Mateo 9

Quë'quë Dahuë Ju̱'iquëre Jujuye

(Mr 2.1-12; Lc 5.17-26)

1Ja̱je cajëna, Jesús asani yohuëna aya mëni jaira je te̱'tena je̱ji'i, i̱ pa'i daripëna. 2Ja̱rote pa'ina, quë'quë dahuë ju̱'iquëpi ca̱i saihuëre u̱ina, dahuë. Jujuquë api cuasajë yo'orena, ñani capi, ju̱'iquëre:

“Tsihua'ë co'ya huajësi'i caquë yo'ojë̱'ë. Më'ë co'aye yo'ose'e yurepi oi ne de'huacaiyë.”

3Ja̱je caquëna, cua̱ñese'e ye'yacohua'i acohua'ipi cuasahuë: “Iquë Maija'quëni cue'cuequë ja̱je caji cajë.” 4Ja̱je cuasajëna, Jesús asaquë capi, ja̱ohua'ire:

“¿Me yo'ojë mësaru co'ayerepa cuasayere paye'ni? 5Ja̱je pa'ito ¿me cayepi de'oquë'ni, ‘Më'ë co'aye yo'ose'ere oi ne de'huacaiyë,’ caye, pa̱nita'a ‘huëni saijë̱'ë’ caye?” 6Ja̱je se cani capi: “De'oji. I̱ñosi'i, Pa̱i Mamaquë iye yejare pa'i tutu quë'irepa pa'iyere, pa̱i tayo co'aye yo'oyere oi ne de'huacaiyere.” Cani quë'quë dahuë ju̱'iquëre capi:

“Huëijë̱'ë. Huëni më'ë u̱i daisicore de'huani huë'ena saijë̱'ë.”

7Ja̱je ca maca quë'quë dahuë ju̱'iquëpi huëni i̱ huë'ena saji'i. 8Pa̱ipi ja̱ yo'ose'ere ñani ai ca'rajë Maija'quëre de'oquëre pa'ni cajë sihuahuë, pa̱ina Maija'quëpi iye tutu i̱sise'ere, cuasajë.

Jesús Mateore Soiye

(Mr 2.13-17; Lc 5.27-32)

9Ja̱ yo'o sitopi je̱oni saji'i, Jesús. Saisiquëpi Mateore ñapi, pa'i do'i sa̱i hue̱'ñare ñu'i curiquëre se̱ina. Ñani capi:

“Pe'tejë̱'ë, yë'ëre.”

Ja̱je caëna, Mateo huëni i̱ ja̱'re saji'i.

10Mateo huë'ena a̱o a̱i saihuëre Jesús ñu'i a̱ina, pa'i do'i se̱cohua'i cui'ne co'aye yo'ocohua'i dani te'e Jesús ja̱'re co̱ni a̱o a̱i saihuëre paë'ë. I̱ ye'yacohua'ije̱ ja̱rote co̱ni paë'ë. 11Ja̱je yo'ojëna, fariseohua'ipi ñani i̱ ye'yacohua'ire se̱i'ë. “¿Me yo'oquë mësarute ye'yaquë curiquë pa'i do'i se̱cohua'i ja̱'re cui'ne co'aye yo'ocohua'i ja̱'re co̱ni a̱iquë'ni?”

12Jesupi iyere asani capi:

“De'oye huajëcohua'i pa'icohua'ipi jujuquëre co'ema'cohua'i a'ë. Ju̱'icohua'ipi co'ecohua'i a'ë, jujuquëre. 13Ja̱je pa'ito sani iye toyase'e cayere ye'yejë̱'ë: ‘Ai yo'ocohua'ire teaye ñani co̱caiyere yë'ë cato yëyë. Coeyë, nëicohua'ire huani i̱siye cato.’ Ja̱je pa'ina, yë'ë cato daima'ë paë'ë, de'ocohua'ini soisi'i caquë. Tayo yo'ocohua'ini caquë daë'ë, ja̱ohua'ipi i̱ohua'i yo'oye je̱oni po̱nëjajë caquë.”

Jesure Se̱ñe, A̲ima'pë Se̱ñere

(Mr 2.18-22; Lc 5.33-39)

14Juan oco doquë ye'yacohua'ipi Jesure tsio dani se̱i'ë:

“Yëquë cui'ne fariseohua'i ja̱'re a̱o a̱ima'pë se̱ñe. ¿Me yo'ojë më'ë ye'yacohua'ise'e yo'omapë pa'iye'ni?”

15Cajëna, Jesupi sehuopi:

“Mësarupi ñacohua'i a'ë, hueja po̱së pa'ina, ñañu'u cajë daisicohua'ije̱ oima'cohua'i pa'iye. Ja̱je pa'isicohua'ita'are ti̱'aja'coa, hueja po̱sëni yequë mu'se jio je̱ocaiye. Ja̱ macata'a a̱o a̱ima'pë se̱ja'cohua'i a'ë.

16Yecohua'ije̱ ai ju'i ca̱na huajëcopi se sëo de'huama'cohua'i a'ë, huajëcore se sëosicopi jo̱jajëna, quërësi̱o ai jerepa jaicore ne yeto saoye pa'iji, ai ju'i ca̱re. 17Cui'ne ai ca̱'ni topëna huajë cuiya'i co̱nore ayama'coa. Ja̱je pa'iquëta'are ayasico pa'ito ai ca̱'nihuëpi o'saona, joni saiona, si'aye o'sa co̱no cui'ne topë nejoñe pa'iji.”

