SAN LUCAS 20

Nga chjaningiyare Jesús ꞌyá xi kitsjare kjuaꞌñu

Mt. 21:23-27; Mr. 11:27-33

1Jngu nixtjin yejerañu Jesús tibakuya ña ma ndetsinre ningu ꞌba titsikjaꞌaxtiuyare xuta en ndare Naꞌenchana, kitsitiñatꞌare xi ngakure naꞌmiu ko chjine kjuatexuma ꞌba ko xuta chingare naxinando, 2ꞌba kitsure:

—ꞌBa tꞌinnii̱. ¿Mé= kjuaꞌñu xi tjinri nga ꞌbi teñeꞌen? ꞌBa ¿ꞌyá xi kitsjari kjuaꞌñu nga ma ꞌbi teñeꞌen?

3ꞌBa Jesús kitsingojore:

—ꞌBa nde an skuiningiya_nuu̱ jngu tsajmi. ꞌBa tingojonu. 4¿ꞌYá= xi kitsikasen Juan Bautista nga jaꞌekatenda, a Naꞌenchana, asa xuta=?

5ꞌBa nchjabiu jonijmiko xinkjin nga ꞌbi kitsu:

—Tsa kuixan nga Naꞌenchana kitsikasen, kui kuetsu=na: “Ngu, ¿ánñu bi kuakjainninu mé= xi kitsu Juan?” 6ꞌBa tsa kuixan nga xuta kitsikasen, ngu ngatsiꞌi xuta kueꞌena ndiojo nga sikꞌenna, ngatꞌa makjainre nga Juan jngu profeta kuán.

7ꞌBa ꞌbitsaꞌen kitsingojore Jesús:

—Bi ꞌyee̱ ꞌyá= xi kitsikasen.

8ꞌBa ꞌbatsaꞌen Jesús kitsu nganire:

—ꞌBa ninga an bi ꞌba xin_nuu̱ mé kjuaꞌñu xi tjinna̱ nga ꞌbi tsaꞌaa̱n.

Nga Jesús ꞌbejña kjuakusun ngatꞌa tseꞌe nchja chꞌokun xi tsaꞌexako uva

Mt. 21:33-44; Mr. 12:1-11

9ꞌBa Jesús ꞌetutsꞌinre nga ꞌejñare jngu kjuakusun xutankjiun, ꞌba kitsu:

—Jngu xuta ꞌentje uva. ꞌBa kitsikeyare nangiu nchja xi mare tsaꞌexako uva ꞌba kui kjin kiji, ꞌba ꞌñu tsé tsꞌandayare. 10ꞌBa kionga echu chanre tu, xi naire nangiu kitsikasen jngu chuꞌndare, tuxi kuekiꞌanire nchjabiu nga sjare tu xi ꞌbakore. Tunga nchjabiu yeꞌere chuꞌndabiu ꞌba tu tjejen ntsja nga kitsikasen. 11ꞌBa kio xi naire nangiu kitsikasen ngani ngijngu chuꞌndare; tunga nchjabiu ꞌba nde yeꞌe nganire chuꞌndabiu, ꞌba chꞌo kitsiko ꞌba tu tjejen ntsja nga kitsikasen. 12ꞌBa xi naire nangiu kitsikasen ngani ngijngu chuꞌndare, tunga nchjabiu ꞌba nde kitsiꞌon nganire chuꞌndabiu ꞌba tsꞌaxje.

13’Tuchan xi naire nangiu ꞌbi kitsu: “¿Mé= xi saꞌaa̱n? Tusa sikasia̱n kiꞌndi xi ꞌñu tjona̱. ꞌBa ku̱an kionga nchjabiu skue kiꞌndina̱, skuekun.” 14Tunga kionga nchjabiu tsabe nga titsitiñatꞌare kiꞌndire xi naire nangiu, ꞌbi kitsure xinkjin: “Kui=bi xi xuntsja yeje xi tjinre naꞌenre. Tusa sikꞌian, tuxi tsajan ku̱anni mé= xi xuntsja.” 15ꞌBa meni nchjabiu kikotꞌaxin ngaꞌnde ña tjintje uva kiꞌndire xi naire nangiu ꞌba kitsikꞌen.

