Lucas 10

Jesupi Setentare Jëjo Saoye

1Ja̱je iye yo'osi jeteyo'je setenta pa'iohua'ini i̱ saija̱'a daripë̱ana du'ru jëjo saopi, cayaohua'ise'ere, i̱pi ñaquë sahuasicohua'ini. 2Jëjo saoquë capi, ja̱ohua'ire:

“Nuñerepa cayë. Tëa ja̱'ñe cato jaiye a'ë. Ja̱je pa'iquëta'are i̱ti necohua'ipi a'ri maña pa'iyë. Ja̱je pa'ina, se̱jë'ë, i̱ti tse̱ aquëni jai pa̱ire jëjo saoja̱quë neja'cohua'ire. 3Ñajë saijë̱'ë. Mësarute jëjo saoyë, yëi ñamaje pa'iohua'ini yaije̱ pa'iohua'i jopona. 4Sama'pë pa'ijë̱'ë, curi topëje̱, ca̱i topëje̱, cui'ne curiquëje̱, cui'ne zapatoje̱, cui'ne ma'aja'a saijë pa̱i pa'icohua'i pa'ito coa sa pëpajë saijë̱'ë, tsoe nëcaja̱ni caye peoye. 5Huë'ena cacacohua'i pani du'ru macarepa ñeje cajë̱'ë: ‘Iye huë'e pa'icohua'ire de'oye pa'iyepi pa'ijë̱'ë.’ 6Ja̱je pëpajëna, ja̱ohua'ipi de'oye pa'iyere oicohua'i pa'ito mësaru pëpase'epi i̱ohua'ini pa'ija̱'coa. De'oye pa'iyere oima'cohua'i pa'ito ja̱ pëpase'epi mësaruna co'i co̱sipi. 7Du'ru pëpasi huë'ena cacani pëani i̱ohua'i a̱oñere a̱ijë cui'ne u̱cujë pa'ijë̱'ë. Co'amaña necohua'ire sëte i̱ohua'ipi sa̱iñeje pa'ye co̱caiyepi pa'ijë̱'ë. Ja̱je pa'ina, huë̱'ña ñape cu'ima'pë pa'ijë̱'ë.

8Pa̱i daripëna ti̱'arena, ja̱ro aquëpi i̱ huë'ena pëpasiquëpi a̱ore a̱oto a̱ijë'ë. 9Ja̱rore ju̱'icohua'i pa'ito jujucaijë̱'ë. Cui'ne quëajë̱'ë, Maija'quë cua̱ñe te̱'tena mësarupi po̱nëñe ja'yere pa'iji cajë. 10Ja̱je pa'iquëta'are yequë hue̱'ña daripë pa'icohua'ipi mësarute coeto i̱ti daripë ma'añana etani cajë̱'ë: 11‘Mësaru daripë ya'opi yëquë quë̱ona së'ase'ere ti̱'to to̱ñë, mësaru asaye yëma'pë pa'i do'ire i̱ñojë.’ De'hua cuasajë̱'ë, iyere, Maija'quë pa'i te̱'tena ja'yere pa'iji, mësarute. 12Mësarute cayë, pa̱i ñape yo'ose'e ne de'hua mu'se ti̱'asi maca ja̱ohua'i co'aye yo'ose'e sa̱iñe pasipi. Sodoma daripë acohua'ire yo'ose'e jerepa co'ayepi.

Sehuoma'cohua'i

(Mt 11.20-24)

13Teayerepa më'ë Corazín daripë maca cui'ne Betsaida daripë. Jaiye pa̱i yo'o ti̱'a ma'ñere yo'otoje̱ coa ñahuë, më'ë. Ja̱ro yo'ose'eje̱ pa'ye Tirona cui'ne Sidón daripëna yo'oquëna, ñasicohua'i pani tsoe otira'huë. I̱ohua'i co'ayere cuasajë ai ju'i ca̱re su̱ñani hua̱tapi jorëjë ai oiyere i̱ñora'huë. 14Ja̱je pa'iquëta'are pa̱i ñape yo'ose'e mu'se ti̱'asi maca mësarupi ai jerepa co'aye yo'osi do'ire sa̱i cua̱ñoñe pa'iji. Tiro cui'ne Sidón daripë̱a pa'icohua'i se̱ña maca. 15Cui'ne mësaru Capernaum daripë pa'icohua'i yëquëpi ai jerepa tëto saisicohua'i a'ë ma'tëmo quë'rore pana cuasayë, mësaru. Pa̱ni mësaru cato coa ai jerepa huë'ehuëre pana caje huesëja̱'cohua'i a'ë, toa yejana.

