Judas 1

Carta qalaykunan

1Yärakuq mayikuna:

Noqa Judas,#Mat. 13.55; Mar. 6.3. Jesucristupa sirviqnin y Santiagupa wawqin karmi, kay cartata qamkunapaq apaykäsimü. Tayta Diosmi kuyayäshushpayki salvayäshunaykipaq qayayäshushkanki. Saymi mana alikunapitapis Jesucristo sapaykäyäshunki. 2Tayta Dios kuyapäyäshushpayki imaypis yanapaykuyäläshunki kuyanakur ali kawayänaykipaq.

Lutan yachasikuqkunata mana chaskipäyänanpaq yäsishqan

2 Pedro 2.1-17

3Kuyay wawqi panikuna, noqa yarparqä Jesucristo salvamashqansipita cartakamuytami. Sayno yarparpis kanan qelqaykämü lutan yachasikuqkunata ichipäyänaykipaqmi. Tayta Diospa wilakuyninqa manami imaypis trukakansu ni yapakansu. Say wilakuynintami Tayta Dios mayna tantiyasimashkansi.

4Say lutan yachasikuqkunaqa Diospa wilakuqnin tukularmi qamkunaman chäyämush. Paykunaqa Tayta Diosta mana mansapakur runakunata criyisirmi niyan: <<Jusalikuyta mana kacharishqapis Tayta Dios perdonamäshunmi>>.

Sayno nirqa lapanpaq munayyuq Tayta Diosninsita y Señor Jesucristutapis ñëgaykäyanmi. Sayno yachasiq runakunaqa infiernuman qaykush kayänanpaq destinashqami kaykäyan.

5Musyayashqaykinöpis Israel runakunata Egiptupita Señorninsi jorqarkamurmi#Éxo. 12.51. mana cäsukuqkunata ushakäsirqan.#Núm. 14.29-30. 6Saynölami Tayta Diosta mana cäsuyashqanpita wakin angilkunatapis yanawyaykaq sakayman wichqaykush juiciu final chämushqanyaq. 7Saynölami Sodomacho, Gomorracho y cercan markakunacho taq runakunapis fiyupa penqaypaq jusalikuyarqan. Saymi runakuna tantiyakuyänanpaq say markakunata Tayta Dios ninawan ushakäsirqan.#Gén. 19.1-24.

8Say markakunacho taq runakunanölami say lutan yachasikuqkuna mana penqakuypa chïnäkur purikuyan. Saynöpis <<kikïmi munayyuq kaykä>> niyashpanmi pitapis cäsukuyansu. Nirkurnami niyan sayno kawayänanpaq sueñuynincho Tayta Dios revelashqanta.

Paykunaqa angilkunapaq y supaykunapaqpis shimin tarishqantami imatapis parlayan. 9Sayno parlayaptinpis angilkunapa mandaqnin Miguelqa#Dan. 10.13, 21; 12.1; Apoc. 12.7. manami saynösu parlan. Moiséspa ayanta#Deut. 34.6. diablu apakuyta munaptin ichipänakurpis manami qayapänakurqansu. Saypa trukanqa: <<¡Tayta Diosmi upälakunaykipaq nikäshunki!>> nirqanmi.#Zac. 3.2. 10Say lutan yachasikuqkunaqa mana tantiyayashpanmi manakaqkunata parlayan. Paykunaqa uywakunano mana tantiyakuq karmi imatapis lutanta rurayan. Sayno kayashqanpitami ushakäyanqa.

11¡Paykunaqa imajinanparaq nakayanqa! Caín#Gén. 4.3-9; Heb. 11.4; 1Juan 3.12. wawqinta chikir wanusishqanno y Balaam#Núm. 22.1-35; Apoc. 2.14. qellaylapaq wachakash kashqannömi paykunapis kaykäyan. Moiséspa contran parlashqanpita Coré#Núm. 16.1-35. ushakashqannömi say lutan yachasikuqkunapis elaqpita ushakäyanqa.