’ꞌBa mani, xi naire nangiu, ¿Mé= xi siko nchjabiu? 16Ngu kjuaꞌetsikjesun nchjabiu ꞌba kjaꞌe xuta sikeya nganire ngaꞌnde ña tjintje uva —kitsu Jesús.

ꞌBa kionga xuta xi inya kio kjintꞌe kibi, kitsu:

—¡Niñajanni ꞌba ngatjama!

17Tunga Jesús kiskutsejenꞌa nchjabiu ꞌba kitsure:

—Ngu, ¿jó tsunire en xi kuaꞌindutꞌa enre Naꞌenchana? Ngatꞌa ꞌbitsaꞌen kuaꞌindutꞌa: “Ndiojo xi nchja chjine xjo tsꞌaxjengi, kui= xi je kuánni ndiojo titjun.” 18ꞌBa tuꞌyañu xi skasun ndiojobiu, niki ku̱axkua. ꞌBa xi kuijennere ndiojobiu, niki ku̱axi —kitsu Jesús.

Nga Jesús bakuya ngatꞌa tseꞌe kjuaꞌbechjintjai

Mt. 21:45-46; 22:15-22; Mr. 12:12-17

19ꞌBa ndekuini chubabiu xi ngakure naꞌmiu ꞌba ko chjine kjuatexuma kuamejénre kitsuba Jesús, ngatꞌa be= nga Jesús ꞌejña kjuakusunbi ngatꞌa tseꞌe kui, tunga kitsakjunke xutankjiun. 20ꞌBa kjinikasen ña tijña Jesús yakꞌa nchja, tuxi kiskutsejenꞌmonire. Kui xi kitsimaña yojore nga nda xuta kitsu, tuxi saꞌenni nga Jesús kuetsu jngu en xi bi ꞌba tjin, ꞌba ꞌbatsaꞌen ku̱an singantsjare gobernador tseꞌe Roma. 21ꞌBa kui nchjabiu kitsure:

—Maestru, ꞌya=ni ji̱n nga kjuakixi= xi sji ko xi bakuye ꞌba nga bi kabi ñeꞌen kjua xuta. Tusa ko kjuakixi bakuye ndiyare Naꞌenchana. 22¿A tixaꞌnde asa bi tixaꞌnde nga kꞌuechjintjai_ra ña xuta ngakure Romano? ¿A kꞌuechji=ña, asa bi kꞌuechja?

23Tunga Jesús be= kjuamañare nchjabiu, ꞌba kitsure:

24—Takunu jngu ton denario. ¿ꞌYá= tseꞌe isen xi kjitꞌa ngaꞌe, ꞌba ꞌyá= tseꞌe jaꞌen xi kuaꞌindutꞌa tonbi?

ꞌBa nchjabiu kitsingojo:

—Tseꞌe xuta titjun César.

25ꞌBa Jesús kitsure:

—Ngu, taꞌe_ru César mé= xi kui tseꞌe, ꞌba taꞌe_ru Naꞌenchana mé= xi tseꞌe kui.

26ꞌBa nchjabiu bi kuán kitsaꞌen nga Jesús kuetsu jngu en xi bi ꞌba tjin ngixkun xutankjiun. Tusa kuakunre en xi kitsingojo Jesús ꞌba xiu tsikꞌendu.

Nga Jesús bakuya nga kjuaꞌaya nganire xuta

Mt. 22:23-33; Mr. 12:18-27

27ꞌBa kio yakꞌa nchja saduceo jaꞌekun Jesús. Kui nchjabiu tsu nga mikꞌen bi nde faꞌayanire; ꞌba jaꞌekiningiyare Jesús, ꞌba kitsure:

