Filipenses 1

Carta qalaykunan

1Filipos#Hech. 16.12. markacho kaykaq mayor wawqikuna, diäcunukuna y wakin yärakuq mayïkuna:

Noqa Pablo, Jesucristupa sirviqnin karmi kay cartata Timoteuwan cartakayämü. 2Papäninsi Tayta Dios y Señor Jesucristo kuyapäyäshushpayki ali kawayänaykipaq yanapaykuyäläshunki.

Tayta Diosta Pablo manakushqan

3Qamkunapaq yarpararmi imaypis Tayta Diosta agradëcikü. 4Saynölami Tayta Diosta manakur imaypis qamkunapaq kushish manakü. 5Jesucristupa ali wilakuyninta chaskikuyashqaykipita pasa yanapäyämashqaykita manami qonqäsu. 6Musyämi qamkunacho Tayta Dios alita rurayta qalaykushqanta y Jesucristo kutimushqanyaq say ruraykashqanta ushananpaq kashqanta.#Sal. 138.8.

7Qamkunapaq yarpararmi sayno nï. Jesucristupa wilakuyninta wilakur puriptïpis o prësu kaykaptïpis qamkunami yanapäyämashkanki. 8Tayta Dios musyanmi qamkunapaq imaypis yarparaykashqäta. Jesucristo kuyamashqansinölami noqapis lapan shonqüwan qamkunata kuyä.

9Saymi Tayta Diosta manakuykä shumaq tantiyakuyashpayki payta kuyashpayki jukniki juknikipis kuyanakuyänaykipaq. 10Sayno kuyanakurmi ali kaqkunata rurayänaykipaq tantiyakuyanki y Jesucristo kutimunanta shuyakur pay munashqanno jusaynaqla kawayanki. 11Imaypis alilata rurayänaykipaq Jesucristo yanapaykuyäläshunki. Lapanpis kaykusun Tayta Dios alabash kananpaq.

Jesucristupa ali wilakuyninta wilakuyaptin Pablo kushikushqan

12Wawqi panikuna, prësu wichqaräsiyämaptinpis Jesucristupa ali wilakuyninta maysaychöpis chaskikuykäyashqanta musyayänaykitami munä. 13Saymi kaycho lapan wardiakunawan wakin runakunapis musyaykäyan Jesucristupa wilakuyninta wilakushqäpita prësu kaykashqäta.#Hech. 28.30. 14Sayta musyayashpanmi wakin wawqi panikunapis Jesucristuman yärakuyashpan mana mansariypana ali wilakuyta wilakuykäyan.

15Wakinqa noqapita mas reqish kayta munalarmi chikikuypita wilakuykäyan. Wakinmi isanqa runakuna salvakuyänanpaq wilakuykäyan. 16Paykuna musyayanmi Jesucristupa ali wilakuyninta wilakushqäpita wichqaraykashqäta. Wichqaraptïpis Jesucristuta kuyarmi wilakuykäyan. 17Reqish kayta munaqkunaqa manami Diosta sirviyta munarsu wilakuykäyan, sinöqa rabyanäsimayta munarmi. 18Sayno kayaptinpis manami lakiküsu. Rabyanäsiyämänanpaq wilakurpis o runakuna salvakuyänanpaq wilakurpis Jesucristupa ali wilakuyninta wilakuyaptin kushikümi.

Kawaypis wanuypis Pablupaq ali kashqan

Saynöpis kushikü 19Tayta Diosta noqapaq manakuyaptiki y Jesucristupa Espïritun yanapämaptin prësu kaykashqäpita yarqamunäpaq kashqanta musyarmi. 20Mana mansariypa parlanäpaq imaypis yanapämashqannömi autoridäkunapa nawpanchöpis yanapämanqa. Saymi Jesucristo yanapämashqan musyakanqa kawaykaqta kachariyämaptinpis o wanusiyämaptinpis.

21Kawarpis Jesucristulapaqmi kawashaq. Wanukuptïpis mas alimi kanqa.#Gál. 2.20. 22Sayno kaptinpis mana wanusiyämaptinqa Jesucristupa wilakuynintami imaypis wilakushaq. Saymi wanuypis kawaypis noqapaqqa ali kaykan.

23Sayno kaptinmi mayqanta akraytapis kamäpaküsu. Noqapaqqa mas alimi kanman kay pasata kacharir Jesucristupa nawpanmanna aywakuptï. 24Sayno kaptinpis qamkunata yanapänä rayku masla kawaptïpis alimi kanman. 25Saymi qamkuna rayku Tayta Dios sapämaptin autoridäkuna wanusiyämanqasu. Saynöpami yanapäyäshayki Tayta Diosman yärakur kushish kawayänaykipaq. 26Carcilpita yarqur chämuptïmi seqaypa kushikur Jesucristuta alabashun.

Chikiyaptinpis mana mansariyänanpa nishqan

27Jesucristupa ali wilakuynin nishqannöla imaypis kawayay. Saynöpami shamurpis mana shamurpis musyashaq nakarpis lakikurpis Jesucristo munashqanno kawaykäyashqaykita y imaypis kuyanakuykäyashqaykita. Saynöpis musyashaq runakuna chikiyäshuptikipis Jesucristupa ali wilakuyninta wilakuykäyashqaykita.

28Jesucristuman yärakuyashqaykipita runakuna chikiyäshuptikipis ama mansariyaysu. Saynöpami tantiyakuyanqa kikinkuna ushakäyänanpaq kashqanta y qamkunata Tayta Dios salvayäshushqaykita. Saytaqa Tayta Diosmi ruranqa.

29Manami Jesucristuman yärakunalansipaqsu Tayta Dios akramashkansi, sinöqa payta chaskikushqansipita nakanansipaqmi. 30Nawpata imano nakashqätapis y kanan imano nakaykashqätapis musyayankimi.#Hech. 16.19-40. Noqapis qamkunapis Jesucristupa wilakuyninta wilakushqansipita nakashunmi.

Currently Selected:

Filipenses 1: qvhB

Highlight

Copy