1 Juan 3
3
Tayta Diospa wamrankuna kashqansi
1¡Tantiyakuyay! ¡Tayta Dios seqaypami kuyamansi! Kuyamashpansimi <<wamräkunami kayanki>> nimansi.#Juan 1.12. Rasunpaypami wamrankuna kaykansi. Wamran kashqansitaqa Tayta Diosta mana chaskikuq runakuna manami tantiyayansu. Sayno tantiyayansu Tayta Diosta mana reqirmi.
2Kuyay wawqi panikuna, Tayta Diospa wamran kashqansita kanan musyarpis manami musyansiraqsu imano kanansipaq kashqantapis. Sayno kaptinpis musyansimi Jesucristo kutimuptin paywan tinkur kikin niraqman tikranansipaq kashqanta.#Fil. 3.21. 3Sayno kanansipaq kashqanta shuyakuykarqa Jesucristo jusaynaq püru kashqanno noqansipis jusaynaq püru kashun.
4Pipis jusalikurqa Tayta Diospa leyninkunata manami cäsukunsu. 5Musyansimi jusaynaq kanansipaq Jesucristo kay pasaman shamushqanta. Payqa manami imaypis jusalikushsu. 6Saymi Jesucristupa makincho kawaqkunaqa jusalikuyta kachariyan. Jusalikuyta mana kachariqkunaqa manami Jesucristuta chaskikuyashsu ni reqiyansu.
7Kuyay wamräkuna, pipis <<Tayta Diostami cäsukü>> nirqa Jesucristunömi alikunata rurar kawasun. Cäsukuq kashqanta nikar jusalikuptinqa yachasiyäshushqaykita ama chaskiyaysu. 8Jusalikuyta mana kachariq kaqqa diablupa munayninchömi kaykan. Diabluqa kay pasa qalaykushqanpita pasami jusalikun. Diablu rurashqankunata ushakäsinanpaqmi Tayta Diospa Surin Jesucristo shamush.#Heb. 2.14-15.
9Tayta Diospa wamran kaqkunaqa manami jusalikuyannasu, sinöqa Tayta Dios munashqannönami kawayan. Tayta Diospa wamran karmi jusalikuyta kachariyan. 10Pipis jusalikur y runa mayinta chikirqa manami Diospa wamransu kaykan, sinöqa diablupa wamranmi. Saynöpami musyansi Diospa wamran pï kashqanta y diablupa wamran pï kashqantapis.
Pïmaywanpis kuyanakunansipaq nishqan
11Jukninsi jukninsipis kuyanakunansipaq kashqantaqa unaypitanami musyansi.#Juan 13.34; 15.12. 12Ama kashunsu Caínnöqa. Payqa diablu munashqanta rurarmi wawqin Abelta wanusirqan.#Gén. 4.8. ¿Imanirtaq wanusirqan? Kikin rurashqankuna mana ali kaptin y wawqin rurashqankuna ali kaptinmi wanusirqan.
13Wawqi panikuna, musyansimi jusalikuq runakuna chikimashqansita. 14Saynöpis musyansimi wanushno kashqansipita mana ushakaq kawaytana tarishqansita. Sayta musyansi wawqi panikunawan kuyanakur kawarmi.#Juan 5.24. Mana kuyaq kaqqa wanush japuymi kaykan. 15Lapanpis runa mayinta chikiqkunaqa wanusiq japuymi kaykäyan. Musyashqansinöpis wanusikuqkunaqa manami Tayta Diospa nawpanman chäyanqasu.
16Kuyakuq kanansipaq Jesucristo noqansi rayku wanushqanta tantiyakushun.#Juan 15.13. Noqansipis kuyakuq karqa runa mayinsi rayku wanunansipaq listu kaykäshun. 17Kaykäpamash runa mayinsi muchuycho kaykaptin mana yanaparqa manami Tayta Dios kuyakuq kashqannösu kuyakuq kansi.
18Kuyay wamräkuna, janan shonqulaqa ama kuyanakushunsu, sinöqa imaypis yanapänakur rasunpa kuyanakushun. 19Sayno kuyanakurmi musyansi Tayta Diospa wilakuyninta rasunpaypa chaskikushqansita y jusansipita perdonamashqansita. 20Mana perdonamashqansita yarpashqapis payqa jusalikushqansipita lakikushqansita musyarmi perdonamansi.
21Kuyay wawqi panikuna, perdonashna kashqansita musyaykarnaqa mana mansapaypa Tayta Diosta manakushun. 22Mandamientunkunata cäsukur pay munashqanno kawarqa imata manakushqansitapis chaskishunmi.
23Tayta Diospa mandamientun nikan Surin Jesucristuman yärakunansipaq y jukninsi jukninsipis kuyanakunansipaqmi.#Juan 13.34; 15.12, 17. 24Mandamientunkunata cumplirqa paywanmi kaykansi y paypis noqansiwanmi kaykan. Noqansiwan pay kaykashqanta musyansi kachamushqan Espíritu Santuta chaskikush karmi.
Currently Selected:
1 Juan 3: qvhB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.