärakunansipaq Tayta Dios tantiyasimashqansita musyarmi. 4Yärakunansipaq tantiyasimashqami Tayta Dios munashqanno kawayta yachakunsi. Pay munashqanno kawarmi gloriaman shuntakamänansipaq kashqanta musyansi. 5Shuntakamänansipaq kaqtaqa manami manakaqlapaqsu shuyakuykansi. Tayta Dios sayta musyasimansi qomashqansi Espíritu Santuwanmi. Espíritu Santumi shonqunsicho musyasimansi Tayta Dios rasunpaypa kuyamashqansita.

6Salvakuyta mana kamäpakushqami Tayta Dios destinashqan junaq noqansi rayku Jesucristo wanurqan. 7Ali runapa trukan pipis wanuyta mana munaptinpis capazchir pilapis paypa trukan wanunman. 8Jesucristumi isanqa jusayuq kaykashqapis noqansi rayku wanurqan. Saynöpami Tayta Dios kuyamashqansita musyasimansi.

9Jesucristo yawarninta jichashqanpita Tayta Dios perdonaykämashpansiqa ¿manasuraq castïgunpita salvamäshun? 10Tayta Diospa contran kaykash Surin wanuyninpa perdonaykämashpansiqa ¿manasuraq kawarimuyninpa salvamäshun? 11Saypis manami saylasu, sinöqa Señorninsi Jesucristo wanuyninpa perdonashna karmi Tayta Diosta kushish alabaykansi.

Adánpita wanuy shamuptinpis Jesucristupita salvación shamushqan

12Jusatapis wanuytapis juk runala kay pasaman apamushqanpitami#Gén. 3.6-19. lapan runakunapis jusalikur wanuyan.

13Diospa leyninkuna manaraq kaptinpis runakuna jusalikuyarqanmi. Jusalikurpis jusayuq kayashqantaqa manami musyayarqansu. 14Isanqa Adán kawashqanpita pasami runakuna wanuyan. Sayno wanuyan Adánno mana jusalikurpis.#5.14 Adánqa Tayta Dios nishqanta musyaykarmi jusalikurqan (Gén. 2.16-17; 3.11-12). Wakin runakunaqa Tayta Dios nishqanta mana musyayninpami jusalikuyan. Saymi Adánno mana jusalikushqanta nirqa Tayta Dios nishqanta mana musyar jusalikushqanta nikan.

Manami Adánnösu Jesucristo kaykan. 15Adán jusalikushqanpitami saysika runakuna wanuyan. Jesucristo wanushqanpitami saysika runakuna salvakuyan. Sayno salvakuyan Tayta Diospis y Jesucristupis kuyapäkuq kaptinmi.

16Jusalikush karmi Adán tinkunsu Tayta Dios kachamushqan Jesucristuman. Adán jusalikuyninpami lapan runa castigash kayänanpaq kaykäyan. Jesucristo noqansi rayku wanuyninpami Tayta Dios perdonamansi.

17Adán jusalikushqanpita lapan runakuna wanuyaptinpis Jesucristuman yärakuqkunaqa mana ushakaq kawaytami tariyanqa. Sayno tariyanqa Tayta Dios kuyapäkuq kar dembaldila perdonaptinmi.

18Adán mana cäsukuq kashqanpitami lapan runakuna castigash kayänanpaq kayarqan. Jesucristo cäsukuq kashqanpitami isanqa lapan runakuna perdonash kar salvacionta tariyanqa.

19Saymi juk runala Tayta Diosta mana cäsukushqanpita lapan runakuna jusalikuyan. Saynölami juk runala Tayta Diosta cäsukushqanpita askaq runakunata jusaynaqtana Tayta Dios chaskinqa.

20Tayta Diosqa leyninkunata musyasimashkansi jusayuq kashqansita tantiyakunansipaqmi. Jusayuq kaykashqapis Tayta Dios kuyapäkuq karmi lapan jusansita perdonaykämansi. 21Runakuna jusalikuyashqanpita wanuykäyaptinpis Tayta Dios kuyapämashpansimi Señorninsi Jesucristo wanushqanpita perdonamansi nawpancho imayyaqpis kawanansipaq.

Currently Selected:

Romanos 5: qvhB

Highlight

Copy