Hechos 28

Malta islacho Pablo kashqan

1Lamarpita lapäkuna yarquskirmi musyayarqä Malta islacho kaykäyashqäta. 2Saycho taq runakuna alimi chaskiyämarqan. Saymi tamyar alaptin ninata sarirkasir mashakuyänäpaq qayayämarqan. 3Pablupis saki rämakunata shuntarkur ninaman qaykuykaptinmi ninapita culebra qeshpir makinta amukurkurqan. 4Pablupa makincho warkaraykaqta rikaykurmi saycho taq runakuna niyarqan: <<¡Kay runaqa wanusikuqmi kanqa! Saymi lamarpita kawaykar yarqamuptinpis adorashqansi diösa#28.4 Griëguchöqa Dique nikanmi. Dique karqan griego runakuna adorayashqan juk diösami. munansu kawananta>>.

5Makinpita ninaman culebrata Pablo tapshiriykuptin picashqan manami imanarqanpissu. 6Culebra picashqanwan jakänanpaq kashqanta o wanuskinanpaq kashqantami runakuna yarpäyarqan. May höra imapis mana päsaptinmi niyarqan: <<¡Kay runaqa juk diospis kakunchir!>>

7Say mashakuykäyashqä cercanchömi Publio jutiyuq runapa chakrankuna karqan. Publiuqa say islacho mas mandaq autoridämi karqan. Noqakunata kimsa junaq posädasiyämar alimi rikayämarqan. 8Saychömi Publiupa taytan disenteriawan#28.8 Disenteriaqa yawarnintin qecha qeshyami kaykan. y fiebriwan cämacho ansa jitaraykarqan. Sayman Pablo yaykuykur Tayta Diosta manakushpan yataykuptinmi aliyarqan. 9Say runa aliyashqanta musyaykurmi wakin qeshyaykaqkunapis Pabluman shayämuptin lapanta aliyäsirqan. 10Sayno aliyäsishqanpita agradëcikurmi ali rikayämarqan. Aywakuyaptïnami lapan nistäyashqäkunatapis kamaripäyämarqan.

Romaman Pablo chashqan

11Tamya killakuna päsashqanyaqmi Alejandríapita shamuq büqui say islacho ichirarqan. Saymi kimsa killa say islacho tarkur aywakuyänäpaq say büquiman wisäyarqä. Say büquipa senqanchömi Cástor y Pólux niyashqan diosninkuna laqlaypa dibujash kaykarqan. 12Saypita Siracusa markaman chaykurmi kimsa junaq saycho qoyäyarqä. 13Siracusapitanami lamar kuchulanpa Regio markayaq aywayarqä. Sur kaqläpita wayrämuptinmi Regiupita ishkay junaqlatana Puteoli markaman chäyarqä. 14Saychönami büquipita yarqur wawqikunawan tinkuyarqä. Paykuna ruwakayämaptinmi juk semäna paykunata qoyäpäyarqä. Saypitanami chakilapana Romaman aywayarqä. 15Aywaykäyashqäta musyarmi Romacho kaq wakin wawqikuna Foro de Apio markaman taripäyämarqan. Wakin kaqnami Kimsa Tabernas markacho shuyaräyämarqan.#28.15 Foro de Apio markaqa chunka chusku lëwami Romapita karqan. Kimsa Tabernas markanami chunka lëwa pulan Romapita karqan. Paykunata rikaykurmi Tayta Diosta Pablo kushish agradëcikurqan. 16Romaman chaykuyaptïnami [capitanqa prësukunata comandantiman entregarqan]. Pablutami isanqa juk wayiman aparqan saycho wichqaränanpaq. Saychömi juk soldädu täparqan.

Israel runakunata Romacho Pablo wilapashqan

17Chäyashqäpita kimsa junaqtanami Israel mayor runakunata Pablo qayasirqan. Shuntakaskiyaptinmi nirqan: <<Taytakuna, manami Israel mayinsikunatapis ni costumbrinsikunatapis manakaqman churashkäsu. Lutanta imatapis mana ruraykaptïmi Jerusaléncho prësu sariykamar Roma autoridäkunaman apayämash. 18Say autoridäkuna juzgamarpis wanusiyämänanpaqno ima jusätapis mana tarirmi kacharimayta munayarqan. 19Israel autoridäkunami isanqa wanusimayta munayarqan. Saymi manakurqä mandaq César arreglamänanpaq.#Hech. 25.11. Imano kaptinpis Israel mayinsikunata manami demandäsu. 20Lapan Israel runakunanölami noqapis criyï Tayta Dios promitimashqansikunata cumplinanpaq kashqanta. Sayno criyishläpitami cadinawan wataraykä. Sayta musyasinäpaqmi qamkunata qayasimushkä>>.

21Sayno niptinmi Israel mayor runakuna niyarqan: <<Imano kashqaykitapis musyayänäpaq Judea provinciapita manami ima cartatapis chaskiyashkäsu. Israel mayinsikunapis kayman chämur qampaq manami imatapis parlakuyashsu. 22Isanqa maysaychöpis runakuna parlaykäyan yachasishqaykikuna lutan kashqantami. Saymi imata yachasishqaykitapis kikïkuna musyayta munayä>>.

23Sayno niyaptinmi juk junaq yapay shuntakäyänanpaq jitapänakuyarqan. Niyashqan junaq chämuptinnami Pablo posädaraykashqan wayiman askaq shuntakäyarqan. Saymi tutapita tardiyaq Tayta Dios mandaykashqanpita Pablo yachasirqan. Saynöpis Moisés qelqashqan leykunata y profëtakuna qelqayashqankunata tantiyasirmi Jesucristo salvamaqninsi kashqanta yachasirqan. 24Sayno yachasiptinmi wakin runakuna criyiyarqan y wakinna criyiyarqansu. 25Apänakur aywakuyänanpaqna kaykäyaptinmi Pablo nirqan: <<Rasun kaqtami unay ayllunsikunata wilapänanpaq Espíritu Santu profëta Isaíasta tantiyasirqan kayno nir:

26<< <Aywar say runakunata niy:

<<Mayjina wiyayashpaykipis manami tantiyayankisu.

Mayjina rikayashpaykipis manami cuentata qokuyankisu>>.

27Say runakunapa shonqunkuna chukruyashqami.

Rinrinkunapis upayashqami.

Nawinkunapis qaprayashqami.

Sayno karmi rikayansu, wiyayansu, tantiyakuyansu ni wanakuyansu#28.27a Wakin runakunaqa wiyakuyansu niyan..

Sayno kayaptinmi noqapis aliyäsishaqsu#28.27b Manami qeshyalapita aliyäsinanpaqsu nikan, sinöqa nakaykunapita, lakikuykunapita y jusalikuykunapita salvananpaqmi nikan.> >>.#Isa. 6.9-10.

28<<Isaías nishqannöla qamkunapis kayaptikimi mana Israel runakunatana wilapäshaq salvakuyänanpaq. Paykunami isanqa tantiyakuyanqa>>.

29[Pablo sayno niptinmi Israel runakuna kikinpura rimanakur aywakuyarqan.]

30Ishkay watami arriendashqan wayicho Pablo tarqan. Saymanmi pïmaypis watukaq. 31Saynöpis Tayta Dios mandaykashqanpita y Señor Jesucristupitami mana mansariypa yachasiq. Yachasiptin manami pipis michaqsu.

Currently Selected:

Hechos 28: qvhB

Highlight

Copy