Marcos 2

Quë'quë Dahuë Ju̱'iquëre Jujuye

(Mt 9.1-8; Lc 5.17-26)

1Yequë huë̱'ñare paniroja̱ni tëjini, ti̱jupë Capernaum yejana co'i co̱pi. Co'ina, huë'ere pa'iji asareña, yecohua'i. 2Asani esa tsi'sireña. Si'a huë'e ti̱më huesëoña, so'o sa'ro peoyerepa. Ja̱je tsi'sirena, i̱ cato Maija'quë cocare quëaëña. 3Quëaquëna, cajese'e ë̱mëohua'ipi ju̱'iquëre hue'ejë dareña. I̱ ju̱'iñe cato quë'quë dahuë paji'i. 4Dani jai pa̱i pa'ijëna, Jesús pa'i hue̱'ñana caca ti̱'añe peoquëna, ña jujani huë'e ë̱mëje'eja'a coje neni ju̱'iquëre ca̱i saihuëre u̱ina, Jesús nëca hue̱'ñana casareña. 5Jujucaija̱'quë api cuasajë yo'oyere ñani Jesús ju̱'iquëre capi:

“Tsihua'ë, më'ë co'aye yo'ose'ere sa̱i de'huacaise'e a'ë.”

6Ja̱je caquëna, i̱ti maca ñu'icohua'ipi cua̱ñese'e ye'yacohua'i acohua'ipi asani cuasahuë. 7¿Me yo'oquë ja̱je caquë'ni, iquë? Coa Maija'quëni cue'cuequë caji. Iye yeja acohua'i pa̱i co'aye yo'ose'ere sa̱i de'huaye peoji. Coa Diususe'e yo'oye a'ë, ja̱ cato.

8Cuasajëna, Jesús i̱ joyopi i̱ohua'i cuasase'e asani caëña:

“¿Me neñu'ju ja̱je cuasaye'ni, mësaru? 9I̱que a'ni, ju̱'iquëre ai de'oye ca'ñe pa'ye: ‘Më'ë co'aye yo'ose'e sa̱i de'huacaise'e a'ë.’ Pa̱nita'a caye, ‘Huëni më'ë ca̱i saihuë i̱ni saijë̱'ë.’ 10Ja̱je pa'ito mësarute i̱ñosi'i, yë'ë Pa̱i Mamaquë iye yeja pa'i pa̱i co'aye yo'ose'ere sa̱i de'hua tutu paquë pa'iyere.”

Ja̱je cani ju̱'iquëre caëña:

11“Më'ëni cayë, huëijë̱'ë. Më ca̱icore i̱ni hue'equë më huë'ena saijë̱'ë.”

12Ja̱re caëna, ju̱'iquëpi i̱ ca̱i sëohuë i̱ni hue'equë saquëña. Saquëna, ñani Maija'quë ai de'oji cajë sihuareña, mai ña ma'ñere ñañë, cajë.

Jesupi Levíre Soiye

(Mt 9.9-13; Lc 5.27-32)

13Jesupi sani co̱uña, jaira të̱'tëpana. Sani co̱una, si'a pa̱i i̱ quë'rona tsi'sirena, ye'yaëña. 14Ye'ya tëjini jerepa saina, Leví, Alfeo mamaquëpi pa'i do'i sa̱i huë'ere ñu'ina, Jesupi ñani caëña:

“Yë'ë ja̱'re daijë̱'ë.”

Caëna, asani i̱ ja̱'re saquëña.

15Jesupi Leví huë'ena sani ñu'i a̱ina, jai pa̱i pa'i do'i se̱cohua'i cui'ne yecohua'i co'aye yo'ocohua'i cui'ne i̱ ye'yacohua'i co̱ni te'e ñu'ijë a̱teña. 16Jesupi ja̱je ja̱ohua'i ja̱'re co̱ni ñu'i a̱ina, ñaquë ñani cua̱ñese'e ye'yacohua'ipi cui'ne fariseohua'ipi i̱ ye'yacohua'ire se̱teña:

“¿Me neni mësarute ye'yaquë pa'i do'i se̱cohua'i ja̱'re co̱ni cui'ne co'acohua'i ja̱'re co̱ni u̱cuquë cui'ne a̱iquë'ni?”