16Mësaru cayere asacohua'i pani yë'ëni asaja̱'cohua'i a'ë, cui'ne mësaruni coecohua'i pani yë'ëni coeja̱'cohua'i a'ë, cui'ne yë'ëni coecohua'i pani yë'ëre jëjo daosiquëni coeyë.”

Setenta Jëjo Saosicohua'ipi Co'iye

17Ja̱ohua'i setenta pa'iohua'i ai sihuayë. Co'ini cahuë:

“Ëjaë, huatiohua'ique yëquë më'ë mamire cajëna, asajë ca'rajë etahuë.”

18Jesupi capi, ja̱ohua'ire:

“Ja̱je pa'ijë̱'ë. Yë'ëje̱ ñahuë, huati ëjaëpi ma'tëmopi mujuë ye'hueyeje̱ pa'yerepa to̱mequëna. 19Yë'ëpi mësarute tutu i̱sihuë, a̱ñare, pu̱nire tsa'cujëna, ti a'si neñe peo ja̱'ñere. Cui'ne maire sa̱ñope yo'oquë tutu jerepa i̱sihuë, quëcoja̱'cohua'ire caquë. 20Ja̱je pa'iquëta'are sihuama'pë pa'ijë̱'ë, huatiohua'i mësarute sehuoyere. Coa ai jerepa mësaru mami ma'tëmore toyase'e pa'iyere sihuajë̱'ë.”

Jesús Sihuaye

(Mt 11.25-27; 13.16-17)

21Ja̱ maca Jesús Maija'quë joyopi i̱ ja̱'re pa'iye sëte ai sihuaquë capi:

“Sihuayë, Ja'quë më'ëre ma'tëmo cui'ne yeja Ëjaëre. Më'ëpi iyere i̱ñohuë, tsi̱je pa'iohua'ina më'ëpi ta̱'ñe cuasajë pa'icohua'ire cui'ne ai asacohua'ire yahuese'ere. Ja̱je ti̱'api, më'ë yëyeje̱.”

22Yë'ë ja'quëpi si'a co'amaña yë'ëna i̱sipi. Maija'quë mamaquë api cajë pa̱i ñañe pa̱ñë. Coa ja'quëse'e asaji, i̱ mamaquëre. Ja'quëreje̱ pa̱i ñañe pa̱ñë. Coa mamaquëse'e asaji, i̱te. Ja̱je asaquë i̱ mamaquëpi i̱ yëcohua'ina i̱ñocohua'ise'e asayë, i̱ pa'iye. 23Ja̱ maca i̱ ye'yacohua'ise'ere capi:

“Mësaru ñañeje ñacohua'ipi sihuacohua'i a'ë. 24Ja̱je pa'ina, cayë, mësarute. Jai pa̱i Maija'quë yo'o ja̱'ñere quëacaicohua'i cui'ne pa̱i ëjaohua'i mësaru ñañeje pa'ye ñañe yëhuë. Ja̱je yëjëta'a ñama'pë paë'ë. Cui'ne asaye yëhuë, mësaru asayeje̱ pa'yere. Ja̱je yëjëta'a asaye pa̱huë.”

De'oquërepa Samaria Aquëpi

25Ja̱ maca cua̱ñese'e ye'yaquëpi huëni Jesús quë'rona i̱ ja̱'re coca caquë, neñasi'i cuasaquë sani se̱ji'i:

“¿Ye'yaquë, me neja'quë a'ni, ti pa'iye ti̱'añe cani?”

26Jesupi sehuopi:

“¿I̱ti cua̱ñese'ere ñato me pa'iquë'ni, më'ëpi asato?”

