Marcos 16

Jesús Ju̱'isiquëpi Huëise'e

(Mt 28.1-10; Lc 24.1-12; Jn 20.1-10)

1Huajë mu'se tëto sai maca María Magdalena cui'ne Jacobo, Salomé pëca ja'copi María co̱ni huëo së̱ ma'ñare hueroni sateña, Jesús ca̱përe huëo së̱ñepi neñu'u cajë. 2Semana huëo mu'serepa ai nea hue̱'ñarepa tsoe ë̱së pa'ina, sani ti̱'areña, ta̱si daripë quë'ro. 3I̱ohua'ija̱'a sa̱'ñe careña:

“¿Nepi jai quë̱na pë hui'yoja̱'cohua'i a'ni?”

4Ja̱je cajë ñajëna, ta̱si daripëpi tsoe hui'yosico pacoña. 5Pa'iona, ñani ta̱si daripëna cacareña: Cacajë ñajëna, ëja te̱'tere poja'i ju'i ca̱re po̱sëpi ju'i ñuquëña. Ja̱ëni ñani ai quëquëreña. 6Quëquëjëna, i̱pi caëña:

“Quëquëma'pë pa'ijë̱'ë. Mësaru cato Jesús Nazaret aquëni co'eyë, que̱ sarahuana que̱siquëni. Ja̱je pa'iquëta'are i̱ cato tsoe huëji'i. Peoji, i̱ño. Ñajë'ë. I̱te o̱a sitore peoji. 7Mësarupi sani i̱ ye'yacohua'ire cui'ne Pedrore quëajë̱'ë. Galileana du'ru saija̱'quë api. Ja̱rona i̱te ñaja'cohua'i a'ë, i̱ ja̱'rë mësarute quëase'eje̱.”

8Ja̱ maca nomiohua'ipi quëquë huesëni tsasijë etani ta̱si daripëpi sateña. Co'ini yecohua'ire quëaye pa̱reña, quëquë huesësicohua'i pa'ijë.

María Magdalenapi Huëisiquëre Du'ru Ñase'e

(Jn 20.11-18)

9Semana huëo mu'se huëisiquëpi du'ru macarepa María Magdalenana ñaiña. Ja̱o cato siete huatiohua'ire eto sao cua̱ñosico paco'ë. 10Ja̱opi yureta'a ñani sani quëaoña, i̱ ja̱'re cu'ijë pa'isicohua'ire oijë co'a ju̱'ijë pa'icohua'ire. 11Ja̱ohua'ipi quëacona, asani care paco cuasaye pa̱reña, i̱o case'e.

I̱te Ye'yecohua'ipi Cayahua'i Ñase'e

(Lc 24.13-35)

12Ja̱ jeteyo'je Jesús ñaiña, cayaohua'i tsiona ma'aja'a saicohua'ina. 13Ja̱ohua'ipi sani yecohua'ire quëareña. Quëajëna, ja̱ohua'ije̱ coa cayë cuasajë asaye pa̱reña.

I̱ Once Soisicohua'ipi I̱te Ñase'e

(Mt 28.16-20; Lc 24.36-49; Jn 20.19-23)

14Ai tsoe maca yureta'a once i̱ ye'yacohua'ina ñaiña, mesare ñu'ijëna. Ñaini ja̱ohua'ire yëhuo nu'ñeiña, ju̱'isiquëpi huëisiquëre ñani quëacohua'ire asacaiye pa̱si do'ire, i̱ohua'i jëa joñoa hue'e do'ire. 15Yëhuoquë caëña:

“Si'a hue̱'ña sani cu'ijë iye huaso cocare quëajë̱'ë, si'a pa̱ire. 16Quëajëna, asani quëare payë caquë asaquëni oco dosiquëpi huasosiquë pasipi. Ja̱je quëajëna, coa cayë caquë asama'quë cato nejosiquë api. 17Iye tuture paja̱'cohua'i a'ë yë'ëre asacohua'i cato: Yë'ë mamipi cajë huatire eto saoja̱'cohua'i a'ë. Huajë cocapi caja̱'cohua'i a'ë. 18A̲ñare tse̱aja'cohua'i a'ë. Tsi̱mare u̱cusicohua'i panije ai yo'oye pa̱ja'cohua'i a'ë. Cui'ne yequeje̱, ju̱'icohua'ire patojëna, co'yaja̱'cohua'i a'ë, ju̱'icohua'ipi.”

Jesupi Ma'tëmo Saise'e

(Lc 24.50-53)

19Ja̱je ca tëjini Ëjaë Jesús ma'tëmona sa cua̱ñopi. Ja̱rona Diusu ëja te̱'te ñu'i saihuëna ja'ruña. 20Ja̱ maca ja̱ohua'ipi si'a hue̱'ña cu'ijë quëareña, huaso cocare. Ja̱re Ëjaëpi co̱cai cui'ne i̱pi pa̱i yo'o ti̱'a ma'ñere yo'o i̱ñoquëna, quëareña, huaso coca. I̱ cocare pa'ë caquë yo'oquëna, ja̱ yo'oyepi i̱ñojë huaso cocare quëareña. Ca tëjihuë.

Currently Selected:

Marcos 16: sey

Highlight

Copy