17Se̱jëna, Jesupi asani sehuouña, ja̱ohua'ire:

“Huajëcohua'i cui'ne de'oye pa'icohua'i jujuquëre co'ema'cohua'i a'ë. Ju̱'icohua'ipi co'ecohua'i a'ë. Yë'ë cato de'ocohua'ini soisi'i caquë daiye pa̱huë. Co'acohua'ini caquë daisiquë a'ë.”

A̲i Ma'ñere Cajë Se̱ñe

(Mt 9.14-17; Lc 5.33-39)

18Fariseo pa̱i ye'yacohua'ipi cui'ne Juanre ye'yacohua'ipi a̱ima'pë Maija'quëre se̱jëna, yecohua'ipi ñani Jesús quë'rona dani se̱teña:

“¿Me yo'ojë më ye'yacohua'i a̱ima'pë se̱ñe pa̱ñe'ni, Juan ye'yacohua'i cui'ne fariseo pa̱i ye'yacohua'ise'e a̱ima'pë se̱jëna?”

19Se̱jëna, Jesupi sehuouña:

“¿Hueja a̱o a̱ija'cohua'ire soisicohua'i je̱'quë a̱ima'cohua'ini i̱ti hueja po̱sëpi i̱ohua'i ja̱'re co̱ni pa'ito? I̱pi pa'ito a̱iñe pa'iji. 20Ja̱je pa'iquëta'are hueja po̱sëje̱ pa'ini yequë mu'se sio cua̱ñoni ja̱ macata'a a̱ima'pë se̱ja'cohua'i a'ë.

21Ai ju'i ca̱re huajë ca̱pi jaoma'cohua'i a'ë. Ja̱je yo'osicohua'i pa'ito jo̱jajëna, huajë ca̱pi quërësi̱o ai ju'i ca̱re jerepa jai coje neñe pa'iji. 22Cui'ne huajë cuiya'i co̱nore ai ca̱'ni topëna ayama'cohua'i a'ë. Ayasicohua'i pa'ito huajë cuiya'i co̱nopi o'saquë qui̱'co joiye pa'iji. Ja̱ maca yureta'a si'aye nejoñe pa'iji, co̱no cui'ne topëje̱ co̱ni. Ja̱ do'ire huajë cuiya'i co̱no ja̱'re huajë ca̱'ni topëna ayaye pa'iji.”

Jesús Ye'yecohua'ipi Huajë Mu'se Yo'oye

(Mt 12.1-8; Lc 6.1-5)

23Te'e mu'se Jesús huajë mu'se pa'ina, trigo tsioja̱'a saina, i̱ ye'yacohua'ipi sa tëto saijë tëahuë. 24Tëajëna, ñani fariseo pa̱ipi careña, Jesure:

“Ñajë'ë, ja̱ohua'i yo'oyere huajë mu'se yo'oye peoji, huajëye pa'i mu'sere.”

25Cajëna, i̱pi i̱ohua'ire caëña:

“¿Maija'quë toyapë mësaru ñama'cohua'i a'ni? Toyase'e cato caji: Abiatar Maija'quë huë'ere ñacaicohua'i ëjaërepa pa'i maca, Davidpi cui'ne i̱ co̱cohua'ipi a̱iñe peoquëna, a̱i ëa ju̱'ijë. 26David cui'ne i̱ co̱cohua'i co̱ni cacani a̱ore Maija'quë ña hue̱'ñana tëose'ere a̱ë'ë. Iye a̱o cato Maija'quë huë'e ñacaicohua'ise'e a̱i ja̱'ñe pa'iji. Yecohua'ire ë̱sese'e paji'i.”

27Cui'ne ja̱ohua'ire Jesupi caëña:

“Pa̱ini caquë Maija'quë huajë mu'se nepi. Pa̱ni pa̱ipi huajë mu'se do'ire ai yo'oja̱jë caquë neñe. 28Yë'ë Pa̱i Mamaquë cato huajë mu'se ëjaëpi yo'oyë.”

Currently Selected:

Marcos 2: sey

Highlight

Copy