27Caquëna, cua̱ñese'e ye'yaquëpi sehuopi:

“Oijë̱'ë, më'ë Ëjaë Diusure si'a më'ë yëyepi, si'a më'ë joyo, si'a më'ë tutu, cui'ne si'a më'ë cuasaye. Cui'ne oijë̱'ë, më'ë quë̱no maca aquëre më'ëja'a co'ye oiyeje̱ pa'ye.”

28Caquëna, ja̱ maca Jesupi capi:

“I̱te de'oyerepa sehuohuë, më'ë. Ja̱je më'ë yo'oquë pani, ti pa'iye ti̱'aja'quë a'ë.”

29Ja̱je caquëna, cua̱ñese'e ye'yaquëpi de'oye yo'oquë a'ë caquë Jesure i̱ñosi'i caquë sa̱ñope se̱ji'i:

“¿Ja̱je pa'ito ne a'ni, yë'ë quë̱no maca pa'iquë?”

30Caquëna, Jesupi sehuopi i̱te:

“Te'i pa̱i Jerusalénpi ma'aja'a Jericóna meji'i. Meina, co'amaña ñacohua'ipi tse̱ani si'aye i̱ paye cui'ne i̱ ju'i ca̱je jiohuë. Ai të'carena, ju̱'ise'eje̱ pa'i u̱ina, je̱oni saë'ë. 31Cui'na ma'aja'a judío Maija'quë huë'ere ñacaiquë saiquëpi ma'are u̱ina, ñani coa ñaquë sa saji'i. 32Cui'ne i̱ti ma'aja'a levita sai coa ñani saji'i. 33Ja̱je sai sitore Samaria pa̱i coecohua'i aquëpi cui'ne ma'aja'a sai teaye ñani. 34Ja̱ maca tsioja̱ni a'sire hui'yape ocopi cui'ne o'sayepi tsoani ca̱ñapi hue̱ni jujupi. Jeteyo'je i̱ caballona tëoni sapi, saicohua'i pëa huë'ena. 35Se ñatasi mu'se Samaria aquëpi sai huëoni caya curiquë të̱'ña i̱sipi, i̱ti huë'e aquëre. I̱siquë capi: ‘De'hua ñacaijë̱'ë, iquëre. Më'ëpi ai jerepa i̱ do'ire necaisiquë pa'itoje̱ yë'ëpi sa̱isi'i cui'naëpi co'i co̱si maca.’ 36De'oji. Ja̱je pa'ito: ¿Toaso̱cohua'i aquë jequë paquë'ni, ñaohua'i huani o̱ani saisiquë quë̱no maca aquë i̱te oisiquë, më'ëpi cuasato?”

37Caquëna, cua̱ñese'e ye'yaquëpi capi:

“I̱te ñani oi necaisiquë api cuasayë.”

Caquëna, ja̱ maca Jesupi capi, i̱te:

“Më'ëje cui'ne sani yo'oquë pa'ijë̱'ë.”

Jesupi Marta Cui'ne María Huë'ere Pa'iye

38Jesús ma'aja'a saiquëpi ti̱'api, a'ri daripëna. Ja̱rote cui'ne paco'ë, Marta hue'ecopi. Ja̱opi i̱o huë'ena pëpao, i̱te, cui'ne i̱ ye'yacohua'ije̱. 39Cui'ne paco'ë, Marta yo'jeo María hue'ecoje̱. Ja̱opi Jesús quë̱o yë'quë macana ja'runi ñu'io asao, i̱ cayere. 40Asacona, Martapi jaiye huë'e co'amaña neñe pa'ina, ñani ai cuasa huesëco Jesús quë'rona tsio dani cao:

“¿Ëjaë, yë'ëse'e necona, yë'ë yo'jeo coa ñu'ico ñaquë, më'ë? Ja̱je pa'ina, cayë i̱ote cajë̱'ë, yë'ëre sani co̱caija̱'co.”

41Ja̱je cacona, Jesupi sehuopi:

“Marta, Marta më'ë jaiye neñere co'a ju̱'io, cui'ne ai cuasaco. 42Ja̱je pa'iquëta'are te'o pa'iji nuñerepa co̱caiye. Ja̱re María ti̱'ao, yecohua'ije̱ jioye ti peoyere.”

Currently Selected:

Lucas 10: sey

Highlight

Copy