28—Maestru, ꞌbitsaꞌen kitsiꞌindu xujunna Moisés: “Tsa jngu xiꞌin xi je tsixanko chjun kueya, ꞌba tsa bi kisꞌekore kiꞌndi, jngu ntsꞌe xuta xi kꞌion kuixanko ngani chjun kꞌanbiu tuxi sjanire kiꞌndi ntsꞌe xi kꞌion.” 29Ngu, tsikꞌendu yatu nchja xi ntsꞌe mani. Xi matitjun tsixan; tunga kꞌen, ꞌba bi kisꞌere kiꞌndi. 30ꞌBa chjunbiu tsixanko ngani xi majóni, xi ꞌba nde kꞌen, ꞌba bi kisꞌere kiꞌndi ngayeje. 31ꞌBa chjunbiu tsixanko ngani xi majánni ngayeje, ꞌba ꞌba kitsaꞌen ngatsiꞌi xi yakꞌa. Ngayatu jesun, ꞌba bi kisꞌere kiꞌndi. 32ꞌBa jaskan ꞌba nde kꞌen chjunbiu ngayeje. 33ꞌBamani, nixtjin nga kjuaꞌaya nganire xuta ngajinre mikꞌen, ¿ꞌyá= tseꞌe ku̱an chjunbi? Ngatꞌa ngayatu tsixanko.

34ꞌBa Jesús kitsure:

—Xuta xi tjin nixtjin ngandaꞌe bixan ꞌba tsikixan kiꞌndire. 35Tunga xuta xi Naꞌenchana saꞌenre kjua nga ꞌbakore nga kꞌuendukun nixtjin xi saꞌe ndiba, xi kjuaꞌaya nganire ngajinre mikꞌen, kui= xi bi nde kuixanni ꞌba bi nde sikixanni kiꞌndire, 36ngatꞌa bi nde ku̱an kueyani. Tusa kꞌuendu jotsaꞌen tjindu ankjele, ꞌba kiꞌndire Naꞌenchana ku̱an, ngatꞌa jaꞌaya nganire ngajinre mikꞌen. 37Tunga ngatꞌa tseꞌe nga kjuaꞌaya nganire xuta, kaꞌnda Moisés ꞌba nde ꞌejñatsejen nga kjuaꞌaya nganire xuta ngajinre mikꞌen, kionga kitsiꞌindu ngatꞌa tseꞌe ya naꞌya xi titijin ndiꞌi. Ngatꞌa ꞌbitsaꞌen kitsure Naꞌenchana: “Naꞌenre Abraham ko Naꞌenre Isaac ꞌba ko Naꞌenre Jacob.” 38ꞌBa Naꞌenchana bi naꞌenre mikꞌen kuán, tu tseꞌe sani xi tjindukun. Ngatꞌa ngixkun Naꞌenchana tjindukun= ngatsiꞌi xuta.

39ꞌBa kio yakꞌa chjine kjuatexuma kitsu:

—ꞌBa= tjin mé= xi sji, maestru.

40ꞌBa bi nde mani kakun nga miningiya ngisare Jesús.

Nga Jesús miningiya ꞌyá ntje ndibanire Cristo

Mt. 22:41–23:36; Mr. 12:35-40; Lc. 11:37-54

41ꞌBa ꞌbatsaꞌen Jesús tsiningiyare:

—¿Ánñu tsuni xuta nga ntjere David ndibani Cristo? 42Ngatꞌa ndekuini David ꞌbitsaꞌen kitsiꞌindutꞌa xujun Salmos:

Naꞌenchana kitsure Xuta chingana̱:

“Teni ngate kixina̱

43kaꞌnda nga̱ xi stikeri ngi ndsakui sikꞌendaa̱.”

44Ngu, ¿jótsaꞌen Cristo ntjere David kjuendibani, nga ndekuini David “Xuta chingana̱” tsure?

45ꞌBa yejerañu ngatsiꞌi xuta inyaminya ñojon, Jesús jako xutare, ꞌba kitsure:

46—Tikuendo yojonu ngatꞌa tseꞌe chjine kjuatexuma. Ngu, matsjare ꞌbetsuma nga baja najñu nduju ꞌba matsjare nga ko ꞌñu tsé kjuaxuta nikjaꞌayare ngajin ndetsin. ꞌBa matsjare nga ꞌbendusun yaxile xi tjun inya niꞌya sinagoga ꞌba ngaꞌnde xi ngisa nda kjaꞌajin nga jngu sꞌi. 47ꞌBa kui xi kjaꞌare niꞌyare yanchjin kꞌan, ꞌba saꞌe ꞌñu tsé fako Naꞌenchana meni xuta xi kjaꞌere kuetsuni: “Ne nda xuta.” Kui kjuañu xutabiu ne tsé kjuanima kjuaꞌaxtiuni.

Currently Selected:

SAN LUCAS 20: vmy

Highlight

Copy