12Kuyanakuyashpayki shuntakar mikuyashqaykichöpis mana penqakuypami luta sarir mikuyan. Kikilankunapaqmi imatapis ashiyan. Usya wisan saki pukutay wakpa kaypa aywaqnölami kaykäyan. Wayunanpaq tiempunchöna kaykarpis wayuyniynaq sakish jachanömi kaykäyan. Saynöpis lukiriptin sakiq jachanömi kaykäyan. 13Tukuy niraq qanrata lamar jitamushqannömi paykunapis penqakuypaq kaqkunata ruraykäyan. Qoyllar shikwaqnömi yanawyaykaqman qaykush kayanqa.

14Adánpa wilkanpa shurukta wilkanmi karqan Enoc.#Gén. 5.18, 21-24. Paymi Tayta Diospa profëtan kar say lutan yachasikuqkunata Tayta Dios juzgananpaq kashqanta nirqan: <<Tayta Diostami rikashkä waranqanpa santu angilninkunawan shamuykaqta. 15Paymi lapan runakunata juzganqa mana mansapakuypa jusalikuyashqanpita y paypa contran parlayashqanpitapis>>.

16Say lutan yachasikuqkunaqa imalapitapis jamuräkuyanmi. Paykunapaqqa manami imapis alisu. Yarpashqantami imatapis rurasiyan. Runa tukuyashpanmi shimin tarishqanta imatapis parlayan. Yarpashqankunata rurasiyänan kashlami ali shimilanpa pitapis parlapäyan.

Jesúsman yärakuqkunata shakyäsishqan

17Kuyay wawqi panikuna, yarpäyay Señor Jesucristupa apostolninkuna 18kayno niyashqanta: <<Ultimu tiempuchöqa Jesucristupa wilakuyninta manakaqman churaq runakunami yuriyämunqa. Paykunaqa Tayta Diosta cäsukuyänanpa trukan kikinkuna munayashqannömi jusalikular kawayanqa>>.#2Tim. 3.1-5; 2Ped. 3.3.

19Say nishqannölami lutan yachasikuqkuna kanan yuriyämush. Paykunami jusayuq kaykäyan wawqi panikuna chikinakur iglesiapita qarqunakuyänanpaqpis. Espíritu Santuta mana chaskikush karmi munayashqanno jusalikur kawaykäyan.

20Kuyay wawqi panikuna, Jesucristupa wilakuyninta yachakush kaykarqa payman yärakur imaypis kawayay. Saynöpis Espíritu Santu tantiyasiyäshushqaykinöla Tayta Diosta manakuyay. 21Tayta Dios kuyaykäyäshuptikiqa imaypis payta cäsukuyay. Señor Jesucristo kutimunanpaq kashqanta musyaykarqa puestukushla shuyaraykäyay. Pay kutimurmi kuyapäyäshushpayki pushakuyäshunki imayyaqpis kushish kawayänaykipaq.

22Sayno kaykaptinqa shumaq manaraq yärakuykaq wawqi panikunata tantiyasiyay Jesucristuman yärakuyänanpaq. 23Wakinta ninapita imaykanöpapis jorquqno jukla tantiyasiyay. Wakintana kuyapar ali shimilaykikunapa parlapäyay. Paykunawan shuntakarpis isanqa cuidä malamäñankunata yachakuyankiman.

Tayta Diosta alabashqan

24Tayta Dios alabash kaykuläsun. Paymi jusalikuyman mana ishkiyänaykipaq munayninwan imaypis yanapaykäyäshunki. Paymi nawpanman jusaynaqtana pushakuyäshunki imayyaqpis kushish kawayänaykipaq. 25Pay japalanmi [yachayyuq] Tayta Dios. Señorninsi Jesucristo noqansi rayku wanuptinmi salvamashkansi. Paymi lapanpaq munayyuq y imayyaqpis rey kaykan. Sayno kashqanpita kananpis, waraypis y imayyaqpis alabash kaykuläsun. Amén.

Currently Selected:

Judas 1: qvhB

Highlight

Copy