Jairo Mamaco Cui'ne Jesús Ca̱ñare Patoco

(Mr 5.21-43; Lc 8.40-56)

18Ja̱ yë'ta'a Jesús iyere caquëna, Judío pa̱i ëjaëpi ti̱tani i̱ ña hue̱'ñana do're ja'runi capi:

“Yë'ë mamacopi ja̱'arepa ju̱ni huesëo. Ja̱je pa'iquëta'are më'ëpi dani jë̱ñapi i̱ona patoquë pa'ito cui'naopi huajëco huëija̱'coa.”

19Caquëna, Jesupi asani huëni i̱ ja̱'re co̱ni saji'i. Saina, i̱ ye'yacohua'i co̱ni saë'ë. 20Ja̱ mu'se si'anë tsie cajequëna, doce o̱metëca ju̱'icopi Jesús jeteyo'jeja̱'a tsioja̱ni yahuerepa i̱ ju'i ca̱na pato, 21I̱ ju'i ca̱na patoni co'yaja̱'coa'ë cuasaco. 22Ja̱je yo'ocona, Jesupi co'ye po̱nëni i̱ote ñani capi:

“Co'ya huajëjë̱'ë, tsihua'o, jujuquë api, më'ë cuasasi do'ire.”

Ca maca ja̱re i̱ti macapi co'yasico paco'ë.

23Jesús pa̱i ëjaë huë'ena ti̱'aquë ñaquëna, musica yo'ocohua'i ne de'huasicohua'ipi paë'ë, ta̱ maca yo'ocaija̱'cohua'ipi. Pa'ijëna, pa̱ije ai cuijë oicohua'ije̱ paë'ë, i̱ti maca. 24Pa'ijëna, ñani capi:

“Etajë̱'ë. Tsihua'o ju̱'ima'co paco'ë, coa ca̱ico.”

Ja̱je caquëna, pa̱ipi coa cani cuasajë cue'cuejë sohuë. 25Ja̱je cuasatoje̱ Jesupi pa̱ire hue'sena eto saopi. Eto saoni, cacani tsihua'ore jë̱tëpi tse̱aquëna, huajëcorepa huëco'ë. 26Ja̱ yo'ose'ere si'a hue̱'ña ja̱ro pa'icohua'i asahuë, yecohua'ipi se quëajëna.

Jesupi Cayaohua'ire Ñama'cohua'ire Jujuse'e

27Ja̱ropi Jesús etani sai maca caya ë̱mëohua'i ñama'cohua'ipi ¡David mamaquë yëquëre oijë̱'ë! ¡Teaye ai yo'oyë! cajë cuijë daë'ë.

28Huë'ena Jesús cacasi maca ñama'cohua'ipi i̱ quë'rona tsio datena, i̱pi se̱ji'i, i̱ohua'ire: “¿Mësaru yë'ëpi necaiquë api ñeje pa'ye cuasaye?”

Caquëna, i̱ohua'ipi cahuë:

“Ja̱je cuasayë, Ëjaë.”

29Cajëna, Jesupi i̱ohua'i ñaco ca̱na patoquë capi:

“Mësaru cuasase'eje̱ nese'e pa'ija̱quë.”

30Ca maca ñacohua'i po̱nëhuë. Po̱nësi maca Jesús ja̱ohua'ire cua̱ñepi, ñeje caquë:

“De'hua yecohua'ire quëaye peoyerepa cu'ijë̱'ë.”

31Ja̱je casiquëta'are coa sa etani quëahuë, si'a huë̱'ña pa'icohua'ire, Jesús i̱ohua'ire jujuse'ere.

Coca Cama'quëre Jujucaiye

32Ñama'cohua'i pa'isicohua'ipi eta maca, Jesús quë'rona dahuë, coca cama'quëre huati quë'ire. 33Dasi maca Jesupi huatire eto saouna, coca cama'quë pa'isiquëpi coca ca huëopi. Ja̱je caquëna, pa̱ipi ñani ai cuasahuë.

34Ja̱je cuasajë fariseo pa̱ipi cahuë:

“Iquë cato huatiohua'i ëjaëpi de'oye sehuojëna, huatire eto saoji.”

Jesús Pa̱ire Oiye

35Pa̱i ñape daripë̱a pa̱i tsi'si huë̱'ña pa'iyena Jesús cu'i ye'yaroja̱ji'i. Maija'quë cua̱ñe te̱'te ayere de'o cocare quëaquë. Cui'ne si'a ju̱'i dahuë jujucai, cui'ne a'si ju̱'ijë ai yo'ocohua'ireje̱ jujucaji'i. 36Yëi ñama i̱ohua'ire ñacaiquëre peocohua'ije̱ pa'iohua'ipi pa̱i maña ai yo'ojë cui'ne co'a ju̱'ijë pa'ijëna, ñani oji'i. 37Ja̱je oi i̱ ye'yacohua'ire capi:

“Nuñerepa jaiye a'ë, tëaye. Ja̱je pa'iquëta'are necohua'ipi a'ri pa̱i pa'iyë. 38Ja̱je pa'ina, Maija'quëni se̱jë'ë, i̱ti tse̱ aquëni, ja̱ëpi i̱ti tëacohua'ire jëjo daoja̱'quëre.”

Currently Selected:

Mateo 9: sey

Highlight

Copy